Jach yaan baʼax oʼolal u kiʼimaktal k-óol

LE MEJEN celulaʼob yéetel le nukuch cúmulos yéetel supercúmulos tiʼ galaxiaʼoboʼ, ku yeʼesik jach tu tsoolol yanil tuláakal baʼal. Lelaʼ bey yaniloʼ tumen Jéeoba, le Máax beetmiloʼ «maʼ u [Diosil] xaʼakʼaʼan tuukuliʼ» (1 Cor. 14:33). Le bix u yaʼalmil Jéeoba ka adorartaʼakoʼ láayliʼ jach tu tsoolol yanileʼ. Junpʼéel nojoch múuchʼulil tuʼux táakpajaʼan u millonesil angeloʼob yéetel wíinikoʼobiʼ, cada juntúuleʼ yaan u naʼat yéetel tsʼaʼan u páajtalil u yéeyik baʼax ken u beete, tuláakloʼobeʼ junmúuchʼ u meyajtikoʼob Dios. ¿Máasaʼ jach jatsʼuts lelaʼ?

U kaajil Jerusalén yaan tu luʼumil Israel úuchjeakileʼ, letiʼ chíikbes u kaajal Dios way Luʼumeʼ, tumen tiʼ yaan kaʼach le templo yéetel le rey yéeyaʼan tumen Jéeobaoʼ. Juntúul israelita kʼalaʼan tu kaajil Babilonia kaʼacheʼ tu yeʼesaj jach u yaabiltmaj le kiliʼich kaajoʼ, tumen tu yaʼalaj: «¡Ka táakʼak in waakʼ tiʼ in náaʼkaʼan, wa maʼ táan in kʼaʼajsikech; Jerusalén, wa maʼ táan in tsʼáaikech táanil tiʼ in kiʼimak óolalil!» (Sal. 137:6).

¿Bey wa xan a yaabiltmil u kaajal Diosoʼ? ¿Letiʼe baʼax wa beetik u kiʼimaktal a wóoloʼ? ¿U yojel wa a paalal bix káajik yéetel bix u meyaj u kaajal Dios way Luʼumeʼ? ¿U yojloʼob wa táakaʼanoʼob ichil junpʼéel kaaj yaan tiʼ tuláakal yóokʼol kaab? (1 Ped. 2:17.) ¿Bix jeʼel a wáantkoʼob utiaʼal u maas yaabiltikoʼob u kaajal Dioseʼ? Le baʼaxoʼob ken k-ilaʼ jeʼel u páajtal a xakʼalxoktikeʼex ken yanakteʼex le Adoración ich Familiailoʼ.

Tsikbaltiʼob «le jaʼaboʼob máanjaʼanoʼoboʼ»

Le israelitaʼob kaʼachoʼ ku muchʼkubaʼob ich familiail cada jaʼab utiaʼal u kʼiinbesoʼob le Pascuaoʼ. Ka káaj u beetaʼal le kʼiinbesajaʼ, aʼalaʼabtiʼob tumen Moisés: «Le ken u kʼáatchiʼiteʼex sáamal a paaleʼex: ¿Baʼax u kʼáat yaʼal le kʼiinbesajaʼ? Teʼexeʼ bíin a núukeʼextiʼob: Yuumtsil[eʼ] tu jóoʼsoʼon yéetel nojoch páajtalil Egipto[,] tuʼux palitsiltaʼanoʼon kaʼachi» (Éxo. 13:14). Jeʼex túun k-ilkoʼ, le taatatsiloʼoboʼ maʼ unaj u tuʼubskoʼob le baʼax tu beetaj Dios tu yoʼolaloʼoboʼ. K-ojel yaʼab tiʼ letiʼobeʼ tu yilaj u beetkoʼob le baʼax aʼalaʼab tumen Moisesoʼ, tumen ka máan kʼiineʼ juntúul salmistaeʼ tu yaʼalaj ich payalchiʼ: «[Dios], tsʼoʼok k-uʼuyik t-xikinileʼ, tsikbaltaʼantoʼon xan tumen k-taataʼobeʼ le jakʼ óol meyaj ta beetaj tu kʼiiniloʼob letiʼob, tiʼ le jaʼaboʼob máanjaʼanoʼoboʼ» (Sal. 44:1).

