1, 2. ¿Bix u yeʼesik u yutsil Jéeoba yéetel le baʼaxoʼob yaan way yóokʼol kaaboʼ?

JÉEOBAEʼ yaʼab baʼax ku síik tiʼ máak. Tuláakal baʼax yaantoʼoneʼ tiʼ letiʼ u taal, jeʼex le orooʼ, le plataoʼ yéetel uláakʼ baʼaxoʼob yaan way Luʼumeʼ. Tsʼoʼoleʼ letiʼ tsʼáaik tuláakal baʼax kʼaʼabéet utiaʼal ka yanak le kuxtaloʼ (Sal. 104:13-15; Ageo 2:8). Le Bibliaoʼ ku yaʼalikeʼ Jéeobaeʼ yaʼab u téenel tu beetaj milagroʼob utiaʼal u tsʼáaik baʼaxoʼob kʼaʼabéet tiʼ le máaxoʼob meyajtikoʼ.

² Jeʼex le ka máan le israelitaʼob teʼ desierto ichil cuarenta añosoʼ, Jéeobaeʼ tu tsʼáaj maná u jaantoʼob yéetel jaʼ u yukʼoʼob (Éxo. 16:35). Le oʼolaleʼ «mix juntéen pʼáatoʼob yéetel tsʼíibolal» (Neh. 9:20, 21). Tu kʼiinil le profeta Eliseo xanoʼ, Jéeobaeʼ tu beetaj u yaʼabtal le junpʼíit aceite yaan kaʼach tiʼ juntúul koʼolel kimen u yíichamoʼ. Bey túunoʼ páajchaj u láaj boʼotik u pʼaax yéetel u tséentik u paalal (2 Rey. 4:1-7). Ka máan kʼiineʼ Jéeobaeʼ tu tsʼáaj páajtalil tiʼ Jesús u beetik milagroʼob, jeʼex le ka tu tséentaj le yaʼabkach máakoʼobeʼ yéetel le ka kʼaʼabéetchajeʼ tu beetaj u yantal tak taakʼin (Mat. 15:35-38; 17:27).

3. ¿Baʼax kʼáatchiʼiloʼob kun núukbil teʼ xookaʼ?

 ³ Tiʼ Jéeobaeʼ jeʼel u páajtal u meyaj jeʼel baʼaxak utiaʼal u beetik u yantal kuxtal way yóokʼol kaabeʼ. Kex beyoʼ ku yaʼalik tiʼ le máaxoʼob meyajtik ka u tsʼáaʼob le baʼaxoʼob yaantiʼob utiaʼal u yáantajoʼob yéetel le meyaj ku beetik u kaajaloʼ (Éxo. 36:3-7; xok Proverbios 3:9). ¿Baʼaxten Jéeobaeʼ ku páaʼtik ka k-jóoʼs wa baʼax k-síitiʼ ichil le baʼaxoʼob u tsʼaamajtoʼonoʼ? Le máaxoʼob meyajt Dios úuchjeakiloʼ, ¿bix úuchik u tsʼáaikoʼob baʼaxoʼob yaantiʼob utiaʼal u adorartaʼal Dios? ¿Bix u meyaj tiʼ u kaajal Jéeoba le siibaloʼob ku tsʼaʼabaloʼ? Le kʼáatchiʼobaʼ yaan u núukaʼal teʼ xookaʼ.

4. ¿Baʼax k-eʼesik tiʼ Jéeoba kéen k-síi tiʼ u kaajal baʼaxoʼob yaantoʼon?

⁴ ¿Baʼaxten k-tsʼáaik tiʼ Jéeoba le baʼaxoʼob yaantoʼonoʼ? Tumen k-yaabiltmaj yéetel tumen k-agradecertik tuláakal le baʼaxoʼob ku beetik t-oʼolaloʼ. K-tuukul tiʼ lelaʼ ku beetik u kiʼimaktal u yóol k-puksiʼikʼal. K-uʼuyikba jeʼex le ka joʼopʼ u tsolik rey David baʼaxoʼob kʼaʼabéet utiaʼal u beetaʼal le templooʼ. Letiʼeʼ tu yaʼaleʼ tuláakal baʼax yaantoʼoneʼ Jéeoba tsʼáaiktoʼon, le oʼolal u jaajileʼ le baʼaxoʼob k-síiktiʼoʼ letiʼe baʼaxoʼob u tsʼaamajtoʼonoʼ (xok 1 Crónicas 29:11-14).

