Chéen Dios beetik u nojochtal

«Le máax ku paakʼaloʼ yéetel le máax ku jóoyaoʼ mix baʼaloʼob, baʼaleʼ Jajal Dioseʼ letiʼ tuláakal, tumen letiʼ beetik u [nojochtal] le paakʼaloʼ.» (1 COR. 3:7.)

1. ¿Tiʼ baʼax k-áantik Dios?

LE APÓSTOL Pablooʼ tu yaʼalaj yantoʼon u jatsʼuts páajtalil k-áantik Dios (xokaʼak 1 Corintoiloʼob 3:5-9). ¿Bix k-beetik? Letiʼe ken k-kaʼans uláakʼoʼob utiaʼal ka kaambalnakoʼob tiʼ Jéeobaoʼ. Pabloeʼ tu ketaj le meyajaʼ yéetel u pakʼaʼal bey xan u jóoyabtaʼal u kúul paakʼal, yéetel ku kʼaʼajsiktoʼon chéen Dios beetik u nojochtal. Utiaʼal u bintoʼon utsil teʼ meyajaʼ kʼaʼabéettoʼon u yáantaj Jéeoba.

2. Wa k-kʼaʼajsik chéen Jéeoba péeksik utúul máak u natsʼuba tu yiknaleʼ, ¿bix ken k-il le k-meeyjil kʼaʼaytajoʼ?

² K-ojéeltik lelaʼ, ku yáantikoʼon utiaʼal maʼ k-nojbaʼalkúuntikba yéetel utiaʼal k-maas tsʼáaik k-óol kʼaʼaytaj yéetel k-kaʼansaj. Kex ka k-tsʼáa k-óol kʼaʼaytaj yéetel kaʼansajeʼ, chéen Jéeoba unaj u nojbeʼenkúuntaʼal ken yanak wa máax ku káajal u meyajtik. ¿Baʼaxten? Tumen maʼ k-ojel baʼax beetik u chʼaʼatuklik máak u meyajt Diosiʼ, mix tu páajtal k-beetik u séeb káajal u meyajtkiʼ. Le rey Salomonoʼ tu yaʼaleʼ maʼ «[k-ojel] baʼax ku beetik [Dios], máax beet tuláakal baʼal[iʼ]» (Ecl. 11:5).

3. ¿Tiʼ baʼax chíikaʼan u paakʼal máak tiʼ u kaʼansaʼal le máakoʼoboʼ?

³ Le maʼ k-ojéeltik baʼax beetik u chʼaʼatuklik máak u meyajtik Dioseʼ maʼ unaj u beetik u lúubul k-óoliʼ. Baʼaxeʼ ku maas taaktal k-ilik bix u yúuchul. Salomoneʼ tu yaʼalaj: «Pakʼ a wiʼinaj [wa semilla] tu jaʼatskabil, pakʼ xan tu yoknaj kʼiin, tumen mix bikʼin bíin ojéeltaʼak máakalmáak bíin maʼalob jóokʼokiʼ, wa le ta yáax pakʼajoʼ, wa le ta pachal pakʼajoʼ, wa tu kaʼapʼéelal bíin maʼalobchajak» (Ecl. 11:6). Le máax ku paakʼaloʼ, maʼ u yojel wa yaan u jóokʼol le semillaoʼ mix u yojel tuʼux kun jóokʼoliʼ, tumen yaʼab baʼaxoʼob kʼaʼabéet utiaʼal ka jóokʼok le baʼax tu pakʼoʼ. Bey xan u yúuchul yéetel le máaxoʼob k-kaʼanskoʼoboʼ, yéetel teʼ capítulo 4 tiʼ u libroi Marcosoʼ yaan kaʼapʼéel kettʼaanoʼob tu beetaj Jesús bey u yeʼeskoʼoboʼ. Koʼox ilik baʼax ku kaʼanskoʼobtoʼon.

Jejeláas tuʼux lúub le semillaoʼ

4, 5. Tsol le kettʼaan tu beetaj Jesús teʼ Marcos 4:1-9.

