“上帝嘅話語……係有力量嘅”
“上帝嘅話語係活嘅，係有力量嘅”——希伯來書4:12
1．點解我哋確信上帝嘅話語係有力量嘅？（請睇吓課文開頭嘅圖片）
身為耶和華嘅子民，我哋確信上帝話語帶俾人嘅信息“係活嘅，係有力量嘅”。（希伯來書4:12）我哋自己嘅人生就係一個有力嘅證據，證明聖經有力量改變人嘅一生。有啲弟兄姊妹曾經偷過嘢，吸過毒，或者有過性不道德嘅生活。另外有啲人雖然喺呢個制度有名有利，不過佢哋總係會覺得生活有所欠缺。（傳道書2:3-11）好多感到迷惘同絶望嘅人，因為聖經嘅力量而揾到人生嘅意義。你可能讀過《守望台》“聖經真理改變人的一生”嘅專欄文章，好鍾意裏面嘅人物經歷。你可以從中睇出，就算接受真理之後，基督徒都要繼續通過聖經嘅幫助喺屬靈上進步。
2．上帝嘅話語點樣對公元1世紀嘅基督徒發揮作用？
2 今日，有好多人因為學咗聖經而作出好大嘅改變。我哋會唔會因為呢件事而覺得驚訝？當然唔會！公元1世紀嘅受膏基督徒就有過類似嘅經歷。（請讀哥林多前書6:9-11）保羅提出有邊啲行為嘅人唔可以承受上帝嘅王國，之後又話：“你哋有啲人以前都做過噉樣嘅事”。由於有聖靈同聖經嘅幫助，最後佢哋都能够改變過嚟。雖然有啲基督徒已經接受咗真理，但係佢哋仍然要克服嚴重嘅屬靈難題。例如聖經提到，公元1世紀有個受膏基督徒俾會衆開除咗，之後佢作出改變，重新被會衆接納。（哥林多前書5:1-5；哥林多後書2:5-8）見到同工運用上帝嘅話語去面對同克服各種難題，真係俾咗我哋好大嘅鼓勵！
3．喺呢篇課文，我哋會討論乜嘢？
3 上帝嘅話語係一個强而有力嘅工具，所以我哋真係要充分善用。（提摩太後書2:15）喺呢篇課文，我哋會討論吓可以點樣更有效噉發揮上帝話語嘅力量（1）喺生活上；（2）喺傳道工作上；（3）喺台上教導嗰時。噉樣做就可以幫助我哋對仁愛嘅天父表現愛同感激之心，因為佢嘅教導使我哋得益。（以賽亞書48:17）
喺我哋嘅生活上
4．（甲）如果想上帝嘅話語喺我哋身上發揮作用，我哋就要點樣做？（乙）你自己點樣撥出時間研讀聖經？
4 如果想上帝嘅話語喺我哋身上發揮作用，我哋就要撥出時間每日閲讀聖經。（約書亞記1:8）當然，大多數人嘅生活都好忙碌。雖然係噉，我哋都唔應該俾任何事，甚至係一啲必須嘅責任，破壞我哋研讀聖經嘅習慣。（請讀以弗所書5:15,16）耶和華嘅好多子民都用唔同嘅方法喺一日當中盡力揾出時間嚟做個人研讀。佢哋同詩篇執筆者有同樣嘅感覺：“我真係好愛你嘅律法！日夜不停噉沉思。”（詩篇119:97）
5,6．（甲）點解沉思好重要？（乙）我哋可以點樣更有效噉沉思？（丙）你自己點樣從研讀同沉思上帝嘅話語得益？
5 除咗閲讀聖經之外，我哋都要沉思讀過嘅内容。（詩篇1:1-3）我哋噉樣做，先至可以將呢啲實用又唔會過時嘅智慧喺生活上應用出嚟。無論我哋讀嘅係印刷版定係電子版聖經，目標都應該係，將聖經嘅内容深深刻喺我哋嘅心上。
6 點樣沉思先至係有效嘅？好多人讀完一段經文之後就會停落嚟，諗吓以下嘅問題：“我從呢段經文睇出耶和華係一位點樣嘅上帝？呢段經文嘅邊啲原則我已經應用喺生活上？仲有邊啲方面我需要改善？”我哋禱告，而且沉思上帝嘅話語，就會受到推動將所讀嘅更充分噉應用出嚟。噉樣做，我哋就可以喺自己嘅生活上大大發揮上帝話語嘅力量。（哥林多後書10:4,5）
喺傳道工作上
7．點解喺傳道工作上我哋應該善用上帝嘅話語？
7 喺傳道嘅時候，乜嘢能够幫助我哋善用上帝嘅話語？其中一個方法就係，喺傳道同教導嘅時候經常使用聖經。一個弟兄話：“如果你同耶和華一齊逐家逐户傳道，向住户分享好消息，你會自己一個人講晒，定係會請耶和華嚟講？”呢個弟兄嘅意思係，我哋傳道嗰時直接讀出經文，就係俾耶和華同住户交談嘞。一節適當嘅經文比我哋講嘅任何嘢都更加有力。（帖撒羅尼迦前書2:13）請問吓自己：“我有冇利用每個機會同人分享上帝嘅話語呢？”
8．喺傳道嘅時候，除咗讀出經文，我哋仲需要點做？
