Unaj k-kanáantik maʼ k-lúubul tiʼ u léechoʼob Satanás
Unaj k-kanáantik maʼ k-lúubul tiʼ u léechoʼob Satanás
«Jeetsʼel [pʼáateneʼex] tu contra u táabsajiloʼob kʼaasilbaʼal.» (EFE. 6:11)
¿BAʼAX JEʼEL A NÚUKIKEʼ?
¿Baʼax jeʼel u yáantik máak utiaʼal maʼ u xuʼulul u meyajtik Jéeoba yoʼolal le ayikʼaliloʼ?
¿Baʼax jeʼel u yáantik le máax meyajtik Dios utiaʼal maʼ u tusik u núup yéetel yaanaloʼ?
¿Baʼax utsiloʼob jeʼel k-kʼamik wa maʼ k-bin tu paach ayikʼalil yéetel wa maʼ k-núupkʼebantaleʼ?
1, 2. 1) ¿Baʼaxten maʼatech u chʼaʼik óotsilil Satanás tiʼ le sukuʼunoʼob yéeyaʼanoʼob mix tiʼ le «uláakʼ j-tamanoʼob[oʼ]»? 2) ¿Baʼax léechoʼob ku tsʼáaik Satanás ken k-il teʼ xookaʼ?
SATANASEʼ maʼatech u chʼaʼik óotsilil tiʼ mix máak, maases tiʼ toʼon k-meyajtik Jéeoba. Letiʼeʼ jach u pʼekmaj le máaxoʼob yéeyaʼanoʼob utiaʼal u binoʼob kaʼan pʼaatloʼob way Luʼumeʼ (Apo. 12:17). Bejlaʼeʼ le sukuʼunoʼob chúukaʼan u yóoloʼobaʼ, ku nuʼuktikoʼob u kʼaʼaytaʼal le Reinooʼ yéetel ku yeʼeskoʼob letiʼe Kʼaasilbaʼal ku nuʼuktaj teʼ yóokʼol kaabaʼ. Satanaseʼ u pʼekmaj xan le «uláakʼ j-tamanoʼob», ku múul meyajoʼob yéetel le sukuʼunoʼob yéeyaʼanoʼoboʼ. Letiʼobeʼ táan u páaʼtkoʼob junpʼéel baʼal úuch u peʼert le Kʼaasilbaʼaloʼ: le kuxtal minaʼan u xuuloʼ (Juan 10:16). ¡Le oʼolal jach táaj pʼujaʼan! Kex wa táan k-páaʼtik k-kuxtal way Luʼum wa teʼ kaʼanoʼ, le Kʼaasilbaʼaloʼ táan u kaxtik bix u léechtkoʼon (1 Ped. 5:8).
2 Utiaʼal lelaʼ ku meyajtiʼ jejeláas léechoʼob. Letiʼeʼ ku chʼóopkintik le máaxoʼob maʼatech u meyajtikoʼob Jéeoba, utiaʼal maʼ u kʼamkoʼob le maʼalob péektsiloʼ yéetel utiaʼal maʼ u yilkoʼob le léechoʼob ku tsʼáaikoʼ. Baʼaleʼ Satanaseʼ táan u léechtik xan jujuntúul tiʼ le máaxoʼob tsʼoʼok u kʼamkoʼob u maʼalob péektsil le Reinooʼ (2 Cor. 4:3, 4). Teʼ xook máanoʼ t-ilaj bix jeʼel k-kanáantikba tiʼ óoxpʼéel tiʼ u léechoʼobeʼ: 1) le maʼ u kanáantik máak baʼax ku yaʼalikoʼ, 2) le saajkil tiʼ u maasiloʼ, yéetel 3) le maʼ u xuʼulul u yaatal u yóol máakoʼ. Beoraaʼ yaan k-ilik bix jeʼel k-kanáantikba tiʼ uláakʼ kaʼapʼéeleʼ: le ayikʼaliloʼ yéetel u tusik u núup máak yéetel yaanaloʼ.
