YAʼAB sukuʼunoʼob binoʼob kajtal tiʼ uláakʼ luʼumiloʼobeʼ tsʼoʼok u suutoʼob teʼ tuʼux síijoʼoboʼ. Yoʼolal u yaabilajoʼob tiʼ Jéeoba bey xan tiʼ u yéet máakiloʼobeʼ tsʼoʼok u binoʼob kʼaʼaytaj teʼ tuʼuxoʼob maas kʼaʼabéetoʼ (Mat. 22:37-39). ¿Baʼaxoʼob kʼaʼabéetchaj u beetkoʼob yéetel bix bendecirtaʼabikoʼob tumen Jéeoba? Koʼoneʼex tʼaan tiʼ baʼax tsʼoʼok u yúuchul tu luʼumil Camerún.

Tu añoil 1998, juntúul sukuʼun ku kʼaabaʼtik Onésimeeʼ lukʼ Camerúneʼ ka bin kajtal yaanal luʼumil. Teʼeloʼ kuxlaj 14 añosiʼ. Junpʼéel kʼiineʼ tiʼ junpʼéel discursoeʼ tu yuʼubaj u keʼetel le kʼaʼaytaj beyaʼ: «Kaʼatúul amigoʼobeʼ binoʼob chuk kay, chéen baʼaleʼ juntúuleʼ ku tsʼáaik cuentaeʼ le tuʼux táan u chuuk u amigooʼ maas yaʼab kay yaniʼiʼ. Wa u kʼáat xan u chuk maas yaʼab kayoʼobeʼ, ¿máasaʼ yaan u bin teʼ tuʼux ku chuuk u amigooʼ?».

Ka tu yuʼubaj Onésime le kettʼaanaʼ káaj u tuklik u suut Camerún, teʼeloʼ yaʼab máax taak u maas kaanbal tiʼ le Bibliaoʼ le oʼolal jach kʼaʼabéet áantaj tiʼ le sukuʼunoʼoboʼ. Como úuch lukʼukeʼ chan sajak maʼ u kaʼa suuktaliʼ. Le oʼolal tu chʼaʼtuklaj u bin seis meses Camerún utiaʼal u yilik bix kun bintiʼ. Tu añoil 2012 túuneʼ bin kajtaliʼ.

Onésimeeʼ ku yaʼalik: «Anchaj u suuktalten tu kaʼatéen le ooxoloʼ bey xan le bix u kuxtal máak teʼeloʼ. Teʼ lugar tuʼux k-muchʼikba yéetel le sukuʼunoʼoboʼ anchaj u suuktal in kutal teʼ bancaʼob de cheʼoʼ». Ku yaʼalik xan: «Pero tin tsʼáaj cuentaeʼ wa kin tsʼáaik in wóol in chʼenxikint le baʼax ku kaʼansaʼaloʼ maʼ tin kʼaʼajsik le sillaʼob tsʼuʼutsʼuʼkiloʼob tuʼux kin kutal kaʼachoʼ».

Tu añoil 2013, Onésimeeʼ tsʼoʼok u beel yéetel Géraldine, juntúul kiik bin kajtal Francia nueve años chéen baʼaleʼ suunaj Camerún. ¿Bix bendecirtaʼabikoʼob tumen Jéeoba? Onésimeeʼ ku yaʼalik: «Binoʼon teʼ Escuela utiaʼal Máaxoʼob Kʼaʼaytik le Reinooʼ yéetel beoraaʼ táan k-meyaj Betel. Maʼ sen úucheʼ teʼ múuchʼulil tuʼux yanoʼonoʼ okjaʼanaj 20 u túulal j-xoknáaloʼob. Kin wuʼuyikeʼ tiaʼanen teʼ tuʼux jeʼel u béeytal in maas ‹chuukoʼ›» (Mar. 1:17, 18). Géraldineeʼ ku yaʼalik xan: «Maʼ tin tuklaj wa bey ken u sen bendecirtilen Jéeobaaʼ».

