歲月留痕
“下次大會係幾時啊？”
呢件事發生喺1932年嘅墨西哥城。一個星期之前，喺呢個人口超過一百萬嘅繁忙城市，啱啱出現咗第一盞交通燈。不過而家，呢個已經唔算乜嘢新聞嘞。城市記者關注嘅係另一個新聞。佢哋喺火車站，準備好攝影機，等待緊一位特别客人嘅到來。呢位客人就係當時守望台社嘅社長約瑟夫·盧述福。盧述福弟兄嚟墨西哥城參加一個為期三日嘅全國大會，當地嘅見證人亦都在場熱烈歡迎佢。
《黃金時代》描述話:“呢次大會將會成為墨西哥屬靈歷史上嘅一個重大事件，表明真理嘅步伐喺墨西哥繼續向前邁進。”但乜嘢令呢個只有150人參加嘅大會咁值得人注意呢？
喺呢件事發生之前，墨西哥嘅王國果實只有好少嘅收成。雖然從1919年開始，墨西哥都有舉辦小型大會，不過會衆數目就一直喺度減少。1929年，喺墨西哥城設立咗分部辦事處，為當地嘅屬靈發展帶嚟咗希望。但係，事情發展並唔順利。當組織指示話傳道工作唔應該涉及商業活動嗰時，一個派書者（而家叫先驅）對呢個調整好不滿，於是離開組織，成立自己嘅聖經研究小組。同時，分社監督（而家叫分部監督）因為做咗啲違反聖經原則嘅事而被撤換。墨西哥忠貞嘅見證人真係好需要得到鼓勵。
喺探訪期間，盧述福弟兄發表咗兩個振奮人心嘅大會演講，同五個有力嘅電台演講，激勵咗忠心嘅弟兄姊妹。呢個係墨西哥廣播電台首次向全國播放王國嘅好消息。大會之後，新委任嘅分社監督將傳道工作組織起嚟。熱心嘅見證人得到耶和華嘅祝福，重新得力，向前邁進。
1941年墨西哥城嘅大會
下一年，喺墨西哥全國，除咗墨西哥城嘅大會之外，喺韋拉克魯斯又舉辦多一個大會。因為弟兄姊妹努力傳道，田地開始有好嘅收成。1931年，墨西哥只有82個傳道員。10年之後，傳道員嘅數目就增加咗10倍！墨西哥城1941年神治大會嘅出席人數，就有成1000人。
“全城入侵”
1943年，耶和華見證人掛住標語牌（三文治牌），宣傳一個會喺墨西哥12個城市舉行，主題為“自由嘅國家”嘅神治大會。 * 佢哋將標語牌掛喺膊頭，身體嘅前後各有一塊，睇起嚟就好似三文治噉。自從1936年以來，見證人就開始用呢種宣傳方式作見證。
一張1944年嘅剪報，報道咗墨西哥城嘅“三文治牌”遊行
關於墨西哥城嘅標語牌遊行，《民族》雜誌話:“喺［大會］嘅第一日，［見證人］受到鼓勵邀請更多人參加大會。結果第二日，會場就坐滿晒人。”天主教會見到見證人嘅遊行帶嚟咁大嘅影響就好唔開心，於是發起攻擊，對付見證人。即使受到反對，弟兄姊妹依然勇敢無懼，繼續喺街上傳道。《民族》又報道話:“全城人都見到佢哋……有男有女，個個都變成咗‘三文治’宣傳牌。”文章仲刊登咗一張弟兄喺墨西哥城街上遊行嘅相。呢張相下面有個説明，寫住“全城入侵”。
“呢啲床舒服過水泥地”
喺嗰段歲月，大部分見證人都要作出好大嘅犧牲先至可以參加墨西哥舉行嘅大會。好多參加大會嘅人都嚟自冇火車，甚至連路都冇嘅偏遠鄉村。有個會衆話:“我哋附近咩線都冇，淨係得條電報線。”所以，參加大會嘅人有啲騎騾，有啲行路，要用好幾日嘅時間到達火車站，仲要再坐火車，先至去到舉行大會嘅城市。
大部分見證人都好窮，甚至去大會嘅單程路費都幾乎俾唔起。到達之後，有啲人住喺王國聚會所，好多人就住喺弟兄姊妹屋企。當地嘅見證人都好樂意開放自己屋企，接待嚟參加大會嘅同工。有一次，有90個出席大會嘅人住喺分部。分部向佢哋每個人都提供一張“用20箱書拼成嘅床”。年鑑嘅記載話，呢啲客人好感激分部提供嘅住宿，話:“呢啲床舒服過水泥地。”
毫無疑問，對呢啲充滿感激之情嘅見證人嚟講，可以喺基督徒大會同弟兄姊妹歡聚一堂，一切犧牲都係值得嘅。今日，墨西哥嘅傳道員數目已經穩步上升到接近一百萬，當地嘅弟兄姊妹始終有感恩嘅態度。 * 墨西哥分部喺1949年嘅報告評論到呢啲弟兄話:“喺咁艱難嘅時期，佢哋對真理嘅熱情都冇減少。每次大會結束咗好長時間之後，佢哋都仲會經常討論大會嘅内容，而且會一直問:‘下次大會係幾時啊？’”呢份報告講出咗今日弟兄姊妹嘅感受。——中美洲分部檔案室
