Tuukulnakoʼon tiʼ le baʼax tu beetaj le Palitsil yéeyaʼan tumen Diosoʼ

«Jeʼel in palitsilaʼ, [...] letiʼ máax in yéeymaj.» (ISA. 42:1)

1. Tumen naatsʼ yanik u Kʼaʼajsajil u kíimil Jesuseʼ, ¿baʼax unaj k-beetik, yéetel baʼax ken u péeksoʼon beet leloʼ?

TUMEN natsʼaʼan u kʼiinil u Kʼaʼajsajil u kíimil Jesuseʼ, maʼalob ka k-beet le baʼax tu yaʼalaj le apóstol Pabloaʼ: «Koʼox tsʼáaik k-paakat tiʼ Jesús, tiʼ máax ku taal k-oksaj óolal yéetel máax ku yutsil chúukaʼankúuntik. [...] Tsʼáa a tuukuleʼex túun tiʼ Jesús, máax tu mukʼyajtaj jach yaʼab chʼaʼapʼektajil tu kʼab le kʼeban máakoʼoboʼ; le oʼolaleʼ maʼ a kaʼanleʼex mix u lúubul a wóoleʼex» (Heb. 12:2, 3). Jeʼex k-ilkoʼ wa k-xakʼaltik bix úuchik u chúukpajal u yóol Cristo u meyajt Dios tak ka kíimsaʼabeʼ, le máaxoʼob kun binoʼob kaʼan bey xan le uláakʼ tamanoʼoboʼ yaan xan u chúukpajal u yóol meyajtoʼob Dios (ket yéetel Galaciailoʼob 6:9).

2. ¿Baʼax jeʼel k-kanik tiʼ u profecíaʼob Isaías yaan yil yéetel Jesusoʼ?

² Jéeobaeʼ tu tsʼáa u yojéelt le profeta Isaías, jujumpʼéel profecíaʼob yaan yil yéetel Jesusoʼ. Leloʼobaʼ yaan u yáantkoʼon utiaʼal ka tuukulnakoʼon tiʼ Jesús, «tiʼ máax ku taal k-oksaj óolal yéetel máax ku yutsil chúukaʼankúuntik». * Ken k-xakʼalt le profecíaʼobaʼ yaan k-kanik bix le modos anchajtiʼoʼ, le baʼaxoʼob tu muʼyajtoʼ yéetel le nojoch páajtalil tsʼaʼantiʼ bey Rey yéetel Salvadoroʼ. Tsʼoʼoleʼ yaan k-maas naʼatik baʼaxten ku kʼaʼajsaʼal u kʼiinil úuchik u kíimil Jesús. Teʼ jaʼabaʼ le Kʼaʼajsajiloʼ yaan u beetaʼal jueves 9 tiʼ abril ken tsʼoʼokok u tʼúubul kʼiin.

Ku yojéeltaʼal máax u Palitsil Dios

3, 4. 1) ¿Tiʼ máaxoʼob táan u yúuchul tʼaan le ken chíikpajak tu libroi Isaías le tʼaan «palitsi[loʼ]»? 2) Le Bibliaoʼ, ¿bix u yeʼesik máax le Palitsil ku chʼaʼachiʼitaʼal teʼ capituloʼob 42, 49, 50, 52 yéetel 53 tiʼ Isaíasoʼ?

