«Mix juntéen tin tuklaj wa jeʼel u páajtal in maas meyajtik Jéeobaeʼ». Bey u yuʼubikuba Gwen, juntúul kiik nojochchaj Inglaterra yéetel bin áantaj Albania, junpʼéel país tuʼux jach kʼaʼabéet u tsikbaltaʼal u Tʼaan Dios. a

 Jeʼex Gweneʼ yaʼab tiʼ u testigoʼob Jéeobaeʼ tsʼoʼok u binoʼob áantaj Albania utiaʼal u béeytal u natsʼkuba le máakoʼob yiknal Diosoʼ (Ageo 2:7). ¿Baʼax péeksikoʼob u beetoʼob? ¿Baʼax kʼeexiloʼob anchaj u beetkoʼob? ¿Baʼax áantkoʼob utiaʼal u seguer u yáantajoʼob kex maʼ fácil tu káajbaliʼ?

 Tuláakal le máaxoʼob ku binoʼob áantaj Albaniaoʼ junpʼéeliliʼ baʼax péeksikoʼob u beetoʼob: letiʼe yaabilaj ku yuʼubikoʼob yoʼolal Jéeobaoʼ yéetel u kʼáatoʼob xan ka náatsʼak u maasil tu yiknal.

 Baʼaleʼ táanil tiʼ u binoʼob áantaj Albaniaeʼ tu yilaj u maas tsʼáaik u yóoloʼob teʼ kʼaʼaytajoʼ, leloʼ le áantoʼob utiaʼal u tsʼoʼokbeskoʼob le meyajoʼ. Gweneʼ ku yaʼalik: «Utiaʼal in wilik wa jeʼel u páajtal in bin áantaj Albaniaeʼ yáax baʼax tin beeteʼ letiʼe in máan tiʼ junpʼéel grupo tuʼux ku tʼaʼanal albanés yaan kaʼach teʼ tuʼux kajaʼanenoʼ. Ka tsʼoʼokeʼ binen tiʼ junpʼéel asamblea beetaʼab Albania, ka máan kʼiineʼ tin chʼaʼtuklaj in kaʼa bin Albania yéetel pʼáaten junpʼéel tiempo utiaʼal in maas kanik le albanésoʼ».

 Manuela juntúul kiik kajaʼan Italiaeʼ 23 años yaantiʼ ka bin áantaj tiʼ junpʼéel múuchʼulil yaan teʼ país tuʼux kajaʼanoʼ. Letiʼeʼ ku yaʼalik: «Cuatro años áantajnajen teʼ múuchʼuliloʼ, ka tin wojéeltaj jach kʼaʼabéet áantaj Albaniaeʼ tin beetaj planes utiaʼal in bin áantaj wa jaypʼéel meses bey precursoraeʼ».

 Juntúul kiik ku kʼaabaʼtik Federicaeʼ, chéen siete años yaantiʼ ka tu yuʼubaj u tsʼaʼabal junpʼéel informe yoʼolal Albania tiʼ junpʼéel asamblea. Letiʼeʼ ku yaʼalik: «Le sukuʼun tsʼáa le informeoʼ tu yaʼaleʼ táan u tsʼaʼabal yaʼab xookoʼob Albania yéetel yanoʼobeʼ tsʼoʼok u káajal u binoʼob teʼ reuniónoʼoboʼ. Le ka tin waʼalaj tiʼ in papáʼob taak in bin xan Albaniaeʼ jaʼakʼ u yóoloʼob, in papá túuneʼ tu yaʼalajten: ‹Wa jaaj taak a bineʼ aʼal tiʼ Jéeoba, wa letiʼ u kʼáateʼ yaan u núukik a oración›. Ka máan wa jaypʼéel meseseʼ invitartaʼab in familia utiaʼal ka xiʼik áantaj Albania». Kex tsʼoʼok u máan yaʼab añoseʼ Federicaeʼ láayliʼ táan u yáantaj Albaniaeʼ, pero bejlaʼeʼ táan u múul meyaj yéetel Orges, u yíicham.

