Unaj k-eʼesik yaabilaj tiʼ le Dios u yaabiltmoʼonoʼ
Unaj k-eʼesik yaabilaj tiʼ le Dios u yaabiltmoʼonoʼ
«Yaabilt Yuumtsil a Jajal Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat.» (MATEO 22:37.)
1, 2. Maʼ xaaneʼ, ¿baʼaxten tu kʼáatoʼob le fariseoʼob tiʼ Jesús máakalmáak u maas nojochil ichil le aʼalmaj tʼaanoʼob wa leyoʼoboʼ?
TU kʼiiniloʼob Jesuseʼ, le fariseoʼoboʼ táan kaʼach u baʼateltʼaanoʼob yoʼolal máakalmáak u maas nojchil tiʼ le maas tiʼ 600 mandamientos tsʼaʼab tiʼ Moisesoʼ. ¿Letiʼe wa ku tʼaanoʼob tiʼ le tóokbil siibaloʼoboʼ? Tumen leloʼobaʼ ku meyajoʼob kaʼach utiaʼal ka páajchajak u perdonartaʼal le kʼebanoʼoboʼ yéetel utiaʼal u tsʼaʼabal nib óolal tiʼ Dios. ¿Wa unaj u yilaʼal maas nojoch le ku tʼaan tiʼ le u súutkʼuptaʼal máakoʼ? Le baʼax ku yaʼalik le leyaʼ jach kʼaʼanan ka beetaʼak kaʼach, tumen le u súutkʼuptaʼal máakoʼ ku yeʼesik okaʼan máak ichil le pacto tu beetaj Jéeoba yéetel Abrahamoʼ (Génesis 17:9-13).
2 Baʼaleʼ, yaan xan tiʼ le fariseoʼoboʼ ku yaʼalikoʼobeʼ tuláakal le leyoʼob nojochoʼoboʼ, kex yaan jujumpʼéel ku yilaʼal bey maʼ jach kʼaʼanantakoʼobeʼ. Le fariseoʼob túunoʼ tu chʼaʼatukloʼob u beetkoʼob upʼéel kʼáatchiʼ tiʼ Jesús, maʼ xaaneʼ lelaʼ tu beetoʼob utiaʼal u pʼatkoʼob kʼaasil tu táan u maasil. Utúul tiʼ letiʼobeʼ tu natsʼubaeʼ ka tu kʼáataj tiʼ: «¿Máakalmáak u [maas] nojochil ichil le aʼalmaj tʼaanoʼoboʼ?» (Mateo 22:34-36).
3. ¿Máakalmáak tu yaʼalaj Jesús le maas nojoch leyoʼ?
3 Le baʼax tu núukaj Jesusoʼ upʼéel baʼal jach kʼaʼanan xan k-tiaʼal bejlaʼeʼ. Yéetel le baʼax tu núukoʼ, tu yeʼesaj baʼax ku beetik le máaxoʼob yanoʼob ichil le religión yaan u jaajil tiʼoʼ. Jesuseʼ tu chʼaʼachiʼitaj Deuteronomio 6:5, le ka tu núukaj: «Yaabilt Yuumtsil a Jajal Dios Yéetel tuláakal a puksiʼikʼal, yéetel tuláakal a wóol, yéetel tuláakal a naʼat. Le jeʼelaʼ u [maas] nojochil yéetel u yáaxil ichil le aʼalmaj tʼaanoʼoboʼ». Kex le fariseo tu kʼáataj máakalmáak le ley maas nojchoʼ, Jesuseʼ tu chʼaʼachiʼitaj Levítico 19:18, ka tu yaʼalaj xan: «U kaʼapʼéeleʼ chíikaʼan tiʼ, ku yaʼalikeʼ: Yaabilt a láakʼ jeʼel bix ka yaabiltkabaeʼ». Tsʼoʼoleʼ, táanil tiʼ u kʼáataʼal tiʼ Jesús tumen le fariseo ka u yaʼal bix unaj u yilaʼal u yalab le leyoʼoboʼ, letiʼeʼ tu yaʼaleʼ le kaʼapʼéel ley tsʼoʼok u yaʼalikoʼ ku yeʼesikoʼob baʼax unaj u beetaʼal utiaʼal u adorartaʼal Jéeoba, tu yaʼalaj: «Le kaʼapʼéel aʼalmaj tʼaanoʼobaʼ letiʼob u chuun tuláakal u yaʼalmaj tʼaan Moisés yéetel u kaʼambesaj le [profetaʼoboʼ]» (Mateo 22:37-40). Teʼ xookaʼ yaan k-jach xakʼaltik u maas nojchil tiʼ le kaʼapʼéel leyoʼob tu yaʼalaj Jesusoʼ. ¿Baʼaxten kʼaʼabéet k-yaabiltik Dios? ¿Bix k-eʼesik k-yaabiltmaj? ¿Baʼax unaj k-beetik utiaʼal ka yanaktoʼon le yaabilajaʼ? Kʼaʼabéet k-ojéeltik u núukil le kʼáatchiʼobaʼ, tumen utiaʼal ka lúubkoʼon utsil tu táan Jéeobaeʼ unaj k-yaabiltik yéetel tuláakal k-puksiʼikʼal, yéetel tuláakal k-óol bey xan yéetel tuláakal k-naʼat.
Jach kʼaʼanan k-eʼesik yaabilaj
4, 5. 1) Le fariseooʼ, ¿baʼaxten maʼ jaʼakʼ u yóol yoʼolal le baʼax tu núukaj Jesusoʼ? 2) Tu táan Jéeobaeʼ, ¿baʼax maas yaan u tojol ke le siibaloʼob ku kʼuʼubul tiʼoʼ?
4 Le fariseooʼ jach upuliʼ maʼ jakʼ u yóol yoʼolal le baʼax tu núukaj Jesusoʼ. Tumen letiʼeʼ u yojleʼ, lelaʼ letiʼe baʼax unaj u beetaʼal tumen le máaxoʼob meyajtik Diosoʼ, kex yaʼab judíoʼob maʼ bey u beetkoʼob kaʼachoʼ. Teʼ sinagogaʼoboʼ ku yaʼalaʼal le shemá, lelaʼ upʼéel oración tuʼux ku chʼaʼachiʼitaʼal le baʼax ku yaʼalik Deuteronomio 6:4-9, le teksto tu chʼaʼachiʼitaj xan Jesusoʼ. Marcos xaneʼ ku yaʼalikeʼ, le fariseooʼ tu yaʼalaj xan tiʼ Jesús: «Jach maʼalob tʼaanajikech, j-kaʼambesaj. Jach tu jaajil baʼax ka waʼalik. Yaan chéen juntúuliliʼ [...] Jajal Dios, minaʼan uláakʼ wa maʼ chéen letiʼ. Yéetel u yaabiltaʼal Jajal Dios yéetel tuláakal puksiʼikʼal, yéetel tuláakal naʼat, yéetel tuláakal pixan, yéetel tuláakal muukʼ, bey xan u yaabiltaʼal k-láakʼ jeʼel bix u yaabiltikuba máakeʼ, píit máanjaʼan u tojol yóokʼol tuláakal le kíimsbil siibaloʼob yéetel tiʼ tuláakal le siibaloʼob ku tóokaʼaloʼoboʼ» (Marcos 12:32, 33).
