Le baʼaxoʼob jeʼel u líiʼsik k-óoloʼ

«Biseʼex in kuch ta wóokʼoleʼex [...] beyoʼ bíin a kaxteʼex jeʼelel.» (MAT. 11:29)

1. ¿Baʼax tu yaʼalaj Jéeoba tu witsil Sinaí, yéetel baʼaxten?

LE KA tu tsʼáa Jéeoba le Ley tiʼ le israelitaʼob tu witsil Sinaíoʼ, tu yaʼalajtiʼob unaj u jeʼeleloʼob utiaʼal sábado. Letiʼeʼ tu yaʼalaj tiʼ Moisés ka u yaʼal tiʼ u kaajil Israel: «Seis kʼiinoʼob beet tuláakal baʼax u najmal a beetik, baʼaleʼ jeʼelsaba tu siete kʼiin, utiaʼal xan u jeʼelel a waakax yéetel a burro, bey xan utiaʼal u [chʼaʼik] u jeel u muukʼoʼob a palitsil yéetel le j-táanxel luʼumiloʼ» (Éxo. 23:12). Dioseʼ tu yeʼesaj u yaabilaj tiʼ le israelitaʼoboʼ yéetel tu yeʼesaj ku chʼaʼik en cuentai bix u yuʼubikubaʼob le úuchik u tsʼáaik upʼéel kʼiin utiaʼal «u [chʼaʼik] u jeel u muukʼoʼob» wa u jeʼeleloʼoboʼ.

2. ¿Baʼax utsil tu kʼamaj le israelitaʼob úuchik u yaʼalaʼaltiʼob ka jeʼelkoʼob tu kʼiinil le sabadooʼ?

² Baʼaleʼ ¿chéen wa túun jeʼelel ken u beetoʼob tu kʼiinil sábado? Maʼatech. Baʼaxeʼ utiaʼal u adorartkoʼob Jéeoba. Lelaʼ tu tsʼáaj u páajtalil tiʼ le taatatsiloʼob utiaʼal ka u kaʼans tiʼ u paalaloʼob «u tsʼoʼokbesoʼob [u] kaʼambesajoʼob» Jéeoba yéetel ka u beetoʼob baʼax maʼalob (Gén. 18:19). Tsʼoʼoleʼ tu tsʼáaj u páajtalil u muchʼkuba le familiaʼob yéetel le amigoʼob utiaʼal u tuukuloʼob tiʼ le baʼaxoʼob u beetmaj Jéeobaoʼ bey xan utiaʼal u máanskoʼob upʼéel jatsʼuts súutukil (Isa. 58:13, 14). Baʼaleʼ u kʼiinil le sábado xanoʼ ku chíikbesik bix le kuxtal kun yantal ken reinarnak Cristo ichil le Mil Jaʼaboʼoboʼ (Rom. 8:21). ¿Kux túun bejlaʼeʼ? ¿Baʼax jeʼel u yáantkoʼon utiaʼal maʼ u xuʼulul k-tsʼoʼokbesik u «kaʼambesajoʼob» Jéeobaeʼ?

K-muchʼikba yéetel k-sukuʼunoʼobeʼ ku líiʼsik k-óol

3. ¿Bix úuchik u paklan áantikuba le sukuʼunoʼob teʼ yáax siglooʼ, yéetel baʼax utsil tu taasajtiʼob?