 Gianpiero yéetel Gloriaeʼ kajaʼanoʼob Italia, pero le ka tu jubilartuba Gianpieroeʼ binoʼob áantaj Albania. Gianpieroeʼ ku yaʼalik: «K-hijoʼobeʼ nojochchajoʼob Italia, óoxtúul tiʼ letiʼobeʼ binoʼob kajtal tuʼux kʼaʼabéet áantaj. Le xook ‹¿Jeʼel wa u páajtal a máan Macedoniaeʼ?›, jóokʼ tiʼ U Pʼíich Tulumil Kananoʼ, jach tu líiʼsaj k-óol utiaʼal ka xiʼikoʼon xan áantaj tuʼux maas kʼaʼabéet. Káaj k-beetik planes yéetel como yaan in pensióneʼ páajchaj k-bin Albania».

 Utiaʼal u páajtal u bin máak áantaj táanxel tuʼuxeʼ kʼaʼabéet u jach planeartik maʼalob yéetel u beetik jujunpʼéel kʼeexoʼob (Lucas 14:28). Por ejemploeʼ kʼaʼabéet u yilik bix ken u beetil yéetel u gasto. Gwen, le máax tsʼoʼok u yáax chʼaʼchiʼitaʼaloʼ, le kajaʼan kaʼach Inglaterraoʼ tu chʼaʼtuklaj u bin kajtal yiknal u kiik utiaʼal u ahorrar. Sophia yéetel Christoper kajaʼanoʼob xan Inglaterraeʼ ku yaʼalikoʼob: «T-planeartaj kaʼach k-pʼáatal chéen junpʼéel año Albania, utiaʼal u béeytaleʼ t-konaj k-coche yéetel jujunpʼéel muebleʼob. Tu tsʼookeʼ béeychaj k-pʼáatal maas tiempoiʼ».

 Yaan xan jujuntúul sukuʼunoʼobeʼ ku binoʼob kajtal Albania wa jaypʼéel mesesoʼob, tsʼoʼoleʼ ku suutoʼob tu kaajaloʼob meyaj. Beyoʼ ku ahorrarkoʼob taakʼin utiaʼal u béeytal u suutoʼob Albania. Bey tu beetil Eliseo yéetel Miriam, Eliseoeʼ ku yaʼalik: «Tu kaajal Miriameʼ yaʼab u kʼuchul turistaʼobiʼ le oʼolal chéen chʼaʼabil k-kaxtik meyajiʼ. K-meyaj tres mesesiʼ yéetel le uláakʼ nueve mesesoʼ le taakʼin k-náajaltikoʼ ku meyajtoʼon utiaʼal le gastos ku yantaltoʼon Albaniaoʼ, bey t-beetil durante cinco añosoʼ».

 Le máaxoʼob ku binoʼob áantaj tuláakʼ paísoʼoboʼ jejeláas baʼaxoʼob ku aktáantkoʼob, pero jach ku yáantaʼaloʼob tumen le sukuʼunoʼob yanoʼob teʼ múuchʼulil tuʼux ku kʼuchloʼoboʼ. Sophia, le kiik tsʼoʼok k-yáax chʼaʼchiʼitikeʼ ku yaʼalik: «Way Albaniaeʼ jach ku beetik keʼel, maʼ jeʼex le tuʼux kajaʼanen kaʼachoʼ. Junpʼéel baʼax áanten utiaʼal maʼ in jach uʼuyik keʼeleʼ letiʼe in vestirkinba jeʼex u beetik le kiikoʼob kajaʼanoʼob teʼeloʼ». Grzegorz yéetel Sona, u yataneʼ, kajaʼanoʼob kaʼach Polonia baʼaleʼ binoʼob áantaj Prizren, Kosovo. b Grzegorzeʼ ku yaʼalik: «Le sukuʼunoʼoboʼ jach uts u modosoʼob, ku yeʼesik u yutsiloʼob yéetel jach pacienteʼob t-éetel. Maʼ chéen tu kaʼansoʼobtoʼon le idiomaoʼ baʼaxeʼ tu kaʼansoʼobtoʼon tuʼux jeʼel u páajtal k-manik maas barato le baʼaxoʼob kʼaʼabéettoʼonoʼ yéetel bix jeʼel k-manik k-oʼoch teʼ mercadooʼ».

