U yúuchul kʼaʼaytaj teʼ tuʼux yaʼab u máan máakoʼoboʼ

TEʼ YÁAX siglooʼ, le apóstol Pablooʼ ku jóokʼol kaʼach tu kʼíiwikil Atenas utiaʼal u kʼaʼaytik le maʼalob péektsil yoʼolal Jesucristooʼ (Hch. 17:17). Ku bin kaʼach teʼeloʼ tumen yaʼab máakoʼob ku máanoʼobiʼ.

Kex tsʼoʼok u máan óoliʼ dos mil jaʼaboʼob u beet Pablo lelaʼ, bejlaʼeʼ le máaxoʼob meyajtik Jéeobaoʼ láayliʼ ku binoʼob kʼaʼaytaj teʼ tuʼux yaʼab u máan máakoʼoboʼ, jeʼex teʼ tuʼuxoʼob yaan nukuch negocioʼoboʼ. Le sukuʼunoʼoboʼ ku tʼaanoʼob yéetel u yuumil wa yéetel le máax ilik le negociooʼ utiaʼal u tsʼáaikoʼob upʼéel chan mesa utiaʼal u yeʼeskoʼob yéetel u kʼaʼaytikoʼob le revistaʼob yéetel uláakʼ jóoʼsaʼaniloʼoboʼ.

Jeʼex tiʼ upʼéel nuxiʼ negocio yaan tu noj kaajil Nueva Jersey, tu luʼumil Estados Unidoseʼ jujuntúul kiikoʼobeʼ tu tsʼáajoʼob upʼéel chan mesa utiaʼal u kʼaʼaytaʼal yéetel u yeʼesaʼal tuláakal le jóoʼsaʼaniloʼob ku tʼaanoʼob tiʼ «Bix jeʼel u yantal kiʼimak óolal tiʼ máak ichil u familiaeʼ». ¿Bix binik tiʼ le kiikoʼobaʼ? Chéen tiʼ upʼéel kʼiineʼ, tu kʼuboʼob 153 libroʼob ich seis jejeláas tʼaanoʼob.

Utúul koʼolel tu natsʼuba u yil le revistaʼoboʼ, tu chʼenxikintaj le baʼax tsolaʼab tiʼ tumen le kiikoʼoboʼ. Le koʼoleloʼ tu yilaj tuláakal máakeʼ kʼaʼabéet u chʼaʼik en cuenta Dios ichil u kuxtal bey xan ichil le familiaoʼ, tsʼoʼoleʼ tu chʼaʼaj le libroʼob Aprendamos del Gran Maestro, Le baʼax jeʼel u beetik u yantal kiʼimak óolal ichil le familiaoʼ yéetel Lo que los jóvenes preguntan. Respuestas prácticas.

Utúul máak u kaʼaj maan teʼ negocio yaan tu tséel tuʼux yaan le jóoʼsaʼaniloʼoboʼ, joʼopʼ u sen chaʼantik le libro Los jóvenes preguntan. Utúul tiʼ le kiikoʼob túunoʼ tu kʼáatajtiʼ: «¿A kʼáat wa a bis upʼéel tiʼ le libroʼobaʼ?». Le máak túunoʼ tu  yaʼalaj u kʼáat le libro Los jóvenes preguntan. Ka tsʼaʼabtiʼ tumen le kiikoʼ. Le máakoʼ tu yaʼalaj yaan óoxtúul u paalal, kaʼatúuleʼ táankelmoʼob, yéetel tu yaʼaleʼ utéen tiʼ upʼéel semana ku kutal tsikbal tu yéeteloʼob. Le táan u xakʼaltik le librooʼ, tu yaʼalaj jeʼel u meyajtiʼ utiaʼal u tsikbal tu yéeteloʼobeʼ. Le kiik túunoʼ tu yeʼesaj xan tiʼ le libro Le baʼax jeʼel u beetik u yantal kiʼimak óolal ichil le familiaoʼ, ka tu yaʼalajtiʼ yaan maʼalob tsolnuʼukoʼob ku taasik utiaʼal u nuʼuktaʼal maʼalob le familiaoʼ. Le máak túunoʼ tu tsʼáaj u nib óolalil yoʼolal le baʼax aʼalaʼabtiʼoʼ, tu síia upʼíit taakʼin yéetel tu yaʼalaj ka xiʼik kaʼansbil tu najil.

¿Bix tu yuʼubiluba le kiikoʼob ka tsʼoʼok u kʼaʼaytajoʼob teʼ nuxiʼ negociooʼ? Utúul tiʼ letiʼobeʼ tu yaʼalaj: «Jach tu taasajten kiʼimak óolal in kʼaʼaytaj beyaʼ. ¡Mix utéen in beet kaʼachi!» Uláakʼ utúuleʼ tu yaʼalaj xan: «Jéeobaeʼ tu yaʼalaj yaan u kʼaʼaytaʼal le maʼalob péektsil tiʼ tuláakal le Luʼumaʼ. Bejlaʼeʼ way tu kaajil Paramuseʼ (Nueva Jersey), le maʼalob péektsiloʼ tsʼoʼok u kʼuchul tu puksiʼikʼal yaʼab máakoʼob jejeláas tʼaan ku beetkoʼob. Jach tu taasajten kiʼimak óolal in kʼaʼaytaj beyaʼ. Tuláakal le máaxoʼob kʼaʼaytajnajoʼoboʼ jach kiʼimakchaj u yóoloʼob. Ka éeʼsameʼenchajeʼ mix máak taak kaʼach u lukʼliʼ».

Toʼoneʼ maases k-kʼaʼaytaj joonaj joonai (Hch. 20:20). Baʼaleʼ, yaan uláakʼ bix jeʼel k-kʼaʼaytik le maʼalob péektsiloʼ. Techeʼ ¿bix uláakʼ jeʼel u páajtal a kʼaʼaytajeʼ? Maʼ xaaneʼ jeʼel u páajtal a bin kʼaʼaytaj tiʼ upʼéel nuxiʼ negocioeʼ wa teʼ tuʼux yaʼab u máan máakoʼoboʼ.