5 Kex tumen Jéeoba ku kʼáatik teʼ Ley ka kʼuʼubuk siibaloʼob yéetel kíimsbil baʼalcheʼob tiʼeʼ, baʼax maas u kʼáat kaʼacheʼ ka jach yaabiltaʼak tumen le máaxoʼob meyajtikoʼ. Utiaʼal Dioseʼ maas yaan u tojol utúul chan chʼíichʼ ku siʼibil tiʼ yéetel yaabilaj, ke ka siʼibik tiʼ u milesi tamanoʼob, baʼaleʼ maʼ yéetel yaabilajiʼ (Miqueas 6:6-8). Kʼaʼajaktoʼon le koʼolel óotsil kimen u yíicham ilaʼab tumen Jesús teʼ tu temploi Jerusalenoʼ: le kaʼapʼéel mejen taakʼin tu tsʼáaj teʼ nuʼukul tuʼux ku tsʼaʼabal le siibaloʼoboʼ maʼ tu chukikoʼob kaʼach mix tak utiaʼal u manaʼal utúul chan chʼíichʼ, baʼaleʼ tu yeʼesoʼob u nojoch yaabilaj yoʼolal Jéeoba yéetel maas yaʼab u tojoloʼob ke le u yalaʼ taakʼin ku síikoʼob kaʼach le máaxoʼob ayikʼaltakoʼoboʼ (Marcos 12:41-44). ¿Máasaʼ jach ku kiʼimakkuntik k-óol k-ojéeltik Jéeobaeʼ jach nojoch u yilik le yaabilaj k-uʼuyik tu yoʼolaloʼ?
6. Pabloeʼ, ¿bix tu yeʼesil jach kʼaʼabéet u yeʼesaʼal yaabilaj tiʼ Dios?
6 Le apóstol Pablooʼ tu yaʼalaj u kʼaʼabéetil u yeʼesaʼal yaabilaj tiʼ Jéeoba tumen le máaxoʼob adorartikoʼ, letiʼeʼ tu tsʼíibtaj: «Wa ka tʼaanaken yéetel u tʼaa[n] máakoʼob wa u tʼaan angeloʼob, baʼaleʼ minaʼanten yaakunajeʼ, [beyen] jeʼel bix jumpʼéel baʼal ku bobojaʼankileʼ wa jumpʼéel campana chéen táan u juumeʼ. Wa táan in tseʼektik maʼalob péektsiloʼob in kammaj tiʼ Jajal Dios, wa in kʼaj óol tuláakal taʼakbil baʼaloʼob, wa in wojel tuláakal baʼal, wa yanten xan tuláakal le oksaj óolal kʼaʼabéet utiaʼal in lukʼsik le witsoʼob tu kúuchiloʼoboʼ, baʼaleʼ minaʼanten yaakunajeʼ, mix baʼalen. Wa kin tʼoxik tuláakal baʼax yanten, wa kin kʼubik xan in wíinklil utiaʼal ka tóokaʼak, baʼaleʼ minaʼanten yaakunajeʼ, mix baʼal u biilal teen» (1 Corintoiloʼob 13:1-3). Jeʼex k-ilkoʼ jach kʼaʼanan k-eʼesik yaabilaj utiaʼal ka kʼaʼamak k-adoración tumen Jéeoba. Baʼaleʼ ¿bix k-eʼesik yaabilaj tiʼ Dios?
¿Bix k-eʼesik k-yaabiltmaj Dios?
7, 8. ¿Bix k-eʼesik k-yaabiltmaj Dios?
7 Yaʼab máakoʼobeʼ, ku creerkoʼobeʼ le yaabilajoʼ ku túulchʼintik máak u beet baʼaloʼob chéen minaʼan u cuentai; le oʼolal yaan xan kʼiineʼ ku yaʼalikoʼob «táabsbil u beetaʼal máak» tumen le yaabilajoʼ. Baʼaleʼ le yaabilajoʼ maʼ chéen upʼéel baʼal ku yuʼubik máak tu puksiʼikʼaliʼ. Baʼax eʼesik yaan yaabilaj tiʼ máakeʼ letiʼe baʼax ku beetkoʼ, maʼ letiʼe baʼax ku yuʼubikoʼ. Le Bibliaoʼ ku yaʼalikeʼ, le yaabilajaʼ «jumpʼéel bej [maas] maʼalob», tsʼoʼoleʼ ku yaʼalik xan toʼon ka xiʼikoʼon tu paach le yaabilajaʼ yéetel «maʼ k-yaakunaj chéen yéetel le baʼax k-aʼalik yéetel k-chiʼoʼ; baʼaleʼ unaj k-yaakunaj yéetel jaaj bey xan yéetel baʼax k-beetik» (1 Corintoiloʼob 12:31; 14:1; 1 Juan 3:18).
