1．乜嘢系最伟大嘅爱？点解？（请睇吓课文开头嘅图片）

 爱系嚟自上帝嘅恩赐。耶和华系爱嘅源头。（约翰一书4:7）喺圣经里面，希腊语词“阿格配”呢种爱系最伟大嘅，系以正确嘅原则为基础嘅。虽然呢种爱都包括温情同爱意，但最主要嘅表现系无私噉为他人付出。按照一本参考书所讲，“人只能够从爱所引发嘅行动，先可以睇得出乜嘢系阿格配嘅爱。”如果我哋向人表现，或者人哋向我哋表现无私嘅爱，我哋嘅生活就会变得丰富多彩，充满喜乐同意义。

2,3．耶和华点样向人类表现无私嘅爱？

² 耶和华喺创造亚当同夏娃之前，就已经向人类表现爱嘞。佢创造地球作为人类嘅永久家园，使人类唔止系拥有生命，仲可以充分享受生命嘅乐趣。耶和华所做嘅一切唔系为咗佢自己，而系完全为我哋嘅益处着想。佢为地上嘅儿女准备好一个乐园，使佢哋可以喺呢个乐园入面享有永远嘅生命，通过呢一点进一步表现出佢无私嘅爱。

 ³ 喺亚当同夏娃反叛之后，耶和华以最伟大嘅方式表现出无私嘅爱。佢为佢哋嘅后代作出赎价嘅安排，确信人类当中一定会有人回应佢嘅爱。（创世记3:15；约翰一书4:10）事实上，喺耶和华睇嚟，从佢应许拯救人类嘅嗰一刻开始，赎价嘅牺牲就已经付出咗。四千几年后，耶和华付出高昂嘅代价，为所有人牺牲佢嘅独生子。（约翰福音3:16）我哋真系非常感激耶和华无私嘅爱！

4．乜嘢表明唔完美嘅人系能够表现爱嘅？

⁴ 因为耶和华按照佢嘅形像创造我哋，所以我哋都能够表现无私嘅爱。即使我哋遗传咗罪，喺表现爱方面会有挑战，但唔等于我哋做唔到。亚伯无私噉献出佢最好嘅牲畜嚟表现佢对耶和华嘅爱。（创世记4:3,4）挪亚表现无私嘅爱，即使几十年来都冇人积极回应，佢仲系向周围嘅人传讲上帝嘅信息。（彼得后书2:5）亚伯拉罕表明佢爱耶和华多过爱自己，愿意将自己嘅仔以撒献俾耶和华。（雅各书2:21）我哋好想效法呢啲忠仆，就算唔容易都继续努力表现爱。

5．我哋可以点样表现真挚嘅爱？

⁵ 圣经话，表现真挚嘅爱，就“唔好空口讲白话，要有真诚嘅行动”。（约翰一书3:18）噉系咪话，我哋唔可以用言语嚟表达我哋嘅爱呢？当然唔系！（帖撒罗尼迦前书4:18）其实经文嘅意思系，我哋嘅爱唔好只系口讲，喺某啲时候应该有实际嘅行动。例如，当一个基督徒同工缺乏基本嘅生活所需，佢需要嘅唔系净系我哋口头上嘅祝福。（雅各书2:15,16）同样，对耶和华同其他人嘅爱推动我哋全心投入传道工作，而唔系只求耶和华差派工人收割属灵庄稼。（马太福音9:38）

6,7．（甲）乜嘢系“无伪嘅爱心”？（乙）请举出一啲同虚假嘅爱有关嘅例子。

⁶ 正如使徒约翰所写，我哋嘅爱一定“要有真诚嘅行动”。所以，我哋嘅爱“唔应该虚伪”，而应该系“无伪嘅”。（罗马书12:9；哥林多后书6:6）噉意味住，戴住面具假扮向人表现嘅爱，并唔系真挚嘅。我哋可能会谂，“虚伪嘅爱有冇价值呢？”呢个就好似假银纸噉，一啲价值都冇。

⁷ 我哋嚟睇吓一啲同虚假嘅爱有关嘅例子。喺伊甸园，撒但假扮关心夏娃，但佢所做嘅嘢其实表明佢又自私又虚伪。（创世记3:4,5）喺大卫嘅日子，亚希多弗为咗个人利益背叛大卫，佢嘅所作所为表明佢同王之间嘅友谊系虚假嘅。（撒母耳记下15:31）今日都一样，叛道者同其他喺会众制造分裂嘅人“讲嘢油腔滑调，阿谀奉承”，假扮成好有爱心噉，但实际上只系为咗自私嘅目的。（罗马书16:17,18）

