MAʼ SEN úucheʼ kʼáataʼab tiʼ maanal 800 táankelmoʼob wa ku creertikoʼob ku yuʼubaʼal u oracionoʼob tumen Jesús. Maas tiʼ u 60% tu yaʼaleʼ ku creertik, baʼaleʼ juntúuleʼ tu tupaj u kʼaabaʼ Jesús teʼ juʼun tsʼaʼabtiʼoʼ ka tu tsʼíibtaj «Dios».

A tuklikeʼ ¿máax tiʼ unaj k-orar? ¿Tiʼ Dios wa tiʼ Jesús? * Utiaʼal k-ojéeltikeʼ koʼox ilik baʼax tu kaʼansaj Jesús tiʼ u disipuloʼob.

Jesuseʼ maʼ chéen tu yaʼalaj unaj k-orar tiʼ Diosiʼ, baʼaxeʼ tu beetaj xan utiaʼal k-ilik.

BAʼAX TU YAʼALAJ: Juntéenjeakileʼ juntúul u disipuloeʼ tu yaʼalajtiʼ: «Yuumtsil, kaʼansoʼon orar». Jesuseʼ tu núukaj: «Ken orarnakeʼexeʼ, aʼaleʼex: ‹Taata›» (Lucas 11:1, 2). Tsʼoʼoleʼ tu Kaʼansajil le Puʼukoʼ tu yaʼalaj: «Orarnen tiʼ a Taata yaan teʼ kaʼanoʼ». Tu yaʼalaj xan: «A Taataʼexeʼ u yojel baʼax kʼaʼabéetteʼex tak táanil tiʼ a kʼáatkeʼextiʼ» (Mateo 6:6, 8). Tsʼoʼoleʼ teʼ áakʼab táanil tiʼ u kíimiloʼ tu yaʼalaj tiʼ u disipuloʼob: «Wa ka kʼáatkeʼex wa baʼax tiʼ le Taataoʼ letiʼeʼ yaan u tsʼáaikteʼex tin kʼaabaʼ» (Juan 16:23). Jeʼex k-ilkoʼ Jesuseʼ yaʼab u téenel tu yaʼalaj unaj k-orar tiʼ Jéeoba, u Taata, máax k-Taata xan (Juan 20:17).

BAʼAX TU BEETAJ: Jesuseʼ orarnaj tiʼ Dios beyaʼ: «In Taata, teech u Yuumil kaʼan yéetel Luʼum. Kin kiʼikiʼtʼantkech tu táan le máakoʼoboʼ» (Lucas 10:21). Uláakʼ juntéeneʼ Jesuseʼ «tu líiʼsaj u yich kaʼaneʼ ka tu yaʼalaj: ‹In Yuum, kin tsʼáaiktech gracias tumen tsʼoʼok a wuʼuyik in oración›» (Juan 11:41). Le jach taʼaytak u kíimiloʼ orarnaj tiʼ Dioseʼ ka tu yaʼalaj: «In Yuum, ta kʼab kin kʼubéentik in kuxtal» (Lucas 23:46). Jeʼex k-ilkoʼ Jesuseʼ tu yeʼesaj unaj k-orar tiʼ Jéeoba, «u Yuumil kaʼan yéetel Luʼum» (Mateo 11:25; 26:41, 42; 1 Juan 2:6). Bey tu beetil xan le yáax cristianoʼoboʼ.

Jujunpʼéel semanaʼob suunak Jesús kaʼaneʼ u disipuloʼobeʼ táan u chʼaʼpachtaʼaloʼob tumen u nuuktakil le kaajoʼ (Baʼaxoʼob [Hechos] 4:18). Jeʼex suukileʼ orarnajoʼob. Baʼaleʼ ¿máax tiʼ orarnajoʼob? «Múul orarnajoʼob yéetel junpʼéeliliʼ tuukul [...] tiʼ Dios» tu kʼaabaʼ Jesús utiaʼal ka áantaʼakoʼob (Baʼaxoʼob 4:24, 30). Tu beetoʼob le baʼax aʼalaʼabtiʼob tumen Jesusoʼ: orarnajoʼob tiʼ Dios.

Ka máan kʼiineʼ apóstol Pabloeʼ tu tsʼíibtaj: «Mantatsʼ ken orarnakoʼon ta woʼolaleʼexeʼ, k-tsʼáaik gracias tiʼ Dios u Taata k-Yuumtsil Jesucristo» (Colosasiloʼob 1:3). Tsʼoʼoleʼ tu yaʼalaj tiʼ le uláakʼ disipuloʼoboʼ: «Mantatsʼ tsʼáaʼex gracias tiʼ k-Dios yéetel k-Taata tu yoʼolal tuláakal baʼal tu kʼaabaʼ k-Yuumtsil Jesucristo»  (Efesoiloʼob 5:20). Jeʼex k-ilkoʼ Pabloeʼ tu yaʼalaj tiʼ u maasil ka orarnakoʼob «tiʼ Dios le Taata[oʼ]», baʼaleʼ tu kʼaabaʼ Jesús (Colosasiloʼob 3:17).

Jeʼex tu beetil le yáax cristianoʼoboʼ, toʼoneʼ unaj k-orar jeʼex tu yaʼalil Jesusoʼ, beyoʼ yaan k-eʼesik k-yaabiltmaj (Juan 14:15). Juntúul tiʼ le máaxoʼob tsʼíibt le Bibliaoʼ tu yaʼalaj: «In yaabiltmaj [Jéeoba], tumen tsʼoʼok u yuʼubik in kʼáat óolaloʼob» (Salmo 116:1, 2). Toʼon xaneʼ wa k-orar chéen tiʼ Jéeobaeʼ yaan u béeytal k-aʼalik le tʼaanoʼoboʼ. *