甘心舍己——马达加斯加
一个二十几岁嘅先驱姊妹希尔菲阿娜话：“我听到一啲朋友分享佢哋喺需求更大地区服务嘅经历嗰时，我都好想尝试呢种喜乐嘅滋味。不过我担心去呢啲地区服务超出我嘅能力限度。”
你系咪同希尔菲阿娜有类似嘅感受？你系咪都渴望喺需要更多王国传道员嘅地区服务，但系又觉得好难达到呢个目标？如果系噉，请放心！成千上万嘅弟兄姊妹喺耶和华嘅帮助下，都成功克服障碍，从而扩大传道服务。耶和华点样为佢哋打开出路？等我哋一齐探访世界第四大海岛——马达加斯加。
喺过去嘅十年，超过70位嚟自11个国家 a嘅热心传道员同先驱，嚟到非洲呢个反应良好嘅地区服务。当地好多人都尊重圣经。喺呢个广大嘅地区，好多本地传道员都愿意搬到唔同嘅地方传讲好消息。而家，等我哋嚟认识吓当中嘅一啲弟兄姊妹。
克服恐惧同灰心
珀恩同路易
路易同珀恩呢对三十几岁嘅夫妇，从法国搬到马达加斯加。多年来，佢哋都想搬去外国扩大传道服务，但系珀恩一直都犹豫不决。佢解释话：“我一直都怕搬去一个陌生嘅地方。我唔舍得离开我嘅屋企人、会众、房屋、熟悉嘅环境同以往嘅生活习惯。其实，我要克服嘅最大障碍就系自己嘅忧虑。”2012年，珀恩终于下定决心，同路易搬去马达加斯加。佢点样睇自己嘅决定？佢话：“谂翻转头，我可以话呢个决定强化咗我嘅信心，因为我睇到耶和华点样喺生活上帮助我哋。”路易补充话：“我哋喺马达加斯加嘅第一个受难纪念聚会，就有十个圣经学生出席！”
喺遇到难题嘅时候，乜嘢使呢对夫妇有力量继续留喺自己嘅岗位？佢哋恳切祈求耶和华赐佢哋力量保持忍耐。（腓立比书4:13）路易话：“耶和华真系回应咗我哋嘅祷告，赐平安俾我哋。我哋能够将注意力集中喺传道嘅喜乐之上。另外，法国嘅一啲朋友通过电邮同书信鼓励我哋唔好放弃。”（腓立比书4:6,7；哥林多后书4:7）
耶和华因为路易同珀恩所表现嘅忍耐而大大奖赏佢哋。路易话：“2014年10月，我哋喺法国参加咗基督徒夫妇圣经研习班 b。能够参加呢个课程，系耶和华俾我哋一份令人难忘嘅礼物。”毕业嘅时候，佢哋好开心知道自己受委派返去马达加斯加服务。
“我哋会以你哋为荣！”
纳迪娜同迪埃
2010年，一对嚟自法国嘅中年夫妇迪埃同纳迪娜搬到马达加斯加。迪埃话：“我哋年轻嘅时候做过先驱，后来要养育三个仔女。佢哋成年之后，我同太太就考虑能唔能够去国外服务。”纳迪娜承认：“一谂到要同仔女分开，我就犹豫不决。但系佢哋同我哋讲，‘如果你哋搬去国外需求更大嘅地区服务，我哋都会以你哋为荣！’仔女呢番话鼓励我哋采取行动。虽然我哋而家同仔女分隔两地，不过好开心可以经常同佢哋联系。”
对迪埃同纳迪娜嚟讲，学习马达加斯加语系一个挑战。纳迪娜笑住话：“我哋已经唔系二十几岁嘅年轻人喇。”噉佢哋点样做呢？一开始，佢哋先加入法语会众。之后，当佢哋准备好去学习本地语言嘅时候，就决定搬去马达加斯加语会众。纳迪娜话：“传道嘅时候，我哋遇到好多钟意学习圣经嘅人。佢哋经常都会多谢我哋探访佢哋。初时，我仲以为自己发紧梦。我真系好钟意喺呢个地区做先驱。朝早起身嗰时，我同自己讲，‘今日可以出传道，真系太好喇！’”
迪埃谂翻佢初时学马达加斯加语就笑住话：“有一次，我要主持一个节目，但系弟兄姊妹发表嘅评论我完全听唔明。我只可以话，‘多谢。’当我多谢咗一位姊妹发表评论之后，坐喺佢后面嘅人都打晒手势，提示嗰个答案系错嘅。我马上请另一位弟兄提供正确嘅答案，我希望佢答啱咗啦。”
佢好乐意接受邀请
蒂埃里同太太纳迪亚喺2005年区域大会，睇咗一套名为《追求属灵目标，荣耀上帝》嘅戏剧。呢套关于提摩太嘅圣经戏剧深深打动佢哋，亦都加强咗佢哋想去需要更多传道员嘅地区服务呢个愿望。蒂埃里话：“戏剧结束后，当大家仲喺度鼓掌嘅时候，我靠埋去太太度问，‘我哋搬去边度好啊？’太太话佢都谂紧呢个问题。”冇几耐之后，佢哋一步一步达到目标。纳迪亚话：“我哋慢慢减少我哋嘅物品，直到用四个行李箱就可以装晒所有嘢！”
最左边：纳迪亚同玛丽-马德莱娜； 最右边：蒂埃里
2006年，佢哋嚟到马达加斯加，开始喺呢度服务。纳迪亚话：“见到呢度嘅人对好消息有咁好嘅反应，我哋都好开心。”
