Le apóstol Pablooʼ tu yaʼalaj: «Le kéen in wóot in beet baʼax maʼalobeʼ ku kʼatkuba tin táan le baʼax maʼ maʼaloboʼ» (Romanos 7:21). ¿Yaan wa kʼiin tsʼoʼok a wuʼuyikaba beyoʼ? Wa tsʼoʼokeʼ le xookaʼ jach jeʼel u yáantkech utiaʼal a wilik baʼax jeʼel a beetik utiaʼal maʼ a lúubul tiʼ baʼax kʼaas wa tiʼ le tentaciónoʼoboʼ.

•  Baʼax unaj a chʼaʼik en cuenta

•  Baʼax jeʼel u páajtal a beetkeʼ

•  Baʼax ku yaʼalik uláakʼ paalaloʼob

 A sen presionartaʼal utiaʼal a beetik baʼax kʼaas. Le Bibliaoʼ ku yaʼalikeʼ «u biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak» (1 Corintios 15:33). Wa ka sen presionartaʼal tumen u maasileʼ jeʼel u beetik u káajal a tsʼíiboltik «a beetik baʼaloʼob kʼaastak chéen tumen bey u beetik u maasil máakoʼoboʼ» (Éxodo 23:2).

 Jeremyeʼ ku yaʼalik: «Yaan kʼiineʼ chéen tumen a kʼáat lúubul utsil tiʼ u maasileʼ ku káajal a beetik tuláakal le baʼaxoʼob ku beetkoʼoboʼ».

 Tukult lelaʼ: Wa ka sen tuklik bix a wilaʼal tumen u maasileʼ, ¿máasaʼ maas fácil jeʼel a lúubul tiʼ baʼax kʼaas wa tiʼ junpʼéel tentacióneʼ? (Proverbios 29:25).

 Baʼax k-kanik: Maʼ u xuʼulul a beetik baʼax maʼalob chéen tumen táan a sen presionartal tumen u maasil utiaʼal a beetik baʼax kʼaas.

 Kʼaʼabéet seguroech tiʼ baʼax ka creertik. Wa ku káajal a dudar tiʼ baʼax ka creerkeʼ yaan u suʼusutkech u maasil jeʼel bix u kʼáatoʼobeʼ, jeʼel bix u beetaʼal yéetel junpʼéel marionetaeʼ. Le oʼolal maas maʼalob ka a beet baʼax ku yaʼalik le Bibliaaʼ: «Xakʼalteʼex tuláakal baʼal utiaʼal ka a wileʼex wa maʼalob. Chʼíikikeʼex a beeteʼex baʼax maʼalob» (1 Tesalonicenses 5:21). Wa seguroech tiʼ baʼaxoʼob ka creerkeʼ maʼ tun jáan kaʼapʼéeltal a tuukul yéetel maas chéen chʼaʼabil ken a beet baʼax maʼalob.

 Tukult lelaʼ: ¿Baʼaxten maas maʼalob ka a beet le baʼax ku yaʼalik Diosoʼ?

 Kimberlyeʼ ku yaʼalik: «Tsʼoʼok in tsʼáaik cuentaeʼ kéen in beet le baʼaxoʼob kin creertik yéetel maʼ tin lúubul tiʼ baʼax kʼaasoʼ kin maas respetartaʼal tumen u maasil».

 Kaanbalnen tiʼ Daniel. Kex chéen juntúul táankelmeʼ letiʼeʼ «tu chʼaʼtuklaj ichil u puksiʼikʼal» u beetik baʼax ku yaʼalik Dios (Daniel 1:8).

 Ilawil baʼax a debilidad. Le Bibliaoʼ ku tʼaan tiʼ «le tsʼíibolaloʼob ku taasik le táankelmiloʼ». U kʼáat u yaʼaleʼ tu táankelmil máakeʼ jach ku yaʼabtal u tsʼíibolaloʼob (2 Timoteo 2:22). Maʼ chéen le tsʼíibolaloʼob yaan u yil yéetel sexooʼ, baʼaxeʼ tak le u tsʼíiboltik u lúubul utsil tiʼ u maasil yéetel u beetik chéen baʼax u kʼáat kex todavía maʼ preparadoiʼ.