8 Le yaabilaj k-uʼuyik yoʼolal Diosoʼ, ku péekskoʼon k-beet le baʼax utstutʼaanoʼ yéetel péekskoʼon k-eʼes chéen letiʼ unaj u gobernar yóokʼol tuláakal baʼal. Tsʼoʼoleʼ, ku péekskoʼon xan utiaʼal maʼ k-kuxtal jeʼex u kuxtal u máakiloʼob le kʼasaʼan yóokʼol kaabaʼ (1 Juan 2:15, 16). Wa k-yaabilmaj Dioseʼ yaan k-pʼektik le baʼax kʼaasoʼ (Salmo 97:10). Yéetel yaan k-yaabiltik k-prójimo, jeʼex ken k-kan teʼ tuláakʼ xookoʼ. Tsʼoʼoleʼ, yaan k-beetik baʼax u kʼáat Dios, tumen le Bibliaoʼ ku yaʼalik: «U yaabiltaʼal Jajal Dioseʼ u yuʼubaj tʼantaʼal u yaʼalmaj tʼaanoʼob» (1 Juan 5:3).
9. Jesuseʼ, ¿bix tu yeʼesil u yaabilmaj Dios?
9 Jesuseʼ jach maʼalob úuchik u yeʼesik bix unaj u yeʼesik máak yaabilaj tiʼ Dios. U yaabilaj tiʼ Dioseʼ, le péeks u pʼat le kaʼan utiaʼal ka taalak way Luʼum kuxtal bey wíinikeʼ. Letiʼe yaabilaj xan péeks Jesús u nojbeʼenkunt u Taata yéetel le baʼax tu beetoʼ bey xan yéetel le baʼax tu kaʼansoʼ. Tsʼoʼoleʼ, le xan péeks u beet baʼax u kʼáat u Taata tak tu yorai u «kíimil» (Filiposiloʼob 2:8). Baʼaleʼ, le baʼax tu beetoʼ maʼ chéen tu yeʼesaj nojoch u yaabilajiʼ, tu tsʼáaj xan u páajtalil utiaʼal u kʼamaʼal tumen Jéeoba le máaxoʼob jach tu jaajil taak u meyajkoʼob Dios, jeʼex tu yaʼalil Pabloaʼ: «Tu yoʼolal u maʼ uʼuyaj tʼaanil juntúul máakeʼ [Adán] yaʼab beetaʼaboʼob j-kʼebanoʼobiʼ; baʼaleʼ [...], tu yoʼolal u yuʼubaj tʼaanil juntúul máakeʼ [Jesús], yaʼab kun tsʼaabi[loʼob] maʼalob tu táan Jajal Diosiʼ» (Romailoʼob 5:19).
10. Máax u yaabilmaj Dioseʼ, ¿baʼaxten unaj u beetik baʼax ku yaʼalik Dios?
10 Jeʼex Jesuseʼ, toʼon xaneʼ k-eʼesik yaabilmaj Jéeoba ken k-beet baʼax ku yaʼalik. Maʼatech k-tuʼubsik le baʼax tu yaʼalaj le disipulo Juanoʼ: «Le yaakunajoʼ letiʼ lelaʼ: U kuxtal máak jeʼel bix u kaʼansiktoʼon u yaʼalmaj tʼaan Jajal Dioseʼ» (2 Juan 6). Le máaxoʼob jach tu jaajil u yaabilmoʼob Diosoʼ ku tsʼíibolkoʼob ka nuʼuktaʼakoʼob tumen letiʼ. Ku tsʼáaikoʼob cuenta maʼ tu páajtal u nuʼuktik u kuxtaloʼob chéen tu juunaloʼob, le oʼolal ku yuʼubikoʼob le baʼax ku yaʼalaʼaltiʼob tumen Jéeoba yéetel ku chaʼik ka nuʼuktaʼakoʼob tumen letiʼ (Jeremías 10:23). Beyoʼob jeʼex le judíoʼob yanoʼob tu úuchben kaajil Berea «tu [séeb] kʼamajoʼob le maʼalob péektsiloʼ», yéetel tu beetoʼob baʼax ku yaʼalik Diosoʼ (Beetaʼanoʼob [Hechos] 17:11). Le oʼolal tu xakʼalxoktoʼob le Kiliʼich Tsʼíiboʼob utiaʼal u naʼatkoʼob tubeel baʼax u kʼáat Diosoʼ, lelaʼ le áantoʼob utiaʼal maʼ u xuʼulul u beetkoʼob baʼax ku yaʼalik yéetel utiaʼal u yeʼeskoʼob u yaabilajoʼob tiʼ.
