¿Jeʼel wa u páajtal a máan Macedoniaeʼ?

LE TIAʼAN apóstol Pablo tu kaajil Troasoʼ (Asia Menor) tu yilaj ichil upʼéel náay utúul macedonioi táan u yaʼalik: «Máanen Macedonia ka a wáantoʼon». Pablo yéetel u yéet kʼaʼaytajoʼobeʼ tu yaʼaloʼob: «T-ojéeltaj beyoʼ Jajal Dioseʼ táan u tʼanikoʼon utiaʼal [k-kʼaʼaytik] le maʼalob péektsil» tiʼ le máakoʼob kajaʼanoʼob kaʼach teʼ chan kaaj yaan yáanal u páajtalil Romaoʼ. ¿Bix biniktiʼob yéetel le kʼaʼaytaj tu beetoʼoboʼ? Yaʼab tiʼ le máakoʼoboʼ tu kʼamoʼob le maʼalob péektsiloʼ, ichiloʼobeʼ tiaʼan Lidia yéetel le máaxoʼob yanoʼob ichil u yotochoʼ, letiʼobeʼ tiʼ kajaʼanoʼob kaʼach Filipos, le kaaj maas nojoch yaan kaʼach Macedoniaoʼ (Hch. 16:9-15).

Teʼ kʼiinoʼob xanaʼ, u j-jaajkunajoʼob Jéeobaeʼ jach ku tsʼáaik u yóoloʼob u kʼaʼaytoʼob le maʼalob péektsiloʼ. Yaʼab sukuʼunoʼobeʼ ku xupik u taakʼinoʼob utiaʼal u bin u kʼaʼaytoʼob le maʼalob péektsil tuʼux maas kʼaʼabéetoʼ. Lisa, utúul kiik kajaʼan kaʼach Canadaeʼ bey tu beetiloʼ, letiʼeʼ bin tu kaajil Kenia, tumen u kʼáat u maas kʼaʼayt le maʼalob péektsiloʼ. Trevor yéetel Emily xaneʼ tu pʼataj u yotochoʼob Canadaeʼ ka binoʼob kajtal Malaui utiaʼal u maas kʼaʼaytikoʼob le maʼalob péektsiloʼ. Paul yéetel Maggie kajaʼanoʼob kaʼach Inglaterraeʼ, binoʼob África oriental ka tsʼoʼok u jubilarkubaʼob, utiaʼal u maas meyajtkoʼob Jéeobaiʼ. ¿Jeʼel wa u páajtal a beetik xan beyoʼ? ¿Jeʼel wa u páajtal a bin áantaj yaanal luʼumileʼ? Koʼox ilik jujumpʼéel baʼaxoʼob ku yaʼalik le Biblia yéetel uláakʼ tsolnuʼukoʼob jeʼel u yáantkecheʼ.

Jach tukult wa jeʼel u páajtal a beetkeʼ

Yáaxeʼ kʼaʼabéet u yilik máak jach baʼax péeksik. Jesuseʼ tu yaʼaleʼ le ley maas nojchoʼ letiʼ lelaʼ: «Yaabilt Yuumtsil a Jajal Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat».  Lelaʼ ku yeʼesiktoʼoneʼ, le baʼax unaj u péeksik máak bin áantaj táanxel luʼumiloʼ letiʼe u yaabilaj tiʼ Jéeobaoʼ yéetel tumen u kʼáat u yáant u maasil kaambal tiʼ letiʼ. Jesús xaneʼ tu yaʼalaj: «U kaʼapʼéeleʼ chíikaʼan tiʼ, ku yaʼalikeʼ: Yaabilt a láakʼ jeʼel bix ka yaabiltkabaeʼ». Wa k-yaabiltmaj u maasileʼ yaan u taaktal k-áantkoʼob (Mat. 22:36-39; 28:19, 20). Jeʼex túun k-ilkoʼ, le baʼax kʼaʼabéet u péekskoʼonoʼ letiʼe yaabilajoʼ. U bin máak u kʼaʼayt le maʼalob péektsil táanxel luʼumiloʼ maʼ chéen jeʼex u bin xíimbal wa tuʼuxeʼ, tumen ku kʼaʼabéettal u xupik u muukʼ máak utiaʼal ka u beete. Remco yéetel Suzanne, kajaʼanoʼob kaʼach Países Bajoseʼ binoʼob tu luʼumil Namibia, letiʼobeʼ ku yaʼalikoʼob: «Le baʼax péekskoʼon pʼáatal wayeʼ letiʼe yaabilajoʼ».