 Le máaxoʼob ku binoʼob áantaj yaanal paísoʼ ku yantaltiʼob yaʼab amigoʼob yéetel yaʼab baʼax ku kankoʼob teʼ tuʼux ku binoʼoboʼ. Sonaeʼ ku yaʼalik: «Tsʼoʼok in wilik bukaʼaj nojchil u yaabilaj Jéeoba. Jach ku muʼukʼaʼantal in fe le kéen in wil bix u kʼexik u kuxtal le máakoʼoboʼ yéetel bix u natsʼkubaʼob yiknal Jéeoba. Chíikaʼan k-ilik Jéeobaeʼ táan u bendecirtik le meyaj k-beetkoʼ. Jach kiʼimak k-óol tumen tsʼoʼok u yantal yaʼab k-amigoʼob, letiʼobeʼ bey k-sukuʼunoʼob yéetel k-kiikoʼobeʼ» (Marcos 10:29, 30). Gloriaeʼ ku yaʼalik: «Junpʼéel baʼax jach líiʼsik in wóoleʼ letiʼe in wilik bix u tsʼaamil u yóol le kiikoʼob u meyajtoʼob Jéeoba kex pʼektaʼaboʼob tumen u vecinoʼoboʼ».

 Uláakʼ utsil ku jóoʼsik le sukuʼunoʼobaʼ letiʼe u kankoʼob túumben baʼaloʼoboʼ. Por ejemploeʼ tsʼoʼok u yilkoʼobeʼ ikil u maas meyajtikoʼob Jéeobaeʼ maas kiʼimak u yóoloʼob. Stefanoeʼ ku yaʼalik: «Teʼ tuʼux kin taaloʼ maases tiʼ interfón ku kʼaʼaytaj máak yéetel chéen u chan súutuk ka wuʼuyaʼal, pero way Albaniaeʼ le máakoʼoboʼ jach uts tu tʼaan u yuʼubikoʼob k-tsikbal. Hasta ku xáantal táan k-tsikbal tu yéeteloʼob, maases wa kulukbal u yukʼoʼob café. Teneʼ kʼas suʼlaken le oʼolal yaan horaeʼ hasta maʼ tin kaxtik baʼax in waʼaltiʼob. Pero bejlaʼeʼ jach kin disfrutartik le kʼaʼaytajoʼ. Jach uts tin wich in tsikbal tu yéeteloʼob, tin tsʼáaj cuentaeʼ jach kʼaʼabéet k-áantik le máakoʼoboʼ».

 Leah yéetel William, u yíichameʼ, lukʼoʼob Estados Unidoseʼ ka binoʼob áantaj Albania. Leaheʼ ku yaʼalik: «Jach tsʼoʼok u yáantkoʼon ichil k-kuxtal úuchik k-taal áantaj way Albaniaeʼ. Tsʼoʼok k-kanik k-eʼes utsil tiʼ u maasil, k-respetarkoʼob yéetel k-bisikba tu yéeteloʼob. Tsʼoʼok k-maas maʼalobkíintik bix k-kʼaʼaytaj yéetel bix u meyajtoʼon le Bibliaoʼ». Williameʼ ku yaʼalik: «Yaʼab tiʼ le máaxoʼob ku taaloʼob xíimbal Albaniaoʼ jach jatsʼuts u yilkoʼob le playaoʼ, teen xaneʼ jach uts tin wich in bin xíimbal teʼ nukuch montañaʼob yaan Albaniaoʼ. Pero le baʼax maas uts tin wichoʼ letiʼe in kʼaʼaytaj tiʼ le máakoʼoboʼ. Yaʼab tiʼ le mejen kaajoʼoboʼ chéen ku yúuchul kʼaʼaytaj kéen yanak campañaʼobiʼ. Le máakoʼob kajaʼanoʼob teʼeloʼ jach uts tu tʼaan u yuʼubikoʼob le kʼaʼaytajoʼ, le oʼolal kéen xiʼikoʼoneʼ jeʼel tak k-tsikbal bul kʼiin tu yéeteloʼobeʼ».