5. ¿Bix u yeʼesik le Biblia unaj k-síik baʼax yaantoʼon utiaʼal k-adorartik Jéeobaoʼ?

⁵ Uláakʼ baʼax oʼolal k-síik tiʼ Jéeoba baʼaxoʼob yaantoʼoneʼ tumen bey k-adorartikoʼ. Ichil junpʼéel náay anchaj tiʼ apóstol Juaneʼ tu yuʼubaj u yaʼalaʼal desde teʼ kaʼanoʼ: «K-Dios Jéeoba, techeʼ jach ka náajmatik a kʼamik nojbeʼenil, tsiikil bey xan páajtalil, tumen teech beet tuláakal baʼal, yéetel ta woʼolaleʼ kʼuchoʼob antal yéetel beetaʼaboʼob» (Apo. 4:11). Jeʼex k-ilkoʼ Jéeobaeʼ ku náajmatik ka tsʼaʼabak nojbeʼenil yéetel tsiikil tiʼ, le oʼolal ku náajmatik ka k-síitiʼ le baʼax maas maʼalob yaantoʼonoʼ. Tu kʼiinil le israelitaʼoboʼ, Jéeobaeʼ tu nuʼuktaj Moisés ka u yaʼaltiʼob ka u beetoʼob óoxpʼéel kʼiinbesaj cada jaʼab. Le leyoʼ ku yaʼalik: «Mix máak bíin xiʼik tu táan Yuumtsil x-pikʼib kʼabil» (Deu. 16:16). Jeʼex k-ilkoʼ le israelitaʼoboʼ suukchaj u síikoʼob baʼax kʼaʼabéet utiaʼal u beetaʼal le kʼiinbesajoʼoboʼ. Teʼ kʼiinoʼob xanaʼ k-síik baʼaxoʼob yaantoʼon, tumen k-ojel táakaʼan ichil le adoración k-tsʼáaik tiʼ Jéeobaoʼ. Kéen k-beet beyaʼ k-eʼesik ku síijil t-puksiʼikʼal k-áantik u kaajal yaan way Luʼumeʼ.

6. ¿Baʼaxten maʼalob ka suukchajak k-síik baʼaxoʼob yaantoʼon? (Ilawil le foto yaan tu káajbal le xookaʼ.)

⁶ Maʼalob ka k-síi baʼax yaantoʼon, maʼ chéen k-kʼamik siibaloʼobiʼ (xok Proverbios 29:21). Tukleʼ juntúul chan xiʼipaleʼ yéetel le taakʼin ku tsʼaʼabaltiʼ tumen u taataʼoboʼ ku manik junpʼéel regalo utiaʼal u síitiʼob. ¿Máasaʼ u taataʼobeʼ jach yaan u kiʼimaktal u yóoloʼob? Tukult xan lelaʼ: juntúul táankelem ku beetik u precursoril kajaʼan yiknal u taataʼobeʼ ku tsʼáaik taakʼin tiʼob utiaʼal u yáantkubaʼob. Maʼ xaaneʼ u taataʼobeʼ maʼ táan u páaʼtkoʼob ka tsʼaʼabak taakʼin tiʼob tumen u hijoʼobiʼ, baʼaleʼ ku chʼaʼikoʼobtiʼ, tumen u yojloʼobeʼ bey u agradecertik le baʼaxoʼob u beetmoʼob tu yoʼolaloʼ. Jéeoba xaneʼ u yojel maʼalob ka k-tsʼáa tiʼ letiʼ le baʼaxoʼob yaantoʼonoʼ.

7, 8. 1) ¿Bix áantajnajik le máaxoʼob meyajt Dios úuchjeakil utiaʼal u beetaʼal jejeláas meyajoʼoboʼ? 2) ¿Baʼax uláakʼ tu beetoʼob utiaʼal u síikoʼob baʼaxoʼob yaantiʼob utiaʼal u adorartaʼal Dios?