Le paalaloʼob teʼ kʼiinoʼobaʼ, maʼ xaaneʼ jeʼel u yilkoʼob bey jach úuch máanak le cien «jaʼaboʼob máanjaʼanoʼob» joʼopʼok u meyaj u j-jaajkunajoʼob Jéeobaoʼ. ¿Bix jeʼel a wáantik a paalal u creertoʼob jach tu beetoʼob le meyajoʼoboʼ? Yaan taatatsiloʼobeʼ ku meyajtiʼob le libro Los testigos de Jehová, proclamadores del Reino de Dios, le Anuariooʼ, le u tsikbalil u kuxtal le sukuʼunoʼob ku taasik le revistaʼob yéetel uláakʼ áantajoʼob yaan utiaʼal u yojéeltik máak le meyajoʼob u beetmaj u kaajal Dios teʼ kʼiinoʼobaʼ, jeʼex le túumben DVD ku tsolik le meyaj ku beetik u kaajal Jéeoba teʼ kʼiinoʼobaʼ. Le videoʼob ku tʼaanoʼob tiʼ le chʼaʼpachtajil tu muʼyajtaj le sukuʼunoʼob teʼ Alemania nazi yéetel teʼ Unión Sovieticaoʼ ku yáantik le familiaʼob u maas kʼub u yóoloʼob tiʼ Jéeoba kex ka chʼaʼpachtaʼakoʼob. Ken xooknakeʼex ich familiaileʼ maʼalob ka a táakbeseʼex le áantajoʼob beyaʼ. Beyoʼ jeʼel a muʼukʼaʼankúuntik u fe a paalaloʼob utiaʼal u aktáantkoʼob jeʼel baʼalak talamileʼ.

Baʼaleʼ yaan paalaleʼ séeb u náakal u yóol ken joʼopʼok u tsikbaltaʼaltiʼob baʼaloʼob uchaʼantak. Le oʼolal maʼalob ka ilaʼak bix jeʼel u táakpajloʼobeʼ. ¿Bix jeʼel u páajtal u beetaʼaleʼ? Aʼaltiʼob ka u yéeyoʼob junpʼéel luʼumil, tsʼoʼoleʼ ka u xakʼalxoktoʼob bix káajik u meyaj u j-jaajkunajoʼob Jéeobaiʼ, tsʼoʼoleʼ ku tsolkoʼob tiʼ u maasil ichil le familiaoʼ.  Maʼ xaaneʼ yaan juntúul sukuʼun úuch joʼopʼok u meyajtik Jéeoba jeʼel u páajtal u taal ken yanakteʼex le Adoración ich familiailoʼ. Aʼaleʼex tiʼ a paalaleʼex ka u beetoʼob kʼáatchiʼob tiʼ le sukuʼun utiaʼal ka u tsol baʼaxoʼob tsʼoʼok u yilkoʼ. Jeʼel xan u páajtal u yaʼalaʼaltiʼob ka u bonoʼob bix beetaʼabik junpʼéel u najil Betel, bix u yúuchul junpʼéel asamblea internacional, le kʼaʼaytaj ku beetaʼal kaʼach yéetel gramófonosoʼ wa uláakʼ bix u meyaj u kaajal Dios.

Naʼateʼex baʼax meyajil ku beetik «cada junxéetʼ»

Apóstol Pabloeʼ tu ketaj le múuchʼul yéetel junpʼéel wíinkliloʼ. Tu yaʼalaj: «Tuláakal le wíinkliloʼ maʼalob taablil yéetel kʼaxaʼanil tu baatsil tu yoʼolal nupaʼanil tuláakal u xéexetʼaloʼob; yéetel wa cada junxéetʼ le wíinklil ku meyaj maʼaloboʼ, tuláakal ku bin u nojochtal yéetel ku bin u chʼíijil ich yaakunaj» (Efe. 4:16). ¿Máasaʼ ken k-xok bix beetaʼaniloʼoneʼ jach ku taaktal k-tsʼáaik nib óolal tiʼ Jéeoba? Bey xan jeʼel k-uʼuyikba ken kʼuchkoʼon k-kʼaj óolt «u jejeláasil u naʼat Jajal Dios» wa k-xakʼalxoktik bix u meyaj u kaajal tiʼ tuláakal yóokʼol kaaboʼ (Efe. 3:10).

Jéeobaeʼ tsʼoʼok u yáantkoʼon k-ojéelt bix u meyaj u kaajal teʼ kaʼanoʼ. Tuukulnakoʼon tiʼ le baʼax tsʼaʼab u yil apóstol Juanoʼ. Táanileʼ Jéeobaeʼ tu tsʼáaj u yojéelt u Hijo. Ka tsʼoʼokeʼ Jesucristoeʼ «tu [túuxtaj] u ángel tiʼ Juan[,] u palitsil. [Letiʼ túuneʼ] tu yaʼalaj u jaajil tu yoʼolal tuláakal baʼax tu yilaj» (Apo. 1:1, 2). Wa tsʼoʼok u tsʼáaiktoʼon Dios u páajtalil k-ilik bix u meyaj u kaajal teʼ kaʼanoʼ, ¿máasaʼ ku yáantkoʼon k-ileʼ letiʼeʼ u kʼáat ka k-naʼat tubeel bix u múuchʼ meyaj u kaajal yaan way Luʼumeʼ?