³ Le tʼaan «palitsil[oʼ]» yaʼab utéenel ku chíikpajal tu libroi Isaías. Jujumpʼéel tuʼux ku chíikpajleʼ ku tʼaan tiʼ le profetaoʼ (Isa. 20:3; 44:26). Yaan tuʼux xan ku meyaj utiaʼal u yúuchul tʼaan tiʼ u kaajil Israel, máax ku kʼaabaʼintaʼal «Jacob» (Isa. 41:8, 9; 44:1, 2, 21). Baʼaleʼ teʼ capituloʼob 42, 49, 50, 52 yéetel 53 tiʼ Isaíaseʼ, ku tʼaan tiʼ yaanal máax. ¿Tiʼ máax ku tʼaan? Utiaʼal k-ojéeltkeʼ unaj k-xakʼaltik le Kiliʼich Tsʼíiboʼob ich Griegooʼ, tumen tiʼ ku yeʼesaʼal máax u Palitsil Jéeoba ku chʼaʼachiʼitaʼal teʼ capituloʼobaʼ. Tu libroi Beetaʼanoʼobeʼ (Hechos) ku yúuchul tʼaan tiʼ utúul u jalaʼachil Etiopía náatsʼ ilbil tumen Felipe, máax nuʼuktaʼab tumen le kiliʼich muukʼ utiaʼal ka u yáant u naʼat upʼéel tiʼ u profecíaʼob Isaíasoʼ. Le Etiopíailoʼ tu xokaj tiʼ Felipe le baʼax ku chíikpajal tiʼ  Isaías 53:7, 8, tsʼoʼoleʼ ka tu kʼáatajtiʼ: «¿Tu yoʼolal máax ku yaʼalik le [profeta] le baʼaloʼobaʼ, tu yoʼolal letiʼ, wa tu yoʼolal yaanal máak?». Felipeeʼ tu tsolaj tiʼ táan kaʼach u yúuchul tʼaan tiʼ Jesús, le Mesíasoʼ (Hch. 8:26-35).

⁴ Le maʼ úuch síijik Jesusoʼ, Simeón, utúul máak anchaj upʼéel toj kuxtal tiʼeʼ tu yaʼaleʼ le chaambaloʼ yaan u kʼuchul u beetuba «le sáasil bíin u sáasilkunt le máaxoʼob maʼ Israel u kaajaloʼob», jeʼex úuchik u yaʼalik Isaías 42:6 yéetel 49:6 (Luc. 2:25-32). Tsʼoʼoleʼ tuláakal le baʼaloʼob kʼaastak beetaʼab tiʼ Jesús le áakʼab táanil tiʼ u kíimsaʼaloʼ, aʼalaʼan teʼ Isaías 50:6-9 (Mat. 26:67; Luc. 22:63). Yéetel le ka tsʼoʼok le Pentecostés tiʼ u jaʼabil 33, le baʼax tu yaʼalaj le apóstol Pedrooʼ tu yeʼesaj Jesuseʼ letiʼe máax tu yaʼalaj le profecíaʼoboʼ (Isa. 52:13; 53:11; xokaʼak Beetaʼanoʼob 3:13, 26). ¿Baʼax k-kanik tiʼ tuláakal le profecíaʼob ku tʼaanoʼob tiʼ le Mesíasoʼ?

Jéeobaeʼ ku kaʼansik u Palitsil

5. ¿Baʼax kaʼansajil tu kʼamaj u Palitsil Diosoʼ?

⁵ Upʼéel u profecía Isaías ku tʼaan tiʼ u Palitsil Dioseʼ, ku yeʼesik bix u biskuba kaʼach Jéeoba yéetel u yáax Paal táanil tiʼ u túuxtik way Luʼumeʼ (xokaʼak Isaías 50:4-9). Utiaʼal u yeʼesik Jéeoba kaʼanseʼ, le Palitsilaʼ tu yaʼalaj: «Sáamsamal jaʼatskab kʼiin ku beetik in chʼenxikin utiaʼal ka chinlaken in wuʼuy u tʼaan» (Isa. 50:4). Ichil tuláakal le kʼiinoʼob jeʼeloʼ, letiʼeʼ tu yuʼubaj u tʼaan u Taata, kaambalnaj tiʼ letiʼ yéetel mantatsʼ tu beetaj baʼax utstutʼaan. ¡Chéen tukult bukaʼaj jaʼtsil ka kaʼansaʼak máak tumen le Máax beetmil tuláakal baʼaloʼ!