 Le sukuʼunoʼob ku binoʼob áantaj Albaniaoʼ jach ku kiʼimaktal u yóoloʼob le kéen u yiloʼob bix u kʼaʼamal le baʼax ku tsikbaltikoʼoboʼ (1 Tesalonicenses 2:19, 20). Laura, juntúul x-chʼúupal bin áantaj Albaniaeʼ, ku yaʼalik: «Binen áantaj Fier, junpʼéel kaaj yaan Albania, yéetel le ka máan dos años y medioeʼ anchaj 120 publicadoroʼobiʼ. Teneʼ béeychaj in tsʼáaik xook tiʼ16 u túulaliʼ». Uláakʼ juntúul kiik ku kʼaabaʼtik Sandraeʼ ku yaʼalik: «Kʼaʼaytajnajen tiʼ juntúul koʼolel ku meyaj tiʼ junpʼéel mercado, ka máan kʼiineʼ okjaʼanaji chéen baʼaleʼ kʼaʼabéetchaj u suut tu kaajal. Desde ka bineʼ maʼ tin kaʼa iliʼ chéen baʼax tin wojéelteʼ es ke táan u tsʼáaik xook tiʼ 15 u túulal máakoʼob».

 Jujuntúul tiʼ le sukuʼunoʼob binoʼob áantaj Albaniaoʼ láayliʼ tiʼ yanoʼobeʼ yéetel jach kiʼimak u yóoloʼob ikil u yilkoʼob bix u bendecirtik Jéeoba le meyaj ku beetkoʼoboʼ (Eclesiastés 11:6). Christopher, tsʼoʼok k-yáax chʼaʼchiʼitikeʼ ku yaʼalik: «Juntéenjeakeʼ tin wilaj juntúul máak káaj in tsʼáaik xook tiʼ le ka kʼuchen Albaniaoʼ. Jach sorprendernajen ka tu tsikbaltajten kʼajaʼantiʼ tuláakal le baʼax tu kanaj le táan u xookoʼ. Letiʼ yéetel u yataneʼ okjaʼanajoʼob». Federica, tsʼoʼok k-yáax chʼaʼchiʼitikeʼ ku yaʼalik: «Le tiaʼanen tiʼ junpʼéel múuchʼuliloʼ náatsʼ juntúul kiik tin wiknaleʼ ka tu kʼáatajten wa kʼajaʼanten máaxiʼ. Tu yaʼalajteneʼ kʼaʼaytajnajentiʼ walajki nueve añoseʼ. Le maʼ úuch lukʼken binoʼ káaj u xook yéetel okjaʼanaji. Jach kiʼimakchaj in wóol yoʼolal le baʼax úuchoʼ tumen kin tuklik kaʼacheʼ jach maʼ tu tsʼáaj u yich le meyaj t-beetaj Albaniaoʼ».

 Le sukuʼunoʼob binoʼob áantaj Albania yéetel Kosovooʼ jach kiʼimak u yóoloʼob tumen tsʼoʼok u yilkoʼob bix u bendecirtaʼal tumen Jéeoba tuláakal le meyaj ku beetkoʼoboʼ. Eliseo, bin áantaj Albaniaeʼ, ku yaʼalik: «Yaʼab máakeʼ ku tuklikeʼ jach maʼalob u bintiʼ wa yaʼab baʼaloʼob yaantiʼ pero leloʼ maʼ jaajiʼ. Le baʼax jeʼel u yáantkoʼon utiaʼal ka xiʼiktoʼon utsil yéetel ka yanak u biilal k-kuxtaloʼ letiʼe k-beetik baʼax ku kaʼansiktoʼon Jéeobaoʼ. Le in wáantaj Albaniaoʼ tsʼoʼok u yáantken in wil jach jaaj ku bin utsil tiʼ máak kéen u beet baʼax ku yaʼalik Jéeoba. Kin wuʼuyik yaan u biilal in kuxtal yéetel kiʼimak in wóol ikil in múul meyaj yéetel máaxoʼob igual bix táan u xupkubaʼob u meyajtoʼob Jéeoba jeʼex táan k-beetkoʼ». Jach bey u tuukul xan Sandraoʼ, letiʼeʼ ku yaʼalik: «Le ka taalen áantaj way Albaniaeʼ tin wuʼuyaj bey táan u tsʼáaikten Jéeoba u oportunidadil in beetik le baʼax kin tsʼíiboltikoʼ, in beetik in misionerail. Mix bikʼin kin arrepentir úuchik in taal áantaj wayeʼ, jach kiʼimak in wóol ikil in meyajtik Jéeoba».