Koʼox aʼalikeʼ yaan u xíimbaltaʼal le múuchʼulil tumen le superintendente tiʼ circuitooʼ. Maʼalob ka xakʼalxokt yéetel a familia le jejeláas meyajoʼob ku beetik le sukuʼunoʼ bey xan le bix u yáantkoʼonoʼ. Yaan kʼiin xaneʼ maʼalob ka u núuk máak kʼáatchiʼob jeʼex leloʼobaʼ: ¿Baʼaxten kʼaʼabéet u kʼubik máak bukaʼaj tu beetaj teʼ kʼaʼaytajoʼ? ¿Tuʼux ku chʼaʼabal le taakʼin ku meyaj tiʼ u kaajal Diosoʼ? ¿Bix u jatsik le Cuerpo Gobernante le meyaj ku beetkoʼ? ¿Bix u kʼujsiktoʼon le kaʼansaj ku keʼetel yéetel janaloʼ?

¿Bix u yáantkoʼon k-ojéeltik bix u meyaj u kaajal Jéeoba? Óoxpʼéel bixi, yáaxeʼ ku yáantkoʼon k-chʼaʼ en cuentail le meyaj ku beetik le sukuʼunoʼob t-oʼolaloʼ (1 Tes. 5:12, 13). U kaʼapʼéeleʼ ku péekskoʼon k-beet le baʼax ku yaʼalaʼaltoʼonoʼ (Hch. 16:4, 5). U yóoxpʼéeleʼ k-maas yaabiltik le máaxoʼob nuʼuktikoʼonoʼ, tumen k-ilik ku chaʼik u nuʼuktaʼaloʼob tumen le baʼax ku yaʼalik le Biblia ken u chʼaʼtukult u beetkoʼob wa baʼaxoʼ (Heb. 13:7).

«Ileʼex maʼalob u tulumiloʼob bey xan u jalaʼach najiloʼob»

Le salmistaoʼ tu yaʼalaj tiʼ le judíoʼob ka xiʼik u xíimbaltoʼob u kaajil Jerusalén. Tu yaʼalajtiʼob: «Xíimbalneneʼex tu baʼpach Sión, xokeʼex jaypʼéel u witsil najiloʼob; ileʼex maʼalob u tulumiloʼob bey xan u jalaʼach najiloʼob, utiaʼal ka páatak a tsikbaltikeʼex tiʼ le chʼiʼilankabiloʼob bíin taalakoʼ» (Sal. 48:12, 13). Chéen máans ta tuukul le baʼax ku yilik le judíoʼob ken xiʼikoʼob yéetel u familiaʼob tu kaajil Jerusalén cada jaʼab utiaʼal le kʼiinbesajoʼob kaʼachoʼ, letiʼobeʼ ku páajtal u yilkoʼob le nojoch templo yanoʼ, le oʼolal kex xáanchajkeʼ maʼ tu tuʼubultiʼob. Tumen jach jatsʼuts yéetel jach nojoch le baʼax ku chaʼantikoʼob ken xiʼikoʼob Jerusalenoʼ ku taaktal u tsikbaltikoʼob «tiʼ le chʼiʼilankabiloʼob bíin taalakoʼ».

Tuukulnakoʼon tiʼ u reinail Sabá [wa Seba], letiʼeʼ maʼ tu jáan creertaj le baʼaxoʼob aʼalaʼabtiʼ yoʼolal le utsiloʼob ku yilaʼal tu kʼiinil táan u reinar Salomonoʼ mix tiʼ le bukaʼaj naʼat yaan kaʼach tiʼoʼ. ¿Baʼax túun áant u creerte? Letiʼeʼ ku yaʼalik: «Chéen ku páajtal in woksaj óoltik bejlaʼa tsʼoʼok in taal in wil tin wichileʼ» (2 Cró. 9:6). Lelaʼ ku yeʼesikeʼ le baʼaxoʼob ku yilik máakoʼ maas maʼatech u séeb tuʼubul.