8 當然，只係向人讀出經文係唔够嘅。點解呢？因為好多人對聖經嘅認識唔多，甚至完全冇概念。公元1世紀係噉，今日亦都係噉。（羅馬書10:2）所以我哋唔應該認為，只係聽我哋讀出經文，住户就會理解經文嘅意思。我哋需要花啲時間分析經文嘅唔同部分，重複讀出一啲關鍵詞，然後解釋經文嘅意思。噉樣做就可以善用上帝嘅話語打動聽者嘅心。（請讀路加福音24:32）
9．我哋用乜嘢方法嚟介紹經文，就會使住户更加尊重聖經？請舉例。
9 我哋有技巧噉介紹經文，就會使住户更加尊重聖經。例如，我哋可以話：“等我哋睇吓造物主對呢件事有咩睇法。”如果對方冇基督教背景，我哋可以話：“請你留意呢本世界名著點講。”又或者傳道對象對宗教信仰冇興趣，我哋可以問：“你有冇聽過呢句俗語？”冇錯，我哋要先考慮住户嘅個别情況，然後按佢哋嘅需要運用唔同嘅介紹詞。（哥林多前書9:22,23）
10．（甲）請講吓一位弟兄嘅傳道經歷。（乙）你喺傳道工作上點樣睇出上帝嘅話語係有力量嘅？
10 好多人發現，喺傳道嘅時候使用上帝嘅話語能够對住户産生深刻嘅影響。請睇吓一個例子。一個弟兄續訪一位讀咗我哋雜誌好多年嘅老人家。弟兄唔單止留低最新嘅守望台雜誌，仲喺文章入面揀咗一節經文讀出嚟。佢翻開聖經，讀出哥林多後書1:3,4：“佢係慈悲嘅父親，亦係賜一切安慰嘅上帝。我哋遭遇各樣患難嘅時候，上帝都安慰我哋”。老人家俾呢段經文深深打動，佢叫弟兄再讀多一次。呢位老人家表示佢同太太都好需要安慰，佢亦都開始對聖經嘅信息産生興趣。你同唔同意，喺傳道嘅時候運用上帝嘅話語的確可以發揮强大嘅力量呢？（使徒行傳19:20）
喺台上教導嗰時
11．喺台上教導嘅弟兄有責任點樣做？
11 我哋所有人都好鍾意參加基督徒聚會、分區大會同區域大會。呢啲聚會係崇拜嘅一個重要部分。喺聚會得到嘅屬靈指引亦都俾咗我哋好大嘅益處。弟兄有機會喺呢啲場合發表演講係一個好大嘅殊榮。同時，佢哋應該睇出自己責任重大。（雅各書3:1）佢哋需要確保所教嘅完全基於上帝嘅話語。如果你受到委派喺台上教導，你可以點樣喺自己嘅節目當中發揮聖經嘅力量呢？
12．台上嘅講者可以點樣確保經文係演講嘅主幹？
12 要確保經文係你演講嘅主幹。（約翰福音7:16）呢個牽涉到乜嘢？首先，你喺演講嗰陣唔好俾一啲經歷、比喻，又或者你個人嘅表達方式，分散聽衆對經文嘅注意力。其次要記住，讀出好多經文，唔等於就係用聖經嚟教導。其實，使用太多經文，到頭嚟聽衆可能連一節經文都記唔住。所以，你要謹慎選擇嗰啲主要嘅經文，然後用充足嘅時間朗讀、解釋同舉例説明，仲要指出點樣應用經文所藴含嘅原則。（尼希米記8:8）如果演講以組織提供嘅大綱為基礎，就要先研究大綱嘅參考資料同相關經文，再搞清楚參考經文同大綱要點之間嘅關係，然後用已經揀好嘅經文將大綱嘅要點發揮出嚟。（你可以喺《神聖教育使你得益——傳道訓練班課本》第21至23課揾到實用嘅建議。）最重要嘅係，要禱告求耶和華幫你將聖經嘅寶貴真理表達出嚟。（請讀以斯拉記7:10；箴言3:13,14）
13．（甲）一個姊妹點樣深受聚會嗰時聽到嘅經文所打動？（乙）你點樣從聚會嘅聖經教導得益？
13 一個住喺澳大利亞嘅姊妹，深受聚會嗰時聽到嘅經文所打動。雖然佢有悲慘嘅童年，但仲係響應真理，將自己嘅一生獻俾耶和華。即使係噉，佢始終好難接受耶和華對佢嘅愛。乜嘢改變咗佢嘅諗法呢？一個轉捩點就係，佢將聚會嗰陣聽到嘅一節經文同其他經文聯繫埋一齊沉思。慢慢，佢就相信上帝係愛佢嘅。 a你有冇試過喺聚會或者大會嗰時俾上帝嘅話語打動呢？（尼希米記8:12）
14．點樣表明我哋珍視上帝嘅話語？
14 我哋真係好感激耶和華賜俾我哋聖經！佢唔單止仁愛噉將聖經提供俾人類，仲實現自己嘅應許，使聖經得以保存落嚟。（彼得前書1:24,25）所以，我哋應該經常閲讀上帝嘅話語，將聖經嘅原則應用喺生活上，亦都要用聖經幫助其他人。噉樣做，就表明我哋珍視聖經嘅寶貴價值，更重要嘅係，表明我哋愛聖經嘅作者耶和華上帝。