6. Le Palitsiloʼ, ¿bix tu yeʼesil mantatsʼ ku yuʼubik kaʼach u tʼaan u Taata?

⁶ Teʼ profecíaaʼ, le Palitsiloʼ tu yaʼalaj «Yuumtsil» tiʼ u Taata. Le tʼaan «Yuumtsil» meyajnaj teʼ tekstoaʼ, ich hebreoeʼ táan u tʼaan tiʼ Jéeoba, le Máax yaan tuláakal páajtalil tiʼoʼ. Lelaʼ ku yeʼesikeʼ le Palitsiloʼ u yojel kaʼach chéen Jéeoba ku náajmatik u gobernar. Tsʼoʼoleʼ mantatsʼ ku yuʼubik u tʼaan u Taata jeʼex u yaʼalik le tekstoaʼ: «Yuumtsileʼ tsʼoʼok u tsʼáaik in naʼat, [teen] xaneʼ maʼ in pechimba tiʼ u tʼaaniʼ mix in sut in paach tiʼiʼ» (Isa. 50:5). Le Hijoaʼ tiʼ yaan kaʼach tu tséel u Taata le ka beetaʼab tuláakal le baʼaloʼoboʼ bey xan le wíinikoʼ. Jach kiʼimakchaj u yóol u yantal tu yiknal Jéeoba bey xan yoʼolal tuláakal le baʼaxoʼob beetaʼanoʼ. Tsʼoʼoleʼ tu yaabiltaj le wíinikoʼoboʼ (Pro. 8:22-31, NM).

7. ¿Bix k-ojéeltik le Palitsiloʼ u yojel kaʼach yaan u yáantaʼal tumen Jéeoba le ken u aktáant talamiloʼob?

⁷ Le kaʼansaj tu kʼamaj u Palitsil Dios bey xan le yaabilaj ku yuʼubik yoʼolal le wíinikoʼoboʼ le áant utiaʼal ka chúukpajak u yóol le ka taal way Luʼumeʼ. Kex tumen tu jach muʼyajtaj chʼaʼapachtajileʼ mantatsʼ tu beetaj yéetel kiʼimak óolal baʼax utstutʼaan u Taata (Sal. 40:8; Mat. 26:42; Juan 6:38). Jesuseʼ u yojel kaʼach yaan u yáantaʼal tumen u Taata kex ka u aktáant jeʼel baʼalak talamileʼ. Jeʼex u chíikpajal tiʼ u profecía Isaíaseʼ, letiʼeʼ páajchaj u yaʼalik: «Tin tséel yaan in j-toksaj. ¿Yaan wa máax ku taal u tak in pool? [...] Yuumtsileʼ letiʼ áantiken» (Isa. 50:8, 9). Tsʼoʼoleʼ jeʼex u yeʼesik uláakʼ u profecía Isaíaseʼ, le Palitsilaʼ áantaʼab tumen Dios le ka taal way Luʼumeʼ.

Le meeyjil kʼaʼaytaj tu beetaj le Palitsil le ka taal way Luʼumeʼ

8. ¿Bix k-ojéeltik Jesuseʼ letiʼe máax yéeyaʼan ku chʼaʼachiʼitaʼal teʼ Isaías 42:1?

⁸ Le Bibliaoʼ ku yaʼalik baʼax úuch le ka okjaʼanaj Jesús tu jaʼabil 29 tiʼ le yáax siglooʼ: «Le Kiliʼich [muukʼoʼ] éem tu yóokʼol [...] yéetel uʼuyaʼab u juum tʼaan teʼ kaʼanoʼ, táan u yaʼalik: Teech in yaabilaj Paal, jach kiʼimak in wóol ta woʼolal» (Luc. 3:21, 22). Yéetel le baʼax úuchaʼ Jéeobaeʼ tu yeʼesaj máax le Palitsil yéeyaʼan ku chʼaʼachiʼitaʼal tu profecíaʼob Isaíasoʼ (xokaʼak Isaías 42:1-7). Le ka taal way Luʼumeʼ Jesuseʼ tu béeykuntaj le profecíaʼob ku tʼaanoʼob tiʼ le Mesíasoʼ. Teʼ tu Evangelioi Mateooʼ ku chʼaʼachiʼitaʼal baʼax ku yaʼalik Isaías 42:1-4 yéetel bix tu béeykuntil Jesús (Mat. 12:15-21).