⁴ Tu libroi Marcos 4:1-9, Jesuseʼ tʼaanaj tiʼ utúul máak tu tʼotʼaj tsemillaʼob maʼ upʼéeliliʼ tuʼux ku lúubloʼobiʼ. Le tekstooʼ ku yaʼalik: «Juntúul j-paakʼaleʼ jóokʼ paakʼal. Táan u paakʼaleʼ, tsʼeʼetsʼek tiʼ le iʼinajoʼ lúub tiʼ le bejoʼ ka luʼukʼ tumen le chʼíichʼoʼoboʼ. Uláakʼ tsʼeʼetsʼekeʼ lúub yóokʼol tsekʼeloʼob, tuʼux maʼ yaʼab u luʼumileʼ. Le iʼinajoʼ séebaʼan jóokʼik tumen le luʼumoʼ maʼ jach taamiʼ. Baʼaleʼ le ka jóokʼ kʼiineʼ, tóokaʼabi ka tiji tumen minaʼan u moots. Uláakʼ tsʼeʼetsʼekeʼ lúub ich kʼiʼixoʼob; le ka nuukchaj le kʼiʼixoʼoboʼ, ka peʼechʼi; bey túunoʼ maʼ tu tsʼáaj u yichiʼ. Baʼaleʼ uláakʼ tsʼeʼetsʼekeʼ lúub tiʼ maʼalob luʼum, jóokʼ u pakʼliloʼob, nuukchajoʼob jach maʼalob tu tsʼajilakoʼob ich, yaan u kúulul tu tsʼáaj treintaiʼ, yaan tu tsʼáaj sesentaiʼ, yaan tu tsʼáaj cientoiʼ».

⁵ Tu kʼiiniloʼob ka tsʼíibtaʼab le Bibliaoʼ, le máax ku paakʼaloʼ ku bisik le semilla tu nookʼ wa ichil upʼéel jomaʼ, yéetel ku pulik kaʼanal. Le ken aʼalaʼak jejeláas tuʼux lúub le semillaoʼ maʼ u kʼáat u yaʼal wa u yóoliliʼ le máax ku paakʼaloʼ, baʼaxeʼ letiʼe iikʼ bisik le semillaoʼ le oʼolal jejeláas tuʼux ku lúubul.

6. Tsol baʼax u kʼáat u yaʼal le kettʼaan tu yaʼalaj Jesusoʼ.

⁶ Maʼ talam u naʼataʼal baʼax u kʼáat yaʼal le kettʼaanaʼ, tumen tu libroi Marcos 4:14-20 Jesuseʼ ku tsolik: «Le máax ku paakʼaloʼ bey jeʼel bix le máax ku [kʼaʼaytik] le maʼalob péektsiloʼ. Tsʼeʼetsʼek máakoʼobeʼ beyoʼob jeʼel bix le iʼinaj lúub teʼ  bejoʼ, ku yuʼubikoʼob le maʼalob péektsiloʼ, baʼaleʼ ku tsʼoʼokol u yuʼubikoʼobeʼ, ku taal Satanás u lukʼes le maʼalob péektsil paʼakʼ tu puksiʼikʼaloʼoboʼ. Uláakʼ máakoʼobeʼ beyoʼob iʼinaj paʼakʼ yóokʼol [le] tsekʼeloʼoboʼ, ku yuʼubikoʼob le maʼalob péektsiloʼ, ku kʼamikoʼob xan yéetel kiʼimak óolal, baʼaleʼ maʼ maʼalob u mootsoʼobiʼ; le oʼolaleʼ séeb u saʼataloʼob; bey túunoʼ, le ken túuntaʼak u yóoloʼob yéetel ken chʼaʼapachtaʼakoʼob tu yoʼolal le maʼalob péektsiloʼ, tu séeblakil ku lúubul u yóoloʼob. Uláakʼoʼobeʼ beyoʼob jeʼel bix le iʼinaj paʼakʼ ichil kʼiʼixoʼoboʼ; ku yuʼubikoʼob le maʼalob péektsiloʼ, baʼaleʼ ku sen tuklikoʼob u baʼaliloʼob le yóokʼol kaabaʼ, ku tuʼusuloʼob tumen le ayikʼaliloʼ, ku kʼuchuloʼob túun u tsʼíiboltoʼob tuláakal jejeláas baʼaloʼob. Tuláakal lelaʼ ku yokol tu puksiʼikʼaloʼob utiaʼal u pechʼik le maʼalob péektsiloʼ, maʼ tu chaʼik túun u tsʼáaik u yich ichil le máakoʼobaʼ. Baʼaleʼ yaan tsʼeʼetsʼek ku yuʼubikoʼob le maʼalob péektsiloʼ yéetel ku kʼamikoʼob, ku tsʼáaikoʼob maʼalob ich xan, jeʼel bix le iʼinaj paʼakʼ tiʼ le maʼalob luʼumoʼ. Yaan ku tsʼáaik treinta u yichiʼ, yaan ku tsʼáaik sesenta yaan ku tsʼáaik cientoiʼ».

