Le Biblia El Nuevo Testamento de Nuestro Señor Jesucristo ich Mayaoʼ ku yaʼalikeʼ bey tu núukilak Jesús tiʼ le kʼasaʼan máak chʼuykíintaʼab tu tséeloʼ: «Tu jaajil kin waʼalik tiʼ teech, bejlaʼa kan antal tin wéetel tu Kúuchil Kiʼimak óolal» (Lucas 23:43). Baʼaleʼ uláakʼ Bibliaʼobeʼ ku yaʼalikoʼob: «Tu jaajil kin waʼaliktech bejlaʼeʼ: Yaan a wantal tin wéetel teʼ Paraísooʼ». ¿Tu yóotaj wa u yaʼal Jesús teʼ kaʼan kun bin le kʼasaʼan máak teʼ kʼiin jeʼeloʼ?

Táanileʼ koʼox ilik wa ku náajmatik kuxtal teʼ kaʼanoʼ. Le máaxoʼob ku binoʼob kaʼanoʼ okjaʼanajaʼanoʼob yéetel jaʼ bey xan yéetel kiliʼich muukʼ, tsʼoʼoleʼ yéeyaʼanoʼob yéetel kiliʼich muukʼ bey u disipuloʼob Jesús yéetel u paalaloʼob Dioseʼ (Juan 3:3, 5). Ku kuxtaloʼob jeʼex u yaʼalik Dioseʼ, ku beetkoʼob baʼax toj, chúukaʼan u yóoloʼob yéetel ku chʼaʼikoʼob óotsilil (1 Corintoiloʼob 6:9-11). Ku chúukpajal xan u yaabilajoʼob tiʼ Dios yéetel tiʼ Cristo tak tu xuul u kuxtaloʼob way Luʼumeʼ (Lucas 22:28-30; 2 Timoteo 2:12). Chéen le máax beetik tuláakal le baʼaloʼobaʼ ku náajmatik u kaʼa kuxkíintaʼal yéetel u tsʼaʼabaltiʼ le nojoch meyaj teʼ kaʼanoʼ: u beetik u sacerdoteil yéetel u reyil tu tséel Cristo yóokʼol wíinik tu yáamil mil jaʼaboʼob (Apocalipsis 20:6).

Baʼaleʼ le kʼasaʼan máak chʼuykíintaʼab tu tséel Jesusoʼ láayliʼ kʼasaʼan ka kíimeʼ (Lucas 23:32, 39-41). U jaajileʼ yéetel tsiikil tu yaʼalaj tiʼ Jesús: «Kʼaʼajsen le ken taalakech ta [reino]» (Lucas 23:42). Kex beyoʼ maʼ okjaʼanajiʼ, maʼ yéeyaʼab yéetel kiliʼich muukʼ utiaʼal u beetkuba disipuloiʼ mix tu yeʼesaj wa jeʼel u chúukpajal u yóol u bis junpʼéel toj kuxtaleʼ. ¿Jeʼel wa túun u yaʼalik Jesús u tsʼáaik páajtalil tiʼ utiaʼal u beetik u reyil teʼ kaʼan tu tséel u disipuloʼob chúukaʼan u yóoloʼoboʼ? (Romailoʼob 2:6, 7.)

Koʼox ketik beyaʼ: wa juntúul máak ku kʼáatiktech ka a perdonart tumen tu yoklajtech taakʼineʼ, maʼ xaaneʼ jeʼel a perdonartikeʼ. Baʼaleʼ ¿jeʼel wa a kʼubéentiktiʼ ka u kanáant a koonol wa a familiaeʼ? ¿Máasaʼ chéen tiʼ máaxoʼob jach a kʼubmaj a wóol tiʼob jeʼel a kʼubéentikeʼ? Bey túun xanoʼ, le máaxoʼob kun tsʼaabil kuxtal tiʼob teʼ kaʼanoʼ táanileʼ kʼaʼabéet u yeʼeskoʼob jeʼel u nuʼuktikoʼob wíinik jach jeʼex kun aʼalbiltiʼob tumen Dioseʼ (Apocalipsis 2:10). Baʼaleʼ le kʼasaʼan máakaʼ tumen tak tu tsʼook hora ka tu kʼexaj u tuukuleʼ, maʼ páajchaj u yeʼesik wa jeʼel u chúukpajal u yóoleʼ.

Baʼaleʼ ¿maʼ wa tu yaʼalaj Jesús tiʼ le kʼasaʼan máak yaan u yantal tu yéetel teʼ kaʼan jach teʼ kʼiin jeʼeloʼ? Maʼ. Leloʼ maʼ tu páajtal tumen mix Jesús bin kaʼan teʼ kʼiin jeʼeloʼ; pʼáat «yáanal le luʼumaʼ [wa teʼ muknaloʼ] óoxpʼéel kʼiin» (Mateo 12:40; Marcos 10:34). Tak le tsʼokaʼan u kaʼa kuxkíintaʼaloʼ 40 kʼiinoʼob pʼáat way Luʼum táanil tiʼ u bin teʼ kaʼanoʼ (Beetaʼanoʼob [Hechos] 1:3, 9). Le oʼolal túun le kʼasaʼan máakoʼ maʼ tu páajtal u bin kaʼan yéetel Jesús teʼ kʼiin jeʼeloʼ.

¿Baʼax túun le «Kúuchil Kiʼimak óolal» tuʼux kun antal le kʼasaʼan máakoʼ? Ken kaʼa kuxkíintaʼakeʼ yaan u kuxtal teʼ Paraíso way Luʼum tuʼux kun gobernar Jesusoʼ (Beetaʼanoʼob 24:15; Apocalipsis 21:3, 4). Utiaʼal a kanik u maasil yoʼolal le Paraíso yéetel baʼax u kʼáat Dios ka k-beetoʼ, tʼaanen yéetel juntúul u j-jaajkunaj Jéeoba.