9, 10. 1) ¿Bix tu béeykuntil Jesús le baʼax ku chʼaʼachiʼitaʼal tu libroi Isaías 42:3? 2) ¿Bix tu yeʼesil unaj u yantal tiʼ máak upʼéel toj kuxtal? 3) ¿Baʼax kʼiin ken u beet u yantal tojil way Luʼumeʼ?

⁹ Le u nojchil le judíoʼob tu kʼiinil Jesusoʼ jach ku mixbaʼalkúuntkoʼob kaʼach le máakoʼoboʼ (Juan 7:47-49). Letiʼobeʼ jach maʼ maʼalob u tratarkoʼob  le máaxoʼob óotsiloʼob yéetel luubul u yóoloʼoboʼ. Baʼaleʼ Jesuseʼ tu chʼaʼaj óotsilil tiʼ le máakoʼobaʼ (Mat. 9:35, 36). Tiʼ letiʼobeʼ Jesuseʼ tu yaʼalaj: «Koʼoteneʼex tiʼ teen, tuláakaleʼex máaxeʼex kaʼananeʼex tiʼ a meyajeʼex yéetel aal a kuucheʼex, teen bíin in beet a jeʼeleʼex» (Mat. 11:28). Tsʼoʼoleʼ tu yeʼesaj baʼax u kʼáat u yaʼal u yantal tiʼ máak upʼéel toj kuxtal le ka tu kaʼansaj baʼax uts yéetel baʼax kʼaas tu táan Jéeoba (Isa. 42:3). Tu kaʼansajeʼ ken tsʼoʼokbesaʼak le baʼax ku yaʼalik le Leyoʼ unaj u yeʼesaʼal chʼaʼa óotsilil yéetel maʼ unaj u kʼáataʼal ka píit máanak ka tsʼoʼokbesaʼakiʼ (Mat. 23:23). Letiʼeʼ tu kʼaʼaytaj le maʼalob péektsil tiʼ ayikʼaloʼob yéetel tiʼ óotsiloʼob (Mat. 11:5; Luc. 18:18-23).

¹⁰ Jeʼex u yaʼalmil u profecía Isaíaseʼ, le máax yéeyaʼan tumen Jéeobaoʼ yaan u beetik «u yantal [toj] bejil yóo[kʼol] luʼum» (Isa. 42:4). Jeʼex k-ilkoʼ, Jesús le máax tsʼoʼok u beetaʼal Reyiloʼ yaan u beetik u yantal tojil ken u xuʼuls tiʼ le gobiernoʼoboʼ yéetel ken káajak u gobernar way Luʼumeʼ. Yaan xan u beetik u yantal upʼéel túumben luʼum, tuʼux kun beetbil «tuláakal baʼal toj» (2 Ped. 3:13; Dan. 2:44).

Letiʼeʼ upʼéel «núuptʼaan» yéetel upʼéel «sáasil»

11. ¿Bix suunajik Jesús bey upʼéel «u sáasil múuchʼ kaajoʼob», yéetel bix u seguer u beetik bejlaʼeʼ?