7. ¿Baʼax le semillaoʼ yéetel le jejeláas luʼum tuʼux lúuboʼoboʼ?

⁷ Teʼ tekstoaʼ Jesuseʼ maʼ tu yaʼalaj wa jejeláas semillaʼob meyajnaj tiʼ le máax paakʼalnajoʼ. Baʼaxeʼ tu yaʼalaj jejeláas tuʼux lúuboʼob, le oʼolal maʼ upʼéeliliʼ bix u nuuktaloʼobiʼ. Le yáax tuʼux lúuboʼ chich u luʼumil, u kaʼapʼéeloʼ maʼ jach taamiʼ yéetel le u yóoxpʼéeloʼ ich kʼiʼixoʼob. Baʼaxeʼ le u kampʼéel tuʼux lúuboʼ maʼalob luʼum le oʼolal tu tsʼáaj u yich (Luc. 8:8). ¿Baʼax le semillaoʼ? Letiʼe u maʼalob péektsilil le Reinooʼ (Mat. 13:19). ¿Kux túun le jejeláas tuʼux lúuboʼoboʼ? Letiʼe jejeláas modos yaan tiʼ le máakoʼoboʼ (xokaʼak Lucas 8:12, 15).

8. 1) ¿Máax ku chíikbesik le máak ku paakʼaloʼ? 2) ¿Baʼaxten maʼ tuláakal máak upʼéeliliʼ bix u kʼamik le maʼalob péektsiloʼ?

⁸ ¿Máax ku chíikbesik le máak ku paakʼaloʼ? Letiʼe máaxoʼob áantik Dios ken u kʼaʼaytoʼob le maʼalob péektsiloʼ. Jeʼex tu beetil Pablo yéetel Apoloseʼ, letiʼobeʼ ku paakʼaloʼob yéetel ku jóoyaboʼob, baʼaleʼ kex ku jach tsʼáaik u yóoloʼobeʼ maʼ tiʼ tuláakloʼob ku bintiʼob utsiliʼ. ¿Baʼaxten? Tumen jejeláas modos yaan tiʼ le máakoʼoboʼ. Kʼaʼajaktoʼoneʼ le máax aʼalaʼab ku paakʼaloʼ maʼ letiʼ beetik u jóokʼol le semillaoʼ. Lelaʼ jach ku líiʼsik k-óol, maases le sukuʼunoʼob úuch joʼopʼok u kʼaʼaytajoʼoboʼ, baʼaleʼ óoliʼ mix máak u yáantoʼob utiaʼal ka okokoʼob ichil u kaajal Dios. * ¿Baʼaxten maʼ unaj u lúubul u yóoloʼobiʼ?

9. ¿Baʼax tu yaʼalaj Pablo yéetel Jesús jach ku líiʼsik k-óoloʼ?