LE AYIKʼALILOʼ JUNPʼÉEL LÉECH JEʼEL U NÁACHKUNTKOʼON TIʼ DIOSEʼ
3, 4. U chiʼichnakiloʼob le kuxtalaʼ, ¿bix jeʼel u beetik k-bin tu paach ayikʼalileʼ?
3 Tiʼ junpʼéel kettʼaaneʼ Jesuseʼ tʼaanaj tiʼ iʼinaj paʼakʼ ich kʼiʼixoʼob. Tu yaʼaleʼ le kettʼaanaʼ ku chíikbesik le máaxoʼob «ku yuʼubikoʼob le maʼalob péektsiloʼ, baʼaleʼ ku sen tukultikoʼob u baʼaloʼobil le yóokʼol kaabaʼ yéetel ku tuʼusloʼob tumen le ayikʼaliloʼ. Tuláakal lelaʼ ku kupik [u] yiikʼ le maʼalob péektsiloʼ yéetel maʼ táan u chaʼik u yichankil» (Mat. 13:22). Jeʼex k-ilkoʼ, u tsʼíiboltik máak ayikʼalileʼ junpʼéel léech ku meyaj tiʼ le Kʼaasilbaʼaloʼ.
4 Kaʼapʼéel baʼaloʼob ku nupkubaʼob utiaʼal u «kupik [u] yiikʼ le maʼalob péektsiloʼ». Yáaxeʼ u sen «tukult[aʼal] u baʼaloʼobil le yóokʼol kaabaʼ». Teʼ «talam kʼiinoʼob[aʼ]», yaʼab baʼaloʼob jeʼel tak u bisik u wenel máakeʼ (2 Tim. 3:1). U jach koʼojtal tuláakal baʼal yéetel u pʼáatal minaʼan meyajeʼ ku beetik u pʼáatal minaʼan taakʼin tiʼ máak. Maʼ xaaneʼ k-tuklik: «Le ken in jubilartinbaeʼ, ¿yaan wa u yantalten baʼax kʼaʼabéet utiaʼal in kuxtal?». Yoʼolal lelaʼ yaan máakeʼ ku yilik u náajaltik tuláakal le taakʼin ku páajtaloʼ, tumen ku tuklikeʼ letiʼ kun áantik utiaʼal u bin maʼalobil tiʼ.
5. ¿Baʼaxten ku yaʼalaʼal ku tusik máak le ayikʼaliloʼ?
5 Jesuseʼ tu yaʼalaj le u kaʼapʼéel baʼal jeʼel u kupik u yiikʼ le maʼalob péektsiloʼ: u tuʼusul máak «tumen le ayikʼaliloʼ». U jaajileʼ le Bibliaoʼ ku yaʼalikeʼ «taakʼineʼ ku yáantaj» (Ecl. 7:12). Baʼaleʼ minaʼan u naʼat juntúul máak ku chʼíikil u kaxt taakʼin. Yaʼab máak tsʼoʼok u yilkeʼ, wa ku kaxtik u yantaltiʼ yaʼab baʼaloʼobeʼ, chéen ku maas tsʼíiboltik ayikʼalil. Yaan tak máak tsʼoʼok u palitsiltaʼal tumen le ayikʼaliloʼ (Mat. 6:24).
6, 7. 1) ¿Bix jeʼel u joʼopʼol k-tsʼíiboltik ayikʼalil teʼ tuʼux k-meyajoʼ? 2) ¿Baʼax unaj k-chʼaʼik en cuenta wa ku yaʼalaʼaltoʼon ka meyajnakoʼon maas tiempo?
