Le máaxoʼob kʼaʼaytik le Reinooʼ ku yaʼalikoʼob

Anchaj u biilal in kuxtal

JESÚSEʼ u kʼaj óol u mejen tamanoʼob (Juan 10:14). Le máax uts u puksiʼikʼaloʼ ku taaktal u náatsʼal yiknal u discípuloʼob Jesús yéetel ku yantal u biilal u kuxtal. Bey úuchik tiʼ juntúul koʼolel kajaʼan Bélgicaoʼ, letiʼeʼ ku tsikbaltik:

«Le ka kʼoopnaj le Testigoʼob tin wotochoʼ jach lubaʼan in wóol kaʼachi yéetel in tukultmaj in kíimskinba. Jach jatsʼuts tin wuʼuyil le baʼax tu tsikbaltoʼoboʼ tumen tu yaʼaloʼobten bix kun utstal le problemaʼob yaan way yóokʼol kaabaʼ. Chéen baʼaleʼ le baʼax maʼ utschaj tin tʼaanoʼ letiʼe úuchik u yaʼalikoʼob Dios kun utskíintik le baʼaloʼoboʼ. Teʼ kʼiinoʼoboʼ tsʼokaʼaniliʼ u máan ocho años xuʼuluk in bin Iglesia, tumen teʼeloʼ maʼatech u beetkoʼob le baʼax ku kaʼanskoʼoboʼ. Chéen baʼaleʼ tin tsʼáaj cuentaeʼ kʼaʼabéettoʼon u yáantaj Dios jeʼex u yaʼalik le Testigoʼoboʼ.

Jach lúub in wóol tumen maʼ páajchaj u seguer in tsikbal tu yéeteloʼobiʼ. Sáamsamaleʼ kaʼapʼéel u cajetillail chamal kin tsʼuʼutsʼik kaʼachi yéetel káaj xan in drogarkinba. Tsʼoʼoleʼ como jach taak kaʼach in tʼaan yéetel juntúul in abuelo tsʼoʼok u kíimileʼ káaj in kanik espiritismo. Chéen baʼaleʼ jach kʼaas úuchik u binten tumen de áakʼabeʼ ku taal kaʼach le demonioʼob u molestartenoʼoboʼ. Xáanchaj yaʼab meses bey u beetkoʼoboʼ, le oʼolal kéen áakʼabchajkeʼ saajken pʼáatal chéen tin juunal.

Juntéenjeak le ka jóokʼen xíimbaleʼ tin chʼaʼaj yaanal bej. Teʼ tuʼux máanenoʼ tin wileʼ táan u beetaʼal junpʼéel nuxiʼ naj. Jach jaʼakʼ in wóol le ka tin wilaj yaʼab máakoʼob táan u meyajoʼobiʼ. Le ka náatsʼeneʼ tin wileʼ u testigoʼob Jéeoba bakáan, táan kaʼach u beetkoʼob junpʼéel naj utiaʼal u muchʼkubaʼobiʼ. Teʼ súutukoʼ kʼaʼajten le kʼiinoʼob ku bin u xíimbaltenoʼoboʼ. Ka tin waʼaleʼ: ‹¡Bukaʼaj jatsʼutsil wa tuláakal máak ka kuxlak jeʼex letiʼobeʼ!›.

Jach in kʼáat kaʼach ka u xíimbaltenoʼob tu kaʼatéen, le oʼolal náatsʼen tʼaan yéetel jujuntúul tiʼ le Testigoʼob táan u meyajoʼob teʼeloʼ. Tsʼoʼoleʼ orarnajen tiʼ Dios, le ka máan diez díaseʼ suunaj u xíimbalten tin wotoch le máax tsʼáaikten xook kaʼachoʼ. Letiʼeʼ tu kʼáatajten wa jeʼel in xook tu kaʼatéeneʼ, ka tin waʼalajtiʼeʼ jeʼeleʼ. Tu séebaʼanil tu invitarten tuʼux ku muchʼkubaʼob, ka tin waʼalajtiʼeʼ jeʼel in láakʼintikoʼobeʼ. ¡Jach jatsʼuts tin wilil le reuniónoʼoboʼ! Tsʼoʼok kaʼach in kaxtik le máaxoʼob jach kiʼimak u yóoloʼob yéetel jach tu jaajil u yaabiltmubaʼoboʼ.

Desde leloʼ maʼ in pʼax mix junpʼéel reunióniʼ. Tsʼoʼoleʼ ka máan tres semanaseʼ xuʼul in tsʼuʼutsʼik chamal, tin pulaj tuláakal in libroʼob ku tʼaanoʼob tiʼ astrologíaoʼ bey xan le paaxoʼob ku tʼaanoʼob tiʼ le Kʼaasilbaʼaloʼ. Tin wuʼuyaj xuʼul u molestarken le demonioʼoboʼ. Káaj in kuxtal jeʼex u kʼáat Jéeobaoʼ, tsʼoʼoleʼ ka máan tres meseseʼ káaj in jóokʼol yéetel le sukuʼunoʼob utiaʼal in tsikbalt le baʼaxoʼob tsʼoʼok in kanikoʼ. Ka máan seis meseseʼ okjaʼanajen, dos días tsʼoʼokok in wokjaʼeʼ ka tin beetinba precursora auxiliar.

Jach kin tsʼáaik u graciasil tiʼ Jéeoba yoʼolal tuláakal le baʼax tsʼoʼok u beetik tin woʼolaloʼ. Beoraaʼ yaan u biilal in kuxtal. U kʼaabaʼ Jéeobaeʼ jach tu jaajil bey junpʼéel nuxiʼ torre tuʼux ku bin áalkabil le utsul máak utiaʼal ka kanáantaʼakoʼ (Proverbios 18:10). Kin wuʼuyinba jeʼex le salmistaaʼ: ‹¡Tak chéen junpʼéel kʼiin ka yanaken tu táankabil a wotocheʼ maas maʼalob ke ka yanaken mil u téenel yaanal lugar! Maas uts tin tʼaan in wantal tu jool u yotoch in Dios ke ka yanaken tu yotoch le kʼasaʼan máakoʼoboʼ›».

Jeʼex le koʼolelaʼ jeʼel máaxak uts u puksiʼikʼaleʼ jeʼel u páajtal u natsʼkuba yiknal Jéeobaeʼ.