耶和华上帝鼓励基督徒珍视和平，将和平睇成系生活嘅一个重要部分。促进和睦会使真基督徒大享平安。对于嗰啲想远离纷争嘅人，基督徒会众和睦嘅气氛好吸引佢哋。

例如喺马达加斯加，一个有名嘅巫医睇到耶和华见证人和睦相处，就同自己讲：“如果我要加入某个宗教嘅话，就要拣呢个！”后来，佢放弃咗通灵术，仲用咗一段时间去作出调整，使自己嘅婚姻关系符合圣经原则。最终，佢都开始崇拜和平嘅上帝耶和华。

好似呢个人噉，每年都有成千上万嘅人喺基督徒会众入面，揾到佢哋一直渴望得到嘅和平。不过，圣经好清楚噉指出，喺会众里面出现“苦毒嘅嫉妒同争胜嘅精神”会破坏友谊，引起纷争。（雅各书3:14-16）好在，圣经俾我哋实用嘅建议，可以帮助我哋避免呢类难题，而且增进会众嘅和睦关系。而家等我哋嚟睇吓一啲真实事例。

“有个同我一齐做嘢嘅弟兄，我好难同佢相处。有一次，我哋嘈交嘈得好犀利，啱啱好有两个人行入嚟，俾佢哋睇到晒。”——克理斯

“一个经常同我一齐传道嘅姊妹突然间唔再同我去传道，连计都唔同我倾。我一头雾水，都唔知发生咗乜嘢事。”——珍妮特

“我哋三个人一齐倾电话。其中一个人讲咗拜拜，我以为佢收咗线，就开始讲佢嘅坏话，点知佢未收线嘅㖞。”——米高

“喺我哋会众，两个先驱姊妹一直有啲詏撬，后来佢哋仲嘈咗起嚟，搞到其他人都好灰。”——加里

你或者觉得呢啲系小事。但系，呢啲小事都可以令当事人喺感情同属灵上受到长期嘅伤害。不过，我哋好开心话俾你知，呢啲弟兄姊妹按照圣经嘅指引去做，已经恢复翻和睦嘅关系。你估吓佢哋成功噉运用咗边啲圣经原则呢？

 “喺路上大家唔好伤和气。”（创世记45:24）约瑟喺佢嘅兄弟返屋企嗰时，俾咗佢哋呢个明智嘅劝告。如果一个人脾气好暴躁，又唔控制自己，就好容易会激嬲其他人。克理斯留意到自己嘅弱点系高傲同埋唔想接受指引。佢想作出改变，于是向嗰个同佢嘈交嘅弟兄道歉，之后好努力去控制自己嘅脾气。嗰个弟兄睇到克理斯咁努力改变自己，佢亦都作出调整。而家，佢哋好开心一齐事奉耶和华。

“唔先商议，计划失败”。（箴言15:22）珍妮特明白到，佢需要更加深入去体会呢个原则。佢决定同嗰个姊妹“商议”一下。珍妮特主动揾嗰个姊妹倾计，婉转得体噉请佢将心里面嘅不满讲出嚟。一开始，双方都觉得难开口，不过当佢哋静落心嚟讨论彼此之间嘅问题，情况就有所好转。嗰个姊妹发觉自己喺某件事上误会咗珍妮特，其实根本唔关珍妮特事。姊妹道歉之后，佢哋再次并肩事奉耶和华。

“所以，你将礼物带到祭坛嘅时候，如果喺嗰度谂起有弟兄对你不满，就要将礼物留喺坛前，先去同弟兄讲和，返嚟再将礼物献上。”（马太福音5:23,24）或者你仲记得耶稣喺登山宝训讲嘅呢个劝告。米高意识到自己讲嘅话伤害咗弟兄，觉得好内疚。佢下定决心，尽力同嗰个弟兄恢复和睦嘅关系。佢表现谦卑，当面同弟兄道歉。结果点呢？米高话：“我嘅弟兄真心宽恕咗我。”佢哋再次和好如初。

“要继续彼此包容，彼此甘心宽恕。耶和华点样甘心宽恕咗你哋，你哋亦都要点样甘心宽恕人。”（歌罗西书3:12-14）嗰两个嘈交嘅先驱姊妹后来又点呢？一位仁慈嘅长老请佢哋谂吓以下嘅问题：“我哋有冇理由因为个人嘅詏撬而令到其他人难过呢？我哋系咪应该继续彼此包容，团结和睦噉事奉耶和华呢？”接受同实践长老嘅劝告之后，佢哋而家相处得好好，一齐传讲好消息。

喺你受到伤害嘅时候，如果将歌罗西书3:12-14 嘅经文实践出嚟，一定大有帮助。好多人都发觉，只要保持谦卑，佢哋就可以彼此宽恕，既往不咎。如果你经过一番努力，情况都仲系未有好转，不如试吓将马太福音18:15应用出嚟。虽然耶稣呢个劝告针对嘅系严重嘅罪，你都应该运用圣经原则，按照步骤去做。直接去见弟兄姊妹，用谦卑同仁慈嘅态度，努力同对方一齐解决问题。