Willie, utúul superintendente tiʼ circuito ku meyaj tu luʼumil Namibiaeʼ, ku yaʼalik: «Le máaxoʼob tsʼoʼok u xáantal joʼopʼok u meyajoʼob wayaʼ, maʼ taaloʼob utiaʼal ka áantaʼakoʼobiʼ, baʼaxeʼ taaloʼob utiaʼal u yáantkoʼob le sukuʼunoʼoboʼ yéetel utiaʼal u maas kʼaʼaytikoʼob le maʼalob péektsiloʼ».

Le ken tsʼoʼokok a wilik baʼax beetik u taaktal a bin áantaj táanxel luʼumileʼ, tukulte: «¿Yaan wa baʼax in wojel in beet jeʼel u yáantikeneʼ? ¿Kin kʼaʼaytik wa tubeel le maʼalob péektsiloʼ? ¿Yaan wa uláakʼ tʼaanil in wojel? ¿Jeʼel wa u páajtal in kanik uláakʼ upʼéeleʼ?». Wa yaan a láakʼtsiloʼobeʼ, tsikbaltiʼob baʼax ka tuklik a beetik. Tsikbalt tiʼ u ancianoiloʼob a múuchʼulil. Baʼaleʼ baʼax maas unaj a beetikeʼ, a waʼalik tiʼ Jéeoba ich payalchiʼ. Tuláakal lelaʼ jeʼel u yáantkech a wil wa jeʼel u páajtal a bin áantaj táanxel luʼumileʼ (ilawil le cuadro «¿A kʼaj óolaba wa tubeel?»).

Tuʼux jeʼel u páajtal a bin áantajeʼ

Pabloeʼ tiʼ upʼéel náay aʼalaʼabtiʼ ka máanak u yáant le máaxoʼob yanoʼob Macedoniaoʼ, baʼaleʼ  bejlaʼeʼ, Jéeobaeʼ maʼatech u tʼankoʼon tiʼ upʼéel wayakʼ utiaʼal u yaʼaliktoʼon baʼax unaj k-beetik. Baʼaleʼ yéetel u yáantaj le revista U Pʼíich Tulumil Kanan bey xan yéetel uláakʼ jóoʼsaʼaniloʼobeʼ jeʼel u páajtal k-ojéeltik tuʼux kʼaʼabéet áantajeʼ. Táanileʼ tsʼíibt u kʼaabaʼ le tuʼuxoʼob maas kʼaʼabéet áantajoʼ. Wa ka wilik maʼ tu páajtal a jáan kanik uláakʼ upʼéel tʼaanil bey xan wa maʼ tu páajtal a bin kajtal yaanal luʼumileʼ, tuukulnen tiʼ bix jeʼel a bin áantaj tiʼ upʼéel kaaj tuʼux ku beetaʼal le tʼaan a wojloʼ. Tsʼoʼoleʼ kʼáat uláakʼ baʼax taak a wojéeltik tiʼ le kaaj tuʼux taak a binoʼ, jeʼex wa kʼaʼabéettech visa utiaʼal a wookliʼ, wa ku beetik keʼel wa ooxoliʼ, wa yaan baʼal utiaʼal u viajar máak, wa maʼatech u jach beetaʼal baʼax kʼaasiʼ yéetel wa maʼ jach koʼoj u tojol le baʼaxoʼob kʼaʼabéet tiʼ máakoʼ. Kʼáat áantaj tiʼ le máaxoʼob tsʼoʼok u binoʼob áantaj táanxel luʼumiloʼ. Yéetel maʼ u tuʼubultech a kʼáatik u yáantaj Jéeoba ich payalchiʼ. Maʼ xaaneʼ yaan u chan máan kʼiin táan a tukultik tuʼux jeʼel a bin áantajeʼ. Kʼaʼajaktecheʼ táanil tiʼ u binoʼob Pablo kʼaʼaytaj Macedoniaeʼ, le kiliʼich muukʼoʼ «maʼ tu chaʼaj tiʼob u [kʼaʼaytikoʼob] le maʼalob péektsil tu luʼumil Asia[oʼ]», yéetel le ka tu yóotoʼob bin kʼaʼaytaj Bitiniaeʼ, «maʼ chaʼab u binoʼob tumen u kiliʼich [muukʼ] Jesus[iʼ], LTN» (Hch. 16:6-10).

