¿Ka creertik wa Dios beetmil tuláakal baʼal? U jaajileʼ maʼ chéen teech creerkiʼ, yaan uláakʼ paalaloʼob yéetel nukuch máakoʼob creertik Dios beetmil tuláakal baʼal. Baʼaleʼ yaan xan máaxoʼob aʼalikeʼ chéen bey anchajik tuláakal baʼaloʼ.

 ¿A wojel wa? Yaan máakoʼobeʼ jach seguroʼob kéen u yaʼaloʼob: «Kin creertik Dios» wa «Kin creertik le evoluciónoʼ». Pero maʼ u yojel u tsoloʼob baʼaxten ku creerkoʼobiʼ.

•   Yaʼabeʼ ku creertik yaan Dios tumen letiʼe baʼax kaʼansaʼabtiʼ teʼ iglesiaoʼ.

•   Yaʼabeʼ ku creertik le evoluciónoʼ tumen letiʼe baʼax kaʼansaʼabtiʼ teʼ escuelaoʼ.

 Le xookoʼob ku kʼaabaʼtik «¿Bix yanchajik tuláakal baʼal?», yaan u yáantkech utiaʼal a kanik a tsol baʼaxten ka creertik yaan Máax beetmil tuláakal baʼal. Pero anteseʼ kʼaʼabéet a tuukul tiʼ le pregunta jach importanteaʼ:

 ¿Baʼaxten kʼaʼabéet a tuukul tiʼ le preguntaaʼ? Tumen le Bibliaoʼ ku yaʼalikeʼ maʼ unaj a jáan creertik jeʼel baʼaxakeʼ (Romanos 12:1). Táanileʼ unaj a wilik baʼaxten ka creertik yaan Dios. U creertaʼal yaan Dioseʼ maʼ chéen yaan yil yéetel...

•  ... bix u yuʼubikuba máakiʼ («Kin wuʼuyik bey yaan juntúul máax maas jach nojoch u podereʼ»).

•  ... baʼax ku creertik u maasiliʼ («Le máaxoʼob yéetel kin biskinbaoʼ ku creerkoʼob yaan Dios»).

•  ... le baʼax u kʼáat u maasil ka a creertoʼ («In láakʼtsiloʼobeʼ ku yaʼalikoʼobeʼ kʼaʼabéet in creertik yaan Dios»).

 Teech kʼaʼabéet a convencerkaba de ke jach tu jaajil yaan Dios.

 Techeʼ ¿baʼaxten ka creertik yaan Dios? Utiaʼal a maas creertik jach tu jaajil yaneʼ ilawil le jaats «¿Baʼaxoʼob eʼesikten jach tu jaajil yaan Dios?». Tsʼoʼoleʼ jeʼel xan u yáantkech le baʼax ku yaʼalik uláakʼ paalaloʼobaʼ.

 Teresaeʼ ku yaʼalik: «Le kéen in wuʼuy u tsolik le maestro bix u meyaj u wíinklil máakoʼ kin maas convencerkinba de ke jach tu jaajil yaan Dios. Tuláakal le partes yaan t-wíinkliloʼ yaan tiʼ baʼax ku meyaj, kex chan chichan. U suukileʼ maʼatech k-ilik bix u meyaj tuláakal baʼax yaan t-wíinklil. ¡Pero jach impresionante bix u meyaj!».

 Richardeʼ ku yaʼalik: «Le kéen in wil junpʼéel nuxiʼ edificio, junpʼéel barco wa junpʼéel cocheeʼ kin waʼalik: ‹Le máax beetoʼ jach túun yaan u naʼat›. Por ejemploeʼ junpʼéel cocheeʼ kex jach yaʼab u piezasileʼ tuláakal ku meyaj tubeel. Wa yaan máax beet junpʼéel cocheeʼ, le wíinklil xanoʼ yaan Máax beete».

 Kareneʼ ku yaʼalik: «Tsʼoʼok u bisik u cientosil años u naʼataʼal bix beetaʼabik le kaʼan yéetel tuláakal le baʼaxoʼob yanoʼ. Lelaʼ béeychaj yoʼolal le bukaʼaj xook u beetmaj le científicoʼoboʼ. ¿Baʼaxten túun le máakoʼoboʼ maʼ tu aceptarkoʼob de ke yaan juntúul Máax jach yaan u naʼat beetmil tuláakal le baʼaloʼoboʼ?».

 Anthonyeʼ ku yaʼalik: «Mientras maas táan in xokik cienciaeʼ maas kin convencerkinba de ke maʼ anchaj evolucióniʼ. Impresionante bix u meyaj tuláakal le baʼaxoʼob yaan way Luʼumoʼ, bey xan le bix u tuukul wíinikoʼ. Le máaxoʼob kaʼansik le evoluciónoʼ ku yaʼalikoʼobeʼ wíinikeʼ tiʼ baʼalcheʼ u taal, pero maʼ páajchajak u tsolkoʼob baʼaxten wíinikeʼ jelaʼan tiʼ baʼalcheʼ. In tuklikeʼ le máaxoʼob creertik le evoluciónoʼ kʼaʼabéet jach yaan u fejoʼob utiaʼal u creerkoʼob le baʼax ku kaʼansaʼaltiʼoboʼ».

