Tuuseʼ a waʼalik junpʼéel baʼal kex a wojel maʼ jaajiʼ. Techeʼ ¿tuusnajaʼanech wa? *... U jaajileʼ tak nukuch máakoʼob yaabiltmil Dios tuusnajoʼob. Míin kʼajaʼantech máax tiʼ le doce apostoloʼob ku yaʼalik le Biblia tuusnajoʼ. U kʼaabaʼeʼ Pedro. ¿A kʼáat wa a wojéelt baʼaxten tuusnaji? Uʼuy le tsikbalaʼ.

Le ka maʼach Jesuseʼ bisaʼab tu yotoch le nojoch sacerdoteoʼ. Beoraaʼ tsʼoʼok u máan chúumuk áakʼab. Pedroeʼ ook tu táankabil le najoʼ; mix máak kʼaj óolte. Baʼaleʼ tu yoʼolal u sáasilil le kʼáakʼ tuʼux náatsʼoʼ kʼaj óoltaʼab tumen juntúul x-chʼúupal ku meyaj teʼ najoʼ. «Teech xaneʼ táan a máan kaʼach yéetel Jesús», ku yaʼalik le x-chʼúupaloʼ. Pedroeʼ sajakchajeʼ ka tu yaʼalaj maʼ jaajiʼ.

Maʼ sáam tiʼ leloʼ uláakʼ juntúul x-chʼúupaleʼ ku yaʼalik: «Le máakaʼ táan xan kaʼach u máan yéetel Jesús». Pedroeʼ ku kaʼa aʼalik maʼ jaajiʼ. Tu tsʼookeʼ náatsʼ uláakʼ máakoʼobeʼ ka tu yaʼaloʼobtiʼ: «Tu jaajil, techeʼ juntúulech tiʼ letiʼob».

Pedroeʼ sajakchajaʼan. Le oʼolal tuusnaj tu yóoxtéen. Ku yaʼalik: «¡Maʼ in kʼaj óol le máakoʼ!». Le ku kʼaay túun juntúul tʼeel. Jesuseʼ ku paktik Pedro. Pedroeʼ ku kʼaʼajsik le baʼax aʼalaʼabtiʼ tumen Jesusoʼ: «Maʼiliʼ kʼaaynak le tʼeeloʼ, techeʼ yaan a waʼalik óoxtéen maʼ a kʼaj óoleniʼ». Pedroeʼ túupʼ u yokʼol. ¡Jach yaj tu yóol úuchik u tuus!

A tuklikeʼ ¿jeʼel wa u yúuchultech xan beyoʼ?... Tukult tiaʼanech escuelaeʼ. A wéet xookoʼobeʼ ku káajal u tʼaanoʼob yoʼolal u j-jaajkunajoʼob Jéeoba. «Maʼatech u saludartikoʼob bandera», ku yaʼalik juntúuliʼ. «Maʼatech u beetik u soldadoiloʼob», ku yaʼalik uláakʼ. «Maʼ tu creertikoʼob Jesús, le oʼolal maʼatech u kʼiinbeskoʼob Navidad», ku yaʼalik uláakʼoʼob. Juntúul tiʼ letiʼobeʼ ku náatsʼleʼ ku yaʼaliktech:  «¿Máasaʼ techeʼ j-Jaajkunajech?». ¿Baʼax jeʼel a núukikeʼ?...

Táanil tiʼ u yúuchultech beyoʼ, maʼalob ka a yáax tukult baʼax jeʼel a beetkeʼ. Pedroeʼ maʼ u líiʼsmuba kaʼachiʼ, le oʼolal tuusnaji. Baʼaleʼ tumen jach yaachaj u yóol yoʼolal le baʼax tu beetoʼ perdonartaʼab tumen Dios.

Uláakʼ juntúul cristiano tuusnajeʼ Ananías. Letiʼ yéetel Safira u yataneʼ tu múul chʼaʼtuklaj u tuusoʼob. Baʼaleʼ Dioseʼ maʼ tu perdonartoʼobiʼ. Koʼox ilik baʼaxten.

Diez kʼiinoʼob tsʼoʼokok u suut Jesús teʼ kaʼan yiknal Diosoʼ okjaʼanaj kex tres mil máakoʼob tu kaajil Jerusalén. Yaʼabeʼ náach taalikoʼob utiaʼal u Kʼiinbesajil Pentecostés, yéetel pʼáatoʼob utiaʼal u maas kaanbaloʼob tiʼ u túumben religionoʼob, ka áantaʼaboʼob yéetel taakʼin tumen u disipuloʼob Jesús.

Ananías yéetel u yataneʼ tu konoʼob junpʼéel terreno utiaʼal u yáantajoʼob. Le ka taal Ananías u síi u taakʼinil tiʼ le apostoloʼoboʼ tu yaʼalaj táan u tsʼáaik tuláakal le bukaʼaj boʼotaʼaboʼ. Baʼaleʼ maʼ jaajiʼ, u chʼaʼamaj junjaats utiaʼal letiʼiʼ. Dioseʼ tu tsʼáaj u yojéelt Pedro lelaʼ, ka túun tu yaʼalaj Pedro tiʼ Ananías: «Jajal Dios ta tusaj, maʼ wíinikoʼobiʼ». ¡Kíijlin! Ka lúub Ananías kimen. Kex óoxpʼéel hora tiʼ leloʼ kʼuch Safira. Maʼ u yojel kaʼach baʼax úuch tiʼ u yíichamiʼ, ka tuusnaj xan. ¡Le ku lúubul xan kimen!

Jach kʼaʼanaʼan le baʼax tsʼoʼok k-kanikoʼ. Tuláakloʼon unaj k-kʼaʼajsikeʼ mantatsʼ unaj k-aʼalik u jaajil. U jaajileʼ yaan horaeʼ jeʼel k-fallareʼ, maases wa paalaloʼon. ¡Kiʼimak k-óol k-ojéeltik Jéeobaeʼ u yaabiltmoʼon yéetel jeʼel u perdonartikoʼon jeʼex tu beetil yéetel Pedroeʼ!, ¿máasimaʼ?... Baʼaleʼ kʼaʼajaktecheʼ mantatsʼ unaj k-aʼalik u jaajil. Wa yaan kʼiin k-lúubul tiʼ u nojoch kʼebanil le tuusoʼ, unaj k-kʼáat óoltik tiʼ Dios ka u perdonartoʼon. Pedroeʼ bey wal tu beetiloʼ le oʼolal perdonartaʼabi. Wa k-kanáantikba maʼ k-kaʼa tuuseʼ Dioseʼ yaan u perdonartikoʼon.