Maʼ xaaneʼ, beoraaʼ tsʼoʼok a wilik tuʼux jeʼel u páajtal a bin áantajeʼ. Uláakʼ baʼax kʼaʼabéet a beetkeʼ a tsʼíib tu najil Betel. Tsol baʼax meyajiloʼob tsʼoʼok a beetik teʼ múuchʼuliloʼ yéetel kʼáat xan uláakʼ baʼaxoʼob taak a wojéeltik, jeʼex kex bajux u tojol baʼal jaantbil yéetel kex bajux u rentai upʼéel naj bey xan wa yaan hospitaloʼobiʼ yéetel wa yaan tuʼux u kaxtik máak meyajiʼ. Kʼub le carta ken a tsʼíibt tiʼ le comité tiʼ servicio tiʼ a múuchʼuliloʼ. Le ancianoʼoboʼ yaan xan u túuxtikoʼob upʼéel carta tuʼux ku yaʼalikoʼob jeʼel u páajtal a bineʼ yéetel yaan u túuxtikoʼob tiʼ le u najiloʼob Betel ta yéeyajoʼ. Le baʼax kun núukbil techoʼ yaan u yáantkech a yéey tuʼux maas maʼalob ka xiʼikech.

Willie, le máax tsʼoʼok k-yáax chʼaʼachiʼitikeʼ ku yaʼalik: «Le sukuʼunoʼob tsʼoʼok u pʼáatloʼob teʼ luʼumilaʼ letiʼe taaloʼob yáax u yiloʼob tuʼux jeʼel u páajtal u yáantajoʼob yéetel kiʼimak óolaleʼ. Utúul sukuʼun yéetel u yatneʼ tu yiloʼob chan talam jeʼel u kuxtaloʼob wa ka xiʼikoʼob jach náach áantajeʼ, le oʼolal binoʼob áantaj tiʼ upʼéel chan kaaj tuʼux maʼ talam jeʼel u suuktaloʼobeʼ».

Uláakʼ talmiloʼob

U pʼatik u yotoch máak utiaʼal ka xiʼik kajtal náach yéetel yaanal baʼaxoʼob suukaʼan u beetaʼaleʼ maʼ chéen chʼaʼabiliʼ. Lisa, le máax tsʼoʼok k-yáax chʼaʼachiʼitikeʼ ku yaʼalik: «Jach talam u yuʼubikuba máak chéen tu juunal». ¿Baʼax ku beetik ken u yuʼububa beyoʼ? Ku maas ilik u biskuba yéetel le sukuʼunoʼob teʼ múuchʼuliloʼ. Tu yilaj xan u kanik u kʼaabaʼ tuláakal le sukuʼunoʼoboʼ, utiaʼal leloʼ ku tsikbal tu yéeteloʼob táanil tiʼ u káajal le muchʼtáambaloʼoboʼ bey xan le ken tsʼoʼokok. Tsʼoʼoleʼ ku jóokʼol kʼaʼaytaj tu yéeteloʼob yéetel ku invitarkoʼob tu yotoch. Leloʼ tsʼoʼok u yáantik utiaʼal ka u bisuba yéetel yaʼab tiʼ le sukuʼunoʼoboʼ. Letiʼeʼ ku yaʼalik: «Maʼ tu yaatal tin wóol úuchik in pʼatik in  wotoch. Jéeobaeʼ jach tsʼoʼok u beetik u binten utsil».