6 Jeʼel u joʼopʼol u tsʼíiboltik máak taakʼin kex maʼ u tsʼáaik cuentaeʼ. Tukulteʼ junpʼéel kʼiineʼ a patroneʼ ku yaʼaliktech: «Yaan junpʼéel baʼax jach maʼalob taak in waʼaliktech. Tsʼoʼok u tsʼaʼabaltoʼon junpʼéel nojoch meyaj. Teʼ mesoʼob ku taalaʼ yaan u kʼaʼabéettal k-maas meyaj, chéen baʼaleʼ maʼalob u boʼolil». ¿Baʼax jeʼel a beetkeʼ? U jaajileʼ unaj u tsʼáaik máak baʼax kʼaʼabéet tu yotoch (1 Tim. 5:8). Baʼaleʼ unaj a chʼaʼik en cuenta uláakʼ baʼaloʼob jeʼex, ¿bukaʼaj tiempo kun kʼaʼabéettal in maas meyaj? ¿Yaan wa u luʼsikten u tiempoil in bin muchʼtáambal wa u yantalten in Adoración ich Familiaoʼ?
7 ¿Baʼax maas ken a chʼaʼ en cuentail? ¿Letiʼe bukaʼaj taakʼin ken a náajaltoʼ, wa le bix jeʼel a pʼáatal tu táan Diosoʼ? ¿Jeʼel wa a tsʼáaik juntséelil le Reino tu yoʼolal a maas náajaltik taakʼinoʼ? ¿Ka tsʼáaik cuenta wa baʼax jeʼel u yúuchul wa maʼ ta natsʼkaba tiʼ Dios mix ta wáantik a familia u beete? Wa táan u yúuchultech beyoʼ, ¿baʼax jeʼel u yáantkech utiaʼal maʼ u xuʼulul a meyajtik Dioseʼ? (Xokaʼak 1 Timoteo 6:9, 10.)
8. ¿Baʼax tsikbaliloʼob tiʼ le Biblia jeʼel u yáantkoʼon k-il baʼax táan k-tsʼáaik táanil ichil k-kuxtaloʼ?
8 Utiaʼal maʼ u xuʼulul a meyajtik Dios yoʼolal le ayikʼaliloʼ, cada wa baʼax kʼiineʼ unaj a wilik baʼax táan a tsʼáaik táanil ichil a kuxtal. Maʼ a beetik jeʼex Esaueʼ, letiʼeʼ yéetel le baʼax tu beetoʼ tu tsʼáaj juntséelil le baʼaxoʼob ku taal tiʼ Diosoʼ (Gén. 25:34; Heb. 12:16). Maʼ a beetik xan jeʼex le máak «okʼomchaj u yóoleʼ ka biniʼ, tumen jach yaʼab u ayikʼalil», letiʼeʼ maʼ tu yóotaj u kon le baʼaxoʼob yaantiʼoʼ, u yáantik le óotsiloʼoboʼ mix u tsaypachtik Cristo (Mat. 19:21, 22). U ayikʼalileʼ le beet u peʼertik u jatsʼuts páajtalil u tsaypachtik le máax maas yaan u páajtalil tsʼoʼok u yantal way Luʼumeʼ. Wa maʼ k-kʼáat ka úuchuktoʼon beyoʼ, unaj k-jach kanáantik maʼ k-tsʼíiboltik ayikʼalil.
9, 10. ¿Baʼax ku yaʼalik le Biblia yoʼolal le ayikʼaliloʼ?
9 Utiaʼal maʼ a chiʼichnaktal yoʼolal ayikʼalileʼ, beet le baʼax tu yaʼalaj Jesusaʼ: «Maʼ a sen tuukuleʼex táan a waʼalikeʼex: ¿Baʼax k-bíin jaante? wa ¿Baʼax k-bíin ukʼe? wa ¿Baʼax k-bíin búukinte? Tumen u kajnáaliloʼob le yóokʼol kaabaʼ ku kaxtikoʼob tuláakal le baʼaloʼobaʼ, baʼaleʼ teʼexeʼ yaanteʼex juntúul Taata teʼ kaʼanoʼ u yojel kʼaʼabéetteʼex tuláakal le baʼaloʼobaʼ» (Mat. 6:31, 32; Luc. 21:34, 35).
