AUSTRALIA: «Le u j-jaajkunajoʼob Jéeoba ku yoksaʼaloʼob hospitaloʼ —máaxoʼob maʼatech u kʼamkoʼob kʼiʼikʼ yoʼolal baʼax ku crertikoʼob— u jaajileʼ maas séeb u yutstaloʼob», tu yaʼalaj le periódico The Sydney Morning Herald jóokʼ 2 tiʼ octubre tiʼ 2012.

Teʼ periodicooʼ jóokʼ xan baʼax tu yaʼalaj James Isbister, máax ku kaʼansaj teʼ Escuela de Medicina de Sidney. Bey tu yaʼalilaʼ: «Le profesor Isbisteroʼ tu yaʼaleʼ maas maʼalob le tratamiento tu tsʼáaj le doctoroʼob tiʼ le j-Jaajkunajoʼoboʼ, tumen tu yiloʼob maʼ u sen peʼertik kʼiʼikʼ le kʼojaʼanoʼ. Le oʼolaleʼ maas maʼalob jóokʼik le operacionoʼ, maas séeb úuchik u pʼatkoʼob le hospitaloʼ yéetel maas séeb úuchik u xuʼulul u jach kanáantaʼaloʼob, maʼ jeʼex le máakoʼob tsʼaʼab kʼiʼikʼ tiʼob le táan u xoʼotloʼoboʼ.

Maʼ chéen le doctor Isbister ku tuukul beyoʼ. Junpʼéel revistaeʼ, le ka tʼaanaj yoʼolal le j-Jaajkunajoʼob operartaʼab tiʼ u puksiʼikʼaloʼoboʼ, tu yaʼalaj: «Maas maʼalob jóokʼik le operación beetaʼab tiʼ le j-Jaajkunajoʼoboʼ yéetel maas maʼ xáanchajoʼob teʼ hospitaloʼ, maʼ jeʼex le kʼojaʼanoʼob tsʼaʼab kʼiʼikʼ tiʼoboʼ» (Archives of Internal Medicine, 13 tiʼ agosto tiʼ 2012).