¿A wojel wa?

¿Baʼax ku kaʼansik toʼon le úuchik u pʼáatal le apóstol Pedro tu yotoch juntúul máak ku bon kʼéewel táanil tiʼ u bin u xíimbalt Corneliooʼ?

▪ Tu libroil Beetaʼanoʼob wa Hechoseʼ ku yaʼalikeʼ Pedroeʼ «pʼáat tsʼeʼetsʼek kʼiinoʼob» Jope, «tu yotoch juntúul máak ku meyajtik kʼéewel u kʼaabaʼeʼ Simón» «kajakbal tu jáal kʼáaʼnáab» (Beetaʼanoʼob 9:43; 10:6). Le judíoʼoboʼ jach kʼaas u yilkoʼob kaʼach u boʼonol wa u meyajtaʼal le kʼéeweloʼ, le leyoʼob yaan teʼ Talmud ku meyajtiʼoboʼ ku yaʼalikeʼ maas kʼaas tak tiʼ u máan molbil u taʼ peekʼ. Simoneʼ sáamsamal ku machik baʼalcheʼob kimentak le oʼolaleʼ ku pʼáatal maʼ limpio tu táan Diosiʼ (Levítico 5:2; 11:39). Ku yaʼalaʼaleʼ maʼ xaaneʼ utiaʼal lelaʼ ku meyaj tiʼ Simón u jaʼil kʼáaʼnáab, tsʼoʼoleʼ tumen jach tuʼeʼ tiʼ yaan u kúuchil u meyaj teʼ joʼokajoʼ.

Kex beyoʼ Pedroeʼ pʼáat tu yotoch Simón. Lelaʼ ku kaʼansik toʼoneʼ jeʼex Jesuseʼ, maʼ xaaneʼ Pedroeʼ tsʼoʼok u kanik kaʼach maʼ kʼaas u yilik u biskuba máak yéetel le máaxoʼob ku yaʼalik le judíoʼob maʼ limpioʼob tu táan Diosoʼ (Mateo 9:11; Lucas 7:36-50).

«Teech aʼale», ¿baʼax tu yóotaj u yaʼal Jesús yéetel lelaʼ?

▪ Le ka tu yaʼalaj Caifás, u nojchil le sacerdoteʼob judíoʼob, tiʼ Jesús ka u yaʼal tu táan yaʼab máakoʼob wa letiʼ le Cristo u Paal Diosoʼ, Jesuseʼ tu yaʼalaj: «Teech aʼale» (Mateo 26:63, 64, NM). ¿Baʼax tu yóotaj u yaʼale?

Le baʼax tu yaʼalaj Jesús tiʼ Caifasoʼ maʼ u kʼáat u yaʼal wa maʼ u kʼáat u núuk le baʼax kʼáataʼabtiʼoʼ. Le baʼax tu yaʼalaj Jesusoʼ jach suuk u meyaj tiʼ le judíoʼob utiaʼal u yaʼalikoʼob jaaj junpʼéel baʼaloʼ. Jeʼex le Talmud tiʼ Jerusalén beetaʼab tiʼ le siglo cuatro tsʼoʼokok u taal Jesús yéetel ku meyaj kaʼach tiʼ le judíoʼoboʼ, ku yaʼalikeʼ le ka kʼáataʼab tiʼ juntúul judío wa jach tu jaajil tsʼoʼok u kíimil juntúul u maestroil le judíoʼoboʼ, letiʼeʼ tu yaʼalaj: «Teʼex aʼale». Le baʼax tu yaʼalaʼ ku yeʼesikeʼ jach tu jaajil kíim le máakoʼ.

Jesuseʼ u yojel kaʼacheʼ yaan u derechoil tiʼ u nojchil le sacerdoteʼob u yojéeltik u jaajiloʼ. Tsʼoʼoleʼ wa maʼ u núukik kaʼacheʼ, yaan u yaʼalaʼaleʼ maʼ letiʼ le Cristooʼ. Le oʼolal le ka tu yaʼalaj «Teech aʼale», tu yeʼesaj jach jaaj le baʼax kʼáataʼabtiʼoʼ. U tsʼíibil Marcoseʼ ku yaʼalik xaneʼ, le ka tu yaʼalaj Caifás tiʼ Jesús ka u yaʼal wa letiʼ le Mesíasoʼ, letiʼeʼ tu jaajil u yóol tu yaʼalaj: «Teen» (Marcos 14:62, NM; ilaʼak xan Mateo 26:25 yéetel Marcos 15:2).

[U tsolajil le oochel teʼ táan juʼun 31]

FEZ (MARRUECOS): JUNPʼÉEL TUʼUX KU BOʼONOL KʼÉEWEL