«Tsʼoʼok u káajal in xokik le Bibliaoʼ, pero kin wuʼuyik mix bikʼin ken in tsʼoʼokseʼ tumen jach táaj yaʼab u xookil» (Briana, 15 años).

 Wa bey u yúuchultech xanoʼ le xookaʼ jach a tiaʼal.

•  ¿Baʼaxten jach kʼaʼanaʼan u xoʼokol le Bibliaoʼ?

•  Jejeláas bix jeʼel u xoʼokol le Bibliaoʼ

•  Baʼax ku yaʼalik uláakʼ paalaloʼob

 ¿Nak óolil wa a wilik u xookil le Bibliaoʼ? Maʼ xaaneʼ bey a tuukuloʼ tumen le Bibliaoʼ jach yaʼab u páginailoʼob, tsʼoʼoleʼ mix junpʼéel dibujo yaantiʼ. ¿Máasaʼ jach jelaʼan tiʼ le baʼaloʼob ku máansaʼal tiʼ televisión yéetel tiʼ le videoʼoboʼ?

 Jáan tukult lelaʼ, koʼox aʼalikeʼ techeʼ ka kaxtik junpʼéel nuxiʼ baúl tuʼux yaan junpʼéel tesoro. ¿Máasaʼ yaan a wilik a jeʼekʼabtik tu séebaʼanil?

 Le Bibliaoʼ bey jeʼex le baúloʼ yaan xan junpʼéel tesoro ichil. Le baʼax ku yaʼalikoʼ yaan u yáantkech utiaʼal:

•   A chʼaʼtuklik beetik baʼax maʼalob.

•   A biskaba maʼalob yéetel a papáʼob.

•   A kaxtik maʼalob amigoʼob.

•   Maʼ a sen estresar.

 ¿Jeʼel wa u yáantkoʼon le Biblia kex jach úuch tsʼíibtaʼakoʼ? Jeʼeleʼ tumen «tuláakal Tsʼíibeʼ tiʼ Dios u taal» (2 Timoteo 3:16). Leloʼ ku yeʼesikeʼ tuláakal baʼax ku yaʼalik le Bibliaoʼ tiʼ Dios u taal.

 Yáaxeʼ jeʼel u páajtal a xokik desde tu káajbal tak tu tsʼoʼokbaleʼ. Lelaʼ yaan u yáantkech a wojéelt tiʼ baʼax ku tʼaan le Bibliaoʼ. Maʼ chéen junpʼéeliliʼ bix jeʼel a xokikeʼ, koʼox ilik kaʼapʼéeliʼ:

•    Jeʼel u páajtal a xokik desde Génesis tak Apocalipsis.

•    Jeʼel xan u páajtal a xokik le Biblia según le fecha ka úuch cada junpʼéel baʼaloʼ.

 Beet lelaʼ: Teʼ Biblia Túumben Luʼum teʼ jaats 1-G, tu tsoolol u yaʼalik baʼax tu beetaj Jesús le ka taal way Luʼumeʼ.

 U kaʼapʼéeleʼ yéey junpʼéel tsikbalil tiʼ le Biblia jeʼel u yáantkech yéetel junpʼéel problema yaantecheʼ. Koʼox ilik jujunpʼéel ejemploʼob:

•   ¿A kʼáat ka yanaktech maʼalob amigoʼob? Xok u tsikbalil David yéetel Jonatán (1 Samuel, capítulo 18 tak 20). Utiaʼal a wilik baʼax jeʼel a kanik tiʼ le tsikbalilaʼ beet baʼax ku yaʼalik le jaats ku kʼaabaʼtik «Cómo encontrar amigos de verdad».

•   ¿A kʼáat wa a wojéelt baʼax jeʼel a beetik utiaʼal maʼ a lúubul tiʼ kʼebaneʼ? Wa beyoʼ xok u tsikbalil José yéetel ilawil baʼax tu beetaj utiaʼal maʼ u lúubul tiʼ kʼeban (Génesis, capítulo 39). Kéen tsʼoʼokkeʼ jeʼel u páajtal a beetik le baʼax ku yaʼalik le jaats «Cómo resistir las tentaciones» yéetel «Acusado falsamente».

•   ¿A kʼáat a wojéelt bix u yáantik máak le oraciónoʼoboʼ? Xok u tsikbalil Nehemías (Nehemías, capítulo 2). Utiaʼal a kanik u maasileʼ beet baʼax ku yaʼalik le jaats «Jehová contestó su oración».

 Beet lelaʼ: Le kéen a xok le Bibliaoʼ kaxt junpʼéel lugar tuʼux mix baʼal jeʼel u náaysik a wóoleʼ.

 U yóoxpʼéeleʼ yéey junpʼéel Salmo wa junpʼéel tsikbalil tiʼ le Biblia utiaʼal a xokikoʼ, tsʼoʼoleʼ ka tuklik bix jeʼel u yáantkecheʼ. Tuukulnen tiʼ le preguntaʼobaʼ:

•    ¿Baʼaxten Jéeobaeʼ tu beetaj u tsʼíibtaʼal teʼ Biblia le tsikbalilaʼ?

•    ¿Baʼax ku kaʼansikten yoʼolal Jéeoba?

•    ¿Bix jeʼel u yáantken ichil in kuxtaleʼ?

 Beet lelaʼ: Tsʼíibt baʼax kʼiin ken a káajs a xokik le Bibliaoʼ. Jeʼel u páajtal u meyajtech «U programail u xookil le Bibliaoʼ» lelaʼ tiaʼan ich Interneteʼ.