Le oracionoʼ

7 ¿Jeʼel wa u yuʼubik Dios k-oracionoʼobeʼ?

LELAʼ junpʼéel baʼal yaʼab máakoʼob u kʼáat u yojéeltoʼob. Tsʼoʼok k-kanikeʼ yaan oracionoʼob ku yuʼubik Dios, baʼaleʼ maʼ tuláakaliʼ. ¿Ku yuʼubik wa ta tʼaan le oracionoʼob k-beetkoʼ? Leloʼ jach yaan yil yéetel bix k-beetik.

Jesuseʼ tu yaʼalaj maʼ maʼalob baʼax ku beetik kaʼach u nuuktakil le judíoʼob kuxlajoʼob tu kʼiiniloʼ tumen letiʼobeʼ j-kaʼapʼéel ichoʼob yéetel chéen u kʼáatoʼob ka ilaʼak bey jach u tsʼaamaj u yóoloʼob tiʼ Dioseʼ. Jesuseʼ tu yaʼaleʼ letiʼobeʼ «minaʼan uláakʼ baʼax ken u kʼamoʼob». Letiʼobeʼ maʼ táan u kaxtikoʼob ka uʼuyaʼakoʼob tumen Diosiʼ, chéen u kʼáatoʼob kaʼach ka ilaʼakoʼob tumen u maasil máakoʼob, le oʼolaleʼ chéen xan le kun antaltiʼob kaʼachi (Mateo 6:5). Lelaʼ láayliʼ xan bey u yúuchul teʼ kʼiinoʼobaʼ. Yaʼab máakoʼobeʼ ken orarnakoʼobeʼ maʼatech u kʼáatkoʼob ka nojbeʼenkúuntaʼak Dios, chéen ku kʼáatkoʼob baʼaloʼob yaan yil yéeteloʼob. Tsʼoʼoleʼ tumen maʼatech u beetkoʼob le baʼaxoʼob tsʼoʼok k-ilik teʼ xookoʼob máanoʼoboʼ, maʼatech u núukaʼal u oracionoʼob.

¿Kux túun le oracionoʼob k-beetkoʼ? Utiaʼal ka núukaʼakeʼ , maʼ kʼaʼabéet tiʼ k-taal tiʼ junpʼéeliliʼ luʼum wa yaantoʼon taakʼiniʼ. Le Bibliaoʼ ku yaʼalikeʼ «Dioseʼ mix máak jelaʼan u paktik». Baʼaxeʼ ku yaʼalikeʼ «tiʼ tuláakal kaajeʼ ku kʼamik jeʼel máaxak ku beetik baʼax maʼalobeʼ yéetel jeʼel máaxak u chʼaʼamaj saajkilil tiʼeʼ» (Hechos 10:34, 35). Le máax ku tsikik Dioseʼ, ku chʼaʼik en cuenta yéetel maʼatech u beetik baʼax maʼ uts tu tʼaaniʼ. Le máax beetik baʼax utsoʼ ku yilik u beetik baʼax u kʼáat Dios, maʼ le baʼax u kʼáat letiʼ yéetel uláakʼ máakoʼobiʼ. Wa k-kʼáat ka uʼuyaʼak k-oración tumen Dioseʼ, unaj k-beetik baʼax ku yaʼalik le Bibliaoʼ. *

U jaajileʼ yaʼab máakoʼobeʼ ku páaʼtkoʼob ka núukaʼak u oracionoʼob yéetel junpʼéel milagro. Baʼaleʼ tak úuchjeakileʼ Dioseʼ chéen wa jaytéen tu núukaj le oracionoʼob beyoʼ. Ichil le Bibliaoʼ ku béeytal u yilaʼaleʼ yaan horaeʼ ku máan yaʼab sigloʼob utiaʼal u beetik Dios uláakʼ milagro. Tsʼoʼoleʼ ku yaʼalik xaneʼ ken tsʼoʼokok u kíimil le apostoloʼoboʼ yaan u xuʼulul u yilaʼal le milagroʼoboʼ (1 Corintios 13:8-10). Baʼaleʼ lelaʼ maʼ u kʼáat u yaʼal wa maʼatech u núukik Dios le oracionoʼoboʼ. Koʼox ilik bix u beetik Jéeoba teʼ kʼiinoʼobaʼ.

Ku tsʼáaik naʼat. Tiʼ Dios u taal le naʼatoʼ, yéetel letiʼeʼ ku tsʼáaik tiʼ le máaxoʼob kaxtik u nuʼuktaj yéetel ku yilik u beetkoʼob baʼax u kʼáatoʼ (Santiago 1:5).

Ku tsʼáaik u espíritu santo. Mix baʼal jeʼel u páajtal u keʼetel yéetel le espíritu santo wa u kiliʼich muukʼ Diosoʼ. Lelaʼ ku yáantkoʼon tiʼ jejeláas baʼaloʼob jeʼex, utiaʼal k-aktáantik talamiloʼob, ku tsʼáaiktoʼon jeetsʼelil yéetel ku yáantkoʼon utiaʼal ka yanaktoʼon jatsʼuts modos (Gálatas 5:22, 23). Tsʼoʼoleʼ Jesuseʼ tu yaʼaleʼ Dioseʼ jeʼel u tsʼáaiktoʼon u espíritu santo ken kʼaʼabéetchajaktoʼoneʼ (Lucas 11:13).

Ku kaʼansik le máaxoʼob kaxtik u jaajiloʼ. Jeʼex u yaʼalik Hechos 17:26, 27, yaʼab máakoʼob kaxtik Dios. U kʼáat u kʼaj óoltoʼob u kʼaabaʼ, le baʼaxoʼob ku tukultik u beetik yéetel le Luʼumaʼ bey xan yéetel wíinik. Tsʼoʼoleʼ u kʼáat u yojéeltoʼob bix jeʼel u natsʼkubaʼob tiʼ letiʼeʼ (Santiago 4:8). U j-jaajkunajoʼob Jéeobaeʼ (testigos de Jehová) mantatsʼ ku tsikbaloʼob yéetel le máaxoʼob taak u kaanbaloʼoboʼ, tsʼoʼoleʼ yéetel kiʼimak óolal ku kaʼanskoʼob tiʼob le baʼax u kʼáat u yojéeltoʼoboʼ.

¿Taak wa a maas kaanbal yéetel a kʼaj óoltik Dios, le oʼolal ta kʼamaj le revistaaʼ? Wa beyoʼ maʼ xaaneʼ táan u núukik Dios a oración.

[Tsolajil]