10 Agur, juntúul máax tsʼíibt le Bibliaoʼ, u yojel kaʼach bukaʼaj u yáantaj le taakʼinoʼ, baʼaleʼ maʼ tu chaʼaj u tuʼusul tumen le ayikʼaliloʼ. Le oʼolal tu yaʼalaj tiʼ Jéeoba: «Maʼ a beetik in ayikʼaltal, mix in wóotsiltal: tsʼáa tiʼ teen chéen le waaj kʼaʼabéet tiʼ tenoʼ» (Pro. 30:8). Jach maʼalob xan ka tuukulnakoʼon beyoʼ. Maʼ u tuʼubultoʼoneʼ u chiʼichnakiloʼob le yóokʼol kaab yéetel le ayikʼalil ku tusik máakoʼ jeʼel u náachkuntkoʼon tiʼ Dioseʼ. Wa k-chʼíikil tu paach ayikʼalileʼ, jeʼel u pʼáatal minaʼantoʼon u tiempoil mix u muukʼil k-tsʼáaik táanil le Reinooʼ. Jeʼex tsʼoʼok k-ilkoʼ, unaj k-kanáantik maʼ k-tsʼíiboltik ayikʼalil, junpʼéel léech ku tsʼáaik Satanás (xokaʼak Hebreob 13:5).
UNAJ K-KANÁANTIK MAʼ K-TUSIK K-NÚUP YÉETEL YAANAL
11, 12. ¿Baʼaxoʼob jeʼel u péeksik máak u tus u núup yéetel u yéet meyajeʼ?
11 Yaan máakeʼ utiaʼal u chukik juntúul nojoch baʼalcheʼeʼ ku páanik junpʼéel taamkach jool tuʼux suuk u máan le baʼalcheʼoʼ, ku pixik yéetel u kʼab cheʼob, leʼob yéetel luʼum. Satanaseʼ bey u beetik yéetel le núupkʼebanoʼ (Pro. 22:14; 23:27). Yaan sukuʼunoʼobeʼ tsʼoʼok u lúubloʼob tiʼ le léech ku meyaj tiʼ Satanasaʼ, tumen káaj u beetkoʼob jujunpʼéel baʼaloʼob maʼ unajiʼ. Yaan máaxoʼob tsʼokaʼan u beeloʼobeʼ, tumen káaj u biskubaʼob yéetel máaxoʼob maʼ u núupoʼobeʼ, lúuboʼob tiʼ núupkʼeban.
12 ¿Tuʼux maas jeʼel u yúuchul lelaʼ? Junpʼéeleʼ letiʼe tuʼux ku meyaj máakoʼ. Tsʼoʼok u yilaʼaleʼ, maas tiʼ táanchumuk tiʼ le koʼoleloʼob yéetel maas yaʼab tiʼ le xiiboʼob tu tusaj u núupoʼoboʼ, lúuboʼob tiʼ núupkʼeban yéetel u yéet meyajoʼob. Wa kʼaʼabéet k-múul meyaj yéetel máax maʼ k-éet koʼolelil wa maʼ k-éet xiibileʼ, ¿bix k-bisikba tu yéetel? ¿K-tsʼáaik wa u pʼiis bix k-bisikba tu yéetel utiaʼal k-eʼesik chéen k-múul meyaj yéetel maʼ k-kʼáat ka yanak yaanal baʼal tu yéeteliʼ? Maʼ xaaneʼ tuʼux ku meyajeʼ juntúul kiikeʼ ku suuktal u tsikbaltik tiʼ juntúul xiib bix u yuʼubikuba wa tak le talamiloʼob yaantiʼ yéetel u yíichamoʼ. Wa maʼ xaaneʼ juntúul sukuʼuneʼ ku joʼopʼol u biskuba yéetel juntúul koʼolel u yéet meyaj, yéetel ku tuklik: «Le koʼolelaʼ ku yuʼubik yéetel ku kʼamik baʼax kin waʼalik. Letiʼeʼ jach ku yeʼesikten tsiikil. Bukaʼaj maʼalobil wa ka tratartaʼaken bey tin wotochoʼ». Teʼ súutukiloʼob beyaʼ séeb jeʼel u tusik máak u núupeʼ.