⁹ Le máax ku paakʼaloʼ maʼatech u yilaʼal wa chúukaʼan u yóol chéen yoʼolal u yich u meyajoʼ. Pabloeʼ bey tu yeʼesil ka tu yaʼalaj: «Jajal Dios kun boʼotik tiʼ cada juntúuleʼ le meyaj tu beetajoʼ» (1 Cor. 3:8). Le baʼax ku boʼotik Jéeobaoʼ letiʼe meyaj beetaʼaboʼ, maʼ u yich le meyajoʼ.  Jesuseʼ bey úuchik u yeʼesik tiʼ u disipuloʼob le ka suunajoʼob tu yiknal le ka tsʼoʼok u kʼaʼaytajoʼoboʼ. Le disipuloʼoboʼ jach kiʼimakchaj u yóoloʼob tumen le kʼaakʼas pixanoʼoboʼ ku yuʼubik u tʼaanoʼob ken meyajnaktiʼob kaʼach u kʼaabaʼ Jesús. Kex jach kiʼimak u yóoloʼobeʼ, Jesuseʼ tu yaʼalajtiʼob: «Maʼ u kiʼimakchajal a wóoleʼex tumen le kʼaakʼas pixanoʼob ku yuʼubikoʼob a tʼaaneʼexoʼ, baʼaleʼ kiʼimakchajak a wóoleʼex tumen tsʼíibaʼan a kʼaabaʼex teʼ kaʼanoʼ» (Luc. 10:17-20). Maʼ xaaneʼ utúul j-kʼaʼaytajeʼ ku yilik óoliʼ mix máak u yáant utiaʼal ka kaambalnak tiʼ Diosiʼ, baʼaleʼ leloʼ maʼ u kʼáat u yaʼal wa maʼ táan u tsʼáaik u yóol jeʼex u maasil sukuʼunoʼoboʼ. U jaajileʼ, utiaʼal u bin utsil tiʼeʼ táakaʼan le modos ku yeʼesik le máakoʼoboʼ. Tsʼoʼoleʼ chéen Dios jeʼel u beetik u náatsʼloʼob tu yiknaleʼ.

Le baʼax unaj u beetik le máaxoʼob uʼuyik le maʼalob péektsiloʼ

10. ¿Máax ken u chʼaʼatukult wa utúul máakeʼ yaan u beetkuba maʼalob luʼum wa maʼ?

¹⁰ ¿Baʼax unaj u beetik le máaxoʼob uʼuyik le maʼalob péektsiloʼ? ¿Aʼalaʼaniliʼ wa baʼax ken u chʼaʼatukult u beetkoʼob? Maʼatech. Letiʼob ken u chʼaʼatukultoʼob wa yaan u beetkubaʼob bey maʼalob luʼumeʼ wa maʼ. Maʼ xaaneʼ jeʼel u kʼexik le modos yantiʼoboʼ bey xan le bix u kuxtaloʼoboʼ (Rom. 6:17). Teʼ kettʼaanoʼ Jesuseʼ tu yaʼaleʼ pʼelak u yuʼubal le maʼalob péektsil tumen le máakoʼoboʼ «ku taal Satanás u lukʼes [...] tu puksiʼikʼaloʼob». Baʼaleʼ leloʼ maʼ u kʼáat u yaʼal wa tiʼ tuláakal máak kun úuchul beyoʼ. Teʼ Santiago 4:7 ku yaʼalaʼaltiʼob ka u tsʼáaubaʼob tu contra le Kʼaasilbaʼal utiaʼal ka náachchajak tiʼoboʼ. Jesuseʼ tu yaʼaleʼ, yaneʼ ku kʼamik yéetel kiʼimak óolal le maʼalob péektsiloʼ, baʼaleʼ ken máanak kʼiineʼ ku xuʼulul u kaambaloʼob tumen «maʼ maʼalob u mootsoʼobiʼ». Le oʼolal tiʼ le máaxoʼob u kʼáat u meyajtoʼob Diosoʼ, le Bibliaoʼ ku yaʼalik: «Ka jéetsʼkeʼex [...] yéetel ka taamchajak a mootseʼex, utiaʼal beyoʼ ka páatak a naʼatikeʼex [...] bukaʼaj kóochil, bukaʼaj chowakil, bukaʼaj taamil yéetel bukaʼaj kaʼanlil u yaakunaj Cristo». Lelaʼ upʼéel «baʼax maas nojoch tiʼ tuláakal baʼax ku páajtal u kʼaj óoltaʼal» (Efe. 3:17-19; Col. 2:6, 7).

11. ¿Baʼax jeʼel u beetik le máakoʼob utiaʼal maʼ u xuʼulul u beetkoʼob baʼax u kʼáat Dios yoʼolal u táabsajil le ayikʼaliloʼ?