11. ¿Baʼax u kʼáat u yaʼal k-yaabiltik Dios yéetel tuláakal k-puksiʼikʼal, k-naʼat, k-óol yéetel k-muukʼ?
11 Jesuseʼ tu yaʼaleʼ, kʼaʼabéet k-yaabiltik Dios yéetel tuláakal k-óol, k-puksiʼikʼal, bey xan yéetel tuláakal k-naʼat (Marcos 12:30). Tiʼ k-puksiʼikʼal ku taal le yaabilaj ku túulchʼintkoʼon utiaʼal maʼ u xuʼulul k-beetik baʼax utstutʼaan Diosoʼ. K-yaabiltik Jéeoba yéetel k-tuukuleʼ u kʼáat u yaʼal yaan k-yaabiltik yoʼolal le baʼax tsʼoʼok k-kanik tiʼ letiʼoʼ, jeʼex u jatsʼuts modosoʼ, le baʼax ku kʼáatik ka k-beetoʼ yéetel le baʼax u tukulmaj u beetik ichil upʼíit kʼiinoʼ. Uláakʼ xan baʼax kʼaʼabéet utiaʼal k-eʼesik k-yaabilmeʼ, letiʼe k-meyajtik yéetel tuláakal k-pixan wa k-óol, bey xan yéetel tuláakal k-muukʼ.
¿Baʼax oʼolal unaj k-yaabiltik Jéeoba?
12. ¿Baʼaxten ku kʼáatiktoʼon Dios ka k-yaabilte?
12 Yáaxeʼ, k-yaabiltik Jéeoba tumen letiʼeʼ ku kʼáatiktoʼon ka k-eʼes u modosoʼob, yéetel tumen le yaabilajoʼ tiʼ letiʼ u taal. Apóstol Juaneʼ tu yaʼaleʼ, «Jajal Dioseʼ yaakunaj» (1 Juan 4:8). Jéeobaeʼ, tu beetoʼon yéetel u páajtalil k-eʼesik u jatsʼuts modosoʼob, le oʼolal jeʼel u páajtal k-eʼesik yaabilajeʼ. Tsʼoʼoleʼ, letiʼeʼ yéetel yaabilaj ku gobernar. Dioseʼ u kʼáat ka k-meyajt tumen k-yaabiltmaj yéetel tumen k-kʼáat ka u gobernartoʼon. U jaajileʼ, kʼaʼabéet u yantal yaabilaj utiaʼal ka yanak jeetsʼelil ichil tuláakal le máaxoʼob beetaʼanoʼob tumen Diosoʼ.
13. 1) Le israelitaʼoboʼ, ¿baʼaxten unaj kaʼach u yaabiltkoʼob Yuumtsil jeʼex u yaʼalik le Leyoʼ? 2) ¿Baʼaxten maʼ jelaʼan ka u páaʼt Jéeoba ka k-yaabiltiʼ?