³ Apóstol Pabloeʼ tu yaʼaleʼ le múuchʼuliloʼ «u yokmil yéetel u chuumpakʼil le jaajoʼ» (1 Tim. 3:15). Lelaʼ jach bey úuchik teʼ yáax siglooʼ, tumen le sukuʼunoʼoboʼ tu paklan áantubaʼob. Tu paklan líiʼsaj xan u yóoloʼob yéetel yaabilaj (Efe. 4:11, 12, 16). Jeʼex le tiaʼan Pablo tu kaajil Efesooʼ, bin xíimbaltbil tumen le sukuʼunoʼob kajaʼanoʼob Corintooʼ. ¿Bix tu yuʼubiluba yoʼolal le baʼax tu beetaj le sukuʼunoʼoboʼ? Letiʼeʼ ku yaʼalik: «Kiʼimak[chaj] in wóol tumen taal Estéfanas, Fortunato yéetel Acaico, tumen letiʼobeʼ [...] tu líikʼsajoʼob in wóol» (1 Cor. 16:17, 18). Titoeʼ bey xan tu yuʼubiluba le ka bin u yáant le sukuʼunoʼob kajaʼanoʼob Corintooʼ. Pabloeʼ ku yaʼalik: «Tuláakleʼex ta líiʼseʼex u yóol» (2 Cor. 7:13, NM). Toʼon xan bejlaʼeʼ, jach ku líikʼil k-óol ken yanakoʼon yéetel k-sukuʼunoʼob.

4. ¿Bix u líiʼsik k-óol le muchʼtáambaloʼoboʼ?

⁴ Toʼoneʼ tsʼoʼok k-ilkeʼ le muchʼtáambaloʼoboʼ jach ku taasiktoʼon kiʼimak óolal. Ku páajtal k-paklan líiʼsik k-óol yéetel k-paklan muʼukʼaʼankúuntik k-fe yéetel u maasil (Rom. 1:12). Le sukuʼunoʼob teʼ múuchʼuliloʼ maʼ chéen jeʼex le máakoʼob k-ilik wa baʼax kʼiinoʼ. Baʼaxeʼ jach tu jaajil k-amigoʼob yéetel k-yaabiltmoʼob. Le oʼolal ken k-iloʼob cada semana teʼ muchʼtáambaloʼoboʼ ku líikʼil k-óol (File. 7).

5. ¿Bix jeʼel k-paklan líiʼsik k-óol teʼ asambleaʼoboʼ?

⁵ Uláakʼ baʼax jach ku líiʼsik k-óoleʼ letiʼe ka xiʼikoʼon teʼ asambleaʼoboʼ. Teʼ muchʼtáambaloʼobaʼ ku kaʼansaʼaltoʼon yaʼab baʼaloʼob ku taal  tiʼ le Biblia ku keʼetel yéetel le jaʼ ku tsʼáaik kuxtaloʼ, tsʼoʼoleʼ ku béeytal xan k-kʼaj óoltik u maasil sukuʼunoʼobiʼ (2 Cor. 6:12, 13). Baʼaleʼ ¿baʼax jeʼel u páajtal k-beetik wa suʼlakoʼoneʼ? Upʼéel baʼax jeʼel u yáantkoʼon k-bisba yéetel u maasil sukuʼunoʼobeʼ letiʼe ka múul meyajnakoʼon yéeteloʼob teʼ asambleaoʼ. Utúul kiik meyajnaj tiʼ upʼéel asamblea internacionaleʼ, tu yaʼalaj: «Maʼ in kʼaj óol kaʼach mix máakiʼ, chéen in kʼaj óol in familia yéetel wa jaytúul in amigoʼob binoʼobiʼ. Baʼaleʼ yaʼab sukuʼunoʼob yéetel kiikoʼob tin kʼaj óoltaj úuchik in wáantaj utiaʼal u míistaʼal le kúuchiloʼ. Jach jatsʼuts úuchik in wilik».

6. ¿Baʼax uláakʼ jeʼel u líiʼsik k-óol ken jóoʼkoʼon xíimbaleʼ?

