Maʼ u xuʼulul k-tsʼáaik k-óol teʼ kʼaʼaytajoʼ
Maʼ u xuʼulul k-tsʼáaik k-óol teʼ kʼaʼaytajoʼ
«Kʼaʼayt u tʼaan Dios, jach tsʼáa a wóol a beet[e].» (2 TIM. 4:2, NM)
¿JEʼEL WA U PÁAJTAL A TSOLIKEʼ?
¿Baʼaxten jach kʼaʼabéetchaj le kʼaʼaytaj teʼ yáax siglooʼ?
¿Baʼax unaj k-beetik utiaʼal maʼ u xuʼulul k-tsʼáaik k-óol teʼ kʼaʼaytajoʼ?
¿Baʼaxten bejlaʼeʼ maas jach kʼaʼabéet k-tsʼáaik k-óol k-kʼaʼayt le Reinooʼ?
1, 2. ¿Baʼax kʼáatchiʼiloʼob ku beetaʼal yoʼolal le tʼaan: «tsʼáa a wóol» kʼaʼaytajoʼ?
LE MÁAKOʼOB ku meyajoʼob utiaʼal u salvartikoʼob u kuxtal u maasiloʼ, ku tsʼáaik u yóol u beetoʼob tu séebaʼanil. Jeʼex le bomberoʼoboʼ ku yilik u séeb binoʼob ken kʼáataʼak áantaj, tumen u yojloʼob yaan máax jeʼel u peʼertik u kuxtaleʼ.
2 Toʼon táan k-meyajtik Jéeobaeʼ k-kʼáat k-áant le máakoʼob u salvartubaʼoboʼ. Le oʼolal k-jach tsʼáaik k-óol k-kʼaʼayt u maʼalob péektsilil le Reinooʼ. Baʼaleʼ maʼ u kʼáat u yaʼal wa táan u máan k-áalkab utiaʼal k-kʼaʼaytikiʼ. Le oʼolaleʼ, ¿baʼax túun tu yóotaj u yaʼal apóstol Pablo le ka tu yaʼalaj: «Kʼaʼayt u tʼaan Dios, jach tsʼáa a wóol a beet[e]»? (2 Tim. 4:2, NM.) ¿Baʼax u kʼáat u yaʼal u tsʼáaik u yóol máak teʼ kʼaʼaytajoʼ? ¿Yéetel baʼaxten jach unaj u tsʼáaik u yóol máak u beete?
¿BAʼAXTEN JACH UNAJ K-TSʼÁAIK K-ÓOL KʼAʼAYTAJ?
3. ¿Baʼax páajtalil ku tsʼáaik le kʼaʼaytajoʼ?
3 Ken k-tukult jeʼel u páajtal u salvartikuba yaʼab máakoʼob yoʼolal le maʼalob péektsiloʼ, maʼ xaaneʼ ku beetik u maas taaktal k-tsʼáaik k-óol k-kʼaʼayte (Rom. 10:13, 14). Dioseʼ ku yaʼalik: «Wa kin xotʼkʼintik kíimil juntúul loolob wíinikeʼ, baʼaleʼ letiʼeʼ ku pʼatik u kʼeban, ku beetik xan baʼax maʼalob yéetel tiʼibilileʼ bíin kuxlak [...], maʼ bíin kíimikiʼ. Tu yoʼolal maʼalob u kuxtal bejlaʼeʼ [...] maʼ bíin kʼaʼajak tiʼ teen mix junpʼéel u kʼebanoʼobiʼ» (Eze. 33:14-16). Ichil le Bibliaoʼ Jéeobaeʼ ku yaʼalik tiʼ tuláakal le máax kaʼansik u maʼalob péektsilil le Reinooʼ: «Bíin a tokaba [wa a salvartaba] teech yéetel bíin a tok [wa a salvart] xan le máaxoʼob uʼuyikechoʼ» (1 Tim. 4:16; Eze. 3:17-21).
4. ¿Baʼaxten jach kʼaʼabéetchaj le kʼaʼaytaj teʼ yáax siglooʼ?
