LE PAALALOʼOBOʼ TAAK U YOJÉELTIKOʼOB
¿Kʼaas wa u beetik máak u homosexualil?
«Junpʼéel tiʼ le baʼaxoʼob jach difícil tin wilil le táan in nojochtaloʼ letiʼe u yutstal tin wich uláakʼ xiʼipalaloʼoboʼ. Kin tuklik kaʼacheʼ yaan u máan. Chéen baʼaleʼ tak bejlaʼa láayliʼ bey in wuʼuyikinbaoʼ» (David, 23 años).
Davideʼ ku meyajtik Dios yéetel u kʼáat u beet baʼax ku yaʼalik. Chéen baʼaleʼ juntúul máak jeʼex letiʼeʼ, ¿jeʼel wa u páajtal u beetik baʼax ku yaʼalik Dioseʼ? ¿Baʼax ku tuklik Dios yoʼolal le homosexualoʼoboʼ?
¿Baʼax ku yaʼalik le Bibliaoʼ?
Jeʼex u máan le tiempooʼ bey u bin u kʼexpajal bix u yilaʼal le homosexualidad tumen le máakoʼoboʼ. Chéen baʼaleʼ toʼon máaxoʼon meyajtik Jéeobaeʼ maʼ t-tuukul jeʼex u maasil máakoʼoboʼ. Tumen jeʼex u yaʼalik Efesios 4:14, maʼ k-kʼáat ka bisaʼakoʼon «bey jeʼex junpʼéel barco ku máan yóoʼ kʼáaʼnáab ku suʼusutaʼal tumen le iikʼoʼ yéetel ku yuyunchʼintaʼal tumen u olasil le jaʼoʼ». Teʼ Biblia k-jóoʼsik le baʼax k-tuklik yoʼolal le homosexualoʼoboʼ bey xan le uláakʼ baʼaloʼob suuk u beetaʼal tumen le máakoʼoboʼ.
Le Bibliaoʼ jach claro u yeʼesik baʼax ku tuklik Dios yoʼolal le homosexualidadoʼ. Koʼox ilik baʼax ku yaʼalik.
«Maʼ unaj a múul chital yéetel a wéet xiibil jeʼex a múul chital yéetel juntúul koʼoleleʼ» (Levítico 18:22).
«Jeʼex u tsʼíiboltkoʼob tu puksiʼikʼaloʼoboʼ [...] Dioseʼ tu chaʼaj u binoʼob tu paach le baʼaloʼob suʼtsiltak ku tsʼíiboltkoʼob yaan yil yéetel le núupchitaloʼ, tumen le koʼoleloʼoboʼ xuʼul u yantal baʼal u yiloʼob yéetel xiiboʼobeʼ ka joʼopʼ u yantal baʼal u yiloʼob yéetel u yéet koʼoleliloʼob kex maʼ bey u tsʼaamil Diosoʼ» (Romanos 1:24, 26).
«Maʼ a tuskabaʼex. Tumen le máaxoʼob ku núupkʼebantaloʼoboʼ, le ku adorarkoʼob imagenoʼoboʼ, le ku tusik u núupoʼoboʼ, le xiiboʼob ku núupchitaloʼob yéetel u yéet xiibiloʼoboʼ, le ku yookoloʼoboʼ, le ku píitmáan u tsʼíiboltkoʼob wa baʼaxoʼ, le ku káaltaloʼoboʼ, le ku poochʼiloʼoboʼ bey xan le máaxoʼob ku tokikoʼob le baʼax yaan tiʼ uláakʼ máakoʼ, mix juntúul tiʼ letiʼob ken u tiaʼalintoʼob u Reino Diosiʼ» (1 Corintios 6:9, 10).
U jaajileʼ le baʼax ku yaʼalik le Bibliaoʼ tsʼíibtaʼan utiaʼal tuláakal máak. Kex wa xiib bey xan wa koʼolel máakeʼ unaj u controlartik le baʼaxoʼob ku tsʼíiboltik utiaʼal maʼ u beetik baʼax u pʼeek Diosoʼ (Colosenses 3:5).
¿U kʼáat wa túun u yaʼaleʼ...?
¿U kʼáat wa túun u yaʼaleʼ le Bibliaoʼ ku yaʼalik kʼaʼabéet k-pʼektik le homosexualoʼoboʼ (homofobia)?
Maʼatech, le Bibliaoʼ ku kaʼansikeʼ maʼ unaj k-pʼektik mix máakiʼ. Ku yaʼalikeʼ kʼaʼabéet u yantaltoʼon «jeetsʼelil yéetel tuláakal máak» kex jeʼel bixak kuxlikoʼobeʼ (Hebreos 12:14). Le oʼolaleʼ maʼ maʼalob ka burlartaʼak, ka chʼaʼpachtaʼak wa ka maltratartaʼak le homosexualoʼoboʼ.