Ka tsʼoʼok u nuukkíintik u paalal Paul yéetel Maggieeʼ, tu chʼaʼatuklaj u binoʼob kajtal yaanal luʼumil, le oʼolal yanchaj u pʼatik u yotochoʼob, le tuʼux tsʼoʼok treinta jaʼaboʼob kajlakoʼob kaʼachoʼ. Pauleʼ ku yaʼalik: «Toʼoneʼ maʼ talam úuchik k-ilik k-pʼatik le baʼaxoʼob yantoʼon kaʼachoʼ. Baʼaleʼ jach talam úuchik k-ilik k-pʼatik k-láakʼtsiloʼob. Le tiaʼanoʼon teʼ avionoʼ sen okʼolnajoʼon. Ka t-tuklaj: “Maʼ ken béeytal yéetel le baʼax k-kʼáat beetaʼ. Jach talam k-tiaʼal”. Baʼaleʼ t-kʼubaj k-óol tiʼ Jéeoba. Tsʼoʼoleʼ t-ilaj k-kaxtik k-amigoʼob teʼ tuʼux binoʼonoʼ, lelaʼ le áantoʼon utiaʼal ka seguernak k-meyajiʼ».

Greg yéetel Crystaleʼ lukʼoʼob Canadaeʼ ka binoʼob Namibia, tumen teʼeloʼ ku tʼaʼanal xan inglesiʼ. Baʼaleʼ ka máan kʼiineʼ tu yiloʼob jach maʼalob ka u kanoʼob upʼéel tiʼ le tʼaanoʼob ku beetaʼal teʼ luʼumiloʼ. Letiʼobeʼ ku yaʼalikoʼob: «Yaan kʼiineʼ jach ku lúubul k-óol. Baʼaleʼ t-ileʼ utiaʼal k-maas kʼaj óoltik le baʼaxoʼob suukaʼan u beetkoʼoboʼ kʼaʼabéet k-kanik le tʼaanil ku beetkoʼoboʼ. Tsʼoʼoleʼ le úuchik k-bisikba yéetel le sukuʼunoʼoboʼ jach tu yáantoʼon».

Le baʼaxoʼob ku beetik máak yéetel kabal óolaloʼ, jach ku líiʼsik u yóol xan u maasil. Jenny, tiʼ u luʼumil Irlandaeʼ, jach ku kʼaʼajsik yéetel kiʼimak óolal le sukuʼunoʼob yéetel u yatnoʼob binoʼob kʼaʼaytaj tuʼux kajaʼanoʼ. Letiʼeʼ ku yaʼalik: «Letiʼobeʼ jach tu jaajil taaloʼob áantaj, maʼ taaloʼob utiaʼal ka áantaʼakoʼobiʼ. Letiʼobeʼ jach utsoʼob. Jach tu líiʼsoʼob in wóol yoʼolal le kiʼimak óolal ku yeʼeskoʼoboʼ, ka taakchaj xan in bin áantaj tuʼux kʼaʼabéet». Bejlaʼeʼ Jenny yéetel u yíichameʼ tiʼ ku yáantajoʼob tu luʼumil Gambiaeʼ.

Jéeobaeʼ ku tsʼáaiktoʼon yaʼab utsiloʼob

Apóstol Pabloeʼ jach kiʼimakchaj u yóol úuchik u bin kʼaʼaytaj tu luʼumil Macedonia. Kex diez jaʼaboʼob xiʼikeʼeʼ tu yaʼalaj tiʼ le sukuʼunoʼob yanoʼob Filiposoʼ: «Jeʼel jaytéen kin kʼaʼajsikeʼexeʼ kin tsʼáaik gracias tiʼ in Jajal Dios» (Fili. 1:3).

