¿Maʼ wa uts ta tʼaan ka kuxlakech mantatsʼ yéetel a láakʼtsiloʼob tiʼ junpʼéel luʼum tuʼux minaʼan kʼiʼinamil, muʼyajil mix kíimil? Lelaʼ maʼ chéen junpʼéel náayiʼ. Jéeoba Dioseʼ u yaʼalmaj yaan u taasik junpʼéel túumben luʼum tuʼux mix baʼal kʼaas kun antaliʼ. Ilawil bix u yaʼalik Apocalipsis 21:3-5 (xoke).

«[Dioseʼ] yaan xan u choʼik tuláakal u jaʼil u yichoʼob.» (Apocalipsis 21:4.) ¿Baʼax jaʼil ich kun choʼobiloʼ? Maʼ letiʼe ku jóokʼol ken kiʼimakchajak k-óoloʼ mix le ku jóokʼol utiaʼal u kanáantik k-ichoʼ. Le jaʼil ich kun choʼobiloʼ letiʼe ku jóokʼol ken okʼolnakoʼon tu yoʼolal le muʼyajil yéetel le yaj óolaloʼ. Dioseʼ yaan u luʼsik tuláakal le baʼaxoʼob beetik k-muʼyajoʼ.

«Maʼ tun yantal kíimil.» (Apocalipsis 21:4.) ¿Máasaʼ le kíimiloʼ tsʼoʼok u beetik u sen okʼol yaʼab máakoʼob? Baʼaleʼ Jéeobaeʼ yaan u tokik tiʼ le kíimil tuláakal le máaxoʼob beetik baʼax u kʼáatoʼ. ¿Bixi? Yaan u luʼsik le baʼax beetik u kíimil máakoʼ: le kʼeban tu máansajtoʼon Adanoʼ (Romailoʼob 5:12). Jéeobaeʼ yaan u luʼsik u kʼeban tuláakal le máaxoʼob ku tsʼáaik u fejoʼob tiʼ u kuxtal Jesús tu kʼuboʼ. * Ken tsʼoʼokok túuneʼ yaan u xuʼulsaʼal tiʼ le kíimiloʼ, le «u tsʼook enemigo[oʼ]» (1 Corintoiloʼob 15:26). Yaan u páajtal u kuxtal máak ich toj óolal utiaʼal mantatsʼ, jeʼex u chʼaʼtukultmil Dios desde tu káajbaloʼ.

«Maʼ tun yantal [...] kʼiʼinamil.» (Apocalipsis 21:4.) ¿Baʼax kʼiʼinamil kun xuʼulsbil? Ichil lelaʼ táakaʼan le yaj óolaloʼ, le okʼom óolaloʼ yéetel le yajil ku yantaltoʼon yoʼolal le kʼeban yaan t-wíinkliloʼ. Le baʼaloʼobaʼ tsʼoʼok u beetik u muʼyaj u millonesil máakoʼob.

Maʼ kun xáantaleʼ yaan u páajtal k-kuxtal x-maʼ okʼolil, x-maʼ kíimilil yéetel x-maʼ kʼiʼinamil. ¿Tuʼuxiʼ? ¿Teʼ kaʼanoʼ? Maʼ. Ilawil baʼaxten. Yáaxeʼ, tumen Apocalipsis 21:3, ku yaʼalikeʼ «u pasel Dioseʼ tiʼ yaan yiknal le máakoʼoboʼ», yéetel le máakoʼoboʼ way Luʼum kajaʼanoʼobeʼ. U kaʼapʼéeleʼ, tumen le versículo 4, ku yaʼalikeʼ «maʼ tun yantal kíimil», le «baʼaxoʼob yanoʼob kaʼachoʼ» yaan u máan, tsʼoʼoleʼ teʼ kaʼanoʼ mix juntéen anak kíimiliʼ. Jeʼex k-ilik túunoʼ way Luʼum kun antal le jatsʼuts kuxtal u yaʼalmaj Diosoʼ.

Jéeobaeʼ u kʼáat ka k-creert le baʼax u yaʼalmoʼ. Chéen pʼel tsʼoʼokik u yaʼalik le utsiloʼob kun antaloʼ, ku yaʼalik: «¡Ile!, yaan in túumbenkuntik tuláakal baʼal». Ku yaʼalik xan: «Tsʼíibte, tumen le tʼaanoʼobaʼ jaajtak yéetel jach yaan u béeytaloʼob» (Apocalipsis 21:5). ¿Maʼ wa uts ta tʼaan ka kaanbalnakech teech yéetel a láakʼtsiloʼob tiʼ bix jeʼel a kʼamik le utsiloʼob u yaʼalmaj Dios u tsʼáaik tiʼ le máaxoʼob meyajtikoʼ?