⁷ Le Bibliaoʼ ku yaʼalikeʼ le máaxoʼob meyajt Jéeoba úuchjeakiloʼ tu tsʼáajoʼob baʼax yaantiʼob. Le baʼaxoʼob tu tsʼáajoʼoboʼ meyajnaj utiaʼal jejeláas baʼaloʼob. Juntéenjeakeʼ Moiseseʼ tu yaʼalaj tiʼ le israelitaʼob maʼalob ka u tsʼáaʼob u siibaloʼob utiaʼal u beetaʼal  le tabernaculooʼ. Bey tu beetil rey David utiaʼal ka líiʼsaʼak le templooʼ (Éxo. 35:5; 1 Cró. 29:5-9). Tu kʼiinil xan le rey Jehoasoʼ, yéetel le taakʼin tu tsʼáaj le kaajoʼ utskíintaʼab u yotoch Jéeoba tumen le sacerdoteʼoboʼ (2 Rey. 12:4, 5). Teʼ yáax siglo xanoʼ le sukuʼunoʼoboʼ tu yojéeltoʼob yaan wiʼijil tu luʼumil Judeaeʼ ka taakchaj u yáantajoʼob. Le Bibliaoʼ ku yaʼalikeʼ cada juntúuleʼ áantajnaj yéetel le baʼaxoʼob yaantiʼoʼ (Bax. 11:27-30).

⁸ Yaan kʼiin xaneʼ le máaxoʼob meyajt Dios úuchjeakiloʼ tu síiʼob baʼaxoʼob yaantiʼob utiaʼal u yáantaʼal le máaxoʼob nuʼuktik le jaajil adoracionoʼ. Jeʼex u yaʼalik u Ley Moiseseʼ, le levitaʼoboʼ minaʼan u herenciaʼob jeʼex u maasil tribuʼoboʼ. Le oʼolal aʼalaʼab tiʼ le israelitaʼob ka u tsʼáaʼob le diezmooʼ. Beyoʼ le levitaʼoboʼ páajchaj u chʼíikloʼob tiʼ le meyaj ku beetkoʼob teʼ tabernaculooʼ (Núm. 18:21). Ka máan kʼiin xaneʼ jujuntúul koʼoleloʼob uts u modosoʼobeʼ «meyajnajtiʼob baʼaxoʼob yaantiʼob utiaʼal u tsʼáaikoʼob baʼax kʼaʼabéet» tiʼ Jesús yéetel le apostoloʼoboʼ (Luc. 8:1-3).

9. ¿Tuʼux tu chʼaʼajoʼob le baʼax tu síiaj le máaxoʼob meyajt Dios úuchjeakiloʼ?

⁹ Jejeláas tuʼux tu chʼaʼajoʼob taakʼin utiaʼal u síiʼob. Jeʼex le ka beetaʼab le tabernáculo teʼ desiertooʼ, maʼ xaaneʼ ichil le baʼaxoʼob tu tsʼáaj le israelitaʼoboʼ táakaʼan le nuʼukuloʼob siʼibtiʼob Egiptooʼ (Éxo. 3:21, 22; 35:22-24). Teʼ yáax siglo xanoʼ jujuntúul sukuʼunoʼobeʼ tu konoʼob terrenoʼob, najoʼob yéetel uláakʼ baʼaloʼobeʼ ka tu bisoʼob u tojol tiʼ le apostoloʼob utiaʼal u yáantaʼal le óotsiloʼoboʼ (Bax. 4:34, 35). Uláakʼ sukuʼunoʼobeʼ suukchaj u junpáaykuntikoʼob taakʼin utiaʼal u síiʼob ka meyajnak tiʼ baʼaloʼob yaan yil yéetel u adorartaʼal Dios (1 Cor. 16:2). Jeʼex túun k-ilkoʼ tuláakloʼob áantajnajoʼob jeʼex páajchajik tiʼoboʼ, kex ayikʼaloʼob wa kex óotsiloʼob (Luc. 21:1-4).

10, 11. 1) ¿Bix jeʼel u páajtal k-eʼesik k-utsil jeʼex tu beetil le máaxoʼob meyajt Dios teʼ yáax siglooʼ? 2) ¿Bix a wuʼuyikaba kéen áantajnakech utiaʼal u kʼaʼaytaʼal le Reinooʼ?

