Kaanbalnakoʼon tiʼ u Tʼaan Dios

¿Baʼaxten ku yokjaʼ le cristianoʼoboʼ?

Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ, jeʼel a wáantaʼal tumen u j-jaajkunajoʼob Jéeoba (testigos de Jehová) utiaʼal ka a wojéelt u núukil le kʼáatchiʼobaʼ.

1. ¿Baʼax le okjaʼoʼ?

Le okjaʼoʼ junpʼéel chíikulal ku yeʼesik u kʼáat u bisuba máak maʼalob yéetel Dios. Le oʼolal le cristianoʼoboʼ maʼ unaj u yokjaʼob tu chichniloʼobiʼ, baʼaxeʼ tak ken yanak u jaʼabil tiʼob utiaʼal u kʼaj óoltikoʼob Dios yéetel u beetkubaʼob disipuloʼob tiʼ Jesús (Beetaʼanoʼob [Hechos] 8:12; 1 Pedro 3:21). Tsʼoʼoleʼ utiaʼal u beetkubaʼob u disipuloʼob Jesuseʼ, yáax táanil kʼaʼabéet u kankoʼob yéetel u beetkoʼob le baʼax tu yaʼalaj letiʼoʼ. (Xok Mateo 28:19, 20.)

Yaʼab máakoʼob tu kʼiinil le apostoloʼoboʼ, chéen pʼelak páajchajiktiʼobeʼ, tu chʼaʼtuklaj u maas kʼaj óoltikoʼob Dios yéetel Jesús. Juntúul tiʼ le máakoʼobaʼ chéen tu naʼatilak jeʼel u salvarkuba tu yoʼolal u kuxtal Jesús tu kʼuboʼ, ka tu beetuba disipuloil tu séebaʼanil. Bejlaʼeʼ yaʼab máakoʼob tsʼoʼok u chʼaʼtuklik u beetkoʼob xan beyoʼ. (Xok Beetaʼanoʼob 8:26-31, 35-38.)

2. ¿Baʼaxten okjaʼanaj Jesús?

Jesuseʼ 30 jaʼaboʼob yaantiʼ le ka tsʼaʼab u yokjaʼ tumen Juan Bautista tu jaʼil le Jordanoʼ. Letiʼeʼ okjaʼanaj utiaʼal u yeʼesik tsʼoʼok u chʼaʼtuklik u beetik baʼax u kʼáat Dios (Hebreob 10:7). Yéetel leloʼ tu yeʼesaj u kʼáat u tsʼáa u kuxtal utiaʼal u perdonartaʼal u kʼeban wíinik. Desde teʼ kaʼan, táanil tiʼ u taal way Luʼumeʼ, tsʼokaʼaniliʼ u yeʼesik u yaabiltmaj u Taata yéetel ku beetik baʼax u kʼáat. (Xok Marcos 1:9-11 yéetel Juan 8:29; 17:5.)

  3. ¿Baʼaxten ku yokjaʼ le cristianoʼoboʼ?

Toʼoneʼ maʼ beyoʼon jeʼex Jesuseʼ, tumen kʼebanoʼon desde ken síijikoʼoneʼ. Baʼaleʼ yoʼolal u kuxtal Jesús tu kʼuboʼ jeʼel u páajtal k-bisikba maʼalob yéetel Dioseʼ (Romailoʼob 5:10, 12; 12:1, 2). Jeʼel tak u páajtal k-beetikba u paalaleʼ (2 Corintoiloʼob 6:18). ¿Baʼax unaj k-beetik utiaʼal leloʼ? Unaj k-beetik junpʼéel oración tiʼ Jéeoba chéen t-juunal utiaʼal k-kʼubik k-kuxtal tiʼ letiʼ. Leloʼ u kʼáat u yaʼal táan k-aʼalik jach tu jaajil yaan k-beetik baʼax u kʼáat tuláakal u kʼiiniloʼob k-kuxtal. Ken tsʼoʼokok túun k-beetik le oracionaʼ, k-okjaʼ utiaʼal ka ilaʼak tsʼoʼok k-kʼubik k-kuxtal tiʼ Dios. (Xok Mateo 16:24 yéetel 1 Pedro 4:2.)

4. ¿Baʼax unaj a beetik táanil tiʼ a wokjaʼ?

U j-jaajkunajoʼob Jéeobaeʼ ku tsʼáaikoʼob xook yéetel le Biblia tiʼ le máaxoʼob taak u natsʼkubaʼob tiʼ Diosoʼ. Wa ka xokik le Biblia yéetel ka bin teʼ muchʼtáambaloʼob ku beetkoʼoboʼ yaan a maas yaabiltik Dios yéetel yaan u maas muʼukʼaʼantal a fe. Tsʼoʼoleʼ leloʼ yaan u yáantkech utiaʼal ka yanaktech jatsʼuts modos yéetel ka a beet baʼaloʼob maʼalobtak. U yantaltech jatsʼuts modos jeʼex le yaabilaj yéetel le fejoʼ yaan u yáantkech a meyajt Dios mantatsʼ ken a kʼub a kuxtal tiʼ letiʼoʼ. (Xok Juan 17:3 yéetel Hebreob 10:24, 25.)

Wa a kʼáat a wojéelt u maasileʼ, ilawil u xooki 18 tiʼ le libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeobaoʼ.