¿Maas wa yaan páajtalil tiʼ le kíimil ke tiʼ Diosoʼ? ¡Maʼatech! ¿Baʼaxten? Tumen Dioseʼ u Yuumil «tuláakal páajtalil» (1 Corintoiloʼob 15:26; Éxodo 6:3). Dioseʼ jeʼel u páajtal u xuʼulsik le kíimiloʼ yéetel bey u yaʼalmaj u beetik teʼ túumben luʼumoʼ: yaan u kaʼa kuxkíintik le kimenoʼoboʼ. * ¿Jach wa tu jaajil yaan u beetik leloʼ? Jesús u Paal Dioseʼ tu yaʼalaj junpʼéel baʼal ku yeʼesik jach tu jaajil yaan u beetik. (Xok Mateo 22:31, 32.)

Le ka tʼaanaj Jesús yéetel le saduceoʼob, máaxoʼob maʼatech u creertikoʼob wa yaan u kaʼa kuxtal le kimenoʼoboʼ, tu yaʼalaj: «Baʼaleʼ wa tu yoʼolal u kaʼapúut kuxtal le kimenoʼoboʼ, ¿maʼ wa a xokmeʼex baʼax ku yaʼalik tiʼ teʼex Jajal Diosiʼ? Tu yaʼalaj beyaʼ: Teen u Jajal Dios Abraham, Isaak yéetel Jacob. Jajal Dioseʼ maʼ u Jajal Dios kimenoʼobiʼ baʼaleʼ u Jajal Dios kuxaʼanoʼob». Jesuseʼ tuukulnaj wal tiʼ le ka tʼaanaj Jéeoba yéetel Moisés yiknal le junkúul chan cheʼ ku tóochʼbal u kʼáakʼil walajki 3,500 jaʼaboʼobaʼ (Éxodo 3:1-6). Jeʼex tu yaʼalil Jesuseʼ, le tʼaanoʼob aʼalaʼab tiʼ Moisesoʼ ku yeʼesikeʼ Jéeobaeʼ jach tu jaajil yaan u kaʼa kuxkíintik le kimenoʼoboʼ, tumen letiʼeʼ «u Jajal Dios kuxaʼanoʼob». ¿Bix ken u kaʼa kuxkíint le kimenoʼoboʼ?

Táanileʼ koʼox tuklik lelaʼ. Le ka tsikbalnaj Jéeoba yéetel Moiseseʼ, tsʼokaʼaniliʼ u máan 329 jaʼaboʼob kíimik Abraham, 224 kíimik Isaak yéetel 197 kíimik Jacob. Kex beyoʼ le ka tʼaanaj Jéeoba tu yoʼolaloʼobeʼ tu yaʼalaj «Teen u Diosoʼob», maʼ tu yaʼalaj «Teen kaʼach u Diosoʼob». Lelaʼ ku yeʼesikeʼ tu táan Jéeobaeʼ láayliʼ kuxaʼanoʼobeʼ. ¿Baʼaxten?

Jesuseʼ tu yaʼalaj: «[Jéeobaeʼ] maʼ u Jajal Dios kimenoʼobiʼ baʼaleʼ u Jajal Dios kuxaʼanoʼob». ¿Baʼax u kʼáat u yaʼal leloʼ? Wa maʼ u kaʼa kuxkíintaʼal Abraham, Isaak yéetel Jacobeʼ, u kʼáat u yaʼaleʼ Jéeobaeʼ chéen u Dios kimen wíinkliloʼob. Baʼaleʼ maʼ beyiʼ, tumen Jéeobaeʼ maas yaan u páajtalil ke le kíimiloʼ, yéetel letiʼeʼ yaan u tokik tiʼ le kíimil le máaxoʼob chúukaʼan u yóoloʼob tiʼoʼ.

¿Baʼax túun kun úuchul yéetel Abraham, Isaak, Jacob yéetel le uláakʼ máaxoʼob chúukpaj u yóol u meyajtoʼob Dios tsʼoʼok u kíimloʼoboʼ? Jesuseʼ tu yaʼalaj: «Utiaʼal letiʼeʼ tuláakal kuxaʼantakoʼob» (Lucas 20:38). Jeʼex k-ilkoʼ, Jéeobaeʼ jach tu jaajil yaan u kaʼa kuxkíintik le máaxoʼob chúukpaj u yóoloʼob u meyajtoʼ (Romailoʼob 4:16, 17). Jéeobaeʼ mix bikʼin ken u tuʼubsoʼob; ken kʼuchuk u kʼiinileʼ yaan u kaʼa kuxkíintikoʼob.

¿Maʼ wa uts ta tʼaan ka a wil tu kaʼatéen juntúul máax a yaabiltmaj tsʼoʼok u kíimil? Wa beyoʼ kʼaʼajaktecheʼ Jéeobaeʼ maas yaan u páajtalil ke le kíimiloʼ. Mix baʼal jeʼel u beetik maʼ u kaʼa kuxkíintik le kimenoʼoboʼ. ¿A kʼáat wa a kan u maasil yoʼolal Dios yéetel bix ken u kaʼa kuxkíint le kimenoʼoboʼ? Wa ka beetik beyoʼ yaan a natsʼkaba tiʼ Jéeoba, «u Jajal Dios kuxaʼanoʼob».