4 Baʼax unaj a beetik wa yaan baʼax maʼ ta jach creertik

«¡Jach jumpʼíit a woksaj óolal! ¿Baʼaxten kaʼapʼéelchaj a tuukul?» (Mateo 14:31)

¿BAʼAXTEN KU TALAMTAL? Tak jujuntúul tiʼ u disipuloʼob Jesuseʼ yaan kʼiineʼ yanchaj baʼaxoʼob maʼ tu jach creertoʼobiʼ (Mateo 14:30; Lucas 24:36-39; Juan 20:24, 25). Le Bibliaoʼ ku yaʼalikeʼ le u pʼáatal minaʼan fe tiʼ máakoʼ upʼéel «kʼeban ku woʼoltikoʼon» (Hebreob 12:1). Le apóstol Pablooʼ tu yaʼalaj xan: «Maʼ tiʼ tuláakal yaan oksaj óolaliʼ» (2 Tesalonicailoʼob 3:2). Baʼaleʼ lelaʼ maʼ u kʼáat u yaʼal wa jach upuliʼ maʼ tu páajtal u yantaltoʼon fejiʼ. Baʼaxeʼ yaʼab máakoʼobeʼ maʼatech u beetkoʼob mix baʼal utiaʼal ka yanaktiʼob. Baʼaleʼ le máaxoʼob ku yilik u yantal fe tiʼoboʼ ku yáantaʼaloʼob tumen Dios.

¿BAʼAX UNAJ A BEETIK WA YAAN BAʼAX MAʼ TA JACH CREERTIK? Yáaxeʼ ilawil baʼaxoʼob beetik maʼ a jach creertik. Jeʼex le apóstol Tomasoʼ talamchaj u creertik wa tsʼoʼok u kaʼa kuxkíintaʼal Jesús kex tumen táan kaʼach u yaʼalaʼaltiʼ tumen  uláakʼ disipuloʼob tsʼoʼok u yilkoʼoboʼ. Letiʼeʼ kʼaʼabéet u yilik kaʼach wa jach tu jaajil le baʼax aʼalaʼabtiʼoʼ. Le oʼolaleʼ Jesuseʼ tu chíikbesuba tiʼ, lelaʼ le beet u muʼukʼaʼantal u fe Tomás (Juan 20:24-29).

Jéeobaeʼ u tsʼaamajtoʼon le Biblia utiaʼal k-ilik wa jach jaaj le baʼaxoʼob yaan hora maʼatech k-jach creertikoʼ. Yaʼab máakoʼobeʼ tsʼoʼok u pʼáatal minaʼan u fejoʼob tiʼ Dios, tumen ku tuklikoʼob letiʼ beetik wa yaan baʼax u yil yéetel le sen baʼateloʼob yéetel le sen muʼyajiloʼob yaan teʼ yóokʼol kaabaʼ. Baʼaleʼ ¿baʼax ku yaʼalik le Biblia yoʼolal lelaʼ?

Maʼ Dios gobernartik le yóokʼol kaabaʼ. Jesuseʼ tu yaʼaleʼ, «le máax ku tusbel way yóokʼol kaabeʼ» Satanás, letiʼeʼ utúul máax jach kʼasaʼan (Juan 14:30). Utéenjeakeʼ Satanaseʼ tu yaʼalaj u tsʼáaik tiʼ Jesús «tuláakal u kaajiloʼob yóokʼol kaab» wa ka u adorarte. Satanaseʼ tu yaʼalajtiʼ: «Teneʼ jeʼel in tsʼáaiktech tuláakal le páajtalilaʼ yéetel u nojbeʼenil le kaajoʼobaʼ. Tumen teneʼ in kʼammaj tuláakal lelaʼ, yéetel kin tsʼáaik tiʼ le máax bíin in wóolteʼ». Jesuseʼ tu núukajtiʼ: «Tselaba tin táan, kʼasilbaʼal, tumen le Kiliʼich Tsʼíiboʼ ku yaʼalik: [Adorart] Yuumtsil a Jajal Dios yéetel meyajt chéen letiʼ» (Lucas 4:5-8). Jeʼex k-ilkoʼ Jesuseʼ maʼ tu yaʼalaj tiʼ Satanás wa maʼ utiaʼal u kaajiloʼob le yóokʼol kaabaʼ. Le oʼolaleʼ, le máax beetik u yantal muʼyajiloʼ Satanás yéetel u gobiernoiloʼob le yóokʼol kaabaʼ maʼ Diosiʼ (Apocalipsis 12:9, 12).

Maʼ kun xáantal ken xuʼulsaʼak le muʼyajiloʼ. Dioseʼ tsʼoʼok u yéeyik Jesucristo utiaʼal ka u gobernart le yóokʼol kaab maʼ kun xáantaloʼ (Mateo 6:9; 1 Corintoiloʼob 15:20-28). Yéetel jeʼex u yaʼalmil le Bibliaoʼ, le baʼax ku taal u kʼiinilaʼ táan u tsikbaltaʼal tuláakal yóokʼol kaab (Mateo 24:14). Maʼ kun xáantaleʼ le gobiernoaʼ yaan u xuʼulsik le máaxoʼob pʼekmil Diosoʼ yéetel yaan u xuʼulsik le baʼaxoʼob beetik u yantal le muʼyajiloʼ (Daniel 2:44; Mateo 25:31-33, 46; Apocalipsis 21:3, 4).

¿BAʼAX UTSILOʼOB KU TAASIK? Le Bibliaoʼ ku yaʼalikeʼ le máaxoʼob maʼ u jach jetsʼmaj u tuukuloʼob tiʼ le baʼax ku creertkoʼoboʼ beyoʼob jeʼex u olasi le kʼáaʼnáaboʼ, tumen «ku jíiltaʼaloʼob tumen u yiikʼal jeʼel máakalmáak túumben kaʼansajileʼ» (Efesoiloʼob 4:14; 2 Pedro 2:1). Baʼaleʼ le máaxoʼob ku yilkoʼob wa jaaj le baʼax ku creerkoʼoboʼ ku muʼukʼaʼantal u fejoʼob (1 Corintoiloʼob 16:13).

U j-jaajkunajoʼob Jéeoba (Los testigos de Jehová), le máaxoʼob beetik le revistaaʼ, jach jeʼel u yáantkechoʼob utiaʼal ka a wil wa jaaj le baʼaxoʼob ka creertikoʼ yéetel utiaʼal ka muʼukʼaʼanchajak a fe. Ilawil a tsikbal tu yéeteloʼob utiaʼal ka wil wa jaaj le baʼax ku kaʼanskoʼoboʼ. Wa ka beetik beyoʼ, jach yaan u muʼukʼaʼantal a fe tiʼ Dios.

Utiaʼal a wojéeltik u maasileʼ ilawil le xookil ocho yéetel once tiʼ le libro ¿Baʼax jach tu jaajil ku kaʼansik le Bibliaoʼ?, * ku kʼaabaʼtik «¿Baʼax u Reino Dios?» yéetel «¿Baʼaxten ku chaʼik Dios u yantal muʼyajil?».

[Tsolajiloʼob]

[U tsolajil le oochel teʼ táan juʼun 9]

Le máaxoʼob ku yilkoʼob wa jaaj le baʼax ku creerkoʼoboʼ ku muʼukʼaʼantal u fejoʼob