⁶ Le israelitaʼoboʼ ku binoʼob kaʼach tu kaajil Jerusalén óoxtéen tiʼ upʼéel jaʼab utiaʼal u táakpajloʼob teʼ kʼiimbesajoʼob u yaʼalmaj Jéeoba ka beetaʼakoʼ (Éxo. 34:23). Utiaʼal lelaʼ ku pʼatik u yotochoʼob yéetel u meyajoʼob utiaʼal u binoʼob xíimbalil tu kaajil Jerusalén. Kex maʼ chéen chʼaʼabil u beetkoʼobeʼ, maʼ chéen kuneliʼ, tumen ku kiʼimaktal u yóoloʼob ken u muchʼubaʼob yéetel le máaxoʼob «kiʼikiʼtʼant[ik]» Jéeobaoʼ (2 Cró. 30:21). Bejlaʼa xaneʼ yaʼab máaxoʼob meyajtik Jéeobaeʼ tsʼoʼok u yilkoʼobeʼ jach ku líikʼil u yóoloʼob ken xiʼikoʼob yéetel u láakʼtsiloʼob u xíimbaltoʼob u najil Betel. Wa táan a tuklik a jóoʼleʼex xíimbaleʼ, ¿tsʼoʼok wa a chʼaʼatuklikeʼex a kʼuchuleʼex xíimbal tu najil Betel yaan maas naatsʼ teʼ tuʼux kajaʼaneʼexoʼ?

7. 1) ¿Bix jeʼel u yáantkoʼon k-muchʼikba yéetel k-láakʼtsiloʼob bey xan yéetel k-amigoʼobeʼ? 2) ¿Baʼax unaj u beetaʼal utiaʼal maʼ u yantal talmiliʼ?

⁷ Le k-muchʼikba yéetel k-láakʼtsiloʼob bey xan yéetel k-amigoʼoboʼ jach ku líiʼsik k-óol xan. Le rey Salomonoʼ tu yaʼalaj: «Baʼax u najmal u beetik wíinikeʼ janal, ukʼul, ka xan u kiʼimakkúuns u yóol yéetel u tojol u náajal» (Ecl. 2:24). Le ken k-muchʼba yéetel le sukuʼunoʼob teʼ súutukiloʼob beyaʼ maʼ chéen ku líiʼsik k-óoliʼ, baʼaxeʼ ku yantal tuʼux k-maas kʼaj óoltikoʼob tubeel. Baʼaleʼ utiaʼal maʼ u yantal talmiloʼobeʼ kʼaʼabéet u yilaʼal maʼ u jach yaʼabtal máak ka  xiʼikiʼ yéetel ka yanak máax kanáantik baʼax ku beetaʼaliʼ. Lelaʼ maas unaj u beetaʼal wa yaan u tsʼaʼabal ukʼbil wa baʼax ku káalkunajiʼ.

Le kʼaʼaytajoʼ ku líiʼsik k-óol

8, 9. 1) ¿Baʼax u jelaʼanil u kaʼansaj Jesús tiʼ le fariseoʼoboʼ? 2) ¿Baʼax utsiloʼob ku taasik k-kʼaʼaytik u maʼalob péektsilil le Reinooʼ?

⁸ Jesuseʼ jach tu tsʼáaj u yóol kʼaʼaytaj yéetel tu yaʼalaj tiʼ u disipuloʼob ka u beetoʼob xan beyoʼ. Tu yaʼalajtiʼob: «Le joochoʼ jach yaʼab, baʼaleʼ le j-meyajoʼoboʼ jach jumpʼíitoʼob. Le oʼolaleʼ kʼáat óolteʼex tiʼ u Yuumil le joochoʼ ka u túuxt j-meyajoʼob utiaʼal jochik» (Mat. 9:37, 38). Le «maʼalob péektsil» tu kʼaʼaytoʼ jach tu líiʼsaj u yóol le máakoʼoboʼ (Mat. 4:23; 24:14). Jesuseʼ mix utéen tu yaʼalaj ka beetaʼak baʼaloʼob maʼ tu páajtal u beetaʼal jeʼex u beetik kaʼach le fariseoʼoboʼ (xokaʼak Mateo 23:4, 23, 24).