8．我哋可以问吓自己乜嘢问题？

⁸ 虚假嘅爱同上帝无私嘅爱背道而驰，特别可耻。噉样嘅行为呃得到人但系呃唔到耶和华。实际上，耶稣话 嗰啲虚伪嘅人会受到“最重嘅惩罚”。（马太福音24:51）当然，耶和华嘅忠仆绝对唔想表现虚假嘅爱。我哋应该问吓自己：“我嘅爱系咪一直都咁真挚呢？我系咪一个自私虚伪嘅人呢？”等我哋嚟睇吓，努力表现“无伪嘅爱心”嘅九种方法。

9．真挚嘅爱会推动我哋做乜嘢？

⁹ 乐意做幕后工作。我哋应该甘愿“暗中”为弟兄姊妹服务，尽可能保持低调。（请读马太福音6:1-4）亚拿尼亚同撒非拉并冇噉做。佢哋好想人知道自己嘅善行，就夸大自己所作嘅捐献，最终因为虚伪嘅行为而导致可悲嘅下场。（使徒行传5:1-10）我哋有真挚嘅爱，就会乐意为弟兄姊妹服务，即使冇人认可或称赞，我哋都会噉做。例如，好多弟兄默默无闻噉协助中央长老团预备属灵食物，佢哋唔想人留意自己，亦都唔会透露自己嘅工作内容。

10．我哋可以点样带头互相尊重？

¹⁰ 带头互相尊重。（请读罗马书12:10）耶稣甘愿做卑微嘅工作，喺尊重他人方面树立咗好好嘅榜样。（约翰福音13:3-5,12-15）我哋如果想效法耶稣尊重其他人，就要付出努力培养谦卑。喺领受圣灵之前，就算系使徒都唔能够完全明白耶稣所做嘅事。（约翰福音13:7）我哋向人表现尊重，就唔会因为自己受过更高嘅教育、拥有更多嘅财富，或者享有特别嘅服务机会而觉得比其他人优越。（罗马书12:3）我哋见到其他人得到称赞嗰阵，即使觉得自己配得同样嘅赞赏，都唔应该妒忌，而应该戥佢哋开心。

11．点解我哋嘅称赞一定要真心？

¹¹ 真心称赞弟兄姊妹。我哋一有机会就应该互相称赞，噉样做就系讲“强化人嘅好话”。（以弗所书4:29）不过，如果我哋嘅称赞唔系出于真心，就会变成系阿谀奉承，或者系逃避责任，冇俾人适当嘅劝告。（箴言29:5）称赞完一个人之后，又喺背后讲佢坏话，呢个系虚伪嘅一种表现。使徒保罗真心称赞其他人，对人表现真挚嘅爱，为我哋树立咗好榜样。例如，保罗真心称赞哥林多基督徒做得好嘅地方。（哥林多前书11:2）但系，当佢哋需要劝告嘅时候，保罗就用仁慈嘅态度，清晰噉向佢哋解释。（哥林多前书11:20-22）

12．喺好客方面，我哋可以点样表现真挚嘅爱？

¹² 要有好客精神。耶和华吩咐我哋要对弟兄姊妹慷慨大方。（请读约翰一书3:17）不过，我哋必须怀住纯正嘅动机，避免有任何自私嘅目的。我哋可以问吓自己：“我系咪只系慷慨对待亲密好友、显要人物，或者嗰啲将来能够回报自己嘅人呢？抑或，我哋会揾机会对嗰啲自己唔系好认识，或者冇乜嘢可以回报我哋嘅弟兄姊妹表现慷慨？”（路加福音14:12-14）假设有一个基督徒同工因为作出唔明智嘅决定 而需要帮助，又或者我哋款待完一个同工之后冇得到感谢。喺噉嘅情况之下，我哋应该听从圣经嘅劝告：“要好客，彼此款待，唔好发牢骚。”（彼得前书4:9）如果我哋实践呢个忠告，就会因为自己怀住正确嘅动机为其他人付出而得到喜乐。（使徒行传20:35）

