唐系加拿大嘅一个耶和华见证人，佢特别想对流浪汉作见证。佢讲到其中一个，话：“彼得系一个无家可归嘅人，系我喺巷仔里面见过最邋遢嘅人。佢会专登做啲嘢，令人觉得佢好讨厌，想远离佢。有好多次其他人好心想帮佢，佢都拒绝人。”虽然系噉，有14年嘅时间，唐依然耐心噉向呢个无家可归嘅人表现仁慈。

有一日，彼得问唐：“我同你非亲非故，人人都懒得理我，点解你咁关心我？”唐好有技巧噉运用三节经文，尝试打动彼得嘅心。首先，佢问彼得知唔知上帝有个名，然后请彼得直接喺圣经入面读出诗篇83:18。跟住，唐再请彼得读出罗马书10:13,14，经文话“凡呼求耶和华之名嘅人，都必得救”，唐用呢节经文解释点解佢咁关心彼得。最后，唐读出马太福音9:36，然后请彼得自己再读一次。经文话：“佢睇见群众，就怜悯佢哋，因为佢哋俾人剥削，四处流离，好似冇牧人嘅绵羊一样。”读完之后，彼得眼湿湿噉问：“我系唔系其中一只绵羊呢？”

彼得开始作出改变。佢洗干净个身，修剪好啲胡须，换咗唐俾佢嘅衫。彼得继续保持住干净嘅仪容。

彼得有写日记嘅习惯。佢先前写嘅都系好悲惨好绝望嘅事，但系写到最近嘅内容就好唔一样嘞。其中一篇话：“今日我认识到上帝嘅名。而家我祷告嗰时，都会用耶和华呢个名。认识佢嘅名真系好奇妙啊！唐话俾我知，我可以同耶和华做朋友，无论咩事都好，佢随时都会听我倾诉。”

 喺日记里面，彼得最后嘅说话系写俾佢细佬同家姐嘅。佢写到：

“今日我觉得特别唔舒服，我谂自己时日无多嘞。就算今日系我人生嘅最后一日，但我知道，我会喺乐园见到我嘅朋友［唐］。可能你哋睇到呢篇日记嘅时候，我已经唔喺度嘞。如果你哋喺我嘅葬礼度留意到一个男人明显同其他人唔一样嘅，就一定要揾佢倾吓，同埋记得读吓呢本蓝色嘅书。 a呢本书话，我会喺乐园里面见翻我嘅朋友。我深信呢件事。你哋亲爱嘅兄弟，彼得。”

葬礼结束之后，彼得嘅家姐乌米话：“大约两年前，彼得联络我。咁多年来，我第一次见到佢开心嘅样，佢仲面带笑容添。”乌米话俾唐知：“我一定会睇呢本书，因为任何打动到我细佬嘅嘢，一定系非比寻常嘅。”乌米应承同耶和华见证人讨论《辨明圣经的真理》呢本书。

同样，睇人唔好只睇外表，我哋应该对人有耐心，向所有人都表现真挚嘅爱。（提摩太前书2:3,4）如果我哋噉做，就好可能会打动到嗰啲好似彼得噉，虽然因外表俾人睇低，但其实心地善良嘅人。我哋深信耶和华系睇人“内心”嘅上帝，佢一定会帮助嗰啲诚心正意嘅人，使真理喺佢哋心里面生根发芽。（撒母耳记上16:7；约翰福音6:44）