1-3．（甲）喺撒迦利亚开始讲预言嘅时候，上帝嘅子民处于点样嘅情况？（乙）点解耶和华呼吁佢嘅子民“回头归向”佢？

 一卷喺空中飞紧嘅书；一个妇人被封喺量篮入面；两个妇人展翅乘风飞翔，佢哋嘅翅膀好似鹳鸟嘅翅膀——呢啲生动嘅景象就记录喺撒迦利亚书。（撒迦利亚书5:1,7-9）点解耶和华要俾佢嘅先知睇呢啲惊人嘅异象呢？当时犹太人嘅情况系点样嘅呢？撒迦利亚所记录嘅呢啲异象，对今日嘅我哋有乜嘢影响？

² 对耶和华嘅子民嚟讲，公元前537年系好值得开心嘅一年。佢哋被掳去巴比伦70年之后，终于获得自由。起初，佢哋又兴奋又开心，喺耶路撒冷着手恢复正确嘅崇拜。喺公元前536年，佢哋奠定咗圣殿嘅根基。喺嗰阵，犹太人“大声呼喊，喊声喺好远嘅地方都听得见”。（以斯拉记3:10-13）不过，喺建筑工程上受到嘅反对好快就变得越来越猛烈。 由于遇到好多挑战同困难，犹太人就灰心丧气，于是停手唔再修建圣殿，开始净系顾住起屋耕田。16年之后，耶和华圣殿嘅建造工程仲系未完工。上帝嘅子民需要受到提醒，应该回头归向耶和华，唔好再将个人追求放喺首位。耶和华希望佢嘅子民可以回头，重新振作，鼓起勇气，全心事奉佢。

³ 喺公元前520年，耶和华差派先知撒迦利亚去提醒自己嘅子民，要佢哋回想自己从巴比伦获得释放嘅主要原因。撒迦利亚呢个名嘅意思系“耶和华已经顾念”。呢个可能会使犹太人记得，虽然佢哋已经忘记上帝曾经点样拯救佢哋，但系上帝并冇忘记佢嘅子民。（请读撒迦利亚书1:3,4）佢仁爱噉向犹太人保证，佢会帮助佢哋恢复正确崇拜，同时亦都警告话，佢唔会接受三心两意嘅崇拜。等我哋嚟睇吓，耶和华点样通过撒迦利亚嘅第六同第七个异象嚟推动佢哋采取行动。然后再睇吓，今日我哋从呢两个异象学到乜嘢？

4．撒迦利亚喺佢嘅第六个异象入面睇到乜嘢？书卷嘅正反两面都记录咗文字，呢个有乜嘢特别嘅含意？（请睇吓课文开头嘅图片1）

⁴ 撒迦利亚书第5章以一个非比寻常嘅异象作为开头。（请读撒迦利亚书5:1,2）撒迦利亚见到空中飞过一卷书，有成9米长（30英尺），4.5米阔（15英尺）！书卷系展开嘅，入面嘅内容清晰可见。书卷嘅正反两面都记录咗一个审判信息。（撒迦利亚书5:3）书卷一般只会用一面嚟做记录，既然呢个书卷两面都有文字，表明书卷上嘅信息一定好重要。

5,6．耶和华对任何形式嘅偷窃行为有乜嘢睇法？

⁵ 请读撒迦利亚书5:3,4。既然全人类都要向耶和华上帝交账，佢名下嘅子民就更加有责任要噉样做。爱上帝嘅人都清楚知道，任何形式嘅偷窃行为都会“羞辱［佢哋］上帝嘅名”。（箴言30:8,9）无论出于乜嘢目的，或者几咁情有可原，偷窃就系过度重视物质财富，将满足自己嘅贪欲睇得比事奉上帝更重要。呢啲人唔尊重上帝嘅律法，完全无视耶和华同佢嘅圣名。

⁶ 你有冇留意到撒迦利亚书5:3,4点样讲呢？经文话：“咀咒必进入偷窃之人嘅家……必留喺佢家中，以致房屋……毁灭。”冇任何事物可以阻挡得到耶和华施行审判。无论上帝子民嘅错误行为有几咁隐密，上帝都能够揭发出嚟。就算一个人喺司法人员、老板、长老或者父母面前有办法隐瞒自己嘅偷窃行为，但佢点都瞒唔到上帝，而上帝一定会将所有偷窃行为揭发出嚟。（希伯来书4:13）能够同嗰啲“行事尽都诚实”嘅人做朋友，真系令人舒畅！（希伯来书13:18）

