Betaniaeʼ junpʼéel chan kaaj 3 kilómetros u náachil tiʼ Jerusalén (Juan 11:18). Jujunpʼéel semanaʼob táanil tiʼ u kíimil Jesuseʼ, teʼ kaajoʼ úuch junpʼéel baʼal jach yaj: Lázaro, juntúul u amigo Jesús jach u yaabiltmeʼ, kʼojaʼanchajeʼ ka kíimi.

Le ka tu yojéeltaj Jesusoʼ, tu yaʼalaj tiʼ u disipuloʼobeʼ Lázaroeʼ chéen táan u wenel yéetel nukaʼaj bin u yajse (Juan 11:11). Le ka tu yilaj maʼ tu naʼatoʼobeʼ tu yaʼalajtiʼob juntaatsʼ: «Lázaroeʼ tsʼoʼok u kíimil» (Juan 11:14).

Kanpʼéel kʼiin muʼukukeʼ, kʼuch Jesús tu kaajil Betania utiaʼal u líiʼsik u yóol Marta, u kiik Lázaro. Martaeʼ tu yaʼalajtiʼ: «Wa way yanech kaʼacheʼ, bejlaʼa maʼ tu kíimil in wíitsʼineʼ» (Juan 11:17, 21). Jesuseʼ tu núukaj: «Teen le kuxtaloʼ, bey xan le kaʼa kuxtaloʼ. Le máax ku tsʼáaik u fe tiʼ teneʼ, kex ka kíimkeʼ yaan u kaʼa kuxtal» (Juan 11:25).

Utiaʼal u yeʼesik jaaj le baʼax táant u yaʼalikoʼ, Jesuseʼ náatsʼ tiʼ le muknaloʼ ka tu kʼaʼam aʼalaj: «¡Lázaro, jóokʼen!» (Juan 11:43). Le máaxoʼob waʼalakbaloʼob teʼeloʼ jaʼakʼ u yóoloʼob le ka tu yiloʼob u jóokʼol le kimenoʼ.

Jesuseʼ tsʼokaʼaniliʼ u kaʼa kuxkíintik kaʼatúul máakoʼobeʼ. Juntúul tiʼ letiʼobeʼ u hija Jairo. Jach le nukaʼaj u kaʼa kuxkíint le chan x-chʼúupaloʼ, Jesuseʼ tu yaʼaleʼ «chéen táan u wenel» (Lucas 8:52).

Jeʼex k-ilkoʼ, le ka kíim Lázaro bey xan u hija Jairoeʼ, Jesuseʼ tu yaʼaleʼ chéen táan u weenloʼob. ¿Baʼaxten tu yaʼalaj beyoʼ? Tumen ken tʼúubuk u wenel máakeʼ maʼ u yojel baʼax ku yúuchul tu baʼpachiʼ; ku jeʼelel tiʼ le muʼyajil wa tiʼ le kʼiʼinamiloʼ (Eclesiastés 9:5; ilawil le cuadro  «Kíimileʼ bey jeʼex u tʼúubul u wenel máakeʼ»). U yáax disipuloʼob Jesuseʼ tu naʼatoʼob bix tu jaajil yanil le kimenoʼoboʼ. Junpʼéel enciclopediaeʼ ku yaʼalik: «Utiaʼal u disipuloʼob  Jesuseʼ le kíimiloʼ bey jeʼex le weenloʼ, le muknaloʼ bey u kúuchil u jeʼelel [...] le máaxoʼob kíimoʼob tu tsʼáaj u fejoʼob [tiʼ Cristooʼ]» * (Encyclopedia of Religion and Ethics).

Ku líiʼsik k-óol k-ojéeltikeʼ le kimenoʼoboʼ chéen táan u weenloʼob teʼ muknaloʼoboʼ, maʼ táan u muʼyajoʼobiʼ. Le oʼolaleʼ maʼ unaj k-chʼaʼik saajkil tiʼ le kíimiloʼ.

Tuláakal máak uts tu tʼaan u wenel utiaʼal u jeʼelskuba, baʼaleʼ ¿máax jeʼel u taaktal u wenel utiaʼal mantatsʼeʼ? ¿Bix jeʼel k-ojéeltik wa jach tu jaajil yaan u kaʼa kuxtal le máaxoʼob táan u weenloʼob teʼ muknal jeʼex úuchik tiʼ Lázaro yéetel tiʼ u hija Jairooʼ?