13 Tsʼoʼoleʼ, k-yaabiltik xan Jéeoba tumen yaʼab baʼaloʼob tsʼoʼok u beetik t-oʼolal yéetel k-kʼáat tsʼáa nib óolal tiʼ. Maʼ u tuʼubultoʼoneʼ Jesuseʼ tu yaʼalaj tiʼ le judíoʼoboʼ: «Yaabilt Yuumtsil a Jajal Dios». Unaj kaʼach u yaabilkoʼob utúul Dios u kʼáaj óoloʼob yéetel tsʼoʼok u yeʼesik u yaabilaj tiʼob, maʼ utúul Dios náach yaniktiʼob yéetel mix u kʼaj óoloʼobiʼ. Jéeoba kaʼacheʼ u Diosoʼob, letiʼ jóoʼsoʼob tiʼ luʼumil Egipto yéetel letiʼ bisoʼob tak teʼ luʼum u yaʼalmaj u tsʼáaiktiʼoboʼ, tsʼoʼoleʼ yéetel yaabilaj tu kanáantoʼob bey xan yéetel yaabilaj tu tsolaj u nuʼuktiʼob. Bejlaʼeʼ, Jéeoba xan k-Dios, le Máax tu kʼubaj u Hijo utiaʼal u salvarkoʼon yéetel utiaʼal u yantaltoʼon kuxtal minaʼan u xuuloʼ. Le oʼolal maʼ jelaʼan ka u páaʼt ka k-yaabilte. Bey túunoʼ, k-yaabiltik Jéeoba tumen «letiʼeʼ tu yaabiltajoʼon táanil» (1 Juan 4:19).
14. Le yaabilaj ku yuʼubik Jéeoba yoʼolal wíinikoʼoboʼ, ¿baʼaxten jeʼel u páajtal u keʼetel yéetel le yaabilaj ku yuʼubik le taatatsiloʼoboʼ?
14 Le yaabilaj ku yuʼubik Jéeoba yoʼolal le wíinikoʼoboʼ jeʼel u páajtal u keʼetel yéetel le yaabilaj ku yuʼubik le taatatsiloʼob yoʼolal u paalaloʼoboʼ. Kex tumen kʼeban wíinikoʼobeʼ, ku jach xupikubaʼob utiaʼal u kanáantik u paalaloʼob yéetel utiaʼal u tsʼáaikoʼob baʼax kʼaʼabéettiʼob. Ku kaʼansik u paalaloʼob, ku líiʼsik u yóoloʼob, ku tsʼáaikoʼob áantaj yéetel ku tsolik u nuʼuk tiʼob, lelaʼ ku beetkoʼob tumen u kʼáatoʼob ka yanak kiʼimak óolal tiʼob yéetel ka xiʼik utsil tiʼob. Baʼaleʼ ¿baʼax ku páaʼtik le taatatsiloʼob tiʼ u paalaloʼoboʼ? Ka yaabiltaʼakoʼob tumen u paalaloʼob yéetel ka u tsʼáa ichil u kuxtaloʼob le tsolnuʼuk tu tsʼáajoʼob tiʼoboʼ. Jéeoba, k-kiliʼich Taata yaan teʼ kaʼanoʼ, ¿maʼ wa unaj xan u páaʼtik ka k-eʼes yaabilaj tiʼ yéetel ka k-tsʼáa nib óolal tiʼ yoʼolal le baʼaxoʼob tsʼoʼok u beetik t-oʼolaloʼ?
Kʼaʼabéet k-ilik maas yaabiltik Dios
15. ¿Baʼax unaj k-beetik utiaʼal k-maas yaabiltik Dios?
15 U jaajileʼ mix utúul tiʼ toʼon u yil Diosiʼ mix u yuʼub u tʼaʼanal tumen letiʼiʼ (Juan 1:18). Kex beyoʼ, letiʼeʼ ku yaʼaliktoʼon ka k-beetba u amigoʼon (Santiago 4:8). Baʼaleʼ ¿bix jeʼel u páajtal k-beetkeʼ? Utiaʼal ka k-yaabilt wa máaxeʼ táanil unaj k-kʼaj óoltik tu beel, tumen wa maʼ k-kʼaj óoleʼ maʼ tu páajtal k-yaabiltik. Utiaʼal ka k-kʼaj óolt bix letiʼeʼ, Jéeobaeʼ tu tsʼáajtoʼon le Bibliaoʼ. Le oʼolal cada ku yaʼalaʼaltoʼon tumen u kaajal ka k-xok le Bibliaoʼ. Le Bibliaoʼ ku kaʼansiktoʼon bix Dios, bix u modos yéetel bix u bisikuba yéetel u kaajal. Wa k-tuukul tiʼ tuláakal le baʼaloʼobaʼ, yaan u joʼopʼol k-tuukul jeʼex letiʼeʼ yéetel yaan xan k-maas yaabiltik (Romailoʼob 15:4).