13. Teʼ múuchʼuliloʼ, ¿bix jeʼel u káajal u biskuba máak yéetel máax maʼ u núupeʼ?
13 Teʼ múuchʼuliloʼ jeʼel u yúuchul xan lelaʼ. Lelaʼ bey úuchik tiʼ Daniel yéetel Sara, * u yatan, kaʼatúul precursor regular. Ku yaʼalikeʼ letiʼeʼ juntúul tiʼ le ancianoʼob «maʼ tu yaʼalikoʼob wa maʼ tu kʼamkoʼob» junpʼéel meyaj ichil u kaajal Diosoʼ. Letiʼ kaʼacheʼ ku tsʼáaik xook tiʼ cinco táankelmoʼob. Óoxtúul tiʼ letiʼobeʼ okjaʼanajoʼob yéetel kʼaʼabéetchaj u yáantaʼaloʼob. Tumen Daniel jach chʼiikil u beet le meyajoʼob tsʼaʼantiʼ teʼ múuchʼuliloʼ, Sara áantik le táankelmoʼob cada ken kʼaʼabéetchajkoʼ. Yéetel tumen kʼaʼabéet áantaj xan tiʼ Saraeʼ, ku yáantaʼal tumen le u j-xoknáaloʼob Danieloʼ. Bey anchajik junpʼéel léechoʼ. ¿Baʼax úuchi? Danieleʼ ku yaʼalik: «Máan yaʼab mesoʼob táan u yáantaʼaloʼob tumen in watan, le oʼolal jach kaʼani ka joʼopʼ tak u pʼáatal minaʼan u yóol u meyajt Dios. Baʼaleʼ teneʼ pʼáat maʼ tin jach beetik u cuentail, le oʼolal anchaj junpʼéel nojoch talamil, Saraeʼ lúub tiʼ núupkʼeban yéetel juntúul tiʼ letiʼobiʼ. Tu táan in wich pʼáat minaʼan u yóol u meyajt Dios, baʼaleʼ maʼ tin tsʼáaj cuentaiʼ tumen chʼiikilen in beet le meyajoʼob tsʼaʼantenoʼ». ¿Baʼax jeʼel u yáantkoʼon utiaʼal maʼ u yúuchultoʼon beyoʼ?
14, 15. ¿Baʼax jeʼel u yáantik le tsʼokaʼan u beeloʼob utiaʼal maʼ u tusik u núupoʼoboʼ?
14 Junpʼéel baʼax jeʼel u yáantkoʼon utiaʼal maʼ k-tusik k-núup yéetel yaanaleʼ, letiʼe k-kʼaʼajsik utiaʼal mantatsʼ le tsʼoʼokol beeloʼ. Jesuseʼ tu yaʼalaj: «Mix máak unaj u jatsik le baʼax nupaʼan tumen Jajal Dioseʼ» (Mat. 19:6). Mix juntéen unaj a tuklik maas kʼaʼanaʼan le meyajoʼob ka beetik ichil u kaajal Dios tiʼ a watanoʼ. Wa óoliʼ maʼatech a máansik tiempo yéetel a watan, tumen táan a beetik uláakʼ baʼaloʼobeʼ unaj a wilik baʼax ku yúuchul, tumen maʼ xaaneʼ yaan baʼax jeʼel u beetik u lúubul juntúul tiʼ teʼex tiʼ junpʼéel nojoch kʼebaneʼ.