13．（甲）喺帮助软弱嘅人方面，我哋会遇到乜嘢特别嘅挑战？（乙）我哋可以做啲乜嘢实际嘅事去支持软弱嘅人？

¹³ 支持软弱嘅人。圣经嘅一个吩咐可以验证我哋嘅爱系咪真挚嘅。呢个吩咐就系，“支持软弱嘅人，耐心对待所有人”。（帖撒罗尼迦前书5:14）虽然，好多软弱嘅人后来都恢复翻坚强嘅信心，但有啲人仲系需要我哋耐心噉继续支持佢哋。我哋可以用圣经鼓励佢哋，邀请佢哋一齐传道，或者拨出时间聆听佢哋心入面嘅谂法。我哋唔应该随意断定某个同工系“坚强”抑或系“软弱”嘅，我哋应该承认所有人都有自己嘅优点同弱点。就算系使徒保罗都承认自己有软弱嘅一面。（哥林多后书12:9,10）所以，我哋都能够通过基督徒同工嘅支持而得益。

14．为咗维持同弟兄姊妹之间嘅和睦关系，我哋愿意付出几多？

¹⁴ 保持和睦。就算有时我哋觉得自己俾人误会或者受到唔公平嘅对待，都要尽己所能同弟兄姊妹保持和睦。（请读罗马书12:17,18）一句真心嘅道歉就可以修复彼此之间嘅关系。与其话，“唔好意思呀，我唔知你会噉谂㗎”，不如承认喺呢个问题上自己都有责任。你可以同对方道歉话：“真系唔好意思，我讲嘅嘢伤害咗你。”和睦嘅关系对婚姻尤其重要。夫妇唔应该只系喺人前假扮恩爱，而私底下就以冷战、恶言恶语或者暴力嚟互相伤害。

15．我哋可以点样表明自己真心宽恕人？

¹⁵ 甘心宽恕。如果我哋俾人得罪，就应该乐意原谅对方，唔好怀恨在心。我哋“用爱心彼此包容，用和平维系团结，竭力持守圣灵所赐嘅合一”，就会乐于宽恕嗰啲无意得罪我哋嘅人。（以弗所书4:2,3）如果我哋真心想宽恕人，就唔好成日谂住对方嘅过错，“唔［好］计较人对我哋嘅伤害”。（哥林多前书13:4,5）如果我哋对人怀恨在心，就可能会使我哋同弟兄姊妹，甚至同耶和华嘅关系受到永久嘅伤害。（马太福音6:14,15）我哋亦都可以为嗰啲得罪 我哋嘅人祷告，表明我哋真心宽恕佢哋。（路加福音6:27,28）

16．如果我哋喺事奉耶和华方面有特别嘅委派，应该注意乜嘢？

¹⁶ 牺牲个人嘅利益。如果我哋喺事奉耶和华方面得到一啲特别嘅委派，我哋应该将呢个视为一个机会，“求其他人嘅益处，唔好总系求自己嘅益处”，噉样做就表明我哋有真挚嘅爱。（哥林多前书10:24）例如，喺大会嗰阵，招待员会早过其他人入场。佢哋唔会利用呢个机会提前帮自己同家人霸靓位，反而会喺自己受委派嘅区域选择嗰啲唔系咁理想嘅位置。佢哋愿意牺牲自己嘅个人利益，表现无私嘅爱心。你会点样效法佢哋嘅好榜样呢？

17．如果一个人犯咗严重嘅罪，真挚嘅爱会推动佢点样做？

¹⁷ 承认同离弃不为人知嘅罪。为咗保全面子或者唔想令其他人失望，一啲有严重过犯嘅基督徒会掩饰自己嘅罪。（箴言28:13）不过，噉样做唔系爱心嘅表现，到头来只会害人害己，亦都会阻碍上帝圣灵嘅运作，危害整个会众嘅安宁。（以弗所书4:30）如果一个基督徒犯咗严重嘅罪，真挚嘅爱会推动佢向长老讲出实情，噉长老就能够向佢提供所需嘅帮助。（雅各书5:14,15）

18．真挚嘅爱有几重要？

¹⁸ 爱心系所有特质当中最伟大嘅一种。（哥林多前书13:13）如果我哋向人表现爱心，就系效法爱嘅源头耶和华，其他人亦都因此睇出我哋系耶稣嘅门徒。（以弗所书5:1,2）喺圣灵启示下，保罗话：“我……冇爱心，就唔算得系乜嘢。”（哥林多前书13:2）愿我哋继续表现爱心，唔系净系“空口讲白话”，亦都“有真诚嘅行动”。