Judith, juntúul kiik bin kajtal Estados Unidoseʼ, jach taak kaʼach u maas tsʼáaik u yóol u meyajt Jéeoba. Letiʼeʼ ku yaʼalik: «Kéen xiʼiken Camerún in xíimbalt in familiaeʼ tiʼ yaʼab máaxoʼob kin káajsik in tsʼáaik xook, le oʼolal le kéen lukʼkeneʼ jach kin woʼtik». Kex bey u yuʼubikubaoʼ chan sajak kaʼach u suut kajtal Camerún. Maʼalob u boʼotaʼal le tuʼux ku meyajoʼ le oʼolal ku páajtal u túuxtik taakʼin tiʼ u papá utiaʼal u boʼotik ka tsʼaʼakak. Chéen baʼaleʼ Juditheʼ confiarnaj tiʼ Jéeoba ka suunaj kajtal Camerún. Letiʼeʼ ku yaʼalikeʼ yaan horaeʼ ku tsʼíiboltik le kuxtal yaan kaʼach tiʼ Estados  Unidosoʼ. Le oʼolal tu kʼáataj tiʼ Jéeoba ka áantaʼak utiaʼal u suuktal tu kaʼatéen Camerún, tsʼoʼoleʼ jach líiʼsaʼab u yóol tumen juntúul superintendente tiʼ circuito yéetel u yatan.

¿Bix binik tiʼ Judith? Letiʼeʼ ku yaʼalik: «Tu yáamil tres añoseʼ tin wáantaj kantúul máakoʼob utiaʼal ka okjaʼanakoʼob». Tsʼoʼoleʼ ka máan kʼiineʼ tsʼaʼab u beet u precursora especialil. Bejlaʼeʼ tsʼokaʼan u beel yéetel juntúul sukuʼun ku kʼaabaʼtik Sam-Castel, letiʼeʼ superintendente tiʼ circuito. ¿Baʼax úuch yéetel u papáoʼ? Judith yéetel u láakʼtsiloʼobeʼ tu kaxtoʼob junpʼéel hospital tiʼ yaanal luʼumil tuʼux maʼ kun cobrarbiltiʼob le operación kʼaʼabéet tiʼ u papáoʼ. Tsʼoʼoleʼ jach maʼalob jóokʼik le operación beetaʼabtiʼoʼ.

Juntúul sukuʼun Víctor u kʼaabaʼeʼ bin kajtal kaʼach Canadá. Chéen baʼaleʼ tu xokaj junpʼéel xook jóokʼ tiʼ U Pʼíich Tulumil Kanan ku tʼaan tiʼ u bin máak universidad. Letiʼ túuneʼ tu tuklaj tubeeleʼ, tu pʼataj le universidadoʼ ka tu chʼaʼaj junpʼéel curso utiaʼal u kanik junpʼéel meyaj. Letiʼeʼ ku yaʼalik: «Le curso tin chʼaʼajoʼ tu yáanten in séeb kaxt meyaj, tsʼoʼoleʼ páajchaj in beetik junpʼéel baʼal jach úuch káajak in tsʼíiboltik in beetik, in meyaj bey precursoreʼ». Ka máan kʼiineʼ Víctoreʼ tsʼoʼok u beel yéetel Carolineeʼ ka binoʼob xíimbal Camerún. Teʼeloʼ binoʼob tu najil Betel, le tiaʼanoʼob teʼeloʼ aʼalaʼabtiʼob jach nojoch áantaj jeʼel u tsʼáaikoʼob wa ka suunakoʼob Camerúneʼ. Víctoreʼ ku yaʼalik: «Mix baʼal kʼatik kaʼach k-beel. Como deporsi kuxaʼanoʼon yéetel junpʼíit baʼaloʼobeʼ t-kʼamaj le invitación beetaʼabtoʼonoʼ». Tiʼ Carolineeʼ yaan jujunpʼéel kʼojaʼaniloʼob maʼ sen graveʼobiʼ, kex beyoʼ binoʼob áantaj Camerún.