16. K-tuukul tiʼ baʼaxoʼob tu beetaj Jesús way Luʼumeʼ, ¿bix u yáantkoʼon utiaʼal k-maas yaabiltik Jéeoba?
16 Utiaʼal k-maas yaabiltik Jéeobaeʼ, jach kʼaʼabéet xan k-tuukul yoʼolal le baʼaxoʼob tu beetaj Jesús way Luʼumeʼ; letiʼeʼ jach tu chíikbesaj bix u Taata, le oʼolal páajchaj u yaʼalik: «Le máax ku yilken teneʼ ku yilik le Taataoʼ» (Juan 14:9). K-tuukul tiʼ le chʼaʼa óotsilil tu yeʼesaj Jesús le ka tu kaʼa kuxkíintaj u juntúuliliʼ paal utúul nojoch koʼolel kimen u yíichameʼ, ¿máasaʼ jach ku líiʼsik k-óol? (Lucas 7:11-15.) K-kʼaʼajsik xan bix úuchik u pʼoʼik u yook u disipuloʼob, kex letiʼ u Hijo Dioseʼ, ¿máasaʼ ku beetik u jaʼakʼal k-óol? (Juan 13:3-5.) Tsʼoʼoleʼ ku péeksik xan k-óol ojéeltik Jesuseʼ, tu jóoʼsaj u súutukil utiaʼal u yantal tak yéetel le mejen paalaloʼob, kex jach yaan kaʼach u páajtalil yéetel u naʼateʼ (Marcos 10:13, 14). Ken tuukulnakoʼon tiʼ tuláakal le baʼax tsʼoʼok k-aʼalikaʼ, k-kʼuchul k-beetba jeʼex le máaxoʼob tu yaʼalaj Pedroaʼ: «Teʼexeʼ a yaabiltmajeʼex Jesucristo kex maʼ a wileʼexiʼ» (1 Pedro 1:8). Yéetel jeʼex u bin k-maas yaabiltik Jesuseʼ, bey xan u bin k-maas yaabiltik Jéeoba.
17, 18. Utiaʼal k-maas yaabiltik Jéeobaeʼ, ¿tiʼ baʼaxoʼob maʼalob ka tuukulnakoʼon?
17 Uláakʼ baʼax jeʼel u yáantkoʼon utiaʼal k-maas yaabiltik Jéeobaeʼ, letiʼe k-tuukul tiʼ tuláakal le baʼax u tsʼaamajtoʼon utiaʼal k-kiʼimakkúuntik k-óol, jeʼex le jatsʼuts baʼaloʼob u beetmoʼ, le janalbeʼen baʼaloʼob u tsʼaamoʼ yéetel le u páajtal k-máansik jatsʼuts súutukiloʼob yéetel k-amigoʼoboʼ (Beetaʼanoʼob 14:17). Jeʼex u bin k-maas kʼaj óoltik Jéeobaeʼ, yaan u maas taaktal k-tsʼáaik u nib óolalil tiʼ yoʼolal le baʼaxoʼob jach maʼalobtak ku tsʼáaiktoʼonoʼ. Tuukulnakoʼon tiʼ tuláakal le baʼaxoʼob tsʼoʼok u beetik t-oʼolaloʼ. ¿Máasaʼ letiʼeʼ tsʼoʼok u jach náajaltik ka k-yaabilte?