⁹ Le ken k-kʼaʼayt u maʼalob péektsilil le Reinooʼ, k-áantik le máakoʼob u yojéeltoʼob baʼax ku yaʼalik le Bibliaoʼ, tsʼoʼoleʼ ku yáantkoʼon utiaʼal ka maas pʼáatak t-tuukul bey xan t-puksiʼikʼal le baʼaxoʼob ku yaʼalikoʼ. Le oʼolal bakáan aʼalaʼab tumen le salmistaaʼ: «¡Kiʼikiʼtʼantaʼak Yuumtsil! ¡Bukaʼaj maʼalobil u kʼaʼayal kʼaayoʼob tiʼ [Dios]!» (Sal. 147:1). ¿Jeʼel wa u páajtal a maas táakpajal teʼ meyaj jach ku taasik kiʼimak óolalaʼ?

10. ¿Baʼaxten k-aʼalik le bix u kʼaʼamal le maʼalob péektsiloʼ maʼ letiʼ eʼesik wa maʼalob le meyaj k-beetkoʼ?

¹⁰ U jaajileʼ yaan tuʼuxoʼobeʼ maas ku kʼaʼamal le maʼalob péektsiloʼ (xokaʼak Beetaʼanoʼob 18:1, 5-8). Wa le máakoʼob tuʼux kajaʼanech maʼatech u kʼaʼamkoʼob le maʼalob péektsiloʼ, tuukulnen tiʼ le utsiloʼob ku taasik le meyaj ka beetkoʼ. Kʼaʼajaktech maʼ chéen kunel tuláakal le baʼax ka beetik utiaʼal a tsʼáaik kʼaj óoltbil u kʼaabaʼ Jéeobaoʼ (1 Cor. 15:58). Tsʼoʼoleʼ maʼ letiʼe bix u kʼaʼamal le maʼalob péektsil eʼesik wa maʼalob le meyaj ka beetkoʼ. Maʼ u tuʼubultoʼoneʼ Jéeoba natsʼik le máakoʼob tu yiknaloʼ yéetel letiʼ tsʼáaiktiʼob u páajtalil u yuʼubikoʼob u maʼalob péektsilil le Reinooʼ (Juan 6:44).

Le Adoración ich Familiailoʼ ku líiʼsik k-óol

11. ¿Baʼax páajtalil u tsʼaama Jéeoba tiʼ le taatatsiloʼoboʼ, yéetel baʼax áantajil ku tsʼáaik utiaʼal u beetkoʼob?

¹¹ Le taatatsiloʼoboʼ tsʼaʼantiʼob u páajtalil u kaʼansik u paalaloʼob u kʼaj óoltoʼob Jéeoba bey xan le baʼaxoʼob ken u beetoʼ (Deu. 11:18, 19). ¿A jóoʼsmeʼex wa u súutukil utiaʼal a kaʼanskeʼex a paalaleʼex u kʼaj óoltoʼob Jéeoba? Letiʼeʼ jeʼel u yáantkeʼex utiaʼal u béeytal a wáantkeʼex a familiaʼexeʼ. ¿Bix u beetik? Letiʼeʼ ku tsʼáaik yaʼab libroʼob, revistaʼob, videoʼob yéetel uláakʼ áantajoʼob ku keʼetel yéetel janal.

12, 13. 1) ¿Baʼax utsiloʼob ku taasik le Adoración ich Familiailoʼ? 2) ¿Baʼax unaj u beetik le taatatsiloʼob utiaʼal ka jatsʼutschajak u yilaʼal le xookoʼ?