4 Utiaʼal k-naʼatik baʼaxten tu yaʼalaj Pablo tiʼ Timoteo ka u tsʼáa u yóol kʼaʼaytajeʼ, koʼoneʼex ilik le baʼax seguernaj u yaʼalik le ka tsʼoʼok u chʼaʼchiʼitik u tekstoil le xookaʼ. Ku yaʼalik: «Kʼaʼayt u tʼaan Dios, jach tsʼáa a wóol a beet tiʼ maʼalob kʼiinoʼob bey xan tiʼ kʼiinoʼob talamtak, (NM)». «Eʼes u siʼipiloʼob, kʼeyoʼob yéetel tsolxikintoʼob yéetel tuláakal chúukaʼan óolal bey xan yéetel kaʼansaj. Tumen bíin kʼuchuk u kʼiinil maʼ bíin óoltaʼak tumen máakoʼob u kʼamoʼob le maʼalob kaʼansajoʼ; baʼax kun úuchleʼ, jeʼel bix kun u tsʼíiboltoʼobeʼ, bíin u muchʼkíintoʼob j-kaʼanbesajoʼob utiaʼal ka kaʼansaʼaktiʼob chéen le baʼax u kʼáat u yuʼuboʼoboʼ. Bíin u kúulpachkúuntoʼob le jaajoʼ.» (2 Tim. 4:2-4.) Jesuseʼ u yaʼalmiliʼ yaan u yantal máaxoʼob kun pʼatik u kaajal Dioseʼ (Mat. 13:24, 25, 38). Jeʼex u bin u náatsʼal u kʼiinil u yúuchul lelaʼ, Timoteoeʼ unaj u tsʼáaik u yóol u kʼaʼayt «le maʼalob péektsil» tak ichil le múuchʼuliloʼ, beyoʼ maʼ kun táabsbil mix juntúul yéetel le kaʼansajoʼob maʼ jaajtakoʼ. Yaan máakoʼob jeʼel u peʼertik u kuxtaloʼobeʼ. ¿Kux túun bejlaʼeʼ?
5, 6. ¿Bix u tuukul le máakoʼob k-ilik teʼ kʼaʼaytajoʼ?
5 Bejlaʼeʼ jach tsʼoʼok u yaʼabtal u kaʼansaʼal chéen tuusoʼob (2 Tes. 2:3, 8). ¿Baʼax kaʼansajil maas uts tu tʼaan u yuʼubik le máakoʼoboʼ? Yaʼab tuʼuxeʼ ku yilaʼal le evolución jeʼex junpʼéel religioneʼ. Kex ku meyaj le ciencia utiaʼal u tsoʼololoʼ tsʼoʼok u pʼáatal bey junpʼéel religioneʼ, baʼaleʼ mix baʼal yaan u yil yéetel Dios mix yéetel bix yanchajik wíinik. Ku kaʼansaʼal xaneʼ maʼ yaabiltaʼanoʼon tumen Diosiʼ, le oʼolal maʼ kʼaʼabéet k-yaabiltik xaniʼ. ¿Baʼaxten yaʼab máakeʼ jach uts tu tʼaan u yuʼubik le baʼaloʼob beyoʼ? Tumen ku tsʼáaik u naʼatoʼob lelaʼ: «Jeʼel u páajtal a beetik jeʼel baʼaxak a kʼáateʼ, tumen tiʼ mix máak ken a kʼub cuenta». Lelaʼ letiʼe baʼax taak u yuʼubikoʼoboʼ (xokaʼak Salmo 10:4).
6 Baʼaleʼ yaan uláakʼ kaʼansajoʼob uts tu tʼaan u yuʼubikoʼob. Yaan tiʼ le máaxoʼob ku binoʼob iglesiaoʼ uts tu tʼaan u yuʼubikoʼob u yaʼalaʼal tumen u nuuktakil u religionoʼob: «Kex jeʼel baʼaxak ka a beeteʼ, yaabiltaʼanech tumen Dios». Le j-kʼiinoʼob yéetel le pastoroʼoboʼ ku yaʼalikoʼobtiʼob chéen le baʼax u kʼáat u yuʼuboʼoboʼ, ku yaʼalikoʼobeʼ le kʼiinbesajoʼob, le misaʼob, le chaʼanoʼob yéetel le imagenoʼoboʼ jeʼel u yáantkoʼob utiaʼal ka áantaʼakoʼob tumen Dioseʼ. ¡Maʼatech u tsʼáaikoʼob cuenta maʼ maʼalob baʼax ku beetkoʼobiʼ! (Sal. 115:4-8.) Baʼaleʼ toʼoneʼ jeʼel u páajtal k-áantkoʼob utiaʼal ka aajkoʼob yéetel utiaʼal ka u naʼatoʼob le baʼax ku kaʼansik le Bibliaoʼ, utiaʼal u kʼamkoʼob le utsiloʼob ken u taas u Reino Diosoʼ.