¹⁰ Bejlaʼa xaneʼ yaan kʼiineʼ k-tsʼáaik k-siibal utiaʼal k-áantaj tiʼ wa baʼax meyajil ku kʼaʼabéettal u beetaʼal. Jeʼex u yutskíintaʼal le Najil Reino tuʼux k-muchʼikbaoʼ wa u beetaʼal junpʼéel túumbeniʼ. Wa maʼeʼ ku yaʼalaʼaltoʼon kʼaʼabéet taakʼin utiaʼal u jel utskíintaʼal junpʼéel u najil Betel, u boʼotaʼal le xuupoʼob ku yantal teʼ asamblea tuʼux k-binoʼ wa utiaʼal u yáantaʼal le sukuʼunoʼob tuʼux úuch junpʼéel nojoch loobiloʼ. Le taakʼin k-síik xanoʼ ku meyaj utiaʼal u yáantaʼal le misioneroʼoboʼ, le precursor especialoʼoboʼ, le superintendenteʼob tiʼ circuitooʼ bey xan le sukuʼunoʼob ku meyajoʼob Beteloʼ. Maʼ xaaneʼ le múuchʼulil tuʼux yanoʼonoʼ u chʼaʼtukultmaj u túuxtik wa bajux cada mes utiaʼal u meyaj kéen beetaʼak Najiloʼob Reino wa u Najiloʼob Asamblea. Lelaʼ ku yáantaj utiaʼal u yutsil le sukuʼunoʼob yanoʼob tiʼ tuláakal yóokʼol kaaboʼ.

¹¹ Tuláakloʼon jeʼel u páajtal k-áantaj teʼ meyaj ku beetik u kaajal Jéeoba teʼ kʼiinoʼobaʼ. Maʼatech u yojéeltaʼal máax tsʼáaik u siibal, tumen ku tsʼaʼabal ichil le mejen cajaʼob yaan teʼ Najil Reinooʼ wa ku túuxtaʼal teʼ sitio ich Internet jw.org. Maʼ xaaneʼ k-tuklikeʼ maʼ yaʼab le siibal k-tsʼáaikoʼ. Baʼaleʼ u jaajileʼ u maas yaʼabil le siibaloʼob ku tsʼaʼabal bejlaʼoʼ maʼ nojoch taakʼiniʼ, chéen ku yaʼabtal tumen yaʼab máakoʼob tsʼáaik u siibaloʼob. Tuláakal le sukuʼunoʼoboʼ, tak le maas óotsiloʼoboʼ, beyoʼob jeʼex u kajnáaliloʼob Macedonia anchajoʼob teʼ yáax siglooʼ. Kex nakʼan óotsiloʼobeʼ «maʼ xuʼul u sen kʼáat óoltikoʼob» ka chaʼabak u yáantajoʼobiʼ (2 Cor. 8:1-4).

12. ¿Baʼax ku beetik u kaajal Jéeoba utiaʼal u meyaj maʼalob le siibaloʼoboʼ?

¹² Le Cuerpo Gobernanteoʼ jach ku yilik  ka meyajnak maʼalob le taakʼin ku siʼibiloʼ (Mat. 24:45). Le sukuʼunoʼobaʼ ku oraroʼob yéetel ku tuklikoʼob maʼalob bix kun meyaj le siibaloʼoboʼ (Luc. 14:28). Tu kʼiinil le israelitaʼoboʼ kaxtaʼab máakoʼob chúukaʼan u yóoloʼob utiaʼal ka u yiloʼob bix kun meyaj le siibaloʼoboʼ. Letiʼobeʼ ku kanáantkoʼob ka meyajnak chéen utiaʼal u adorartaʼal Jéeoba. Bey úuchik tu kʼiiniloʼob Esdrasoʼ. Le nukaʼaj suut Jerusalenoʼ u reyil Persiaeʼ tu kʼubaj yaʼab oro, plata yéetel uláakʼ baʼaloʼob tiʼ. Tuláakaleʼ jeʼel u tojoltik maas tiʼ 100 millones dólares bejlaʼeʼ. Esdraseʼ u yojel u tiaʼal Jéeoba tuláakal le siibal tsʼaʼaboʼ, le oʼolal tu yaʼalaj bix unaj u kanáantaʼal le táan u viajaroʼoboʼ (Esd. 8:24-34). Teʼ yáax siglo xanoʼ apóstol Pabloeʼ tu juntartaj le taakʼin siʼib utiaʼal u yáantaʼal le sukuʼunoʼob kajaʼanoʼob Judeaoʼ. Tsʼoʼoleʼ tu yilaj ka tʼoʼoxok tubeel tumen le máaxoʼob bisoʼ, tumen u kʼáat ka beetaʼak «toj tuláakal baʼal, maʼ chéen tu táan Jéeobaiʼ, baʼaxeʼ tak tu táan le máakoʼoboʼ» (xok 2 Corintoiloʼob 8:18-21). Jeʼex tu beetil Esdras yéetel Pabloeʼ, bejlaʼeʼ u kaajal Jéeobaeʼ ku tsolik tubeel bix kun kanáantbil yéetel bix kun xupbil le taakʼin ku siʼibiloʼ.