¿Bix jeʼel a wáantik a paalal u yiloʼob le baʼaxoʼob ku beetik u kaajal Jéeobaoʼ? Wa yaan junpʼéel u najil Betel naatsʼ tiʼ a wotocheʼexeʼ, jóoʼseʼex u súutukil a bin a xíimbalteʼex. Tuukulnakoʼon tiʼ baʼax tu beetaj Mandy yéetel Bethany. U yotochoʼobeʼ 375 leguas (1,500 kilómetros) náachil tiʼ u najil Betel, kex beyoʼ tu chichniloʼobeʼ ku bisaʼaloʼob mantatsʼ tumen u taataʼob xíimbaliʼ. Letiʼobeʼ ku yaʼalikoʼob: «Táanil tiʼ k-kʼaj óoltik Beteleʼ, k-tuklik kaʼacheʼ  chéen táan u adorar le máaxoʼob yanoʼoboʼ yéetel k-tuklik chéen nukuch máakoʼob yaniʼ. Baʼaleʼ ka binoʼon xíimbaleʼ t-ilaj yaʼab táankelmoʼob yéetel x-lóoʼbayanoʼob meyajtik Jéeobaiʼ. Kʼuchoʼon k-naʼateʼ maʼ chéen tuʼux kajaʼanoʼon yaan u j-jaajkunajoʼob Jéeobaiʼ. Cada ken xiʼikoʼon xíimbal Beteleʼ ku maas muʼukʼaʼantal k-fe». Mandy yéetel Bethanieʼ páajchaj u yilkoʼob bix u meyaj u kaajal Dios, leloʼ le áantoʼob utiaʼal ka u beet u precursorailoʼob, yéetel ka máan kʼiineʼ invitartaʼaboʼob ka xiʼikoʼob meyaj wa jaypʼéel kʼiinoʼob tu najil Betel.

Bejlaʼeʼ yaan junpʼéel baʼax jeʼel u yáantkoʼon k-il bix u meyaj u kaajal Jéeobaeʼ, lelaʼ minaʼan kaʼach tu kʼiinil le israelitaʼoboʼ. Teʼ tu tsʼook jaʼaboʼobaʼ tsʼoʼok u jóoʼsaʼal videoʼob yéetel DVD ku tʼaanoʼob tiʼ le jejeláas meyajoʼob ku beetik u kaajal Dios, jeʼex, Hasta los cabos de la Tierra, Los testigos de Jehová: organizados para predicar las buenas nuevas, Toda nuestra asociación de hermanos yéetel Unidos gracias a la enseñanza divina. Ken a wil yéetel a familia le bukaʼaj meyaj ku beetik le sukuʼunoʼob tu najil Betel, le sukuʼunoʼob ku yáantajoʼob ken úuchuk wa baʼax loobiloʼ, le misioneroʼob bey xan le sukuʼunoʼob nuʼuktik le asambleaʼoboʼ, yaan a maas yaabiltikeʼex le sukuʼunoʼob tiʼ tuláakal yóokʼol kaaboʼ.

U jaajileʼ le múuchʼulil tuʼux yanoʼonoʼ jach ku yáantkoʼon utiaʼal ka seguernak k-kʼaʼaytaj yéetel ka tsʼaʼabaktoʼon áantaj. Baʼaleʼ kʼaʼabéet k-jóoʼsik u tiempoil utiaʼal ka tuukulnakoʼon tiʼ le k-sukuʼunoʼob yaan «tiʼ tuláakal yóokʼol kaa[boʼ]». Lelaʼ jeʼel u yáantkoʼon utiaʼal ka maas muʼukʼaʼanchajak k-fejeʼ yéetel jeʼel u yáantkoʼon k-il jach yaan baʼax oʼolal u kiʼimaktal k-óoleʼ (1 Ped. 5:9).

 [U tsolajil le oochel teʼ táan juʼun 18]

U kaajal Dioseʼ junpʼéel baʼax maʼalob ka xokaʼak

Jach yaʼab áantaj yaantoʼon utiaʼal k-ojéeltik bix káajik u meyaj u kaajal Jéeoba. Le kʼáatchiʼobaʼ jeʼel u yáantkecheʼ:

☞ ¿Bix úuchik u káajal u meyaj le superintendente viajanteʼob teʼ kʼiinoʼobaʼ? (Los testigos de Jehová, proclamadores del Reino de Dios, táan juʼun 222 tak 228.)

☞ ¿Baʼaxten jach maʼalob úuchik u tsʼaʼabal u kʼaabaʼt junpʼéel kʼiin tiʼ le asamblea yanchaj tu jaʼabil 1941 «U kʼiinil le paalaloʼoboʼ»? (Los testigos de Jehová, proclamadores del Reino de Dios, táan juʼun 86 yéetel 88.)

☞ ¿Bix u chʼaʼtuklik le Cuerpo Gobernante baʼax unaj u beetkoʼ? (“Testimonio cabal” del Reino de Dios, táan juʼun 108 tak 114.)