¿BAʼAX U KʼÁAT U YAʼAL U TSʼÁAIK U YÓOL MÁAK KʼAʼAYTAJ?
7. ¿Bix jeʼel k-eʼesik k-tsʼáaik k-óol teʼ kʼaʼaytajoʼ?
7 Juntúul maʼalob doctor táan u operartik wa máaxeʼ ku yilik maʼ u náayal u yóol, tumen u yojel jeʼel tak u peʼertik u kuxtal le kʼojaʼanoʼ. Toʼon xaneʼ unaj k-kanáantik maʼ u náayal k-óol teʼ kʼaʼaytajoʼ, utiaʼal lelaʼ unaj k-tuukul tiʼ baʼax jeʼel k-tsikbaltik tiʼ le máakoʼoboʼ, baʼax kʼáatchiʼil jeʼel u páajtal k-beetiktiʼobeʼ wa baʼax jóoʼsaʼanil jeʼel u páajtal k-pʼatiktiʼobeʼ, leloʼobaʼ ku yeʼesik táan k-tsʼáaik k-óol teʼ kʼaʼaytajoʼ. Tsʼoʼoleʼ k-ilik k-jóokʼol kʼaʼaytaj teʼ hora maas jeʼel u kʼaʼamal tumen u yuumiloʼob najoʼ (Rom. 1:15, 16; 1 Tim. 4:16).
8. ¿Baʼax táakaʼan ichil u tsʼáaik u yóol máak u beet wa baʼax?
8 Wa k-tsʼáaik k-óol teʼ kʼaʼaytajoʼ yaan u yilaʼal tiʼ le baʼaxoʼob k-tsʼáaik táanil ichil k-kuxtaloʼ (xokaʼak Génesis 19:15). Tukulteʼ tsʼoʼok u beetaʼaltech junpʼéel análisis, le doctor túunoʼ ku tʼankech utiaʼal u yaʼaliktech: «Le kʼojaʼanil yaantechoʼ séebaʼan kʼaʼabéet u tsʼaʼakal. Yaantech kex chéen junpʼéel mes utiaʼal a beetik». ¿Máasaʼ maʼ kun jóokʼol a wáalkab jeʼex u beetik juntúul bombero utiaʼal u tup kʼáakʼeʼ? Baʼaxeʼ yaan a jach uʼuyik le baʼax ku yaʼalik le doctoroʼ, yaan a bin ta wotoch yéetel yaan a jach tuklik baʼax ken a beete.
9. ¿Baʼaxten ku páajtal u yaʼalaʼal Pabloeʼ jach tu tsʼáaj u yóol kʼaʼaytaj tu kaajil Éfeso?
9 Le bix úuchik u tsʼáaik u yóol Pablo teʼ kʼaʼaytajoʼ ku chíikpajal tiʼ le baʼaxoʼob tu yaʼalaj tiʼ le ancianoʼob yanoʼob Éfeso yoʼolal le kʼaʼaytaj tu beetaj tu luʼumil Asiaoʼ (xokaʼak Beetaʼanoʼob 20:18-21). Desde ka kʼucheʼ joʼopʼ u kʼaʼaytik le maʼalob péektsil joonaj joonajiloʼ. Tsʼoʼoleʼ kaʼansajnaj «tu najil tuʼux ku kaʼansaj juntúul máak u kʼaabaʼeʼ Tirano, teʼ tʼaanaj sáamsamal» ich kaʼapʼéel jaʼabiʼ (Hch. 19:1, 8-10). Jeʼex túun k-ilkoʼ, le baʼaxoʼob tu beetaj sáamsamaloʼ tu yeʼesaj jach tu tsʼáaj u yóol kʼaʼaytaj. Ken aʼalaʼaktoʼon ka k-tsʼáa k-óol teʼ kʼaʼaytajoʼ, maʼatech u beetaʼal utiaʼal k-uʼuyik bey maʼ tu páajtal k-beetkeʼ. Baʼaxeʼ utiaʼal k-tsʼáaik táanil ichil k-kuxtal.