¹¹ Jesuseʼ tu yaʼaleʼ yaan uláakʼoʼobeʼ ku yuʼubkoʼob le maʼalob péektsiloʼ, «baʼaleʼ ku sen tuklikoʼob u baʼaliloʼob le yóokʼol kaabaʼ, ku tuʼusuloʼob tumen le ayikʼaliloʼ» le oʼolal ku xuʼulul u beetkoʼob baʼax u kʼáat Dios (1 Tim. 6:9, 10). ¿Baʼax jeʼel u beetkoʼob utiaʼal maʼ u yúuchultiʼob lelaʼ? Pabloeʼ tu yaʼalaj: «Maʼ a yaabiltikeʼex le taakʼinoʼ; kiʼimakchajak a wóoleʼex yéetel le baʼax yaan teʼexoʼ, tumen Jajal Dioseʼ u yaʼalmaj: Mix bikʼin [ken] in pʼatech mix [ken] in xúumpʼattech» (Heb. 13:5).

12. ¿Baʼaxten le máaxoʼob beyoʼob maʼalob luʼumoʼ maʼ upʼéeliliʼ u yaʼabil le ich ku tsʼáaikoʼoboʼ?

¹² Tu tsʼookeʼ Jesuseʼ tu yaʼaleʼ le ku pakʼaʼaloʼob tiʼ maʼalob luʼumoʼ «yaan ku tsʼáaik treinta u yichiʼ, yaan ku tsʼáaik sesenta yaan ku tsʼáaik cientoiʼ». Le máaxoʼob kʼamik le maʼalob péektsiloʼ ku yeʼeskoʼob maʼalob modos, le oʼolal ku tsʼáaikoʼob maʼalob ich. Baʼaleʼ le bukaʼaj ich ku tsʼáaikoʼob wa le u táakpajloʼob teʼ kʼaʼaytajoʼ maʼ upʼéeliliʼiʼ. Yaan sukuʼunoʼobeʼ maʼ tu páajtal u jach táakpajloʼob teʼ kʼaʼaytajoʼ tumen tsʼoʼok u chan yantal u jaʼabiloʼob wa kʼojaʼanoʼob (ket yéetel Marcos 12:43, 44). Kex tumen óoliʼ maʼ tu páajtal u jach táakpajloʼobeʼ ku kiʼimaktal u yóoloʼob ken u yiloʼob táan u yaʼabtal le máaxoʼob ku yookloʼob tu kaajal Diosoʼ (xokaʼak Salmo 126:5, 6).

Le máax paakʼalnajoʼ ku bin wenel

13, 14. 1) Tsol le kettʼaan tu chʼaʼachiʼitaj Jesús teʼ Marcos 4:26-29. 2) ¿Máax le ku paakʼaloʼ yéetel baʼax le semillaoʼ?

¹³ Tu libroi Marcos 4:26-29 yaan uláakʼ kettʼaan yaan yil yéetel utúul máak ku paakʼal: «U [reino] Jajal Dioseʼ bey le baʼax ku yúuchul tiʼ le iʼinaj le ken tsʼaʼabak tiʼ luʼum tumen juntúul máakoʼ. Le máax paakʼalnajoʼ ku bin wenel. Ku tsʼoʼokol u chúunkʼintaleʼ ku líikʼil. Le ken máanak kʼiinoʼob yéetel u yáakʼabiloʼobeʼ, le iʼinajoʼ ku jóokʼol yéetel ku nojochtal, baʼaleʼ maʼ u yojel bixiʼ. Baʼax ku yúuchuleʼ le luʼumoʼ ku meyaj tu juunal; yáaxileʼ ku jóokʼol u sakʼabil, ku tsʼoʼokoleʼ u yiʼij, tu tsʼookeʼ u neekʼ u yiʼij. Le ken kʼanak  u yicheʼ, ku jóokʼol molbil, tumen tsʼoʼok u kʼuchul tu kʼiin».