18 Ichil le yaʼab baʼaloʼob ku tsʼáaiktoʼon Jéeobaoʼ táakaʼan xan le páajtalil yantoʼon utiaʼal k-orar tiʼ letiʼoʼ, tumen letiʼeʼ ku yuʼubikoʼon jeʼel baʼaxak ora yéetel jeʼel baʼaxak súutukileʼ (Salmo 65:2). Kex tumen Jéeoba tsʼoʼok u tsʼáaik tiʼ Jesús u meeyjil u beetik u reyil yéetel u juezileʼ, baʼaleʼ tiʼ mix máak, mix tiʼ Jesús, u tsʼaamaj u meeyjil u yuʼubik yéetel u núukik le oracionoʼoboʼ, chéen Letiʼ uʼuyik yéetel núukik. Le yaabilaj ku yuʼubik Jéeoba t-oʼolaloʼ ku beetik u taaktal k-maas natsʼikba tiʼ letiʼ.
19. ¿Baʼaxoʼob u yaʼalmaj Jéeoba u beetik ku péekskoʼon k-maas yaabilte?
19 K-tuukul xan tiʼ tuláakal le baʼax u yaʼalmaj Dios u beetik utiaʼal wíinikoʼobeʼ ku yáantkoʼon xan utiaʼal k-maas natsʼikba tiʼ letiʼ. Jéeobaeʼ ku yaʼalik yaan u luʼsik le kʼojaʼaniloʼ, le yaayaj óolaloʼ yéetel le kíimiloʼ (Apocalipsis 21:3, 4). Ken luʼsaʼak le kʼeban tu wíinklil máakoʼ, mix máak kun lúubul u yóol, maʼ kun antal wiʼijil, óotsilil, baʼateloʼob mix xan uláakʼ baʼaloʼob jeʼel u beetik k-muʼyajeʼ (Salmo 46:9; 72:16). Tuláakal le Luʼumaʼ yaan u súut paraísoi (Lucas 23:43). Tumen u yaabiltmoʼoneʼ, Jéeobaeʼ yaan u beetik tuláakal le maʼalob baʼaloʼobaʼ.
20. Moiseseʼ, ¿baʼax utsiloʼob tu yaʼalaj ku taasik u yaabiltaʼal Jéeoba?
20 Teʼ xookaʼ, tsʼoʼok k-ilik baʼax oʼolal unaj k-maas yaabiltik Jéeoba. ¿Yaan wa u seguer k-maas nojochkíintik le yaabilaj k-uʼuyik yoʼolal Jéeoba yéetel yaan wa k-chaʼik u nuʼuktik k-kuxtal? Lelaʼ cada utúul tiʼ toʼon unaj u tuklik wa yaan u beetik. Úuchjeakileʼ, Moiseseʼ tu yaʼalaj baʼax utsiloʼob ku taasik tiʼ máak u bin u maas nojochkíintik u yaabilaj tiʼ Dios; letiʼeʼ tu yaʼalaj tiʼ u kaajil Israel: «Yéeyeʼex túun le kuxtal utiaʼal ka kuxlakeʼex yéetel a chʼiʼibaleʼexoʼ; yaabilteʼex Yuumtsil a [Dioseʼex], uʼuyaj tʼanteʼex, maʼ a kʼexikeʼex tumen chéen bey bíin páatak a kuxtaleʼex, bey xan u yaʼabtal a jaʼabileʼex» (Deuteronomio 30:19, 20).
¿Kʼajaʼan wa tech?
• ¿Baʼaxten kʼaʼabéet k-yaabiltik Jéeoba?
• ¿Bix k-eʼesik k-yaabiltmaj Jéeoba?
• ¿Baʼax oʼolal unaj k-yaabiltik Jéeoba?
• ¿Baʼax unaj k-beetik utiaʼal ka yanaktoʼon le yaabilajaʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 14]
Baʼax maas jach nojoch u yilik Jéeobaeʼ, letiʼe yaabilaj k-uʼuyik tu yoʼolaloʼ
[U tsolajil le oochel teʼ táan juʼun 17]
«Le máax ku yilken teneʼ ku yilik le Taataoʼ.» (Juan 14:9)