10. ¿Baʼaxten ku kiʼimaktal k-óol úuchik u tsʼáaik u yóol kʼaʼaytaj le sukuʼunoʼob walajki cien jaʼaboʼobaʼ?
10 Le baʼax tu beetaj le Máaxoʼob Xokik le Biblia táanil tiʼ u jaʼabil 1914, ku yeʼesik baʼax táakaʼan ichil u tsʼáaik u yóol máak teʼ kʼaʼaytajoʼ. Kex maʼ jach yaʼaboʼobeʼ, tu naʼatoʼob kʼaʼabéet u tsʼáaik u yóoloʼob u kʼaʼaytoʼob u Reino Dios. Le oʼolal tu jóoʼsoʼob le tsoltʼaanoʼob tiʼ yaʼabkach periodicoʼoboʼ yéetel tu tsʼáajoʼob chaʼantbil le «Foto-Drama de la Creación», lelaʼ u jaats fotoʼob ku chaʼantaʼal yéetel ku yuʼubaʼal u tʼaaniloʼob. Beyoʼ tu bisoʼob le maʼalob péektsil tiʼ u millonesil máakoʼoboʼ. Wa maʼ úuchik u tsʼáaik u yóoloʼob kʼaʼaytajeʼ, bejlaʼa yaʼab tiʼ toʼon maʼ u yuʼub kaʼach u maʼalob péektsilil le Reinooʼ (xokaʼak Salmo 119:60).
UNAJ K-ILIK MAʼ U XUʼULUL K-TSʼÁAIK K-ÓOL KʼAʼAYTAJ
11. ¿Baʼax beetik u xuʼulul u tsʼáaik u yóol kʼaʼaytaj jujuntúul máaxoʼob meyajtik Dios?
11 Le náaysaj óolaloʼoboʼ jeʼel u beetik u tuʼubultoʼon kʼaʼabéet k-kʼaʼaytajeʼ. U kʼasaʼan yóokʼol kaab Satanaseʼ jeʼel u beetik k-chʼíikil k-kaxt chéen k-utsileʼ bey xan uláakʼ baʼaloʼob maʼ kʼaʼabéetoʼobiʼ (1 Ped. 5:8; 1 Juan 2:15-17). Yaan tiʼ le máaxoʼob u tsʼaamaj u yóoloʼob kaʼach u meyajtoʼob Jéeobaoʼ tsʼoʼok u xuʼulul u beetkoʼob. Leloʼ bey úuchik tiʼ Demas, juntúul máak kuxlaj teʼ yáax siglooʼ. Kex u yéet meyaj kaʼach Pabloeʼ tu chaʼaj u náaysaʼal u yóol tumen le kʼasaʼan yóokʼol kaabaʼ. Letiʼeʼ maʼ pʼáat tu yiknal Pablo teʼ kʼiinoʼob jach kʼaʼabéetchaj u yáantaj tiʼoʼ (File. 23, 24; 2 Tim. 4:10).
12. ¿Baʼax páajtalil yaantoʼon bejlaʼeʼ, yéetel baʼax páajtalil kun yantaltoʼon teʼ kuxtal minaʼan u xuuloʼ?
12 Utiaʼal maʼ u xuʼulul u tsʼáaik u yóol máak u meyajt Dioseʼ, kʼaʼabéet u luʼsik tu tuukul u bin tu paach le baʼaxoʼob ku tsʼáaik le yóokʼol kaabaʼ. Unaj u tsʼáaik u yóol u machuba maʼalob tiʼ «le kuxtal minaʼan u xuuloʼ» (1 Tim. 6:18, 19). Jeʼex k-ojliloʼ, yáanal u Reino Dioseʼ yaan u yantal u páajtalil k-beetik baʼaxoʼob uts t-ich. Baʼaleʼ le páajtalil yaantoʼon utiaʼal k-áantik le máakoʼob utiaʼal u salvarkubaʼob ken taalak Armagedoneʼ, maʼ kun kaʼa beetbil.
