Nuu binni riree gana purtiʼ qué randa riree ora cayaba nisaguié. Ti joven láʼ Robert guníʼ: «Ora qué randa rireeʼ de ra lidxeʼ qué ridxelaʼ xi guneʼ».

 ¿Ñee huayuni sentirluʼ zacá la? Pa zacá ni, zacané artículo riʼ lii.

•  Ni naquiiñeʼ gánnaluʼ

•  Ni zanda gúniluʼ

•  Ni riníʼ ique xcaadxi joven

•   Qué zanda gacané ca dispositivu electrónicu lii.

   Zándaca chuʼluʼ lu Internet para cadi guireeluʼ gana, peru pa chuʼluʼ luni xadxí la? Zedandá hora jmaruʼ si zareeluʼ gana. Jeremy, ti joven ni napa 21 iza guníʼ: «Ni málasi ora gudiiluʼ cuenta maʼ guíʼdiluʼ lu pantalla ne maʼ cadi caníʼ íqueluʼ gastiʼ».

   Zácaca riníʼ ique ti baʼdudxaapaʼ láʼ Elena. Laa guníʼ: «Zanda gúniluʼ stale cosa lu Internet, peru rixéleluʼ de ca binni ni nuu gaxha de lii. Nga runi, ora gusuiʼluʼ ca dispositivu electrónicu stiluʼ, jmaruʼ si rireeluʼ gana».

•   Zanda gacané actitud stiluʼ lii

   Naquiiñeʼ gúniluʼ xiixa para cadi guireeluʼ gana, peru naquiiñeʼ chuuláʼdxiluʼ ni cayúniluʼ. Guzéʼtenu ti ejemplu, ti baʼdudxaapaʼ láʼ Karen, guníʼ: «Neca nuu ni cayuneʼ ra scuela, peru bireeʼ gana. Napa xidé chuuláʼdxiluʼ ni cayúniluʼ para cadi guireeluʼ gana».

 ¿Nánnaluʼ ndiʼ la? Pa riníʼ íqueluʼ gastiʼ ni gúniluʼ, cadi naquiiñeʼ gucueeza nga lii. Naquiiñeʼ iquiiñeluʼ tiempu ca para gúniluʼ xiixa ni riuuláʼdxiluʼ.

 Bi’ni’ xcaadxi cosa. Biyubi xcaadxi binni gaca xhamíguluʼ. Bi’ni’ xcaadxi cosa ni riuuláʼdxiluʼ, bi’ni’ investigar de xiixa tema. Ti binni ni riuulaʼdxiʼ guni stale cosa, jma nagana guiree gana o cuee gana xcaadxi.

 Ni ná Biblia: «Guiráʼ ni zanda gúniluʼ, bi’ni’ ni né guiráʼ sti pastiluʼ» (Eclesiastés 9:10).

 Melinda guníʼ: «Cadi xadxí bizuluáʼ caziideʼ chino mandarín. Ora runeʼ practicar ni guiráʼ dxi, rudieeʼ cuenta riuuladxeʼ iquiiñeʼ xquendabiaaneʼ para guiziideʼ. Riuuladxeʼ gapaʼ xiixa ni guneʼ. Ne iquiiñeʼ tiempu stinneʼ jneza».

 Guníʼ ique xiñee cayúniluʼ xiixa. Pa guiníʼ íqueluʼ xiñee cayúniluʼ xiixa, jma zuchaluʼ gana gunduuxeluʼ ni. Dede pa cayúniluʼ tarea ni bisaananécabe lii ra scuela. Qué zareeluʼ gana pa guiníʼ íqueluʼ xiñee cayúniluʼ ni.

 Ni ná Biblia: «Ni jma galán para ti hombre nga guiecheʼ pur dxiiñaʼ nadipaʼ ni runi» (Eclesiastés 2:24).

 Hannah guníʼ: «Dxi mayaca gacaʼ graduar, runeʼ estudiar xhono hora guiráʼ dxi, purtiʼ biniteʼ tiempu lu xcaadxi cosa. Qué nireeʼ gana purtiʼ cá iqueʼ gacaʼ graduar. Ne ngue gucané naa».

 Gunna nuu cosa ni qué zanda guchaaluʼ. Dede ca cosa ni jma galán nuu biaje ribee cani gana tuuxa. Zándaca nuu tiru guni cancelar ca xhamíguluʼ lii ne maʼ cadi gúniluʼ gastiʼ. Lugar de chuʼluʼ triste ne guireeluʼ gana la? bi’ni’ stipa guiníʼ íqueluʼ cosa ni gacané lii.

 Ni ná Biblia: «Binni nuu nayecheʼ qué rusaana de guni saa» (Proverbios 15:15).

 Ivy guníʼ: «Ti xhamigaʼ gudxi naa cadi naquiiñeʼ chuaaʼ triste ora guiaanaʼ stubeʼ. Laaca gúdxibe naa guiranu naquiiñeʼ iquiiñenu tiempu stinu para chuʼnu né xcaadxi ne chuʼnu stúbinu».