U millonesil máakoʼobeʼ u kʼáatoʼob bin kaʼan. Jesuseʼ tu yaʼaleʼ u apostoloʼob chúukaʼan yóoloʼoboʼ tiʼ kun kajtaloʼobiʼ. Le maʼ kíimkoʼ tu yaʼalaj yaan u preparartik junpʼéel kúuchil utiaʼal letiʼob teʼ kaʼan yiknal u Taataoʼ. (Xok Juan 14:2.)

¿Baʼaxten yaan u kaʼa kuxkíintaʼaloʼob teʼ kaʼanoʼ? ¿Baʼax ken u beetoʼob teʼeloʼ? Jesuseʼ tu yaʼalaj tiʼ u apostoloʼobeʼ yaan u beetik u reyiloʼob yéetel yaan u gobernartikoʼob le Luʼumoʼ. (Xok Lucas 22:28-30; Apocalipsis 5:10.)

Óoliʼ tuláakal tuʼuxeʼ, le máaxoʼob ku gobernaroʼoboʼ chéen wa jaytúuloʼob. Bey túun xanoʼ le máaxoʼob kun kaʼa kuxkíintbiloʼob tumen Jesús utiaʼal u beetik u reyiloʼob teʼ kaʼanoʼ maʼ sen yaʼaboʼobiʼ (Lucas 12:32). Le Bibliaoʼ ku yaʼalik jaytúul le kun gobernaroʼob yéetel Jesusoʼ. (Xok Apocalipsis 14:1.)

Dioseʼ maʼ chéen le máaxoʼob kun binoʼob kaʼan ken u kaʼa kuxkíintoʼ. Le máaxoʼob ku tsʼáaikubaʼob tu tséel u reino Jesuseʼ yaan xan u kuxtaloʼob minaʼan u xuul tiʼ junpʼéel paraíso way Luʼumeʼ (Juan 3:16). Jujuntúul tiʼ le máaxoʼob kun kajtaloʼob teʼeloʼ máakoʼob maʼ kun kíimloʼob ken xuʼulsaʼak le kʼasaʼan yóokʼol kaabaʼ. Uláakʼoʼobeʼ teʼ Paraíso kun kaʼa kuxkíintbiloʼoboʼ. (Xok Salmo 37:29; Juan 5:28, 29)