13. Bejlaʼa táan k-meyajtik Dioseʼ, ¿baʼax jeʼel u yáantkoʼon utiaʼal maʼ u xuʼulul k-tsʼáaik k-óol teʼ kʼaʼaytajoʼ?
13 Tumen u maas yaʼabil le máakoʼob bey táan u weenloʼoboʼ, ¿baʼax unaj k-beetik utiaʼal maʼ u xuʼulul k-tsʼáaik k-óol teʼ kʼaʼaytajoʼ? Kʼaʼajaktoʼoneʼ bey kaʼach k-wenel xanoʼ, baʼaleʼ junpʼéel kʼiineʼ ajsaʼaboʼon. Cristoeʼ juulnaj bey junpʼéel sáasil t-óokʼol, jeʼex úuchik u yaʼalik Pablooʼ. Le oʼolal bejlaʼeʼ yaantoʼon u páajtalil k-julik u maasil yéetel le sáasiloʼ (xokaʼak Efesoiloʼob 5:14). Ka tsʼoʼokeʼ Pabloeʼ tu yaʼalaj xan: «Ilawileʼex bix a xíimbaleʼex. Maʼ a kuxtaleʼex bey máaxoʼob minaʼan u naʼatoʼobeʼ baʼaleʼ bey máaxoʼob yaan u naʼatoʼobeʼ. Maʼ a chéen máansaj kʼiineʼex tumen kʼasaʼan le kʼiinoʼoboʼ» (Efe. 5:15, 16). Bey túunoʼ unaj k-ilik maʼ k-chéen «máansaj kʼiin», baʼaxeʼ unaj k-beetik tuláakal le meyajoʼob jeʼel u yáantkoʼon utiaʼal maʼ u beetaʼal k-wenel tumen le kʼasaʼan yóokʼol kaabaʼ.
KUXAʼANOʼON TIʼ KʼIINOʼOB MIX JUNTÉEN ILAʼAN
14-16. ¿Baʼaxten maas jach kʼaʼanaʼan k-kʼaʼaytik le Reino teʼ kʼiinoʼobaʼ?
14 Le kʼaʼaytajoʼ desde úuchjeakil jach kʼaʼabéet u beetaʼal, baʼaleʼ bejlaʼeʼ maas jach kʼaʼabéet. Desde tu jaʼabil 1914 káaj u yilaʼal bix u béeytal le baʼaxoʼob ku yaʼalik le Biblia kun ilbiloʼ (Mat. 24:3-51). Mix juntéen pʼáatak jach sajbeʼentsil u kuxtal máak jeʼex yanil bejlaʼaʼ. Kex le nukuch kaajoʼob tsʼoʼok u yaʼalikoʼob yaan u yantal jeetsʼelil ichiloʼoboʼ, láayliʼ yaantiʼob kex dos mil misiloʼob utiaʼal u túuxtoʼob jeʼel baʼaxak kaajil utiaʼal u xuʼulsoʼob tiʼeʼ. Le gobiernoʼoboʼ ku yaʼalikoʼobeʼ tsʼoʼok u «saʼatal» yaʼab tiʼ le misiloʼobaʼ. Maʼ xaaneʼ tsʼoʼok u kʼuchul tu kʼab le terroristaʼoboʼ. Yaan máaxoʼob aʼalikeʼ le yóokʼol kaabaʼ jeʼel u páajtal u xuʼulsaʼal chéen wa ka káajsaʼak junpʼéel baʼateltáambal tumen juntúul terroristaeʼ. Baʼaleʼ le baʼateltáambaloʼoboʼ maʼ chéen letiʼ beetik u sajbeʼentsiltal le kuxtal bejlaʼaʼ.
15 Le jóoʼsaʼanil The Lancet yéetel le University College tiʼ Londresoʼ tu yaʼalaj: «Le u kʼexpajal le clima way Luʼumaʼ letiʼe baʼax beetik u muʼyaj máak teʼ siglo 21. Le bix u kʼexpajal le climaoʼ yaan u beetik u muʼyaj yaʼab máakoʼob teʼ jaʼaboʼob ku taaloʼ, letiʼ kun beetik u kʼojaʼantal yéetel u kíimil u millonesil máakoʼob». Yaʼab tuʼuxoʼobeʼ yaan u búululoʼob, yanoʼobeʼ yaan u xuʼulultiʼob yoʼolal yáaxkʼiin, yoʼolal kʼojaʼaniloʼob, chak ikʼaloʼob yéetel baʼateltáambaloʼob kun yantal yoʼolal le junpʼíit baʼaxoʼob ku pʼáatal utiaʼal u kuxtal máakoʼ. Bey túunoʼ le baʼateltáambaloʼob yéetel uláakʼ loobiloʼob kun yantaloʼ, yaan u beetik u pʼáatal jach sajbeʼentsil le kuxtaloʼ.