15 Wa ancianoecheʼ u jaajileʼ maʼalob u taaktal a wáantik le múuchʼuliloʼ. Le apóstol Pedrooʼ tu yaʼalaj: «Kanáanteʼex jeʼel bix kanan tamanoʼobeʼ le u j-tamanoʼob Jajal Dios kʼubéentaʼanteʼexoʼ; beeteʼex yéetel maʼalob óolal, jeʼel bix u kʼáat Jajal Dioseʼ, maʼ tumen táan u tsaʼabalteʼexiʼ [wa u sen kʼáataʼalteʼexiʼ], mix tumen táan a tsʼíiboltkeʼex taakʼiniʼ. Beeteʼex a meyajeʼex yéetel maʼalob óolal» (1 Ped. 5:2). Le oʼolal unaj a kanáantik le múuchʼuliloʼ, baʼaleʼ maʼ unaj u xuʼulul a kanáantik a wataniʼ. Jach jeʼel u taasik talamil ka chʼíikikech a wáant le múuchʼulil, baʼaleʼ ka xuʼuluk a wáantik a watan u natsʼuba tiʼ Diosoʼ. Daniel, le máax tiʼ tsʼoʼok k-yáax tʼaanoʼ, ku yaʼalik: «Maʼ maʼalob ka chʼíikik máak u beet le meyajoʼob teʼ múuchʼulil ka tak xuʼuluk u yáantik u familiaeʼ».
16, 17. 1) ¿Baʼax unaj u beetik le tsʼokaʼan u beeloʼob utiaʼal u yeʼeskoʼob maʼ u kʼáatoʼob ka yanak mix baʼal u yiloʼob yéetel mix máakiʼ? 2) Aʼal baʼax jóoʼsaʼanil jeʼel u yáantik le máaxoʼob meyajtik Dios utiaʼal maʼ u tusik u núupoʼoboʼ.
16 Le revista ¡Despertad! yéetel U Pʼíich Tulumil Kananoʼ, tsʼoʼok u tsʼáaikoʼob yaʼab tsolnuʼuk jeʼel u yáantik le máaxoʼob meyajtik Dios utiaʼal maʼ u tusik u núupoʼoboʼ. Jeʼex U Pʼíich Tulumil Kanan 15 tiʼ septiembre tiʼ 2006, tu yaʼalaj: «Tu kúuchil a meyaj wa tiʼ uláakʼ tuʼuxeʼ, kʼaʼabéet a kanáantkaba utiaʼal maʼ u joʼopʼol a jach biskaba yéetel wa máax. Jeʼex wa kʼaʼabéet a pʼáatal a tsʼoʼoks junpʼéel meyaj yéetel máax maʼ a wéet xiibil wa maʼ a wéet koʼolelileʼ, leloʼ jeʼel u tsʼáaik tuʼux u beetik máak baʼax maʼ maʼalobiʼ. Teech tsʼokaʼan a beeleʼ kʼaʼabéet a waʼalik yéetel a weʼesik junpuliʼ minaʼan ta tuukul u yantal baʼal a wil yéetel wa máax. Tumen a kʼáat a beet baʼax u kʼáat Dioseʼ, yaan a kanáantik maʼ a coquetear yéetel mix máak, mix a takik junpʼéel nookʼ maʼ maʼalob utiaʼal juntúul máax meyajtik Diosiʼ [...]. Wa tu kúuchil a meyaj ka tsʼáaik u foto a núup yéetel a paalal tiʼ junpʼéel tuʼux jeʼel u páajtal u yilaʼaleʼ, yaan u kʼaʼajsiktech yéetel yaan u kʼaʼajsik tiʼ u maasileʼ máaxoʼob jach kʼaʼanaʼanoʼob ichil a kuxtal. Kanáant maʼ a tsʼáaik tuʼux u yantal baʼax a wil yéetel wa máax, mix xan a chaʼik tiʼ mix máak u kaxtik u yantal baʼax u yil ta wéetel».