¹⁴ ¿Máax le ku paakʼaloʼ? Yaan máakoʼob tiʼ jujumpʼéel religionoʼobeʼ ku yaʼalikoʼobeʼ Jesucristo. Baʼaleʼ ¿jeʼel wa u páajtal u yaʼalaʼal Jesuseʼ táan u wenel yéetel maʼ u yojel bix u jóokʼol le semillaoʼ? Maʼatech, letiʼeʼ jach u yojel bix u jóokʼol. Jeʼex teʼ kettʼaan tsʼoʼok k-ilkoʼ le máak ku paakʼaloʼ ku chíikbesik cada utúul tiʼ le máaxoʼob ku jach tsʼáaik u yóol u kʼaʼaytoʼob u maʼalob péektsilil le Reinooʼ. Yéetel le semillaoʼ letiʼe baʼax ku kʼaʼaytikoʼoboʼ. *

15, 16. Tu kettʼaanil le máak ku weneloʼ, ¿bix tu yeʼesil Jesús ku nojochtal u kúul chan paakʼal yéetel bix xan tu yeʼesil kun bin u maas kaambal utúul máak tiʼ Dios?

¹⁵ Jesuseʼ tu yaʼaleʼ «le máax paakʼalnajoʼ ku bin wenel. Ku tsʼoʼokol u chúunkʼintaleʼ ku líikʼil». Lelaʼ maʼ u kʼáat u yaʼal wa maʼakʼol le máakaʼ, baʼaxeʼ chéen ku beetik le baʼax suuk u beetik u maasiloʼ: ku meyaj de kʼiin yéetel ku wenel de áakʼab. Le táan u weneloʼ «le iʼinajoʼ ku jóokʼol yéetel ku nojochtal». Baʼaleʼ Jesuseʼ tu yaʼaleʼ le máakaʼ «maʼ u yojel bixiʼ». Teʼ kettʼaanaʼ ku yaʼalaʼaleʼ le luʼumoʼ ku meyaj «tu juunal». *

¹⁶ ¿Baʼax u kʼáat u kaʼans Jesús yéetel le kettʼaanaʼ? Jeʼex k-ilkoʼ, maases ku chʼaʼachiʼitaʼal bix u bin u nojochtal le paakʼaloʼ. «Le luʼumoʼ ku meyaj tu juunal; yáaxileʼ ku jóokʼol u sakʼabil, ku tsʼoʼokoleʼ u yiʼij, tu tsʼookeʼ u neekʼ u yiʼij» (Mar. 4:28.) U kúul chan paakʼaleʼ jujumpʼíitil u bin u nojochtal. Maʼ tu páajtal k-beetik u séeb nojochtal. Bey xan u yúuchul yéetel le máaxoʼob k-kaʼanskoʼ. Le máaxoʼob ku náajmatikoʼob ka yanaktiʼob le kuxtal minaʼan u xuuloʼ jujumpʼíitil xan kun bin u maas kaambaloʼob, jeʼel bix u chaʼik Jéeoba u bin u maas nojochtal ichil u puksiʼikʼaloʼob le baʼax ku kankoʼoboʼ (Hch. 13:48; Heb. 6:1).

17. ¿Bix u táakpajal teʼ jooch le máax paakʼalnajoʼ?

¹⁷ Le kettʼaanaʼ ku yeʼesikeʼ «le ken kʼanak u yich» le semillaoʼ, le máax paakʼalnajoʼ ku táakpajal xan tiʼ le joochoʼ. ¿Bix u beetik? Jeʼex tsʼoʼok k-ilkoʼ, Jéeobaeʼ ku beetik u maas nojochtal ichil u puksiʼikʼal le máakoʼob le baʼax tsʼoʼok u kankoʼob tiʼ le Reinooʼ. Le yaabilaj ku yuʼubikoʼob yoʼolal Diosoʼ le beetik u kʼubik u kuxtaloʼob tiʼ yéetel tu tsʼookeʼ ku yokjaʼob. Yéetel  utúul xiibeʼ jeʼex u bin u maas kaambaleʼ bey xan u bin u tsʼaʼabaltiʼ uláakʼ meyajoʼob u beet teʼ múuchʼuliloʼ. Ken yanak wa máax ku joʼopʼol u adorartik Jéeobaeʼ, le máax kaʼansoʼ ku kiʼimaktal u yóol bey xan le uláakʼ máaxoʼob áantajnajoʼoboʼ (xokaʼak Juan 4:36-38). Leloʼ ku yeʼesikeʼ ku «múuchʼ [kiʼimakchajal] u yóoloʼob le máax ku paakʼaloʼ bey xan le máax ku joochoʼ».