¹² Tsʼoʼoleʼ le palitsil chúukpajaʼan u yóoloʼ tsʼoʼok u yaʼalik ka jóoʼsaʼak upʼéel kʼiin utiaʼal le Adoración ich Familiai utiaʼal ka páatak u muchʼikubaʼob cada semana u xokoʼob le Bibliaoʼ. Yaʼab taatatsiloʼobeʼ ku yaʼalikoʼobeʼ lelaʼ tsʼoʼok u yáantkoʼob u maas yaabiltubaʼob, u bisubaʼob tubeel yéetel tsʼoʼok u páajtal u maas natsʼkubaʼob tiʼ Jéeoba. Baʼaleʼ ¿bix unaj u beetaʼal utiaʼal maʼ u náakal u yóol le familiaoʼ?

¹³ Le Adoración ich Familiailoʼ unaj u beetaʼal upʼéel bix maʼ u náakal u yóol mix utúul ichil le familiaoʼ. Tumen táan k-meyajtik utúul Dios «kiʼimak u yóol[eʼ]», letiʼeʼ u kʼáat ka yanaktoʼon kiʼimak k-óolal (1 Tim. 1:11, NM; Fili. 4:4). U jóoʼsik máak uláakʼ upʼéel kʼiin utiaʼal u xakʼalxoktik le baʼaxoʼob ku kaʼansik le Bibliaoʼ jach ku taasik utsiloʼob. Le taatatsiloʼoboʼ unaj u kanik u yiloʼob baʼax maas kʼaʼanan u kaʼansik tiʼ u paalaloʼob yéetel unaj u beetkoʼob jejeláas bixi. Jeʼex Brandon, utúul chan paal yaan 10 jaʼaboʼob tiʼeʼ, aʼalaʼabtiʼ ka u máans upʼéel tsoltʼaan ku kʼaabaʼtik: «¿Baʼaxten le Bibliaoʼ ku ketik Satanás yéetel utúul kaan?». Lelaʼ upʼéel baʼax chiʼichnakkúuntik kaʼachi, tumen jach utstuyich le kaanoʼoboʼ, le beetik maʼ utstutʼaan u keʼetel le Diablo yéetel le kaanoʼoboʼ. Yaan familiaʼob xaneʼ ku yéeykoʼob u jaats tiʼ le baʼax ku yaʼalik le Bibliaoʼ yéetel ku yaʼalikoʼob baʼax jaatsil ken u xok cada utúul wa ku beetkoʼob upʼéel drama tiʼ le baʼax  ku xokikoʼoboʼ. U beetaʼal beyaʼ maʼ chéen ku yáantaj utiaʼal ka jatsʼutschajak u yilaʼal le xookoʼ, baʼaxeʼ ku yáantaj utiaʼal ka táakpajak le paalaloʼoboʼ bey xan ka kʼuchuk tu puksiʼikʼaloʼob le baʼax ku yaʼalik le Bibliaoʼ. *

Maʼ k-beetik baʼaloʼob chéen ku taasik chiʼichnakil

14, 15. 1) ¿Baʼaxten jach yaʼab baʼaxoʼob beetik u chiʼichnaktal yéetel u sajaktal máak teʼ tu tsʼook kʼiinoʼobaʼ? 2) ¿Baʼax uláakʼ talmiloʼob ku aktáantik le máaxoʼob meyajtik Diosoʼ?

¹⁴ Teʼ tu tsʼook kʼiinoʼobaʼ jach yaʼab baʼaxoʼob beetik u chiʼichnaktal yéetel u sajaktal máak. U millonesi máakoʼobeʼ óotsiloʼob wa minaʼan meyajtiʼob. Yéetel le máaxoʼob yaan meyajtiʼoboʼ ku yilkoʼob jach séeb u xupkoʼob le taakʼin ku náajaltkoʼoboʼ, bey ka u tsʼaʼob tiʼ upʼéel bolsa joololeʼ, le oʼolal talam u yilkoʼob u tsʼáaikoʼob baʼaxoʼob kʼaʼabéet tiʼ u familiaʼob (ket yéetel Ageo 1:4-6). Le politicoʼob yéetel le gobiernoʼoboʼ maʼ tu páajtal u beetkoʼob mix baʼal utiaʼal u xuʼulskoʼob le terrorismooʼ yéetel uláakʼ talmiloʼob beetik u muʼyaj máak. Tsʼoʼoleʼ yaʼab máakoʼob xaneʼ táan u muʼyajoʼob yoʼolal le baʼaxoʼob maʼ maʼalobtak ku beetkoʼoboʼ (Sal. 38:4).