¹¹ Jesuseʼ letiʼe «u sáasil múuchʼ kaajoʼob» ku chʼaʼachiʼitaʼal teʼ Isaías 42:6. Le ka anchaj way Luʼumeʼ Jesuseʼ tu beetuba bey upʼéel sáasil utiaʼal le judíoʼoboʼ (Mat. 15:24; Hch. 3:26). Baʼaleʼ tu yaʼalaj xan: «Teen u sáasil yóokʼol kaab» (Juan 8:12). Jach beyoʼ, letiʼeʼ suunaj bey upʼéel sáasil utiaʼal tuláakal máak le ka tu kaʼansaj u jaajil yoʼolal Dios bey xan le ka tu kʼubaj u kuxtal tu yoʼolal wíinikoʼ (Mat. 20:28). Ka tsʼoʼok u kuxkíintaʼaleʼ tu yaʼalaj tiʼ u disipuloʼob ka u kʼaʼaytoʼob u kʼaabaʼ «tak [teʼ] kúuchiloʼob yaan tu xuul yóokʼol kaaboʼ» (Hch. 1:8). Le oʼolaleʼ, le ka tu chʼaʼachiʼitoʼob Pablo yéetel Bernabé le tʼaan «sáasilil tiʼ le kaajoʼoboʼ», táan kaʼach u tʼaanoʼob tiʼ le kʼaʼaytaj ku beetkoʼob tiʼ le máaxoʼob maʼ judíoʼoboʼ (Hch. 13:46-48; ket yéetel Isaías 49:6). Bejlaʼeʼ le meyajaʼ táan u beetaʼal tumen u yalab le máaxoʼob yéeyaʼanoʼob utiaʼal u binoʼob kaʼan yéetel le máaxoʼob kun pʼáatloʼob kuxtal way Luʼumeʼ. Tuláakloʼobeʼ ku suutoʼob bey upʼéel sáasil le ken u kaʼansoʼob u jaajil yoʼolal Dios yéetel le ken u yáant le máakoʼob u tsʼáa u fejoʼob tiʼ Jesús le máax «u sáasil múuchʼ kaajoʼob[oʼ]».

12. Jéeobaeʼ, ¿bix tu beetil Jesús bey upʼéel «núuptʼaan yéetel kaaj[eʼ]»?

¹² Teʼ profecía xanaʼ Jéeobaeʼ tu yaʼalaj tiʼ u Palitsil u yéeymoʼ: «Teen tin beetajech, tumen in kʼáat ka a beetaba u jetsʼ [...] tʼaanil in núuptʼaan yéetel kaaj» (Isa. 42:6). Satanaseʼ tu beetaj tuláakal le ku páajtal utiaʼal ka kíimsaʼak Jesús utiaʼal maʼ u tsʼoʼokbesik le baʼax túuxtaʼab u beetoʼ, baʼaleʼ Jéeobaeʼ tu kanáantaj Jesús tak ka kʼuch u kʼiinil u kíimsaʼal (Mat. 2:13; Juan 7:30). Tsʼoʼoleʼ tu kuxkíintaj yéetel tu tsʼáaj bey upʼéel «núuptʼaan» utiaʼal u kaajaleʼ. Lelaʼ tu yeʼeseʼ Jesús le u Palitsil Diosoʼ, maʼ kun xuʼulul u beetik «u sáasil múuchʼ kaajoʼob» yéetel yaan u jáalkʼabtik le máaxoʼob palitsiltaʼanoʼob tumen le religionoʼob maʼatech u kaʼanskoʼob u jaajiloʼ (xokaʼak Isaías 49:8, 9). *

