«Óoliʼ bey junpʼéel fiesta ich láakʼtsilileʼ.» Bey tu yaʼalil u joʼol xookil junpʼéel periódico teʼ Alemaniaoʼ (Frankfurter Rundschau). Tuláakal le máaxoʼob binoʼoboʼ láayliʼ bey tu yaʼaliloʼoboʼ.

«Tin wuʼuyaj bey tin wotoch yaneneʼ», tu yaʼalaj Karla, kajaʼan Puerto Rico.

«Bey ka xiʼiken in xíimbalt in láakʼtsiloʼobeʼ, chéen baʼaleʼ tuláakʼ u tséel le yóokʼol kaaboʼ», tu yaʼalaj Sara, kajaʼan Australia.

¿Baʼaxten bey tu yuʼubilubaʼoboʼ? Tumen binoʼob teʼ asamblea internacional tiʼ u j-jaajkunajoʼob Jéeoba beetaʼab 18 tak 20 tiʼ julio tiʼ 2014 teʼ estadio Commerzbank-Arena tu kaajil Fráncfort del Menooʼ (Alemania). Teʼ asambleaaʼ óoliʼ 37,000 máakoʼob binoʼobiʼ.

U tuukulileʼ ka kaanbalnakoʼob tiʼ le Bibliaoʼ. Ichil le kaʼansaj tsʼaʼab teʼ asambleaoʼ, xoʼok le Bibliaoʼ, anchaj kʼaayoʼob, oracionoʼob, kaʼapʼéel obra de teatro yéetel tsoltʼaanoʼob yaan yil yéetel le Bibliaoʼ.

Le máaxoʼob chʼenxikintoʼ j-Jaajkunajoʼob alemanoʼob, baʼaleʼ taal uláakʼ 3,000 u túulal tiʼ Australia, Estados Unidos, Gran Bretaña, Grecia, Líbano, Serbia yéetel Sudáfrica. Teʼ asambleaoʼ anchaj xan 234 j-Jaajkunajoʼob tiʼ 70 luʼumoʼob bul kʼiin táan u meyajtikoʼob Dios; ichiloʼobeʼ yaan misioneroʼobiʼ.

Jujunpʼéel jaatsoʼob tiʼ le programaoʼ máansaʼab Internet tiʼ 19 kaajoʼob teʼ Alemaniaoʼ bey xan tiʼ uláakʼ kaajoʼob yaan Austria yéetel Suiza. Tuláakal le máaxoʼob il yéetel uʼuy le programaoʼ 204,046 u túulaloʼob.

Teʼ Francfortoʼ le programaoʼ máansaʼab ich alemán, inglés yéetel griego. Tuláakʼ tuʼuxoʼoboʼ le tsoltʼaanoʼoboʼ traducirtaʼab ich uláakʼ 17 idiomaʼob jeʼex árabe, chino, tamil, turco yéetel kaʼapʼéel lenguaje de señas.

Kex jejeláas idioma ku tʼanik le j-Jaajkunajoʼob yéetel kex jejeláas u luʼumiloʼobeʼ junmúuchʼ yaniloʼob. Letiʼe yaabilaj beetik u biskubaʼob maʼaloboʼ (Juan 13:34, 35). Letiʼobeʼ ku tratarkubaʼob bey láakʼtsiloʼobeʼ.

«Tsʼoʼok in tsʼáaik cuentaeʼ tuláakal yóokʼol kaab yaan k-láakʼtsiloʼob. Ichiloʼoneʼ mix máak u pʼekmuba», tu yaʼalaj Tobías, kajaʼan Gran Bretaña.

«Tsʼoʼok in kʼaj óoltik j-Jaajkunajoʼob tiʼ maanal 20 luʼumoʼob. In waʼalikeʼ le yaabilaj k-uʼuyik yoʼolal u maasil yéetel yoʼolal Jéeobaoʼ letiʼe baʼax beetik k-bisikba jach maʼaloboʼ», tu yaʼalaj Davianna, kajaʼan Puerto Rico.

«Teneʼ tiʼ junpʼéel chan kaaj tin beetinba u j-jaajkunaj Jéeoba —​tu yaʼalaj Malcom, kajaʼan Australia​—. In xokmaj yéetel in chaʼantmaj tiʼ videoʼob le bix u biskuba k-sukuʼunoʼob tiʼ tuláakal yóokʼol kaaboʼ, pero beoraaʼ tin wichil tin wilaj jach tu jaajil beyoʼ. Maas muʼukʼaʼanchaj in fe.»

Le j-Jaajkunajoʼob tiʼ 58 múuchʼuliloʼob yanoʼob Fráncfort yéetel naatsʼ tiʼoʼ yaʼab baʼaloʼob tu beetoʼob utiaʼal u síiʼob tiʼ le máaxoʼob taaloʼob teʼ asambleaoʼ bey xan utiaʼal u náaysik u yóoloʼob.

«Jach jatsʼuts bix úuchik k-kʼaʼamal —​tu yaʼalaj Cynthia, kajaʼan Estados Unidos​—. Mix bikʼin ken in tuʼubs le nojoch yaabilaj, le utsil yéetel uláakʼ jatsʼuts modos tu yeʼesoʼobten in sukuʼunoʼoboʼ.»

«Tuláakal tuʼux ku yilaʼal le yaabilajoʼ. Tuláakloʼob táan u cheʼejoʼob yéetel táan u tsikbaloʼob kiʼimak u yóoloʼob. Yaʼab baʼaxoʼob páajchaj k-kanik tiʼ letiʼob», tu yaʼalaj Simon, kajaʼan Alemania.

«Le náaysaj óoloʼob beetaʼab ka tsʼoʼok le asambleaoʼ tu yeʼeseʼ u j-jaajkunajoʼon Jéeobaeʼ maʼ nak óol k-kuxtaliʼ. Toʼoneʼ k-ojel k-divertirtba yéetel baʼaloʼob maʼalobtak», tu yaʼalaj Amy, kajaʼan Australia.

Le asamblea beetaʼab Francfortoʼ chéen junpʼéel tiʼ le jejeláas asamblea internacionaloʼob beetaʼan tiʼ 9 luʼumoʼoboʼ.

Le ka kʼáataʼab tiʼ juntúul tiʼ le máaxoʼob binoʼob teʼ asamblea bix tu yuʼubilubaoʼ, tu yaʼalaj: «Máans ta tuukuleʼ ka kʼaj óoltik juntúul a láakʼtsil, maʼ xaaneʼ juntúul a sukuʼun, maʼ a wojel kaʼach wa yaniʼ. Letiʼeʼ ku kʼamkech tu yotoch yéetel ku jeʼiktech u puksiʼikʼal. Leloʼ ku beetik u kiʼimaktal a wóol, ¿máasaʼ? Beoraaʼ multiplicart tu yoʼolal le 37,000 máakoʼob binoʼoboʼ. Bey úuchik in wuʼuyikinba teʼ asambleaoʼ.»