 ¿Baʼax jeʼel in waʼalik tiʼ in wéet xookoʼob wa ku burlarkenoʼob tumen kin creertik Dios beetmil tuláakal baʼal? ¿Kux túun wa ku yaʼalikoʼobten de ke le cienciaoʼ tsʼoʼok u yeʼesik jaaj le evoluciónoʼ?

 Kiʼimakchaj a wóol yoʼolal le baʼaxoʼob ka creerkoʼ, maʼ a suʼlaktal tiʼ u maasil (Romanos 1 :16). Kʼaʼajaktech lelaʼ:

1.   Maʼ chéen teech creertik yaan Diosiʼ, yaʼab uláakʼ máakoʼob creertik. Yaʼab científicoʼob yéetel uláakʼ máakoʼob kaʼanchajaʼan u xookoʼobeʼ ku creerkoʼob yaan Dios.

2.   Yaan máaxeʼ maʼ tu naʼatik baʼaxten Dioseʼ ku chaʼik u yúuchul wa baʼax. Le máaxoʼob maʼatech u creerkoʼob wa yaan Diosoʼ ku beetkoʼob preguntaʼob jeʼex lelaʼ: «Wa jach tu jaajil yaan Dioseʼ, ¿baʼaxten ku chaʼik u yúuchul baʼaloʼob kʼaastak?». Kex ku creerkoʼob le evoluciónoʼ, pero ku yeʼeskoʼob kʼuuxoʼob tu contra Dios.

3.   Tuláakal máak ku yuʼubik kʼaʼabéet u natsʼkuba tiʼ Dios (Mateo 5:3). Deporsi beetaʼaboʼon utiaʼal k-creertik yaan Dios. Jeʼex túun k-ilkoʼ maʼ letiʼe máaxoʼob ku creerkoʼob yaan Dios unaj u yaʼalikoʼob baʼaxten ku creerkoʼobiʼ, baʼaxeʼ letiʼe máaxoʼob maʼatech u creerkoʼob wa yaan Diosoʼ (Romanos 1:18-20).

4.   Maʼ junpʼéel baʼal jelaʼan u creertaʼal yaan Diosiʼ. Yaʼab baʼax eʼesik de ke maʼ chéen bey anchajik le kuxtaloʼ. Mix máak béeychajak u comprobartik de ke bey úuchikoʼ. Mix baʼal ku yantal chéen beyoʼ.

 Wa ka kʼaʼabéetchajak a tsolik baʼaxten ka creertik yaan Dioseʼ, ¿baʼax jeʼel a waʼalikeʼ? Ilawil baʼax jeʼel u yáantkecheʼ.

 Wa yaan máax ku yaʼaliktech: «Chéen le máaxoʼob ignoranteʼob ku creerkoʼob yaan Diosoʼ».

 Jeʼel u páajtal a núukiktiʼeʼ: «¿Jach wa tu jaajil beyoʼ? Juntéeneʼ tin xokajeʼ beetaʼab junpʼéel encuesta tiʼ maas tiʼ 1,600 profesoroʼob ku kaʼanskoʼob ciencias teʼ universidadoʼob maas kʼaj óolaʼanoʼoboʼ. U maas yaʼabil tiʼ letiʼobeʼ maʼ tu yaʼaloʼob wa ateoʼobiʼ mix agnósticoʼobiʼ. a A tuklikeʼ le profesoroʼobaʼ, ¿ignoranteʼob tumen ku creerkoʼob yaan Dios?».

 Wa yaan máax ku yaʼaliktech: Wa jach tu jaajil yaan Dioseʼ, ¿baʼaxten túun ku chaʼik u yúuchul baʼaloʼob kʼaastak?».

 Jeʼel u páajtal a núukiktiʼeʼ: «Yaan máakoʼobeʼ maʼ tu creerkoʼob wa yaan Dios tumen maʼ tu naʼatkoʼob baʼaxten ku chaʼik u yúuchul wa baʼax. ¿Maʼ wa letiʼe baʼax uchaʼantechoʼ? [Chaʼa u núukik]. Le Bibliaoʼ tsʼoʼok u yáantken in naʼat baʼaxten ku chaʼik Dios u yúuchul baʼaloʼob kʼaastak. In kʼáat in weʼestech le baʼax tsʼoʼok in kanikoʼ, ¿bix a wilik?».

 Tiʼ uláakʼ xookoʼobeʼ yaan k-ilik baʼax uláakʼ eʼesik maʼ jaaj le evoluciónoʼ.