13. Le ka anchaj way Luʼumeʼ, ¿bix tu jáalkʼabtil Jesús le máakoʼoboʼ, yéetel bix u beetik bejlaʼeʼ?

 ¹³ Jeʼex u yaʼalmil Jéeobaoʼ, le Palitsil u yéeymoʼ yaan u tsʼáaik «u sáasil yich chʼóopoʼob», yaan u jáalkʼabtik le «máaxoʼob tsʼaʼanoʼob tiʼ kʼalaboʼob» bey xan le máaxoʼob yanoʼob ich «éekʼjochʼeʼenil[oʼ]» (Isa. 42:7). Utiaʼal u beetkeʼ, Jesuseʼ tu kʼaʼaytaj le maʼalob péektsiloʼ yéetel tu yeʼesaj maʼ maʼalob le baʼax ku kaʼansik le judíoʼoboʼ tumen ku bin tu contra le baʼax ku yaʼalik le Kiliʼich Tsʼíiboʼoboʼ (Mat. 15:3; Luc. 8:1). Bey úuchik u jáalkʼabtik le judíoʼob tiʼ le kaʼansajoʼob maʼ jaajtakoʼoboʼ, yéetel letiʼobeʼ kʼuch u beetubaʼob u disipuloʼob (Juan 8:31, 32). Bejlaʼeʼ Jesuseʼ tsʼoʼok xan u jáalkʼabtik u millonesi máakoʼob maʼ judíoʼobiʼ. Letiʼeʼ tu yaʼalaj tiʼ tuláakal le máaxoʼob tsaypachtikoʼ: «Xeeneʼex túun [...] ka a beeteʼexoʼob j-kaambaloʼob». Tsʼoʼoleʼ tu yaʼalajtiʼob: «Teneʼ tiʼ yanen ta wéeteleʼex tuláakal kʼiinoʼob tak tu xuul yóokʼol kaab» (Mat. 28:19, 20). Jach beyoʼ, Jesuseʼ táan u nuʼuktik le kʼaʼaytaj ku beetaʼal tiʼ tuláakal yóokʼol kaaboʼ.

Jéeobaeʼ tu tsʼáaj upʼéel nojoch páajtalil tiʼ u Palitsil

14, 15. Jéeobaeʼ, ¿bix tu tsʼáajil upʼéel nojoch páajtalil tiʼ u Palitsil, yéetel baʼaxten tu beetaj?

¹⁴ Tiʼ uláakʼ profecía ku tʼaan tiʼ u Palitsileʼ, Jéeobaeʼ tu yaʼalaj: «In palitsileʼ bíin xiʼik utsil tiʼ, bíin líiʼkʼesaʼak utiaʼal tsʼaabil sen kaʼanal» (Isa. 52:13). Tumen Jesús mantatsʼ tu yeʼesaj chéen Jéeoba unaj u gobernar yéetel tumen chúukpaj u yóol u aktáant le talamiloʼoboʼ, Jéeobaeʼ tu tsʼáaj upʼéel nojoch páajtalil tiʼ.

¹⁵ Le apóstol Pedrooʼ tu yaʼalaj yoʼolal Jesús: «Tiʼ yaan tu x-noʼoj kʼab Jajal Dioseʼ; yáanal u kʼabeʼ tiʼ yaan xan le angeloʼoboʼ, le jalaʼachoʼoboʼ yéetel le páajtaliloʼoboʼ» (1 Ped. 3:22). Tsʼoʼoleʼ le apóstol Pablooʼ tu yaʼalaj xan: «Tu kabalkúuntaj u yóol yéetel tu yoʼolal u yuʼubaj tʼaaneʼ bin tiʼ kíimil jumpʼéel kíimil tiʼ [upʼéel u cheʼil muʼyaj, NM]. Le oʼolaleʼ Jajal Dioseʼ tu tsʼáaj le maas kaʼanal nojbeʼenil tiʼoʼ, yéetel jumpʼéel kʼaabaʼ yaan tu yóokʼol tuláakal kʼaabaʼ. Utiaʼal beyoʼ le ken uʼuyaʼak u kʼaabaʼ Jesuseʼ, ka xolak tuláakal le máaxoʼob yanoʼob teʼ kaʼanoʼ, teʼ luʼumoʼ yéetel yáanal luʼum, yéetel utiaʼal ka kʼaj óoltaʼak tumen tuláakal máak yéetel ka u yaʼaloʼobeʼ Jesucristoeʼ letiʼ Yuumtsil, utiaʼal u nojbeʼenil Jajal Dios le Taataoʼ» (Fili. 2:8-11).

16. 1) ¿Bix úuchik u tsʼaʼabal «sen kaʼanal» Jesús tu jaʼabil 1914? 2) ¿Baʼax tsʼoʼok u beetik Jesús desde teʼ kʼiin jeʼeloʼ?