不过六年后，呢对夫妇面对一个重大挑战。纳迪亚嘅妈妈玛丽-马德莱娜住喺法国，有一次，佢只手跌断咗，个头都受咗伤。呢对夫妇征求咗妈妈医生嘅意见之后，就邀请妈妈搬嚟马达加斯加同佢哋一齐住。虽然妈妈当时已经80岁，佢依然好乐意接受邀请。佢对喺国外居住有乜嘢感觉？妈妈话：“有时适应新环境好唔容易，我知道我能力有限，但仲系可以为会众作出贡献。令我最开心嘅系，呢个安排可以使我嘅仔女继续留喺反应咁好嘅地区传道。”
“我得到耶和华嘅帮助”
里安纳用坦德罗纳语发表演讲
里安纳系一个二十几岁嘅弟兄，佢喺阿拉奥特拉-曼古罗区长大。呢个系马达加斯加东部一个土地肥沃嘅地方。佢喺学校嘅成绩好优秀，亦都想追求高等教育。不过学习圣经之后，佢就改变咗自己嘅目标。里安纳话：“我尽力提早完成中学课程。我向耶和华承诺，‘如果我成功通过大考，就开始做先驱。’”毕业之后，里安纳履行佢嘅承诺。佢搬去同一位先驱弟兄一齐住，揾咗份部分时间嘅工作，跟住就开始做先驱。佢话：“呢个系我作过嘅决定当中最好嘅一个。”
不过，里安纳嘅亲戚唔明白点解佢唔揾一份高收入嘅工作。佢话：“我阿爸、阿叔同姑婆都鼓励我追求高等教育，但系我唔会俾任何事阻止我继续做先驱。”之后冇几耐，里安纳好想去需求更大嘅地区服务。点解佢有噉嘅愿望？佢话：“有一次，贼仔入咗我哋间屋偷咗我好多嘢。嗰次盗窃案使我谂起耶稣话要为自己喺‘天上积存财宝’。我下定决心要积存属灵财宝。”（马太福音6:19,20）佢搬到马达加斯加最南面，距离之前住嘅地方1300公里（800英里），一个受严重干旱影响嘅地区。安坦德罗伊人系当地嘅原住民。点解里安纳要搬去嗰度？
盗窃案发生前一个月，里安纳开始同两个安坦德罗伊男子讨论圣经。佢哋讲嘅系坦德罗纳语。里安纳学咗一啲佢哋语言嘅词句，亦都谂到有好多安坦德罗伊人未接触过王国信息。佢话：“我向耶和华祷告，祈求佢使我能够搬去讲坦德罗纳语嘅地区。”
里安纳搬咗之后，马上就遇到一个难题。佢揾唔到工作。一个男子同佢讲：“点解你要嚟呢度？呢度嘅人要去你之前住嗰度先揾到工！”两个星期后，里安纳去参加区域大会，当时佢差唔多一分钱都冇，仲谂紧之后点算好。喺大会最后一日，有一个弟兄放咗啲嘢喺里安纳嘅衫袋。原来系一笔钱。呢啲钱足够佢支付返去安坦德罗伊嘅交通费，仲可以经营一盘售卖酸奶（乳酪）嘅小生意。里安纳话：“喺最适当嘅时候，我得到耶和华嘅帮助。我可以继续帮助嗰啲未有机会听过好消息嘅人认识耶和华！”另外，会众亦都有好多工作要做。里安纳跟住话：“每两个星期我就要讲一个公众演讲，耶和华通过佢嘅组织嚟训练我。”今日，里安纳继续同好多想认识耶和华嘅安坦德罗伊人分享王国信息。
“靠信实嘅上帝而赢得福分”
耶和华向我哋保证，“凡喺地上为自己求福嘅，必靠信实嘅上帝而赢得福分”。（以赛亚书65:16）如果我哋努力克服障碍，扩大传道服务，就可以得到耶和华所赐嘅福分。文章开头提到嘅希尔菲阿娜，佢担心自己冇能力去需求更大嘅地区服务。点解佢会噉谂？佢解释话：“我只右脚长过左脚9厘米（3.5英寸）。所以我行路会趌吓趌吓，而且好容易攰。”
喺多娜婷受浸当日，佢同希尔菲阿娜（左）、西维尔·安（右）嘅合照
虽然系噉，希尔菲阿娜喺2014年同佢会众嘅年轻先驱姊妹西维尔·安一齐搬去离佢哋家乡85公里（53英里）嘅一个村庄。即使面对种种障碍，希尔菲阿娜嘅愿望最终都实现咗，仲得到好大嘅福分！佢话：“喺新地区服务咗只系一年，同我学习嘅一个年轻妈妈多娜婷就喺分区大会受咗浸。”
“我会帮助你”
上帝保证：“我要使你坚强。我一定会帮助你”。（以赛亚书41:10）前往需求更大地区服务嘅人所表达嘅信心证明，如果我哋竭力克服障碍，扩大传道服务，就可以亲自体验到耶和华向佢仆人所作嘅保证系真实嘅。结果，我哋同耶和华嘅关系会更加亲密。无论我哋喺本地抑或喺国外服务，只要我哋甘心舍己，就可以装备自己喺将来嘅新世界做好上帝所委派嘅工作。就好似迪埃讲嘅噉：“前往需求更大嘅地区服务，可以训练我哋为未来做好准备！”愿更多甘心乐意嘅同工尽快开始接受培训！