16 Maʼ xaaneʼ yaan máaxoʼob tuklikeʼ junpʼéel nojoch baʼateltáambal kun beetik u yilaʼal le «chíikulal» aʼalaʼanoʼ. Baʼaleʼ u maas yaʼabil le máakoʼoboʼ maʼ tu naʼatkoʼob baʼax jach tu jaajil u kʼáat u yaʼal le chíikulaloʼ. U jaajileʼ úuch joʼopʼok u yilaʼal, tsʼoʼoleʼ ku yeʼesikeʼ Cristoeʼ way yaneʼ yéetel taʼaytak u xuʼulsaʼal tiʼ le kʼasaʼan yóokʼol kaabaʼ (Mat. 24:3). Mix juntéen ilaʼak u béeytal yaʼab tiʼ le baʼaxoʼob aʼalaʼan jeʼex u yilaʼal bejlaʼaʼ. Bejlaʼeʼ u kʼiinil u yajal le máakoʼob bey táan u weenloʼoboʼ, le kʼaʼaytaj k-beetkoʼ jeʼel u yáantkoʼobeʼ.
17, 18. 1) ¿Baʼax unaj k-beetik tumen k-ojel «tiʼ baʼax kʼiinil kuxaʼanoʼon»? 2) ¿Baʼax jeʼel u beetik u kʼexik u tuukul le máakoʼob utiaʼal u kʼamkoʼob u maʼalob péektsilil le Reinooʼ?
17 Maʼ yaʼab kʼiinoʼob pʼaatal utiaʼal k-eʼesik k-yaabiltmaj Jéeoba yéetel utiaʼal ka tsʼoʼokok le kʼaʼaytaj u kʼubéentmajtoʼon teʼ tu tsʼook kʼiinoʼobaʼ. Le baʼaxoʼob tu yaʼalaj Pablo tiʼ le sukuʼunoʼob yanoʼob Roma teʼ yáax siglooʼ, jach kʼaʼabéet u beetaʼal bejlaʼeʼ: «Teʼexeʼ a wojleʼex tiʼ baʼax kʼiinil kuxaʼanoʼon: u kʼiinil a waajleʼex, tumen bejlaʼeʼ maas natsʼaʼan u kʼiinil k-salvartaʼal ke le ka t-tsʼáaj k-fe tiʼ Cristooʼ» (Rom. 13:11, NM).
18 Maʼ xaaneʼ yaan máakoʼobeʼ jeʼel u yuʼubikoʼob u kʼaʼabéetil u meyajtikoʼob Dios ken u yiloʼob u béeytal le baʼaxoʼob aʼalaʼanoʼ. Yanoʼob xaneʼ yaan u yilkoʼob kʼaʼabéet áantaj tiʼob ken u yiloʼob maʼ tu páajtal u yáantaʼaloʼob tumen le gobiernoʼoboʼ, ken u yiloʼob óotsilil, ken aʼalaʼak yaan u waʼakʼal junpʼéel bomba utiaʼal u kíimsaʼal tuláakal, ken beetaʼak loob tiʼ máak yéetel yoʼolal bix u kʼaskúuntaʼal le baʼaxoʼob beetik u yantal le kuxtaloʼ. Yanoʼob xaneʼ ku taaktal u kʼaj óoltikoʼob Dios ken úuchuk wa baʼax ichil u familiaʼob, jeʼex junpʼéel talam kʼojaʼanil, u pʼatkuba le íichamtsil yéetel u yatanoʼ wa ken kíimik juntúul máax u yaabiltmoʼob. Ken jóokʼkoʼon kʼaʼaytajeʼ ku yantal u páajtalil k-áantik le máakoʼob beyaʼ.
JACH KʼAʼABÉET K-TSʼÁAIK K-ÓOL KʼAʼAYTAJ
19, 20. ¿Baʼax kʼeexil tsʼoʼok u beetik yaʼab sukuʼunoʼob utiaʼal u maas tsʼáaik u yóoloʼob teʼ kʼaʼaytajoʼ?
