Úuchik u kʼubik u kuxtal Jesúseʼ tu salvartaj le máaxoʼob meyajtik Diosoʼ (Mateo 20:28). Le oʼolal le Bibliaoʼ ku yaʼalikeʼ Jesús «salvartik le yóokʼol kaaboʼ» (1 Juan 4:14). Tsʼoʼoleʼ ku yaʼalik xaneʼ «minaʼan salvación tu yoʼolal uláakʼ máak, tumen ichil u kajnáaliloʼob le luʼumoʼ maʼ tsʼaʼan uláakʼ kʼaabaʼ utiaʼal ka páajchajak k-salvartaʼaliʼ» (Hechos 4:12).

 Jesúseʼ tu kʼubaj u kuxtal yoʼolal tuláakal le máaxoʼob ku tsʼáaikoʼob u fe tiʼ letiʼoʼ (Hebreos 2:9; Juan 3:16). Ka tsʼoʼokeʼ Dioseʼ tu kaʼa kuxkíintaj yéetel suunaj teʼ kaʼanoʼ (Hechos 3:15). Desde teʼ kaʼanoʼ Jesúseʼ ku «páajtal u salvartik le máaxoʼob táan u natsʼkubaʼob tiʼ Dios tu yoʼolal u kʼaabaʼoʼ, tumen letiʼeʼ mantatsʼ kuxaʼan utiaʼal u kʼáat óolal tiʼ Dios tu yoʼolaloʼob» (Hebreos 7:25).

¿Baʼaxten kʼaʼabéet k-áantaʼal tumen Jesús?

 Tuláakloʼon kʼebanoʼon (Romanos 3:23). Le kʼebanoʼ ku biskoʼon tiʼ kíimil yéetel ku náachkuntkoʼon tiʼ Dios (Romanos 6:23). Jesúseʼ ku yáantik le máaxoʼob ku tsʼáaikoʼob u fe tiʼ u kuxtal tu kʼuboʼ (1 Juan 2:1). Letiʼeʼ «ku tʼaan t-oʼolal tu táan Dios» utiaʼal u yuʼubik Dios k-oraciónoʼob yéetel utiaʼal u perdonarkoʼon (Mateo 1:21; Romanos 8:34). Dioseʼ ku yuʼubik baʼax ku yaʼalik Jesús tumen letiʼ xaneʼ taak u yáantkoʼon. Letiʼeʼ tu túuxtaj Jesús «utiaʼal ka u salvart yóokʼol kaab» (Juan 3:17).

¿Chéen wa kʼaʼabéet k-creertik Jesús utiaʼal k-salvartikba?

 Maʼatech. Kex kʼaʼabéet k-creertik Jesúseʼ yaan uláakʼ baʼax kʼaʼabéet utiaʼal k-salvartikba (Hechos 16:30, 31). Le Bibliaoʼ ku yaʼalik: «Junpʼéel wíinklil minaʼan u muukʼil u kuxtaleʼ kimen yanil, le fe xanoʼ wa maʼ tu yeʼesik máak yéetel baʼaxoʼob ku beetkeʼ kimen yanil» (Santiago 2:26). Utiaʼal k-salvartikbaeʼ kʼaʼabéet:

•   K-kʼaj óoltik Jesús yéetel Jéeoba (Juan 17:3).

•   K-tsʼáaik k-fe tiʼ letiʼob (Juan 12:44; 14:1).

•   K-beetik baʼax ku yaʼalikoʼob utiaʼal k-eʼesik yaan k-fe (Lucas 6:46; 1 Juan 2:17). Jesúseʼ tu yaʼaleʼ maʼ tuláakal le máaxoʼob aʼaliktiʼ «¡Yuumtsil!» ken u salvartubaʼoboʼ, baʼaxeʼ chéen le máaxoʼob ku beetkoʼob baʼax u kʼáat u Taataoʼ (Mateo 7:21).

•   Unaj u seguer k-eʼesik fe kéen yanaktoʼon problemas. Jesúseʼ tu yaʼaleʼ: «Le máax kun chúukpajal u yóol tak tu xuuleʼ yaan u salvarkuba» (Mateo 24:13).