当然，圣经都提供咗其他实用嘅建议。其实呢啲建议有冇作用，同你有冇表现“圣灵嘅果实”有关，即系“爱心、喜乐、和平、坚忍、仁慈、良善、信心、温和、自制”。（加拉太书5:22,23）呢啲嚟自耶和华嘅特质，就好似润滑油噉，减少人同人之间嘅摩擦，使我哋有更好嘅人际关系。

每个人都有自己独特嘅性格特质，对事情嘅睇法同表达方式都唔一样。噉样其实可以使我哋嘅友谊充满乐趣。但系亦都因为性格唔同，人同人之间好容易发生摩擦。一个有经验嘅长老举咗个例，话：“一个怕丑嘅人，可能唔容易同一个活泼开朗嘅人相处。呢啲差异睇嚟系小事，但系可以导致严重嘅问题。”你认为，性格唔一样嘅人系咪一定会发生矛盾呢？试谂吓两位使徒嘅例子。彼得系点样嘅人呢？可能你会觉得佢系一个率直、冲动嘅人。噉约翰呢？我哋可能认为佢系一个好有爱心，言行谨慎嘅人。冇错，佢哋嘅性格真系好唔同，但佢哋合作得好好。（使徒行传8:14；加拉太书2:9）所以，就算 系性格差异好大嘅基督徒，都可以一齐开开心心噉工作。

可能某个弟兄讲嘅嘢做嘅事令你好唔舒服。但系，你知道基督亦都为佢而死，你应该要表现爱心。（约翰福音13:34,35；罗马书5:6-8）所以，与其唔同佢做朋友，或者避开佢，不如问吓自己：“呢个弟兄有冇做咗一啲违反圣经原则嘅嘢呢？佢系咪特登激嬲我呢？抑或只系我哋性格唔同？”最重要嘅问题系：“佢有乜嘢好嘅特质，我可以向佢学习呢？”

最后嘅问题特别值得我哋谂吓。如果一个人好钟意讲嘢，而你系一个比较静嘅人，噉你可以谂吓，佢传道嗰时肯定好容易同人打开话题。你可以主动约佢一齐传道，向佢学习。如果你系一个知悭识俭嘅人，不妨留意吓大方嘅人点样慷慨对待嗰啲年长、患病、贫穷嘅人，同埋佢哋噉做所带嚟嘅喜乐。所以关键就系，就算性格唔一样，你都可以努力留意弟兄姊妹嘅优点，从而拉近彼此之间嘅关系。噉样做唔一定使你哋成为最好嘅朋友，但可以帮助你哋之间嘅关系更加亲密，仲可以使会众更加团结和睦。

友阿蝶同循都姬可能个性同做事方式都好唔一样，但系使徒保罗鼓励佢哋“要齐心一意为主服务。”（腓立比书4:2）同样，我哋系咪都想同弟兄姊妹一齐崇拜耶和华，努力促进会众嘅和睦呢？

就好似杂草好容易生满晒成个花园噉，除非我哋将负面情绪斩草除根，唔 系嘅话，问题就会扩大恶化。一旦怨恨喺一个人嘅心里面扎根，有可能会影响整个会众嘅气氛。如果我哋爱耶和华同弟兄姊妹，就会尽己所能，唔会因为彼此间嘅差异而影响上帝子民嘅和睦。

我哋以追求和睦为目标，努力化解矛盾嘅话，就可能会有意想唔到嘅结果。睇吓一个姊妹嘅经验，佢话：“有个姊妹成日都当我系细路女，我真系好唔钟意佢噉。我越来越嬲佢，甚至同佢讲多句都唔想。我谂，‘如果佢唔尊重我，我都唔使尊重佢吖。’”

呢位姊妹开始检讨自己嘅行为。“我留意到自己嘅性格弱点，对自己好失望。我意识到我要调整自己嘅谂法。我为呢件事向耶和华祷告之后，就买咗份小礼物送俾呢个姊妹，仲写咗张卡向佢道歉。我哋互相拥抱，将呢啲唔愉快嘅事当粉笔字噉抹咗佢。之后，就咩事都冇喇！”

人与人之间好需要和睦嘅关系。不过，一旦地位同尊严受到威胁，人好容易就会做出一啲破坏和睦嘅事。对于嗰啲唔崇拜耶和华嘅人嚟讲，噉样做一啲都唔出奇。但对于上帝嘅子民嚟讲，我哋应该尽力促进和平同团结。喺耶和华启示之下，保罗写到：“我……恳求你哋，行事要配得上你哋所受嘅呼召，要满心谦卑、温和、坚忍，用爱心彼此包容，用和平维系团结，竭力持守圣灵所赐嘅合一。”（以弗所书4:1-3）“用和平维系［嘅］团结”系无价之宝，所以，我哋应该立定决心，尽力解决彼此之间嘅纷争。