19 Yaʼab sukuʼunoʼobeʼ tsʼoʼok u beetkoʼob yaʼab kʼeexoʼob ichil u kuxtaloʼob utiaʼal u maas tsʼáaik u yóoloʼob teʼ kʼaʼaytajoʼ. Jeʼex juntúul sukuʼun yéetel u yatan kajaʼanoʼob Ecuadoreʼ, tu chʼaʼtukloʼob u kʼexik u kuxtaloʼob le ka tsʼoʼok u yuʼubikoʼob le baʼax kaʼansaʼab teʼ asamblea especial tiʼ u jaʼabil 2006, tu kʼaabaʼtaj «Maʼ u xuʼulul k-paakat maʼalob». Tu beetoʼob u listail baʼaxoʼob maʼ kʼaʼabéettiʼobiʼ, bey túunoʼ tu yáam óoxpʼéel meseʼ, tu pʼatoʼob u yotochoʼob yaan óoxpʼéel u cuartoileʼ, ka binoʼob kajtal tiʼ junpʼéel naj chéen junpʼéel u cuartoil, tu konoʼob jujunpʼéel baʼaloʼob yéetel tu boʼotoʼob tuláakal u pʼaaxoʼob. Maʼ xáanchaj tiʼ leloʼ ka tu káajsaj u beetik u precursor auxiliariloʼob yéetel binoʼob áantaj tiʼ junpʼéel múuchʼulil kʼaʼabéet j-kʼaʼaytajoʼob, jeʼex aʼalaʼabiktiʼob tumen le superintendente tiʼ circuitooʼ.
20 Juntúul sukuʼun kajaʼan Estados Unidoseʼ, ku yaʼalik: «Ka binen yéetel in watan tiʼ junpʼéel asamblea tu jaʼabil 2006, tsʼoʼok treinta jaʼaboʼob okjaʼanakoʼon. Le táan k-suut t-otochoʼ, joʼopʼ k-tsikbaltik bix jeʼel k-kuxtal chéen yéetel junpʼíit baʼaloʼob jeʼex úuchik u yaʼalaʼal teʼ asambleaoʼ (Mat. 6:19-22). Yaantoʼon óoxpʼéel naj, terrenoʼob, cocheʼob jatsʼutstak, junpʼéel lancha yéetel junpʼéel naj de remolque. Tumen t-tsʼáaj cuenta maʼ maʼalob le baʼax k-beetkoʼ, t-chʼaʼtuklaj k-beetik k-precursoril jeʼex u beetik k-hijaeʼ. Tu jaʼabil 2008 t-káajsaj k-beetik. Jach tsʼoʼok u taasiktoʼon yaʼab kiʼimak óolal k-múul meyaj yéetel u maasil sukuʼunoʼob. Tsʼoʼok u páajtal k-áantaj tuʼux maas kʼaʼabéet j-kʼaʼaytajoʼob yéetel ikil k-tsʼáaik k-óol k-maas meyajt Jéeobaeʼ tsʼoʼok u maas natsʼkoʼon tiʼ letiʼ. Junpʼéel baʼax jach ku taasiktoʼon kiʼimak óolaleʼ letiʼe k-ilik bix u líikʼil u yóol le máakoʼob ken u yuʼuboʼob yéetel ken u naʼatoʼob le baʼax ku kaʼansik le Bibliaoʼ».
21. ¿Baʼax péeksikoʼon k-tsʼáa k-óol kʼaʼaytaj?
21 Toʼoneʼ k-ojel tsʼoʼok u náatsʼal «u kʼiinil le pʼis óoloʼ, le ken xuʼulsaʼakoʼob le máaxoʼob kʼasaʼanoʼoboʼ» (2 Ped. 3:7). Le baʼaxoʼob tsʼoʼok k-naʼatik tiʼ le Bibliaoʼ ku péeksikoʼon utiaʼal k-maas tsʼáaik ojéeltbil tsʼoʼok u náatsʼal le nojoch muʼyajil bey xan le túumben luʼum kun ilbil ken tsʼoʼokokoʼ. Láayliʼ k-uʼuyik jach kʼaʼanaʼan k-áantik le máakoʼob utiaʼal u yantal junpʼéel esperanza tiʼoboʼ. Ken k-tsʼáa k-óol k-beet le meyajaʼ, k-eʼesik k-yaabiltmaj Dios bey xan k-éet máakil.
[U kʼáatchiʼiloʼob le xookoʼ]