7．我哋点样先可以免受书卷嘅咀咒？

⁷ 耶和华憎恨任何形式嘅偷窃行为。我哋努力符合耶和华嘅崇高道德标准，而且将呢个视为殊荣，同时保持良好嘅品行，避免令耶和华嘅圣名蒙羞。噉样，喺耶和华对嗰啲蓄意违反佢律法 嘅人施行审判嘅时候，我哋或者可以免受惩罚。

8-10．（甲）誓言系乜嘢？（乙）西底家王背弃咗乜嘢誓言？

⁸ 接住落嚟，书卷又向嗰啲“奉［上帝嘅］名发假誓之人”发出咗一个警告。（撒迦利亚书5:4）发誓嘅意思系，通过誓言嚟保证某件事属实，又或者一个人对于会唔会做某件事而作出严肃嘅承诺。

⁹ 用耶和华嘅名嚟发誓系一个好严肃嘅问题。我哋从最后一个统治耶路撒冷嘅犹大王西底家身上可以学到呢一点。佢用耶和华嘅名发誓，话自己会忠心服从巴比伦王，不过佢并冇履行自己嘅誓言。结果，耶和华宣判话：“我以我嘅永生发誓，巴比伦王立［西底家］作王，但系佢毁约背誓，所以佢一定会死喺巴比伦王嘅京城。”（以西结书17:16）

¹⁰ 既然西底家王用上帝嘅名嚟发誓，佢就有义务要向耶和华履行誓言。（历代志下36:13）不过，西底家试图摆脱巴比伦嘅控制，转而投靠埃及。（以西结书17:11-15,17,18）

11,12．（甲）喺我哋所作嘅承诺当中，边一个系最重要嘅？（乙）我哋嘅献身誓愿应该点样影响我哋每日嘅生活？

¹¹ 耶和华知道我哋所作嘅承诺，而且将我哋嘅誓言睇得好重要。为咗得到耶和华嘅悦纳，我哋必须履行诺言。（诗篇76:11）喺我哋所作嘅承诺当中，最重要嘅就系向耶和华所作嘅献身誓愿。 献身系一个严肃嘅誓愿，表明自己愿意无条件事奉耶和华。

¹² 我哋可以点样实践自己嘅献身誓愿呢？我哋每日都会遇到大大小小嘅考验，我哋所作嘅选择应该表明自己重视“天天”赞美耶和华呢个誓愿。（诗篇61:8）例如，喺学校或者工作嘅地方有人向我哋调情，我哋会唔会坚决拒绝，通过噉样嚟表明自己“喜悦［耶和华］嘅道路”呢？（箴言23:26）就算喺家人当中只有我哋一个崇拜耶和华，我哋有冇祈求耶和华帮助自己继续表现基督徒嘅美好特质？我哋有冇每日向仁爱嘅天父祷告，感谢佢俾我哋成为佢嘅子民同埋感激佢咁爱我哋？我哋有冇每日拨出时间研读圣经呢？事实上，我哋唔系向耶和华承诺过会噉样做嘅咩？呢啲牵涉到我哋对上帝嘅服从。我哋全心事奉耶和华，就表明我哋爱佢，真正履行对佢嘅献身誓愿。崇拜耶和华系一种生活方式，而唔系一种形式。履行誓愿对我哋有益；忠贞事奉耶和华可以带俾我哋一个稳确嘅将来。（申命记10:12,13）

13．我哋从撒迦利亚嘅第六个异象学到乜嘢？

¹³ 撒迦利亚嘅第六个异象帮助我哋睇出，爱耶和华嘅人唔应该发假誓或者有任何偷窃行为。我哋知道，就算犹太人经常犯错，耶和华都冇放弃佢哋。佢好理解犹太人因为四面受敌而面对嘅压力。耶和华言出必行，为我哋立下榜样，佢一定会帮助我哋履行诺言。佢帮助我哋嘅一个方法就系，俾我哋知道佢好快就会终止地上嘅一切罪恶，使我哋怀有希望。撒迦利亚嘅下一个异象证明呢个光明嘅希望一定会实现。

14,15．（甲）撒迦利亚喺第七个异象睇到乜嘢？（请睇吓课文开头嘅图片2）（乙）量篮入面嘅妇人代表乜嘢？点解天使要封实个量篮？

¹⁴ 睇完书卷嘅异象之后，一个天使叫撒迦利亚 “举目观看”。佢睇到嘅第七个异象透露咗乜嘢呢？而家，佢见到一个量篮出现。（请读撒迦利亚书5:5-8）呢个量篮有个“圆形嘅铅盖”。铅盖打开嘅时候，撒迦利亚睇到“有个妇人坐喺量篮入面”。天使解释话，量篮入面嘅妇人就系“邪恶”。试想象吓，睇到呢个妇人从量篮爬出嚟嗰时，撒迦利亚一定非常恐惧！天使即刻将妇人推返去量篮入面，冚实沉重嘅铅盖。噉有乜嘢含意呢？

¹⁵ 异象嘅呢个部分强调，耶和华一定唔会容忍喺佢子民当中有任何形式嘅邪恶行为。天使迅速采取行动冚翻个铅盖，呢个使我哋确信，耶和华一见到邪恶嘅事就会即刻将佢除去。（哥林多前书5:13）

16．（甲）关于量篮，撒迦利亚接住落嚟睇到有乜嘢事发生？（请睇吓课文开头嘅图片3）（乙）两个有翅膀嘅妇人将量篮带去边度？

¹⁶ 喺下一幕，出现咗两个妇人，佢哋强壮嘅翅膀好似鹳鸟嘅翅膀。（请读撒迦利亚书5:9-11）呢两个妇人同量篮入面嘅妇人完全唔一样！凭住有力嘅翅膀，佢哋俯冲落嚟，将装住“邪恶”嘅量篮提起。呢两个妇人要带邪恶去边度呢？佢哋要将佢带去“示拿地”， 即系巴比伦。点解要将量篮安置喺巴比伦呢？

17,18．（甲）点解示拿地系安置“邪恶”嘅“适当嘅地方”？（乙）呢个异象提醒我哋应该有点样嘅决心？

¹⁷ 对撒迦利亚日子嘅犹太人嚟讲，示拿地系一个适合囚禁邪恶嘅地方。撒迦利亚同佢嘅同胞都清楚知道巴比伦系一个邪恶嘅地方。佢哋喺呢个道德败坏，充满偶像崇拜嘅地方长大，每日都要奋力抵抗异教世界嘅精神。异象肯定使当时嘅犹太人大感安慰！因为耶和华通过呢个异象保证，佢一定会使正确嘅崇拜保持洁净。

¹⁸ 异象亦都提醒犹太人有责任喺崇拜方面保持洁净。邪恶嘅行为唔会被容许，亦都唔能够潜入同留喺耶和华嘅子民当中。耶和华将我哋带入佢纯洁嘅组织之后，我哋得到关爱同保护嘅同时，都有责任要维持组织嘅洁净。我哋每个人都可以出一分力保持会众嘅洁净。喺我哋嘅属灵乐园，唔应该存在任何形式嘅邪恶行为。

19．撒迦利亚生动嘅异象对我哋有乜嘢意义？

¹⁹ 撒迦利亚嘅第六同第七个异象向嗰啲继续有唔诚实行为嘅人发出严肃嘅警告，亦都提醒我哋耶和华唔会容忍错误嘅行为。嗰啲真心支持正确崇拜嘅人，必定痛恨一切邪恶嘅事。呢啲记载亦都系嚟自我哋天父嘅仁爱保证。如果我哋努力得到上帝嘅悦纳同保护，就唔会遭受毁灭嘅咀咒。耶和华会祝福我哋。喺呢个充满邪恶嘅世界，我哋为保持洁净而作出嘅一切奋斗同努力都系值得嘅。喺耶和华嘅帮助下，我哋确信一定能够成功！但系，点解我哋可以肯定正确崇拜会战胜呢个充满邪恶嘅世界呢？我哋点知道喺大患难嚟到之前耶和华会保护佢嘅组织？下一篇课文会讨论呢啲问题。