Baʼaxoʼob ku kaʼansiktoʼon

18, 19. 1) ¿Tiʼ baʼax tsʼoʼok u yáantkech le kaʼapʼéel kettʼaanoʼob tsʼoʼok k-xakʼaltikaʼ? 2) ¿Baʼax ken k-il teʼ tuláakʼ xookoʼ?

¹⁸ ¿Baʼax tsʼoʼok k-kanik tiʼ le kettʼaanoʼob ku chʼaʼachiʼitaʼaloʼob teʼ capítulo 4 tiʼ Marcosoʼ? Tsʼoʼok k-ilik kʼaʼabéet k-pakʼik wa k-tsʼáaik ojéeltbil u maʼalob péektsilil le Reinooʼ. Jach upuliʼ maʼ unaj k-kaxtik baʼax k-aʼal utiaʼal maʼ k-tsʼoʼokbesik le meyajaʼ yéetel maʼ unaj u xuʼulul k-beetik yoʼolal le talamiloʼoboʼ (Ecl. 11:4). Tsʼoʼok xan k-kanikeʼ yantoʼon u jatsʼuts páajtalil k-áantik Dios. Jéeobaeʼ letiʼ beetik u káajal u meyajtaʼal tumen wa máax, beyoʼ ku beetik u bintoʼon utsil yéetel ku yáantik xan le máaxoʼob taak u kaambaloʼoboʼ. Tsʼoʼok k-ilkeʼ maʼ tu páajtal k-obligartik mix máak u meyajt Dios yéetel maʼ unaj u lúubul k-óol wa mix máak u kʼáat u beetiʼ. Jach ku líiʼsik k-óol k-ojéeltik baʼax beetik u bintoʼon utsil teʼ kʼaʼaytajoʼ, letiʼe u chúukpajal k-óol k-meyajt Jéeobaoʼ yéetel k-kʼaʼaytik «u maʼalob péektsil le [reino] [...] utiaʼal ka kʼaj óoltaʼak tumen tuláakal kaajoʼob[oʼ]» (Mat. 24:14).

¹⁹ ¿Baʼax uláakʼ tu kaʼansajtoʼon Jesús tiʼ bix u káajal wa u chʼaʼatuklik u meyajtik Dios utúul wa máax yéetel u kʼaʼaytaʼal u maʼalob péektsilil le Reinooʼ? Le kʼáatchiʼaʼ ku núukaʼal tiʼ uláakʼ kettʼaanoʼob ku chíikpajal teʼ tuláakʼ Evangelioʼoboʼ. Teʼ tuláakʼ xookoʼ yaan k-xakʼaltik jujumpʼéel tiʼ leloʼobaʼ.

[Tsolajiloʼob]

¿Kʼajaʼan wa tech?

• ¿Tiʼ baʼax chíikaʼan u paakʼal máak tiʼ u kʼaʼaytaʼal u maʼalob péektsilil le Reinooʼ?

• ¿Bix u yilik Jéeoba wa chúukaʼan u yóol le máaxoʼob kʼaʼaytik le maʼalob péektsiloʼ?

• Jeʼex tu yaʼalil Jesuseʼ, ¿tiʼ baʼax chíikaʼan u nojochtal upʼéel paakʼal tiʼ u chʼaʼatuklaʼal u meyajtaʼal Dios tumen utúul wa máax?

• ¿Baʼaxten ku múul kiʼimaktal u yóol le máax ku paakʼal yéetel le máax ku joochoʼ?

[U kʼáatchiʼiloʼob le xookoʼ]

[U tsolajil le oochel teʼ táan juʼun 13]

¿Baʼaxten tu ketaj Jesús le máaxoʼob ku kʼaʼaytajoʼob yéetel utúul máax ku paakʼaloʼ?

[U tsolajil le oochel teʼ táan juʼun 15]

Le máaxoʼob beyoʼob maʼalob luʼumeʼ ku tsʼáaik u yóol u kʼaʼaytoʼob u maʼalob péektsilil le Reino tak tuʼux ku páajtaleʼ

[U tsolajil le oochel teʼ táan juʼun 16]

Chéen Dios beetik u nojochtal