Le ka kaʼa kuxkíintaʼab Jesusoʼ le disipuloʼoboʼ tu maas tsʼáaj u yóoloʼob tiʼ le meyaj kʼubéentaʼabtiʼoboʼ. Apóstol Pabloeʼ máan tiʼ tuláakal u luʼumil Asia Menor yéetel Mediterráneo táan u yáantaj utiaʼal ka yanak múuchʼuliloʼob. Tu líiʼsaj u yóol le cristianoʼob utiaʼal ka chúukpajak u yóoloʼob kex ka chʼaʼpachtaʼakoʼob wa kex ka túulchʼintaʼakoʼob u beetoʼob baʼaxoʼob maʼ maʼalobtakiʼ. Le cristianoʼoboʼ yaʼabchajoʼob yéetel kʼiʼitpajoʼob.

Pabloeʼ kʼaʼal cárcel, baʼaleʼ desde teʼeloʼ tu tsʼíibtaj cartaʼob utiaʼal u tsolnuʼuktik yéetel u líiʼsik u yóol le múuchʼuliloʼoboʼ. Tu yaʼalajtiʼob unaj u kanáantkubaʼob tiʼ uláakʼ talamil maas nojoch: le apostasíaoʼ. Yéetel u nuʼuktaj le kiliʼich muukʼoʼ Pabloeʼ tu yaʼaleʼ ichil le múuchʼuliloʼ yaan u yokol «kʼasaʼan máakoʼob beyoʼob loboeʼ» yéetel yaan u «kaʼans[k]oʼob baʼaloʼob maʼ pataliʼ, utiaʼal ka u jíilt[oʼob] le disipuloʼob tu paachoʼoboʼ» (Baʼaxoʼob 20:29, 30).

Tu tsʼoʼokbal le yáax siglooʼ tsʼokaʼaniliʼ u káajal u chíikpajal le apostataʼoboʼ. Teʼ kʼiinoʼob xanoʼ, Jesús kaʼa kuxkíintaʼaneʼ yéetel chíikulaloʼob tu tsʼáaj u yojéelt apóstol Juan baʼax ku taal u kʼiin. Lelaʼ tsʼíibtaʼan tu libroil Apocalipsis. Jeʼex tu tsʼíibtil Juaneʼ, mix le ku tsʼáaikubaʼob tu contra Diosoʼ mix le ku kaʼanskoʼob baʼaloʼob maʼ jaajtak ku páajtal u beetkoʼob maʼ u béeytal le baʼaxoʼob u tukultmaj Dios yoʼolal wíinik yéetel yoʼolal le Luʼumoʼ. «Tuláakal luʼumoʼob, chʼiʼibaloʼob, tʼaanoʼob yéetel kaajoʼob[eʼ]» yaan u yuʼubikoʼob u maʼalob péektsilil u Reino Dios (Apocalipsis 14:16). Yaan u kaʼa tsʼaʼabal le Paraíso way Luʼumaʼ, yéetel tiʼ kun kajtal tuláakal máax u kʼáat u tsʼoʼokbes u tʼaan Diosiʼ.

¿Máasaʼ lelaʼ jach tu jaajil junpʼéel maʼalob péektsil? Le oʼolaleʼ kan u maasil yoʼolal le baʼaxoʼob ku yaʼalik Dios teʼ Bibliaoʼ yéetel ojéelt baʼax utsil ken u taastech bejlaʼeʼ yéetel teʼ kʼiinoʼob ku taaloʼoboʼ.

Jeʼel u páajtal a xokik le Biblia teʼ Biblioteca tsʼaʼan teʼ at www.jw.org/yua. Teʼ kúuchil ich Internetoʼ jeʼel u páajtal a wilik xan le folleto Le Bibliaoʼ tiʼ baʼax ku tʼaan, U maʼalob péektsiloʼob Dios yéetel le libro ¿Baʼax jach tu jaajil ku kaʼansik le Bibliaoʼ? Tiaʼan xan uláakʼ jóoʼsaʼaniloʼob ku tsolkoʼob baʼaxten jeʼel u páajtal k-kʼubik k-óol tiʼ le Bibliaoʼ yéetel bix jeʼel k-tsʼáaik ichil k-kuxtal le tsolnuʼukoʼob ku tsʼáaikoʼ. Jeʼel u páajtal xan a tsikbal yéetel juntúul u j-jaajkunaj Jéeoba utiaʼal a wojéeltik u maasileʼ.

(Jóoʼsaʼan tiʼ Baʼaxoʼob, Efesoiloʼob, Filiposiloʼob, Colosasiloʼob, Filemón, 1 Juan, Apocalipsis.)