 Tukult lelaʼ: Le Bibliaoʼ ku yaʼalikeʼ «cada juntúuleʼ ku probartaʼal kéen jíiltaʼak yéetel kéen táabsaʼak tumen u tsʼíibolal» (Santiago 1:14). Techeʼ ¿baʼax tsʼíibolaliloʼob maas tentarkech a beet baʼax kʼaas?

 Sylviaeʼ ku yaʼalik: «Ilawil máakalmáak le tsʼíibolaloʼob yaantechoʼ yéetel kaxt información. Tsʼoʼoleʼ tsʼíibt le baʼaxoʼob jeʼel u yáantkech utiaʼal maʼ a chaʼik u ganarkechoʼ. Beyoʼ le kéen tentartaʼakech a beet baʼax kʼaaseʼ a wojel baʼax ken a beete».

 Kaanbalnen tiʼ David. Yaan kʼiineʼ letiʼ kaʼacheʼ ku beetik chéen baʼax ku yaʼalik u maasil wa chéen le baʼaxoʼob ku tsʼíiboltikoʼ. Chéen baʼaleʼ ka máan kʼiineʼ kaanbalnaj tiʼ le baʼax kʼaas tu beetoʼ yéetel tu yilaj maʼ u kaʼa beetik. Letiʼeʼ tu yaʼalaj tiʼ Jéeoba ich oración: «In Dios, beet u yantalten junpʼéel puksiʼikʼal limpio, beet u yantalten junpʼéel maʼalob tuukul utiaʼal maʼ in náachtal tiʼ teech» (Salmo 51:10).

 Maʼ a chaʼik u controlarkech. Le Bibliaoʼ ku yaʼalik: «Maʼ a chaʼik u tsʼáanchaʼatkech le kʼaasoʼ» (Romanos 12:21). Leloʼ u kʼáat u yaʼaleʼ maʼ unaj a chaʼik u ganarkech a kʼaakʼas tsʼíibolaloʼobiʼ. Techeʼ jeʼel u páajtal a yéeyik a beetik baʼax maʼalobeʼ.

 Tukult lelaʼ: ¿Baʼax jeʼel a beetik utiaʼal maʼ a chaʼik u controlarkech a tsʼíibolaloʼob yéetel a beetik baʼax maʼalob le kéen tentartaʼakecheʼ?

 Sophiaeʼ ku yaʼalik: «Kin tuukul tiʼ le consecuencias ken u taasten wa ka in beet le baʼax kin tsʼíiboltikoʼ. Maʼ xaaneʼ yaan u kiʼimaktal in wóol junsúutuk, chéen baʼaleʼ despuéseʼ yaan in jach chiʼichnaktal. Le oʼolal kin tuklik: ¿Ku valer wa u penail? U jaajileʼ maʼ».

 Kaanbalnen tiʼ Pablo. Letiʼeʼ tu yaʼaleʼ yaan kʼiineʼ ku tentartaʼal u beet baʼax kʼaas, pero maʼ tu chaʼa u ganartaʼaliʼ. Letiʼeʼ tu yaʼaleʼ ku controlartik u wíinklil yéetel ku nuʼuktik bey juntúul esclavoeʼ (1 Corintios 9:27).

 Baʼax k-kanik: Le kéen tentartaʼakech a beet baʼax kʼaaseʼ teech ken a wil baʼax ken a beete. Techeʼ jeʼel u páajtal a controlartik a tsʼíibolaloʼobeʼ.

 Kʼaʼajaktecheʼ le tentaciónoʼoboʼ maʼ utiaʼal mantatsʼiʼ. Melissa, yaan 20 años tiʼeʼ ku yaʼalik: «Tin x-lóoʼbayanileʼ yaan tiʼ le tentaciónoʼob ku yantaltenoʼ jach nuuktak in wilik, chéen baʼaleʼ bejlaʼeʼ kin wilkeʼ mix baʼal u biilaloʼob». Ku yaʼalik xan: «In tuukul tiʼ leloʼ ku yáantken in wileʼ le tentaciónoʼob yaanten bejlaʼeʼ maʼ utiaʼal mantatsʼiʼ. Yaan u kʼuchul u kʼiinil in wilkeʼ le úuchik in rechazartikoʼoboʼ letiʼe maas maʼalob decisión tin chʼaʼoʼ».