¿U kʼáat wa túun u yaʼaleʼ le máaxoʼob meyajtik Diosoʼ kʼaʼabéet u tsʼáaikubaʼob tu contra le leyoʼob ku chaʼik u tsʼoʼokol u beel le homosexualoʼoboʼ?
Le Bibliaoʼ ku yaʼalikeʼ Dioseʼ u yaʼalmeʼ chéen unaj u tsʼoʼokol u beel juntúul xiib yéetel juntúul koʼolel (Mateo 19:4-6). Le máaxoʼob meyajtik Diosoʼ maʼ tu apoyarkoʼob yéetel maʼ tu tsʼáaikubaʼob tu contra le leyoʼob ku chaʼik u tsʼoʼokol u beel le homosexualoʼoboʼ. Tumen le leyoʼobaʼ yaan yil yéetel política, yéetel le Bibliaoʼ ku yaʼalikeʼ maʼ unaj k-oksikba tiʼ políticaiʼ (Juan 18:36).
¿Kux túun wa...?
¿Kux túun wa homosexual máakeʼ? ¿Jeʼel wa u páajtal u kʼexik u kuxtaleʼ?
Jeʼeleʼ. Le Bibliaoʼ ku yaʼalikeʼ jujuntúul máakoʼob teʼ yáax siglooʼ páajchaj u kʼexik u kuxtaloʼob. Teʼ carta tu tsʼíibtaj apóstol Pablo tiʼ le corintoiloʼoboʼ tu yaʼaleʼ le homosexualoʼoboʼ maʼ ken u tiaʼalintoʼob u Reino Dios. Chéen baʼaleʼ tu yaʼalaj xan tiʼob: «Jujuntúul tiʼ teʼexeʼ beyeʼex kaʼachoʼ» (1 Corintios 6:11).
¿U kʼáat wa túun u yaʼaleʼ le máaxoʼob xuʼul u beetik u homosexualiloʼoboʼ junpuliʼ maʼ tu tsʼíiboltoʼob le kuxtal yaantiʼob kaʼachoʼ? Maʼatech. Le Bibliaoʼ ku yaʼalik: «Búukinteʼex le túumben modosoʼ, ikil u yantalteʼex chúukaʼan kʼaj óolalileʼ ku bin u túumbenchaj[loʼob]» (Colosenses 3:10). Jeʼex k-ilkoʼ jujunpʼíitil u kʼexik u kuxtal máak.
¿Kux túun wa yaan máax taak u beetik baʼax ku yaʼalik Dios, pero láayliʼ ku tsʼíiboltik u beetik u homosexualileʼ?
U jaajileʼ cada juntúul unaj u chʼaʼtuklik wa yaan u beetik le baʼaxoʼob ku tsʼíiboltikoʼ wa yaan u controlarkuba. ¿Bix túun jeʼel u controlartik u tsʼíibolal máakeʼ? Le Bibliaoʼ ku yaʼalik: «Maʼ u xuʼulul a nuʼuktikabaʼex yéetel le espíritu santooʼ, beyoʼ maʼ kan lúubleʼex tiʼ mix junpʼéel u tsʼíibolal a kʼeban wíinklileʼex» (Gálatas 5:16).
Jeʼex k-ilkoʼ le tekstooʼ maʼ tu yaʼalik wa maʼ tun kaʼa antal kʼaakʼas tsʼíibolal tiʼ máakiʼ, baʼaxeʼ ku yaʼalik kʼaʼabéet k-xokik le Bibliaoʼ yéetel k-orar mantatsʼ. Beyoʼ yaan u páajtal u controlarkuba máak yéetel maʼ ken u beet le baʼaloʼob kʼaastak ku tsʼíiboltikoʼ.
David, le xiʼipal t-aʼalaj tu káajbaloʼ béeychaj u controlartik u tsʼíibolaloʼob le ka tsʼoʼok u tsikbaltik tiʼ u papá le baʼax ku yúuchultiʼoʼ. Letiʼeʼ ku yaʼalik: «Tin wuʼuyaj sáalchaj in kuuch. In tuklikeʼ wa ka in tsikbalt desde antes tiʼ in papáʼob baʼax ku yúuchulteneʼ jeʼel in maas disfrutartik kaʼach in paalileʼ».
U jaajileʼ maas ku kiʼimaktal u yóol máak wa ku beetik baʼax ku yaʼalik Jéeoba, tuláakal le baʼaxoʼob ku yaʼalik «ka beetaʼakoʼ sen maʼalobtak» yéetel «ku kiʼimakkúuntik u yóol u puksiʼikʼal máak». Wa k-beetik baʼax ku yaʼalik Jéeobaeʼ jach yaan u bintoʼon maʼalobil (Salmo 19:8, 11).
