Kaanbalnakoʼon tiʼ u Tʼaan Dios

¿Baʼax utsiloʼob ku taasik u beetaʼal baʼax ku yaʼalik Dios?

Le xookaʼ yaan u yáantkech a wil ta Biblia jujunpʼéel baʼaloʼob taak a wojéeltik. Wa a kʼáateʼ, jeʼel a wáantaʼal tumen u j-jaajkunajoʼob Jéeoba (testigos de Jehová) utiaʼal ka a wojéelt u núukil le kʼáatchiʼobaʼ.

1. ¿Baʼaxten unaj k-uʼuyik u tʼaan Dios?

Unaj k-uʼuyik u tʼaan tumen letiʼ beetoʼon. Tak Jesuseʼ mantatsʼ tu yuʼubaj u tʼaan u Taata (Juan 6:38; Apocalipsis 4:11). U leyoʼob Dioseʼ ku tsʼáaiktoʼon u páajtalil k-eʼesiktiʼ k-yaabiltmaj. (Xok 1 Juan 5:3.)

U leyoʼobeʼ ku yáantkoʼon utiaʼal ka xiʼiktoʼon utsil. Ku kaʼansiktoʼon bix maas maʼalob ka kuxlakoʼon bejlaʼeʼ yéetel bix jeʼel k-kʼamik yaʼab utsiloʼob utiaʼal minaʼan u xuuleʼ. (Xok Salmo 19:7, 11 yéetel Isaías 48:17, 18.)

2. ¿Bix u yáantkoʼon u leyoʼob Dios utiaʼal k-kanáantik k-toj óolal?

U yaʼalik Dios ichil u ley maʼ maʼalob le káaltaliloʼ ku yáantkoʼon utiaʼal maʼ u yúuchul toʼon loob yéetel utiaʼal maʼ u tsaʼayal toʼon kʼojaʼaniloʼob jeʼel u kíimskoʼoneʼ. U píit máan u yukʼik máak alcoholeʼ jeʼel u suut vicioileʼ yéetel jeʼel u túulchʼintkoʼon k-beet baʼaloʼob kʼaastakeʼ (Proverbios 23:20, 29, 30). Jéeobaeʼ maʼ kʼaas u yilik k-ukʼik alcoholiʼ, baʼaleʼ unaj k-tsʼáaik u pʼiis. (Xok Salmo 104:15 yéetel 1 Corintoiloʼob 6:10.)

Dioseʼ maʼ maʼalob u yilik k-pʼektik u maasil yoʼolal baʼax yaan tiʼobiʼ, k-séeb pʼuʼujuliʼ mix ka yanak toʼon uláakʼ kʼaakʼas modosoʼobiʼ. Wa k-beetik baʼax ku yaʼalik toʼoneʼ maas maʼ ten k-kʼojaʼantal. (Xok Proverbios 14:30 yéetel 22:24, 25.)

3. ¿Bix u yáantkoʼon u leyoʼob Dios tiʼ baʼaxoʼob yaan yil yéetel le sexooʼ?

U ley Dioseʼ ku yaʼalikeʼ maʼ maʼalob ka yanak baʼax u yil kaʼatúul máakoʼob maʼ tsʼokaʼan u beeloʼobiʼ (Hebreob 13:4). Le máaxoʼob chaʼik u nuʼuktaʼaloʼob tumen le leyaʼ maas u yaabiltmubaʼob yéetel maas maʼalob jeʼel u líiʼsik u paalaloʼobeʼ. Tsʼoʼoleʼ le máaxoʼob ku yantal baʼax u yil yéetel máax maʼ u núupeʼ jeʼel u tsaʼayal talam kʼojaʼaniloʼob tiʼobeʼ, jeʼel u divorciarkubaʼobeʼ, u baʼateloʼob, u beetkoʼob u muʼyaj u familiaʼob, yéetel u pʼáatal chéen juntúul tiʼ letiʼob u kanáant u paalaloʼobiʼ. (Xok Proverbios 5:1-9.)

Wa k-kanáantikba utiaʼal maʼ k-lúubul teʼ kʼebanaʼ yaan u yáantkoʼon utiaʼal maʼ u xuʼulul k-bisikba yéetel Dios. Lelaʼ ku yáantaj xan utiaʼal maʼ k-beetik u muʼyaj uláakʼ máakoʼob. (Xok 1 Tesalonicailoʼob 4:3-6.)

  4. ¿Baʼax utsil jeʼel u taasiktoʼon k-eʼesik tsiikil tiʼ le kuxtaloʼ?

Le máaxoʼob eʼesik tsiikil tiʼ le kuxtaloʼ ku pʼatkoʼob le vicioʼob yaan kaʼach tiʼob jeʼex u tsʼuʼutsʼaʼal chamaloʼ yéetel uláakʼ baʼaloʼob jeʼel u beetik loobeʼ (2 Corintoiloʼob 7:1). Dioseʼ jatsʼuts u yilik u kuxtal tak juntúul chaambal maʼ síijikiʼ (Éxodo 21:22, 23). Le oʼolaleʼ maʼ unaj k-kíimsik juntúul chaambal maʼ síijikiʼiʼ. Tsʼoʼoleʼ le máaxoʼob ku tuukuloʼob jeʼex u tuukul Dioseʼ ku kanáantik u yotochoʼob, u camionoʼob yéetel le tuʼuxoʼob ku meyajoʼob utiaʼal maʼ u yúuchul mix junpʼéel loob tiʼob (Deuteronomio 22:8). Maʼatech u táakpajloʼob tiʼ báaxaloʼob wa uláakʼ baʼaloʼob tuʼux ku beetaʼal loob tiʼ máak, tumen u yojloʼobeʼ le kuxtaloʼ junpʼéel siibal tiʼ Dios. (Xok Salmo 36:9.)

5. ¿Baʼax utsil jeʼel u taasiktoʼon k-eʼesik tsiikil tiʼ le kʼiʼikʼoʼ?

Utiaʼal Dioseʼ le kʼiʼikʼoʼ kiliʼich, tumen letiʼeʼ ku yaʼalikeʼ tiʼ yaan le kuxtaloʼ (Génesis 9:3, 4). U ley Dioseʼ ku yaʼalikeʼ le kʼiʼikʼoʼ láayliʼ kiliʼich jeʼel bix le kuxtaloʼ yéetel lelaʼ ku taasik yaʼab utsiloʼob. ¿Baʼaxten? Tumen tu yoʼolal le leyaʼ, Dioseʼ ku tsʼáaik u páajtalil u perdonartaʼal k-kʼebanoʼob. (Xok Levítico 17:11-13 yéetel Hebreob 9:22.)

Minaʼan uláakʼ kʼiʼikʼel jeʼel bix utiaʼal Jesús kaʼacheʼ tumen letiʼeʼ juntúul máak maʼ anchaj u kʼebaniʼ. Ka tsʼoʼok u kʼubik u kuxtal tu yoʼolal wíinikeʼ, letiʼeʼ tu kʼubaj tiʼ Dios u tojol u kʼiʼikʼel wa u kuxtaloʼ (Hebreob 9:12). Le kʼiʼikʼ tu wekajoʼ ku tsʼáaik u páajtalil u yantaltoʼon kuxtal minaʼan u xuul. (Xok Mateo 26:28 yéetel Juan 3:16.)

Wa a kʼáat a wojéelt u maasileʼ, ilawil u xookil 12 yéetel 13 tiʼ le libroaʼ ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.