喺印度古吉拉特邦嘅一个小镇，约翰嘅爸爸60年前受浸成为一个耶和华见证人。约翰同佢嘅五个兄弟姊妹，仲有佢妈妈，都系虔诚嘅罗马天主教徒，所以佢哋都反对爸爸嘅信仰。

有一日，约翰嘅爸爸叫佢送封信俾会众嘅一个弟兄。嗰日朝早，约翰开一个大铁桶嗰阵，割伤咗只手指，伤口好深。虽然系噉，约翰仲系好想按爸爸嘅话去做。跟住佢攞块布包住只手指，就行出去送信嘞。

约翰到咗嗰度，呢个弟兄嘅太太系耶和华见证人。约翰递封信俾姊妹嗰阵，姊妹发现佢只手指受咗伤，就马上攞个急救箱出嚟，帮佢消毒同包扎伤口。之后，姊妹仲冲咗杯热茶俾约翰饮，同埋一直好友善噉同佢讲圣经。

喺呢个时候，约翰对见证人嘅偏见开始改变。佢想知道耶和华见证人同天主教喺信仰方面有咩唔同，所以佢问姊妹两个问题，一个问题系耶稣系咪上帝，另一个问题系基督徒应唔应该向马利亚祷告。因为呢位姊妹学过古吉拉特邦语，所以就用约翰嘅母语，通过圣经回答佢嘅问题，仲送咗本《这王国的好消息》册子俾佢。

当约翰睇紧呢本册子嗰阵，佢觉得自己第一次睇到圣经真理。佢去问神父同样嘅问题。神父即刻发脾气，攞本圣经掟佢，大声嗌：“你呢个撒但！圣经边度话耶稣唔系上帝，边度话唔可以崇拜马利亚，指俾我睇吓吖！”神父嘅反应令约翰好震惊，所以佢同神父讲：“我以后都唔会再踏入天主教堂一步。”之后佢就冇去过嘞！

约翰开始同见证人学习圣经，拥护真理同埋开始事奉耶和华。后来，其他几个家庭成员都系噉样做。今日，约翰右手只食指仲有嗰条60年前留低嘅疤痕，呢条疤痕令佢谂翻起一个美好嘅回忆，就系一个基督徒小小嘅举动，吸引佢认识真理，而且用一生去事奉耶和华。（哥林多后书6:4,6）