甘心捨己——馬達加斯加
一個二十幾歲嘅先驅姊妹希爾菲阿娜話：“我聽到一啲朋友分享佢哋喺需求更大地區服務嘅經歷嗰時，我都好想嘗試呢種喜樂嘅滋味。不過我擔心去呢啲地區服務超出我嘅能力限度。”
你係咪同希爾菲阿娜有類似嘅感受？你係咪都渴望喺需要更多王國傳道員嘅地區服務，但係又覺得好難達到呢個目標？如果係噉，請放心！成千上萬嘅弟兄姊妹喺耶和華嘅幫助下，都成功克服障礙，從而擴大傳道服務。耶和華點樣為佢哋打開出路？等我哋一齊探訪世界第四大海島——馬達加斯加。
喺過去嘅十年，超過70位嚟自11個國家 a嘅熱心傳道員同先驅，嚟到非洲呢個反應良好嘅地區服務。當地好多人都尊重聖經。喺呢個廣大嘅地區，好多本地傳道員都願意搬到唔同嘅地方傳講好消息。而家，等我哋嚟認識吓當中嘅一啲弟兄姊妹。
克服恐懼同灰心
珀恩同路易
路易同珀恩呢對三十幾歲嘅夫婦，從法國搬到馬達加斯加。多年來，佢哋都想搬去外國擴大傳道服務，但係珀恩一直都猶豫不決。佢解釋話：“我一直都怕搬去一個陌生嘅地方。我唔捨得離開我嘅屋企人、會衆、房屋、熟悉嘅環境同以往嘅生活習慣。其實，我要克服嘅最大障礙就係自己嘅憂慮。”2012年，珀恩終於下定決心，同路易搬去馬達加斯加。佢點樣睇自己嘅決定？佢話：“諗翻轉頭，我可以話呢個決定强化咗我嘅信心，因為我睇到耶和華點樣喺生活上幫助我哋。”路易補充話：“我哋喺馬達加斯加嘅第一個受難紀念聚會，就有十個聖經學生出席！”
喺遇到難題嘅時候，乜嘢使呢對夫婦有力量繼續留喺自己嘅崗位？佢哋懇切祈求耶和華賜佢哋力量保持忍耐。（腓立比書4:13）路易話：“耶和華真係回應咗我哋嘅禱告，賜平安俾我哋。我哋能够將注意力集中喺傳道嘅喜樂之上。另外，法國嘅一啲朋友通過電郵同書信鼓勵我哋唔好放棄。”（腓立比書4:6,7；哥林多後書4:7）
耶和華因為路易同珀恩所表現嘅忍耐而大大獎賞佢哋。路易話：“2014年10月，我哋喺法國參加咗基督徒夫婦聖經研習班 b。能够參加呢個課程，係耶和華俾我哋一份令人難忘嘅禮物。”畢業嘅時候，佢哋好開心知道自己受委派返去馬達加斯加服務。
“我哋會以你哋為榮！”
納迪娜同迪埃
2010年，一對嚟自法國嘅中年夫婦迪埃同納迪娜搬到馬達加斯加。迪埃話：“我哋年輕嘅時候做過先驅，後來要養育三個仔女。佢哋成年之後，我同太太就考慮能唔能够去國外服務。”納迪娜承認：“一諗到要同仔女分開，我就猶豫不決。但係佢哋同我哋講，‘如果你哋搬去國外需求更大嘅地區服務，我哋都會以你哋為榮！’仔女呢番話鼓勵我哋採取行動。雖然我哋而家同仔女分隔兩地，不過好開心可以經常同佢哋聯繫。”
對迪埃同納迪娜嚟講，學習馬達加斯加語係一個挑戰。納迪娜笑住話：“我哋已經唔係二十幾歲嘅年輕人喇。”噉佢哋點樣做呢？一開始，佢哋先加入法語會衆。之後，當佢哋準備好去學習本地語言嘅時候，就決定搬去馬達加斯加語會衆。納迪娜話：“傳道嘅時候，我哋遇到好多鍾意學習聖經嘅人。佢哋經常都會多謝我哋探訪佢哋。初時，我仲以為自己發緊夢。我真係好鍾意喺呢個地區做先驅。朝早起身嗰時，我同自己講，‘今日可以出傳道，真係太好喇！’”
迪埃諗翻佢初時學馬達加斯加語就笑住話：“有一次，我要主持一個節目，但係弟兄姊妹發表嘅評論我完全聽唔明。我只可以話，‘多謝。’當我多謝咗一位姊妹發表評論之後，坐喺佢後面嘅人都打晒手勢，提示嗰個答案係錯嘅。我馬上請另一位弟兄提供正確嘅答案，我希望佢答啱咗啦。”
佢好樂意接受邀請
蒂埃里同太太納迪亞喺2005年區域大會，睇咗一套名為《追求屬靈目標，榮耀上帝》嘅戲劇。呢套關於提摩太嘅聖經戲劇深深打動佢哋，亦都加强咗佢哋想去需要更多傳道員嘅地區服務呢個願望。蒂埃里話：“戲劇結束後，當大家仲喺度鼓掌嘅時候，我靠埋去太太度問，‘我哋搬去邊度好啊？’太太話佢都諗緊呢個問題。”冇幾耐之後，佢哋一步一步達到目標。納迪亞話：“我哋慢慢減少我哋嘅物品，直到用四個行李箱就可以裝晒所有嘢！”
最左邊：納迪亞同瑪麗-馬德萊娜； 最右邊：蒂埃里
2006年，佢哋嚟到馬達加斯加，開始喺呢度服務。納迪亞話：“見到呢度嘅人對好消息有咁好嘅反應，我哋都好開心。”