17 Teʼ xook ku kʼaabaʼtik «¿Qué implica realmente la fidelidad conyugal?», jóokʼ teʼ revista ¡Despertad! tiʼ abril tiʼ 2009, aʼalaʼabeʼ le máax ku tsʼíiboltik u yantal baʼax u yil yéetel máax maʼ u núupeʼ, maas séeb jeʼel u lúubul tiʼ núupkʼebaneʼ (Sant. 1:14, 15). Le tsʼokaʼan u beeloʼoboʼ maʼalob ka u xokoʼob cada wa baʼax kʼiin. Le tsʼoʼokol beeloʼ junpʼéel baʼal kiliʼich ku taal tiʼ Jéeoba. Junpʼéel bix u yeʼesik le tsʼokaʼan u beeloʼob u yaabiltmoʼob baʼax ku taal tiʼ Dioseʼ, letiʼe u jóoʼskoʼob u tiempoil u múul tsikbaloʼoboʼ (Gén. 2:21-24).
18, 19. 1) ¿Baʼax ku muʼyajtik le máaxoʼob ku tusik u núupoʼoboʼ? 2) ¿Baʼax utsiloʼob jeʼel k-kʼamik wa maʼ k-tusik k-núupeʼ?
18 Wa yaan kʼiin ku taaktal u yantal baʼal a wil yéetel wa máaxeʼ, tuukulnen tiʼ le talamiloʼob jeʼel u taaskoʼ (Pro. 7:22, 23; Gal. 6:7). Le máaxoʼob ku núupkʼebantaloʼoboʼ ku beetkoʼob kʼaas tiʼ letiʼob, tiʼ u núupoʼob yéetel ku beetkoʼob u yaatal u yóol Jéeoba (xokaʼak Malaquías 2:13, 14). Tuukulnen xan tiʼ le utsiloʼob jeʼel u taasik le maʼ a kʼebantaloʼ. Maʼ chéen yaan a kʼamik le kuxtal minaʼan u xuuloʼ, baʼaxeʼ tak bejlaʼeʼ jeʼel u yantaltech kiʼimak óolal yéetel junpʼéel maʼalob concienciaeʼ (xokaʼak Proverbios 3:1, 2).
19 Juntúul tiʼ le máaxoʼob tsʼíibt le salmosoʼ, tu yaʼalaj tiʼ Jéeoba: «Yaan yaʼabkach jeetsʼel tiʼ máaxoʼob u yaakuntmajoʼob a kaʼansaj, mix baʼal beetik u lúubloʼob» (Sal. 119:165). Teʼ kʼiinoʼobaʼ le máaxoʼob meyajtik Jéeobaoʼ, jach unaj u yaabiltikoʼob u jaajil yéetel unaj u yilkoʼob maʼ u «kuxtal[oʼob] bey máaxoʼob minaʼan u naʼatoʼobeʼ baʼaleʼ bey máaxoʼob yaan u naʼatoʼobeʼ» (Efe. 5:15, 16). Satanaseʼ u chupmaj le yóokʼol kaab yéetel táabsajiloʼob utiaʼal u léechtik le máaxoʼob meyajtik Diosoʼ. Baʼaleʼ Jéeobaeʼ ku kanáantkoʼon. Yaantoʼon baʼax kʼaʼabéet utiaʼal «[k-]jeetsʼel pʼáatal [...] tu contra u táabsajiloʼob» le Kʼaasilbaʼaloʼ (Efe. 6:11, 16).
[Tsolajil]
^ xóot’ol 13 Kʼexaʼan le kʼaabaʼobaʼ.
[U kʼáatchiʼiloʼob le xookoʼ]
[Foto yaan teʼ táan juʼun 26]
Wa k-bin tu paach ayikʼalileʼ jeʼel u xuʼulul k-meyajtik Dioseʼ. Maʼ a chaʼik u yúuchultech beyoʼ
[Foto yaan teʼ táan juʼun 29]
Wa k-tsʼáaik naʼatbil k-kʼáat ka yanak baʼax k-il yéetel wa máax, bey xan wa k-chaʼik u beetik u maasileʼ jeʼel k-lúubul tiʼ núupkʼebaneʼ