Job, juntúul máax tu meyajtaj Dioseʼ, le ka tu yuʼubaj bey nukaʼaj kíimileʼ tu yaʼalaj: «¿Bíin kaʼa kuxlak wa le xiib ku kíimiloʼ?» (Job 14:14).

Utiaʼal u núukikeʼ, Jobeʼ tu yaʼalaj tiʼ Jajal Dios: «Techeʼ bíin a tʼanen, teen xaneʼ bíin in núuk a tʼaan; bíin wal a pakten yéetel yaakunajeʼ, tumen teech beetmilen» (Job 14:15). Jobeʼ jach u yojel kaʼach Jéeobaeʼ ku tsʼíiboltik ka kʼuchuk u kʼiinil u kaʼa kuxkíintik le máaxoʼob meyajtikoʼ. ¿Chéen wa kunel úuchik u tuklik beyoʼ? Maʼ, maʼ beyiʼ.

Dioseʼ u tsʼaamaj páajtalil tiʼ Jesús yóokʼol le kíimiloʼ, le oʼolal páajchaj u kaʼa kuxkíintik máak. Le Bibliaoʼ ku yaʼalikeʼ tiʼ letiʼeʼ tsʼoʼok u tsʼaʼabal «u llaveil le kíimiloʼ» (Apocalipsis 1:18). Jesús túuneʼ yaan u jeʼik u joonajil le muknal jeʼex beetaʼabik le ka tu kaʼa kuxkíintaj Lázarooʼ.

Le Bibliaoʼ yaʼab u téenel ku yaʼalikeʼ yaan u kaʼa kuxkíintaʼal le kimenoʼoboʼ. Tiʼ Danieleʼ aʼalaʼab tumen juntúul ángel: «Jeʼelsaba, tu xuul le kʼiinoʼoboʼ ka líikʼil utiaʼal a kʼamik a boʼolal» (Daniel 12:13). Jesuseʼ tu yaʼalaj tiʼ le saduceoʼob, u nojchil le judíoʼob ku yaʼalikoʼob minaʼan le kaʼa kuxtaloʼ: «Teʼexeʼ maʼ maʼalob bix a tuukuleʼexiʼ, tumen maʼ a kʼaj óoleʼex le Kiliʼich Tsʼíiboʼoboʼ mix le páajtalil yaan tiʼ Diosoʼ» (Mateo 22:23, 29). Apóstol Pablo xaneʼ tu yaʼalaj: «Teneʼ táan xan in páaʼtik u kaʼa kuxkíintaʼal le kimenoʼob jeʼex u yaʼalmil Diosoʼ, le utsoʼoboʼ bey xan le kʼasaʼanoʼoboʼ» (Baʼaxoʼob 24:15).

¿Baʼax kʼiin ken kaʼa kuxkíintaʼak le utsoʼob yéetel le kʼasaʼanoʼoboʼ? «Tu xuul le kʼiinoʼoboʼ», jeʼex tu yaʼalil le ángel tiʼ Danieloʼ. Martaeʼ ku creertik kaʼacheʼ «yaan u líikʼil [u yíitsʼin] ken kaʼa kuxkíintaʼak le kimenoʼob teʼ tu tsʼook kʼiinoʼ» (Juan 11:24).

Le Bibliaoʼ ku tsʼáaik naʼatbileʼ le u «tsʼook kʼiinoʼ» letiʼe ken káajak u reinar Cristooʼ. Apóstol Pabloeʼ tu tsʼíibtaj: «Tumen Cristoeʼ yaan u reinar tak ken tsʼaʼabak tuláakal u enemigoʼob tu yáanal u yook tumen Dios. Le kíimiloʼ letiʼe u tsʼook enemigo kun xuʼulsbiloʼ» (1 Corintoiloʼob 15:25, 26). Le oʼolaleʼ maʼ u xuʼulul k-kʼáatik tiʼ Dios ka taalak u Reino yéetel ka beetaʼak baʼax u kʼáat way Luʼumeʼ. *

Jeʼex u yojlil kaʼach Jobeʼ, Dioseʼ u kʼáat u kaʼa kuxkíint le kimenoʼoboʼ. Ken kʼuchuk le kʼiinoʼ, yaan u xuʼulsaʼal junpuliʼ le kíimiloʼ yéetel mix máak ken u kaʼa tukle: «Kíimileʼ ¿u xuul wa tuláakal?».