不過六年後，呢對夫婦面對一個重大挑戰。納迪亞嘅媽媽瑪麗-馬德萊娜住喺法國，有一次，佢隻手跌斷咗，個頭都受咗傷。呢對夫婦徵求咗媽媽醫生嘅意見之後，就邀請媽媽搬嚟馬達加斯加同佢哋一齊住。雖然媽媽當時已經80歲，佢依然好樂意接受邀請。佢對喺國外居住有乜嘢感覺？媽媽話：“有時適應新環境好唔容易，我知道我能力有限，但仲係可以為會衆作出貢獻。令我最開心嘅係，呢個安排可以使我嘅仔女繼續留喺反應咁好嘅地區傳道。”
“我得到耶和華嘅幫助”
里安納用坦德羅納語發表演講
里安納係一個二十幾歲嘅弟兄，佢喺阿拉奧特拉-曼古羅區長大。呢個係馬達加斯加東部一個土地肥沃嘅地方。佢喺學校嘅成績好優秀，亦都想追求高等教育。不過學習聖經之後，佢就改變咗自己嘅目標。里安納話：“我盡力提早完成中學課程。我向耶和華承諾，‘如果我成功通過大考，就開始做先驅。’”畢業之後，里安納履行佢嘅承諾。佢搬去同一位先驅弟兄一齊住，揾咗份部分時間嘅工作，跟住就開始做先驅。佢話：“呢個係我作過嘅決定當中最好嘅一個。”
不過，里安納嘅親戚唔明白點解佢唔揾一份高收入嘅工作。佢話：“我阿爸、阿叔同姑婆都鼓勵我追求高等教育，但係我唔會俾任何事阻止我繼續做先驅。”之後冇幾耐，里安納好想去需求更大嘅地區服務。點解佢有噉嘅願望？佢話：“有一次，賊仔入咗我哋間屋偷咗我好多嘢。嗰次盜竊案使我諗起耶穌話要為自己喺‘天上積存財寶’。我下定決心要積存屬靈財寶。”（馬太福音6:19,20）佢搬到馬達加斯加最南面，距離之前住嘅地方1300公里（800英里），一個受嚴重乾旱影響嘅地區。安坦德羅伊人係當地嘅原住民。點解里安納要搬去嗰度？
盜竊案發生前一個月，里安納開始同兩個安坦德羅伊男子討論聖經。佢哋講嘅係坦德羅納語。里安納學咗一啲佢哋語言嘅詞句，亦都諗到有好多安坦德羅伊人未接觸過王國信息。佢話：“我向耶和華禱告，祈求佢使我能够搬去講坦德羅納語嘅地區。”
里安納搬咗之後，馬上就遇到一個難題。佢揾唔到工作。一個男子同佢講：“點解你要嚟呢度？呢度嘅人要去你之前住嗰度先揾到工！”兩個星期後，里安納去參加區域大會，當時佢差唔多一分錢都冇，仲諗緊之後點算好。喺大會最後一日，有一個弟兄放咗啲嘢喺里安納嘅衫袋。原來係一筆錢。呢啲錢足够佢支付返去安坦德羅伊嘅交通費，仲可以經營一盤售賣酸奶（乳酪）嘅小生意。里安納話：“喺最適當嘅時候，我得到耶和華嘅幫助。我可以繼續幫助嗰啲未有機會聽過好消息嘅人認識耶和華！”另外，會衆亦都有好多工作要做。里安納跟住話：“每兩個星期我就要講一個公衆演講，耶和華通過佢嘅組織嚟訓練我。”今日，里安納繼續同好多想認識耶和華嘅安坦德羅伊人分享王國信息。
“靠信實嘅上帝而贏得福分”
耶和華向我哋保證，“凡喺地上為自己求福嘅，必靠信實嘅上帝而贏得福分”。（以賽亞書65:16）如果我哋努力克服障礙，擴大傳道服務，就可以得到耶和華所賜嘅福分。文章開頭提到嘅希爾菲阿娜，佢擔心自己冇能力去需求更大嘅地區服務。點解佢會噉諗？佢解釋話：“我隻右腳長過左腳9厘米（3.5英寸）。所以我行路會趌吓趌吓，而且好容易攰。”
喺多娜婷受浸當日，佢同希爾菲阿娜（左）、西維爾·安（右）嘅合照
雖然係噉，希爾菲阿娜喺2014年同佢會衆嘅年輕先驅姊妹西維爾·安一齊搬去離佢哋家鄉85公里（53英里）嘅一個村莊。即使面對種種障礙，希爾菲阿娜嘅願望最終都實現咗，仲得到好大嘅福分！佢話：“喺新地區服務咗只係一年，同我學習嘅一個年輕媽媽多娜婷就喺分區大會受咗浸。”
“我會幫助你”
上帝保證：“我要使你堅强。我一定會幫助你”。（以賽亞書41:10）前往需求更大地區服務嘅人所表達嘅信心證明，如果我哋竭力克服障礙，擴大傳道服務，就可以親自體驗到耶和華向佢僕人所作嘅保證係真實嘅。結果，我哋同耶和華嘅關係會更加親密。無論我哋喺本地抑或喺國外服務，只要我哋甘心捨己，就可以裝備自己喺將來嘅新世界做好上帝所委派嘅工作。就好似迪埃講嘅噉：“前往需求更大嘅地區服務，可以訓練我哋為未來做好準備！”願更多甘心樂意嘅同工盡快開始接受培訓！