Víctor yéetel Carolineeʼ joʼopʼ u múul beetik u precursor regulariloʼob utiaʼal u yáantkoʼob le máakoʼob taak u kaanbaloʼob tiʼ le Bibliaoʼ. Ka káajeʼ meyajnajtiʼob le taakʼin u líiʼsmoʼoboʼ, chéen baʼaleʼ ka xuʼupeʼ joʼopʼ u binoʼob meyaj Canadá wa jaypʼéel meses, ku tsʼoʼoleʼ ku suutoʼob Camerún utiaʼal u seguer u beetik u precursoriloʼob. ¿Bix úuchik u bendecirtaʼaloʼob tumen Jéeoba? Letiʼobeʼ páajchaj u binoʼob teʼ Escuela utiaʼal Máaxoʼob Kʼaʼaytik le Reinooʼ, tu beetaj u precursor especialiloʼob yéetel beoraaʼ táan u meyajoʼob tiʼ junpʼéel grupo de construcción. Víctoreʼ ku yaʼalik: «Desde le ka t-kʼexaj k-kuxtal utiaʼal k-maas meyajtik Jéeobaeʼ tsʼoʼok k-ilik bix u kanáantkoʼon».

Tu añoil 2002, Alain juntúul sukuʼun ku xook tiʼ junpʼéel universidad yaan Alemaniaeʼ tu xokaj le tratado Joven, ¿qué harás con tu vida? Le baʼax tu xokoʼ tu beetaj u kʼexik le baʼax u tukultmaj u beetkoʼ. Tu añoil 2006, bin teʼ Escuela de Entrenamiento Ministerialoʼ ka túuxtaʼab Camerún, le luʼum tuʼux síijoʼ.

Teʼeloʼ tu kaxtaj junpʼéel meyaj tuʼux chéen chúumuk kʼiin kʼaʼabéet u meyajiʼ. Ka máan kʼiineʼ tu kaxtaj uláakʼ meyaj maas maʼalob u boʼotaʼal, chéen baʼaleʼ sajak u xuʼulul u tsʼáaik u yóol u meyajt Dios jeʼex suukil tiʼeʼ. Le oʼolal le ka invitartaʼab utiaʼal ka u beet u precursor especialileʼ tu séebaʼanil tu kʼamaj. U patróneʼ tu yaʼalajtiʼeʼ wa ku seguer u meyaj tu yéeteleʼ yaan u naʼaksik u sueldo, kex beyoʼ Alaineʼ tu pʼataj le meyajoʼ. Ka máan kʼiineʼ tsʼoʼok u beel yéetel Stéphanie, le kiikaʼ kajlaj Francia ichil wa jaypʼéel años. ¿Bix úuchik u bin tiʼ Stéphanie le ka bin kajtal Camerúnoʼ?

Letiʼeʼ ku yaʼalik: «Tsaʼayten jujunpʼéel alergias bey xan uláakʼ kʼojaʼaniloʼob chéen baʼaleʼ tsʼaʼabten tratamiento ka chan maʼalobchajen». Jéeobaeʼ tu bendecirtaj le baʼax tu beetaj le sukuʼun yéetel u yatanaʼ. Alaineʼ ku yaʼalik: «Le ka binoʼon kʼaʼaytaj Katé, junpʼéel chan kaaj náach yanileʼ, yaʼab máaxoʼob taakchaj u kaanbaloʼob tiʼ le  Bibliaoʼ. Xooknajoʼon tu yéeteloʼob tiʼ teléfono, tsʼoʼoleʼ kaʼatúul tiʼ letiʼobeʼ okjaʼanajoʼob yéetel yaan tiʼ letiʼobeʼ tu beetubaʼob j-kʼaʼaytajoʼob». Stéphanieeʼ ku yaʼalik: «Kéen k-il bix u kʼaj óoltikoʼob Jéeoba yéetel bix u kʼubik u kuxtaloʼob tiʼ letiʼeʼ jach ku sen kiʼimaktal k-óol. Way Camerúneʼ yaʼab u téenel tsʼoʼok k-uʼuyikba beyoʼ». Bejlaʼeʼ Alaineʼ superintendente tiʼ circuito.

Gisèleeʼ okjaʼanaj le táan u xokik u doctorail tu luʼumil Italiaoʼ. Le sukuʼun yéetel u yatan tsʼáa xook tiʼoʼ precursoroʼob, le oʼolal suuk u kuxtaloʼob chéen yéetel junpʼíit baʼal. Le bix u kuxtal le sukuʼunoʼobaʼ tu beetaj u tuklik Gisèle wa jeʼel u páajtal u maas tsʼáaik u yóol u meyajt Jéeobaeʼ. Le oʼolal káaj u beetik u precursora regularil kex láayliʼ táan u xookeʼ.