¹⁵ Toʼon k-tsaypachtik Cristoeʼ láayliʼ k-muʼyajtik le talmiloʼob yéetel le chiʼichnakiloʼob yaan teʼ tu kʼasaʼan yóokʼol kaab Satanasaʼ (1 Juan 5:19). Yaan kʼiin xaneʼ maas yaʼab talmiloʼob k-aktáantik tumen k-chʼaʼapachtaʼal ikil k-meyajtik Jéeoba. Lelaʼ jach jeʼex úuchik u yaʼalik Jesuseʼ: «Wa teen tu chʼaʼapachtenoʼobeʼ bey xan teʼex yaan a chʼaʼapachtaʼaleʼex» (Juan 15:20). Baʼaleʼ «kex k-chʼaʼapachtaʼaleʼ, maʼ táan k-xúumpʼattaʼal» (2 Cor. 4:9). ¿Baʼaxten k-aʼalik lelaʼ?

16. ¿Baʼax áantkoʼon utiaʼal ka yanaktoʼon kiʼimak óolal?

¹⁶ Jesuseʼ ku yaʼalik: «Koʼoteneʼex tiʼ teen, tuláakaleʼex máaxeʼex kaʼananeʼex tiʼ a meyajeʼex yéetel aal a kucheʼex, teen bíin in beet a jeʼeleʼex» (Mat. 11:28). Ken k-tsʼáa k-fe tiʼ u kuxtal Cristo tu tsʼáaj t-oʼolaloʼ k-tsʼáaikba tu kʼab Jéeoba, letiʼ túuneʼ ku tsʼáaiktoʼon «nojoch páajtalil» utiaʼal k-aktáantik le talmiloʼoboʼ (2 Cor. 4:7). Tsʼoʼoleʼ «le kiliʼich muukʼoʼ» ku muʼukʼaʼankúuntik k-fe. Lelaʼ maʼ chéen ku yáantkoʼon k-aktáant le talmiloʼoboʼ, baʼaxeʼ ku yáantkoʼon utiaʼal ka yanaktoʼon kiʼimak óolal (Juan 14:26; Sant. 1:2-4).

17, 18. 1) ¿Baʼax unaj u kanáantik maʼ u beetik le máaxoʼob meyajtik Diosoʼ? 2) ¿Baʼax jeʼel u yúuchul wa k-tsʼáaik táanil le náaysaj óoloʼoboʼ?

¹⁷ Le máaxoʼob meyajtik Dios xanoʼ ku yilkoʼob maʼ u binoʼob tu paach chéen náaysaj óoloʼob, jeʼex u beetik le máaxoʼob maʼatech u meyajtkoʼob Diosoʼ (xokaʼak Efesoiloʼob 2:2-5). Tumen wa maʼeʼ jeʼel k-lúubsaʼal tumen «u kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel u kaʼanal ichil ku yantal tu yoʼolal u baʼaliloʼob le kuxtaloʼ» (1 Juan 2:16). Wa jeʼel u joʼopʼol k-tuklik ku taasik kiʼimak óolal u beetaʼal le baʼaxoʼob ku yaʼalik Dios maʼ maʼaloboʼ (Rom. 8:6). Yaan máaxoʼobeʼ tsʼoʼok u joʼopʼol u drogarkubaʼob, u káaltaloʼob, u chaʼantkoʼob pornografía, u náaysik u yóoloʼob yéetel báaxloʼob sajbeʼentsiloʼob wa tiʼ uláakʼ baʼaloʼob ku bin tu contra le baʼaxoʼob ku yaʼalik le Bibliaoʼ. Satanaseʼ ku meyaj «táabsajiloʼob» tiʼ utiaʼal u tuskoʼon yéetel utiaʼal u beetik k-tuklik le baʼaloʼob kʼaastakoʼ jeʼel u taasiktoʼon kiʼimak óolaleʼ (Efe. 6:11).

