Teʼ televisión, teʼ celular, tablet wa computadoraoʼ bul kʼiin táan u kʼuchul jejeláas noticiaʼob. Leloʼobaʼ maases ku tʼaanoʼob tiʼ baʼaloʼob kʼaastak yéetel yaan kʼiineʼ jach kʼaas le fotoʼob ku chíikpajloʼ.

 Yaan horaeʼ tak le mejen paalal chaʼantik le baʼaloʼoboʼ.

 ¿Bix jeʼel a wáantik a paalal utiaʼal maʼ u chiʼichnaktaloʼob wa ku yilkoʼob le baʼaloʼoboʼ?

•  ¿Bix u yuʼubikuba le mejen paalaloʼob kéen u chaʼantoʼob le noticiaʼoboʼ?

•  ¿Bix jeʼel a wáantik a paalal utiaʼal maʼ u chiʼichnaktaloʼobeʼ?

•  ¿Kux túun wa úuch wa baʼax tiʼ a hijo?

•   Yaʼab mejen paalaloʼobeʼ jach ku sajaktaloʼob kéen u chaʼantoʼob. Kex yaan kʼiin maʼ tu yaʼalikoʼobeʼ le mejen paalaloʼoboʼ jeʼel u sajaktaloʼob kéen u chaʼantoʼob le noticiaʼoboʼ. a Tsʼoʼoleʼ kéen u yiloʼob chiʼichnak u taataʼobeʼ maas maʼ tu kaxtikoʼob baʼax ku yúuchultiʼob.

•   Le mejen paalaloʼoboʼ maʼ tu jach naʼatkoʼob le baʼax ku máansaʼal teʼ noticiaʼoboʼ. Yanoʼobeʼ ku tuklikoʼobeʼ le baʼaxoʼob ku máansaʼaloʼ yaan u yúuchul tiʼ u láakʼtsiloʼob. Tsʼoʼoleʼ kex chéen táan u repetirtaʼal le noticiaoʼ le mejen paalaloʼoboʼ ku tuklikoʼobeʼ táan u kaʼa úuchul le baʼax ku yaʼalaʼaloʼ.

•   Le mejen paalaloʼoboʼ maʼ u yojloʼob wa chéen táan u maaskúuntaʼal junpʼéel noticiaiʼ. Letiʼobeʼ maʼ u yojloʼob wa chéen ku máansaʼal yaʼab u téenel le noticiaʼob utiaʼal u maas náajaltaʼal taakʼinoʼ. Utiaʼal lelaʼ ku yaʼalaʼal baʼaloʼob maʼ jaajtak utiaʼal u maas chaʼantaʼal tumen le máakoʼoboʼ.

•   Tsʼáa u pʼiis le noticiaʼob ku chaʼantikoʼoboʼ. Lelaʼ maʼ u kʼáat u yaʼal wa maʼ unaj u yojéeltikoʼob baʼax ku yúuchliʼ. Chéen baʼaleʼ maʼatech u taasik utsil tiʼob u chaʼantikoʼob láalaj hora.

   Mariaeʼ ku yaʼalik: «Yaan horaeʼ k-tsikbaltik tu táan k-paalal le baʼaxoʼob máansaʼab teʼ noticiaʼoboʼ, chéen baʼaleʼ maʼ t-tsʼáaik cuenta wa chéen táan k-beetik kʼaas tiʼob».

   Teksto jeʼel u yáantajeʼ: «Le baʼax ku kuup tu puksiʼikʼal máakoʼ ku beetik u yaatal u yóol» (Proverbios 12:25).

•   Chʼenxikint baʼax ku yaʼalikoʼob yéetel tsʼáaba tu lugaroʼob. Wa maʼ tu páajtal u tsolik a hijo bix u yuʼubikubaeʼ, aʼaltiʼ ka u dibujarte. Kéen tsikbalnakech tu yéeteleʼ aʼal tʼaanoʼob séeb jeʼel u naʼatikeʼ yéetel maʼ a waʼalik baʼaloʼob maʼ jach kʼaʼabéet u yojéeltik tiʼ le noticia tu yiloʼ.

   Sarahieʼ ku yaʼalik: «Tsʼoʼok in wilkeʼ maas maʼalob u yuʼubikuba k-chan hija kéen kulakoʼon tsikbal tu yéetel. Chéen baʼaleʼ jach junpuliʼ maʼ unaj u yaʼalaʼaltiʼob lelaʼ ‹Baʼax maas, deporsi bey le kuxtalaʼ› ».

   Teksto jeʼel u yáantajeʼ: «Cada juntúuleʼ kʼaʼabéet u séeb uʼuyik baʼax ku yaʼalaʼaltiʼ, chéen baʼaleʼ maʼ unaj u séeb tʼaaniʼ» (Santiago 1:19).

•   Áant utiaʼal maʼ u sajaktal yoʼolal le noticia ku yuʼubikoʼ. Wa a hijo ku yuʼubik secuestrartaʼab wa máaxeʼ jeʼel u tuklikeʼ yaan xan u secuestrartaʼal. Le oʼolaleʼ tsoltiʼ baʼax tsʼoʼok u chʼaʼtuklaʼal u beetaʼal utiaʼal u kanáantaʼal. Unaj u naʼatikeʼ le baʼax ku yaʼalaʼal teʼ noticiaʼoboʼ maʼ tuláakal tuʼux táan u yúuchliʼ.

   Lourdeseʼ ku yaʼalik: «Kʼaʼabéet k-áantik k-paalal u controlart bix u yuʼubikubaʼob. Yaan horaeʼ yoʼolal baʼax ku tuklikoʼobeʼ ku lúubul u yóoloʼob, le oʼolal unaj k-áantkoʼob utiaʼal ka tuukulnakoʼob tiʼ baʼaloʼob maʼalobtak, beyoʼ tranquilo ken u yuʼubilubaʼob».

   Teksto jeʼel u yáantajeʼ: «U puksiʼikʼal juntúul máax yaan u naʼateʼ ku tʼaan yéetel naʼatil yéetel ku chʼujukkíintik u tʼaan» (Proverbios 16:23).