Gisèleeʼ taak kaʼach u suut Camerún utiaʼal u maas áantaj, pero yaan baʼaxoʼob chiʼichnakkúuntik. Letiʼeʼ ku yaʼalik: «Saajken kaʼach u luʼsaʼalten le permiso tsʼaʼanten utiaʼal in kajtal Italiaoʼ, tsʼoʼoleʼ yaan in pʼatik in amigoʼob bey xan in láakʼtsiloʼob kajaʼanoʼob teʼeloʼ». Kex beyoʼ tu mesil mayo tiʼ 2016, suunaj tu luʼumil Camerún. Ka máan kʼiineʼ tsʼoʼok u beel yéetel juntúul sukuʼun Léonce u kʼaabaʼ. Le sucursaloʼ tu kʼáatajtiʼob wa jeʼel u béeytal u binoʼob áantaj tiʼ junpʼéel kaaj ku kʼaabaʼtik Ayos, teʼeloʼ jach yaʼab áantaj kʼaʼabéet kaʼachiʼ.

¿Bix le kuxtal teʼ kaaj jeʼeloʼ? Gisèleeʼ ku yaʼalik: «Jach suuk u bin le corrienteoʼ, yaan kʼiineʼ ku máan yaʼab semanaʼob minaʼan, le oʼolal ku pʼáatal minaʼan u cargail le celularoʼob yaantoʼonoʼ. Anchaj in kanik in tʼab kʼáakʼ utiaʼal in cocinar, tsʼoʼoleʼ de áakʼab kʼaʼabéet k-bin chʼaʼ jaʼ kaʼachi. Kéen xiʼikoʼoneʼ k-bisik junpʼéel foco yéetel junpʼéel carretilla, k-bin teʼ hora jeʼeloʼ tumen óoliʼ mix máak ku bin chʼaʼ jaʼiʼ». Gisèleeʼ ku yaʼalik baʼax áantoʼob. Letiʼeʼ ku yaʼalik: «Chéen yéetel u espíritu santo Jéeoba béeychaj k-suuktaliʼ. K-múul áantikba, tsʼoʼoleʼ k-láakʼtsiloʼob yéetel k-amigoʼobeʼ jach tu yáantoʼonoʼob. Tumen yaan horaeʼ ku túuxkoʼobtoʼon junpʼíit taakʼin».

¿Bix u yuʼubikuba Gisèle úuchik u suut teʼ luʼum tuʼux líikʼoʼ? Letiʼeʼ ku yaʼalik: «Jach kiʼimak in wóol. Tu káajbaleʼ chan lúub k-óol yéetel anchajtoʼon jujunpʼéel problemas. Pero le ka tsʼoʼokeʼ t-tsʼáaj cuentaeʼ jach maʼalob le baʼax t-beetaj úuchik k-suutoʼ. Bejlaʼeʼ k-maas confiar tiʼ Jéeoba yéetel maas naatsʼ k-uʼuyikba tiʼ letiʼ». Léonce yéetel Gisèleeʼ binoʼob teʼ Escuela utiaʼal Máaxoʼob Kʼaʼaytik le Reinooʼ tsʼoʼoleʼ invitartaʼaboʼob junpʼéel tiempo utiaʼal u meyajoʼob bey precursor especialoʼobeʼ.

Juntúul maʼalob j-chuk kayeʼ kex maʼ chéen chʼaʼabileʼ ku beetik tuláakal le ku páajtal utiaʼal u chuukoʼ. Le sukuʼunoʼob ku suutoʼob xan teʼ luʼum tuʼux líikʼoʼoboʼ kex yaʼab baʼaxoʼob ku kʼaʼabéettal u beetkoʼobeʼ ku yilik u yáantkoʼob le máaxoʼob taak u kaanbaloʼob tiʼ Jéeobaoʼ. Jéeobaeʼ maʼ ken u tuʼubs tuláakal le baʼax tsʼoʼok u beetik le sukuʼunoʼobaʼ yéetel yaan u bendecirkoʼob (Neh. 5:19; Heb. 6:10). Wa kajaʼanech táanxel luʼumil yéetel ka wojéeltik kʼaʼabéet áantaj teʼ luʼumil tuʼux síijechoʼ, ¿jeʼel wa u páajtal a suuteʼ? Wa ka beetkeʼ Jéeobaeʼ seguro yaan u bendecirkech (Pro. 10:22).