 ¹⁸ U jaajileʼ maʼ kʼaas u janal yéetel u yukʼul máakiʼ mix u náaysik u yóol, baʼaleʼ kʼaʼabéet u tsʼáaik u pʼiis. Lelaʼ maʼ letiʼe baʼaxoʼob unaj k-tsʼáaik táanil ichil k-kuxtaloʼ. Unaj u yilik máak u controlartik baʼaxoʼob ku tsʼíiboltik, lelaʼ maases unaj k-beetik tumen kuxaʼanoʼon tu tsʼook kʼiinoʼob. Wa k-chʼíikil k-kaxt chéen baʼaxoʼob uts t-icheʼ, yaan k-uʼuyik jach kaʼanaʼanoʼon, yéetel jeʼel «u pʼáatal mix baʼal u biilal yéetel [chéen kunel k-kʼaj óolmil] k-Yuumtsil Jesucristo[eʼ]» (2 Ped. 1:8).

19, 20. ¿Baʼax unaj k-beetik utiaʼal maʼ u lúubul k-óol?

¹⁹ Le máaxoʼob ku tuukuloʼob jeʼex Jéeobaoʼ ku yilkoʼob chéen kunel le baʼaxoʼob ku tsʼáaik le yóokʼol kaabaʼ. Moiseseʼ bey úuchik u yilkoʼ; toʼoneʼ bey xan unaj k-ilkoʼ (Heb. 11:25). Le oʼolal wa k-kʼáat ka líikʼik k-óol yéetel ka kiʼimakchajak k-óoleʼ unaj k-ilik beetik le baʼaxoʼob ku yaʼalik Jéeoba, k-Taata yaan teʼ kaʼanoʼ (Mat. 5:6).

²⁰ Wa k-táakpajal mantatsʼ tiʼ le meyajoʼob ku beetaʼal ichil u kaajal Diosoʼ yaan u yáantkoʼon utiaʼal maʼ u lúubul k-óol. Beyoʼ yaan u béeytal «k-pʼat[ik] le kʼaasoʼ yéetel le luʼumkabil tsʼíibolaloʼob [...], [le] táan k-páaʼtik u nojbeʼen taalbal k-nojoch Jajal Dios yéetel k-[Salvador] Jesucristo» (Tito 2:12, 13). Unaj k-bisik u kuuch Jesús. Beyoʼ yaan k-chaʼik u nuʼuktikoʼon tiʼ tuláakal súutukil. Wa k-beetik lelaʼ yaan u yáantkoʼon utiaʼal ka líikʼik k-óol yéetel utiaʼal ka kiʼimakchajak k-óol.

[Tsolajiloʼob]

¿Baʼax jeʼel a núukikeʼ?

• ¿Baʼax áantik le máaxoʼob meyajtik Jéeoba utiaʼal maʼ u lúubul u yóoloʼoboʼ?

• Le maʼalob péektsil k-kʼaʼaytikoʼ, ¿bix u líiʼsik k-óol bey xan u yóol le máaxoʼob kʼamikoʼ?

• ¿Baʼax unaj u beetik le taatatsiloʼob utiaʼal maʼ u náak óoltal le Adoración ich familiailoʼ?

• ¿Baʼaxoʼob jeʼel u beetik u xuʼulul k-tsʼáaik k-óol k-meyajt Dioseʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 26]

Le kuuch ku tsʼáaik Jesusoʼ jejeláas bix u yáantkoʼon