13. ¿Baʼaxten tsʼoʼok u beetaʼal jujunpʼéel kʼeexoʼob ichil u kaajal Jéeoba?

¹³ Yaan kʼiineʼ jujunpʼéel familiaʼobeʼ ku kʼexik bix u kuxtaloʼob utiaʼal maʼ u xupikoʼob maas yaʼab taakʼin tiʼ le ku náajaltikoʼoboʼ. Yaan kʼiin xaneʼ ku yilik u kuxtaloʼob chéen yéetel junpʼíit baʼal utiaʼal u maas meyajtikoʼob Jéeoba. Tu kaajal Jéeobaeʼ óoliʼ bey u yúuchul xanoʼ. Teʼ tu tsʼook jaʼaboʼobaʼ yaʼab jatsʼuts meyajoʼob káajsaʼab u beetaʼal, le oʼolal yaan horaeʼ káaj u xuʼupul maas yaʼab taakʼin tiʼ le ku siʼibiloʼ. Le oʼolal joʼopʼ u yilaʼal maʼ u sen xuʼupul le taakʼinoʼ yéetel tsʼoʼok u kʼeʼexel bix u beetaʼal le meyajoʼob utiaʼal ka maas séebchajakoʼ. Beyoʼ le taakʼin k-síikoʼ ku meyaj tubeel.

14-16. 1) ¿Bix u meyaj le taakʼin k-síikoʼ? 2) ¿Baʼax utsiloʼob tsʼoʼok a kʼamik tiʼ le baʼax ku tsʼáaiktoʼon u kaajal Jéeobaoʼ?

¹⁴ Yaʼab sukuʼunoʼob úuch joʼopʼok u meyajtikoʼob Jéeobaeʼ ku yaʼalikoʼobeʼ yaʼab jatsʼuts baʼaloʼob tsʼoʼok u kʼamkoʼob tiʼ u kaajal Jéeoba teʼ tu tsʼook jaʼaboʼobaʼ. Jaaj u tʼaanoʼob, tumen teʼ tu tsʼook jaʼaboʼobaʼ beetaʼab jw.org yéetel JW Broadcasting. Tsʼoʼoleʼ jóoʼsaʼab xan le Biblia U Suttʼaanil Túumben Luʼum ichil yaʼab uláakʼ idiomaʼoboʼ. Tsʼoʼoleʼ tu jaʼabil 2014 yéetel 2015, beetaʼab le asambleaʼob internacional «Maʼ u xuʼulul a kaxtikeʼex táanil u Reino Dios» tiʼ nukuch estadioʼob yaan tiʼ 14 u pʼéelal kaajoʼob tiʼ tuláakal yóokʼol kaab.  Jach kiʼimakchaj u yóol tuláakal le máaxoʼob binoʼoboʼ.

¹⁵ Yaʼab sukuʼunoʼob tsʼoʼok u tsʼáaikoʼob u diosboʼotikil yoʼolal le jatsʼuts baʼaloʼob ku tsʼáaiktoʼon u kaajal Jéeobaoʼ. Juntúul sukuʼun yéetel u yatan kajaʼanoʼob tiʼ junpʼéel u chan kaajil Asiaeʼ, tu yaʼaloʼob: «Yaan horaeʼ k-uʼuyik chéen t-juunal yanoʼon yéetel séeb u tuʼubultoʼon tak tuʼux ku náakal u meyaj Jéeoba. Chéen baʼaleʼ kéen k-il baʼax ku máansaʼal teʼ JW Broadcastinoʼ k-tsʼáaik cuentaeʼ tuláakal yóokʼol kaab yaan k-sukuʼunoʼob. Wayeʼ le sukuʼunoʼoboʼ jach ku kiʼimaktal u yóoloʼob yoʼolal le JW Broadcastinoʼ. Suuk k-uʼuyik u yaʼalikoʼobeʼ kéen u chaʼantoʼob cada mes le programaoʼ ku yuʼubikoʼob naatsʼ yaniloʼob tiʼ le Cuerpo Gobernanteoʼ. Jach kiʼimak u yóoloʼob yaniloʼob ichil u kaajal Jéeoba».