Trevor yéetel Emilieʼ, áantajnajoʼob tu luʼumil Malaui táanil tiʼ u binoʼob teʼ Escuela Bíblica tiʼ Galaad tiʼ le Watchtoweroʼ, letiʼobeʼ ku yaʼalikoʼob: «Yaan kʼiineʼ t-tuklaj wa maʼalob úuchik k-bin áantaj tu luʼumil Malaui. Baʼaleʼ le tiaʼanoʼonoʼ jach yanchajtoʼon kiʼimak óolal. Le úuchik k-binoʼ tu yáantoʼon utiaʼal k-maas bisikba tubeel yéetel tu yáantoʼon utiaʼal k-ilik le utsiloʼob ku tsʼáaik Jéeobaoʼ». Greg yéetel Crystal, le máaxoʼob tsʼoʼok k-yáax chʼaʼachiʼitkeʼ, ku yaʼalikoʼob: «Minaʼan uláakʼ baʼax maas maʼalob jeʼel k-beetik yéetel k-kuxtaleʼ».

Baʼaleʼ maʼ tuláakal máak jeʼel u páajtal u bin áantaj yaanal luʼumileʼ. Yaan sukuʼunoʼobeʼ ku chʼaʼatuklik u binoʼob áantaj táanxel kaajil tiʼ u luʼumiloʼob. Yanoʼob xaneʼ ku máanoʼob áantaj tuláakʼ múuchʼulil naatsʼ tu yotochoʼob. Le baʼax maas kʼaʼananoʼ ka u beet máak tuláakal le ku páajtal utiaʼal u meyajtik Jéeoba (Col. 3:23). Wa k-beetik beyoʼ yaan k-ilik jach jaaj le baʼax ku yaʼalik le Bibliaaʼ: «U kiʼtʼaan Yuumtsileʼ ayikʼalil maʼ tu taasik kʼiʼinamil tu yéetel» (Pro. 10:22).

[U tsolajil le oochel teʼ táan juʼun 5]

¿A kʼaj óolaba wa tubeel?

Le kʼáatchiʼobaʼ jeʼel u yáantkech a wil wa jeʼel u páajtal a bin áantaj táanxel luʼumileʼ. Payalchiʼinen tiʼ Jéeoba utiaʼal u yáantkech a chʼaʼatukult baʼax ken a beete. Tsʼoʼoleʼ maʼalob xan ka wil le baʼax ku yaʼalik U Pʼíich Tulumil Kanan ku chíikpajal kabalaʼ.

• ¿Jach wa kin tsʼáaik in wóol in meyajt Dios? (K-beetik jeʼex Pabloeʼ ku yáantkoʼon k-maas meyajt Jéeoba, 15 tiʼ mayo tiʼ 2008, táan juʼun 21.)

• ¿Kin kaʼansik wa tubeel le maʼalob péektsiloʼ? («Kʼaʼabéet jach kaxtik bix jeʼel k-kʼaʼaytik le maʼalob péektsiloʼ», 1 tiʼ enero tiʼ 2006, táan juʼun 12.)

• ¿Jeʼel wa u páajtal in náachtal tiʼ in láakʼtsiloʼob yéetel in amigoʼobeʼ? (“Cómo enfrentarse a la nostalgia en el servicio de Dios”, 15 tiʼ mayo tiʼ 1994, táan juʼun 28.)

• ¿Jeʼel wa u páajtal in kanik uláakʼ tʼaanileʼ? (“El reto de servir en una congregación de habla extranjera”, 15 tiʼ marzo tiʼ 2006, táan juʼun 17.)

• ¿Jeʼel wa u páajtal in bin kajtal yaanal luʼumil yéetel in kaxtik u tojol baʼaxoʼob kun kʼaʼabéettal teneʼ? (“¿Puede usted servir en el extranjero?”, 15 tiʼ octubre tiʼ 1999, táan juʼun 23.)

[U tsolajil le oochel teʼ táan juʼun 6]

Le baʼaxoʼob ku beetik máak yéetel kabal óolaloʼ jach ku líiʼsik u yóol u maasil

[U tsolajil le oochel teʼ táan juʼun 7]

Le máaxoʼob ku binoʼob táanxel luʼumil yéetel u tuukulil u yáantajoʼoboʼ letiʼe ku bin utsil tiʼoboʼ