Utiaʼal u yeʼesik máakalmáak u jaajil religióneʼ le Bibliaoʼ ku ketik beyaʼ: «Tu yoʼolal le ich ku tsʼáaikoʼoboʼ tiʼ ken a kʼaj óolteʼex máaxoʼobiʼ. ¿Máasaʼ maʼatech u tʼoʼokol uvaʼob mix higoʼob tiʼ kʼiʼixoʼob?» (Mateo 7:16). ¿Máasaʼ séebaʼan u yilaʼal u jelaʼanil junpʼéel u matail kʼiʼix tiʼ junpʼéel u matail uva? Bey xan u yúuchul yéetel le religiónoʼoboʼ, tu yoʼolal u yichoʼob wa baʼax ku beetkoʼobeʼ, ku páajtal k-kʼaj óoltik máakalmáak u jaajil.

1.   Le jaajil religiónoʼ maʼatech u kaʼansik chéen u tʼaan wíinik, baʼaxeʼ ku kaʼansik u tʼaan Dios (Juan 4:24; 17:17). Por ejemploeʼ ku kaʼansik baʼax ku yúuchul tiʼ máak kéen kíimik yéetel baʼax oʼolal tu beetaj Dios le Luʼumaʼ (Salmo 37:29; Isaías 35:5, 6; Ezequiel 18:4). Tsʼoʼoleʼ le jaajil religiónoʼ maʼ sajak u yaʼal maʼ jaaj le baʼaxoʼob ku kaʼansik le u maasil religiónoʼoboʼ (Mateo 15:9; 23:27, 28).

2.   Le jaajil religiónoʼ ku yáantik le máakoʼob utiaʼal ka u natsʼubaʼob tiʼ Diosoʼ yéetel ka u yojéeltoʼobeʼ u kʼaabaʼeʼ Jéeoba (Salmo 83:18; Isaías 42:8; Juan 17:3, 6). Ku kaʼansik xaneʼ jeʼel u páajtal k-beetikba u amigo Dioseʼ tumen letiʼeʼ u kʼáat ka natsʼkoʼon tu yiknal (Santiago 4:8).

3.   Le jaajil religiónoʼ ku kaʼansikeʼ Jesúseʼ letiʼ le máax túuxtaʼab tumen Dios utiaʼal u salvartik tuláakal máakoʼ (Hechos 4:10, 12). Le máaxoʼob yanoʼob ichil le jaajil religiónoʼ ku yuʼubikoʼob u tʼaan Jesús, tsʼoʼoleʼ ku tsʼáaik u yóol u beetoʼob baʼaxoʼob tu kaʼansaj (Juan 13:15; 15:14).

4.   Le jaajil religiónoʼ ku kaʼansikeʼ chéen u Reino Dios kun utskíintik tuláakal le baʼaxoʼob kʼaastak ku yúuchloʼ. Le oʼolal le máaxoʼob yanoʼob ichil le jaajil religiónoʼ ku kaʼanskoʼob tiʼ u maasil máakoʼob le jatsʼuts baʼaloʼob ken u beet le Reinooʼ (Mateo 10:7; 24:14).

5.   Le jaajil religiónoʼ ku kaʼansikeʼ kʼaʼabéet u paklan yaabiltikuba máak (Juan 13:35). Ku kaʼansik xan u bisuba yéetel u respetartuba tuláakal máak kex yaanal u raza, u idioma wa baʼax suukaʼan u beetkoʼob (Hechos 10:34, 35). Le oʼolal le máaxoʼob yanoʼob ichil le jaajil religiónoʼ maʼatech u táakpajloʼob tiʼ guerra (Miqueas 4:3; 1 Juan 3:11, 12).

6.   Ichil le jaajil religiónoʼ maʼatech u boʼotaʼal le máaxoʼob ku kaʼansajoʼoboʼ mix tu tsʼaʼabaltiʼob títuloʼob utiaʼal u taasaʼaloʼob bey maas importanteʼob tiʼ u maasileʼ (Mateo 23:8-12; 1 Pedro 5:2, 3).

7.   Le jaajil religiónoʼ maʼatech u yoksikuba tiʼ baʼaloʼob yaan yil yéetel política (Juan 17:16; 18:36). Pero ku respetarkoʼob yéetel ku beetkoʼob baʼax ku yaʼalik le autoridadoʼoboʼ tumen bey tu yaʼalil Jesúsoʼ: «Boʼoteʼex tiʼ César le baʼaxoʼob u tiaʼal Césaroʼ [wa u tiaʼal le autoridadoʼoboʼ], chéen baʼaleʼ tiʼ Dioseʼ boʼoteʼex le baʼaxoʼob u tiaʼal Diosoʼ» (Marcos 12:17; Romanos 13:1, 2).

8.   Le jaajil religiónoʼ parte tiʼ u kuxtal máak, maʼ chéen junpʼéel baʼal suuk tiʼ máakiʼ. Le máaxoʼob yanoʼob ichiloʼ ku chaʼik u nuʼuktaʼal u kuxtaloʼob tumen le Bibliaoʼ (Efesios 5:3-5; 1 Juan 3:18). Letiʼobeʼ kiʼimak u yóoloʼob ikil u meyajtikoʼob Dios, maʼatech u yilkoʼob bey junpʼéel kuucheʼ (1 Timoteo 1:11).

9.   Maʼ yaʼab máakoʼob yanoʼob ichil le jaajil religiónoʼ (Mateo 7:13, 14). Tsʼoʼoleʼ ku mixbaʼalkúuntaʼaloʼob, ku burlartaʼaloʼob yéetel ku chʼaʼpachtaʼaloʼob ikil u meyajtikoʼob Dios (Mateo 5:10-12).

«Tuʼux ku convenirteneʼ tiʼ kin biniʼ»

 Jach maʼ maʼalob ka u yéey máak junpʼéel religión chéen tumen ku convenir tiʼiʼ. Le Bibliaoʼ ku yaʼalikeʼ yaan u kʼuchul u kʼiinileʼ le máakoʼoboʼ yaan u binoʼob tu paach u nuuktakil le religiónoʼoboʼ tumen yaan u yaʼalaʼaltiʼob chéen le baʼaxoʼob taak u yuʼubikoʼoboʼ (2 Timoteo 4:3). Pero le Bibliaoʼ ku yaʼaliktoʼon ka k-kaxt le «religión» limpio yéetel kʼamaʼan tumen Diosoʼ, kex maʼ yaʼab máak uts tu tʼaaniʼ (Santiago 1:27, nota; Juan 15:18, 19).