¹⁶ Tiʼ tuláakal yóokʼol kaabeʼ táan u beetaʼal yéetel táan u yutskíintaʼal kex 2,500 u Najiloʼob Reino. Ka beetaʼab junpʼéel u Najil Reino tumen le sukuʼunoʼob tiʼ junpʼéel múuchʼulil tu luʼumil Hondurasoʼ, tu tsʼíibtoʼob: «Jach kiʼimak k-óol k-antal yéetel k-múuchʼ meyaj ichil u kaajal Jéeoba yaan tuláakal yóokʼol kaab. Bejlaʼeʼ tsʼoʼok u yantaltoʼon le Najil Reino úuch joʼopʼok k-tsʼíiboltikoʼ». Yaʼab sukuʼunoʼobeʼ ku tsʼáaikoʼob xan u diosboʼotikil kéen yanaktiʼob le Biblia yéetel uláakʼ publicacionoʼob ichil u idiomaʼob, kéen áantaʼakoʼob tu kʼiinil junpʼéel nojoch loobil wa kéen u yiloʼob le utsil ku taasik u yúuchul kʼaʼaytaj tuʼux yaʼab u máan máakoʼ.

17. ¿Baʼaxten k-aʼalik Jéeobaeʼ táan u yáantik u kaajal teʼ kʼiinoʼobaʼ?

¹⁷ Le máaxoʼob maʼatech u meyajtikoʼob Jéeobaoʼ maʼ tu creertikoʼob wa jeʼel u beetaʼal yaʼab baʼal chéen yéetel taakʼin siibil u beetaʼaleʼ. Juntúul máak nuʼuktik junpʼéel nojoch empresaeʼ bin u xíimbalt junpʼéel tiʼ le imprentaʼob yaantoʼonoʼ. Jaʼakʼ u yóol ka tu yilaj bukaʼaj meyaj ku beetaʼal yéetel le taakʼin siibil u beetaʼaloʼ, tsʼoʼoleʼ le máaxoʼob ku meyajoʼoboʼ maʼ táan u náajaloʼobiʼ yéetel maʼatech u beetaʼal programaʼob utiaʼal u kʼáataʼal taakʼin tiʼ le máakoʼoboʼ. Tu yaʼaleʼ maʼ tu creertaʼal wa jeʼel u páajtal u beetaʼaleʼ. Lelaʼ jaaj u tʼaan. Tuláakal le meyajoʼob ku beetaʼaloʼ ku béeytal chéen yéetel u yáantaj Jéeoba (Job 42:2).

18. 1) ¿Baʼax utsiloʼob k-kʼamik kéen áantajnakoʼon utiaʼal u kʼaʼaytaʼal le Reinooʼ? 2) ¿Bix jeʼel k-kaʼansik tiʼ k-paalal yéetel tiʼ le túumbenoʼob u síiʼob baʼaxoʼob yaantiʼoboʼ?

¹⁸ Jéeobaeʼ ku tsʼáaiktoʼon u páajtalil k-áantaj utiaʼal u kʼaʼaytaʼal le Reino teʼ kʼiinoʼobaʼ. Letiʼeʼ ku yaʼaliktoʼoneʼ wa k-áantajeʼ yaan k-kʼamik yaʼab bendicionoʼob (Mal. 3:10). Ku yaʼalik xaneʼ le máax suuk u yeʼesik u yutsileʼ ku bin utsil tiʼ (xok Proverbios 11:24, 25). Tsʼoʼoleʼ yaan u jach kiʼimaktal k-óol, tumen «maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Bax. 20:35). Jeʼel xan u páajtal k-kaʼansik yéetel k-eʼesik tiʼ k-paalal bey xan tiʼ le túumbenoʼob bix jeʼel u páajtal u yáantajoʼob utiaʼal u kʼamkoʼob yaʼab bendicionoʼobeʼ.

19. ¿Bix tsʼoʼok u líiʼsik a wóol le xookaʼ?

¹⁹ Tuláakal baʼax yaantoʼoneʼ tiʼ Jéeoba u taal. Wa k-tsʼáaiktiʼ baʼaxoʼob yaantoʼoneʼ k-eʼesik k-yaabiltmaj yéetel k-tsʼáaik u graciasil tiʼ yoʼolal le baʼaxoʼob u beetmaj t-oʼolaloʼ (1 Cró. 29:17). Ka tu tsʼáaj le israelitaʼob le baʼaxoʼob yaantiʼob utiaʼal u beetaʼal le templooʼ «kiʼimakchaj u yóoloʼob [...], tumen tu beetoʼob utiaʼal Yuumtsil yéetel u jaajil yóoloʼob» (1 Cró. 29:9). Toʼon xaneʼ wa ku seguer k-tsʼáaik tiʼ Jéeoba le baʼaxoʼob u tsʼaamajtoʼonoʼ yaan u kiʼimaktal k-óol.