Le Bibliaoʼ maʼatech u tʼaan tiʼ u tsʼuʼutsʼaʼal chamal, a chéen baʼaleʼ yaan tekstoʼob eʼesik bix u yilik Dios le baʼaxoʼob ku yéekʼkuntik wa ku beetik loob tiʼ u wíinklil máakoʼ. Le oʼolal tu táan Dioseʼ u tsʼuʼutsʼaʼal chamaleʼ junpʼéel kʼeban.

•   Kanáant a kuxtal. Dios «tsʼáaik kuxtal, iikʼ yéetel tuláakal baʼal tiʼ máak» (Hechos 17:24, 25). Jeʼex k-ilkoʼ le kuxtaloʼ u siibal Dios, le oʼolal maʼ unaj k-beetik baʼaloʼob jeʼel u beetkoʼob k-kʼojaʼantaleʼ. Wa ku tsʼuʼutsʼik máak chamaleʼ jeʼel tak u séeb kíimileʼ.

•   Yaabilt u maasil. «Kʼaʼabéet a yaabiltik a wéet máakil jeʼex a yaabiltikabaeʼ» (Mateo 22:39). Juntúul máax ku tsʼuʼutsʼik chamal tuʼux yaan uláakʼ máakoʼobeʼ maʼ tu yeʼesik yaabilaj tiʼ u maasil. Le máaxoʼob úuts’béentik u buutsʼil le chamaloʼ maas séeb jeʼel u kʼojaʼantaloʼob ke tak le máaxoʼob tsʼuʼutsʼik chamaloʼ.

•   Pʼáatkech limpioil tu táan Dios. «Kʼub a wíinklileʼex yéetel a kuxtaleʼex tiʼ Dios, kʼubeʼex bey junpʼéel sacrificio santo yéetel kʼambeʼen tu táaneʼ» (Romanos 12:1). «Koʼoneʼex limpiokíintikba tiʼ tuláakal baʼax jeʼel u yéekʼkuntik k-wíinklil yéetel k-tuukuleʼ, utiaʼal beyoʼ ka pʼáatkoʼon maas santoil ikil k-respetartik Dios» (2 Corintios 7:1). U tsʼuʼutsʼik máak chamaleʼ maʼ maʼalobiʼ tumen ku beetik u pʼáatal máak maʼ limpio tu táan Diosiʼ. Le máaxoʼob suuk u tsʼuʼutsʼkoʼob chamaloʼ u yojloʼob táan u yoksikoʼob tu wíinkliloʼob baʼaloʼob jeʼel u beetik u kʼojaʼantaloʼobeʼ.

 Le Bibliaoʼ maʼatech u tʼaan tiʼ le marihuanaoʼ mix tiʼ uláakʼ drogaʼob, pero yaan tekstoʼob eʼesik maʼ unaj u usartaʼal chéen tumen uts tu tʼaan wa tumen tsʼoʼok u suut vicioil tiʼ máakiʼ. Aparte tiʼ le tekstoʼob tsʼoʼok u yáax aʼalpajloʼ kʼaʼabéet xan u chʼaʼabal en cuenta le jeʼeloʼobaʼ:

•   Controlart a tuukul. «Kʼaʼabéet a yaabiltik Jéeoba [...] yéetel tuláakal a tuukul» (Mateo 22:37, 38). «Maʼ u náayal a wóoleʼex mix junsúutuk» (1 Pedro 1:13). Le máaxoʼob usartik drogaʼoboʼ como maʼ tu páajtal u controlartik u tuukuloʼobeʼ ku suut vicioil tiʼob. Letiʼobeʼ chéen táan u tuklikoʼob bix jeʼel u conseguirkoʼob u maasileʼ, le oʼolal maʼatech u tuklikoʼob u beetkoʼob baʼaloʼob maʼalobtak (Filipenses 4:8).

•  Uʼuy u tʼaan le autoridadoʼoboʼ. «Ka yanakoʼob yáanal u páajtalil le máaxoʼob ku gobernaroʼoboʼ bey xan yáanal u páajtalil le máaxoʼob yaan autoridad tiʼoboʼ» (Tito 3:1). Tiʼ yaʼab luʼumiloʼobeʼ yaan leyoʼob tsʼaʼan tumen le gobiernoʼob ku prohibirtik u usartaʼal jujunpʼéel drogaʼoboʼ. Wa k-kʼáat k-uʼuy u tʼaan Dioseʼ unaj k-beetik baʼax ku yaʼalik le autoridadoʼoboʼ (Romanos 13:1).