 ¹⁶ Tu jaʼabil 1914, Jesuseʼ tsʼaʼab «sen kaʼanal» tumen u Taata le ka beetaʼab reyiloʼ (Sal. 2:6; Dan. 7:13, 14). Desde teʼ kʼiin jeʼeloʼ, táan u pʼis óoltik le máaxoʼob pʼekmailoʼ (Sal. 110:2, NM). Yáaxeʼ tu jóoʼsaj Satanás yéetel u kʼasaʼan angeloʼob teʼ kaʼanoʼ (Apo. 12:7-12). Tsʼoʼoleʼ jeʼex Ciroeʼ, tu jáalkʼabtaj tiʼ le «nojoch Babilonia» u yalab le máaxoʼob yéeyaʼanoʼob utiaʼal u binoʼob kaʼanoʼ (Apo. 18:2; Isa. 44:28). Teʼ kʼiinoʼobaʼ táan u nuʼuktik le kʼaʼaytaj tsʼoʼok u beetik u muchʼkíintaʼal «u yalab» le máaxoʼob yéeyaʼanoʼoboʼ, bey xan u millonesi «uláakʼ tamanoʼob» ku múuchʼ meyajoʼob yéetel le sukuʼunoʼob yéeyaʼanoʼob utiaʼal u binoʼob kaʼanoʼ (Apo. 12:17; Juan 10:16; Luc. 12:32).

17. ¿Baʼax tsʼoʼok u kaʼansiktoʼon yoʼolal u Palitsil Dios u profecíaʼob Isaías?

¹⁷ Le u profecíaʼob Isaías tsʼoʼok k-xakʼaltikaʼ ku yáantkoʼon k-maas yaabilt Jesucristo, le k-Rey yéetel k-Salvadoroʼ. Le bix úuchik u kuxtal le ka anchaj way Luʼumeʼ tu yeʼesaj jach maʼalob le kaʼansaj tsʼaʼabtiʼ tumen u Taata teʼ kaʼanoʼ. Yéetel tsʼoʼok u yeʼesik letiʼ «u sáasil múuchʼ kaajoʼob», tumen kʼaʼaytajnaji yéetel tumen tak bejlaʼa táan u nuʼuktik le kʼaʼaytaj ku beetik u disipuloʼoboʼ. Teʼ tuláakʼ xookoʼ yaan k-xakʼaltik uláakʼ profecía yaan yil yéetel le Palitsil u yéeymaj Jéeobaaʼ, le profecíaaʼ tʼaanaj tiʼ bix kun muʼyaj yéetel bix kun kíimsbil kaʼach utiaʼal u salvarkoʼon. Tumen tsʼoʼok u náatsʼal u kʼiinil le Kʼaʼajsajiloʼ, unaj k-tuukul tiʼ tuláakal le baʼaloʼob ku tʼaanoʼob tu yoʼolal Jesusoʼ (Heb. 12:2, 3).

[Tsolajiloʼob]

Utiaʼal kʼaʼajsbil

• ¿Máax le «palitsil» ku chʼaʼachiʼitaʼal tu profecíaʼob Isaías, yéetel bix k-ojéeltik leloʼ?

• ¿Baʼax kaʼansajil tu tsʼáaj Jéeoba tiʼ u Palitsil?

• ¿Bix suunajik Jesús bey upʼéel «u sáasil múuchʼ kaajoʼob[eʼ]»?

• ¿Bix tu tsʼáajil Jéeoba upʼéel nojoch páajtalil tiʼ u Palitsil?

[U kʼáatchiʼiloʼob le xookoʼ]

[U tsolajil le oochel teʼ táan juʼun 21]

Felipeeʼ tu yaʼaleʼ Jesuseʼ letiʼe «palitsil» tu chʼaʼachiʼitaj Isaíasoʼ

[U tsolajil le oochel teʼ táan juʼun 23]

Jesús, le Palitsil yéeyaʼan tumen Diosoʼ tu chʼaʼaj óotsilil tiʼ le máaxoʼob táan u muʼyajoʼoboʼ bey xan tiʼ le óotsiloʼoboʼ

[U tsolajil le oochel teʼ táan juʼun 24]

Jéeobaeʼ tu tsʼáaj «sen kaʼanal» Jesús le ka tu beetaj Reyiloʼ