XOOK 29
Unaj k-apoyartik Jesucristo le máax nuʼuktikoʼonoʼ
«Tsʼoʼok u tsʼaʼabalten tuláakal páajtalil teʼ kaʼanoʼ bey xan way luʼumeʼ» (MAT. 28:18).
KʼAAY 13 K-xíimbal jeʼex Cristoeʼ
TIʼ BAʼAX KUN TʼAAN *
1. ¿Baʼax u kʼáat Jéeoba ka beetaʼak teʼ kʼiinoʼobaʼ?
TEʼ KʼIINOʼOBAʼ Jéeobaeʼ u kʼáat ka tsikbaltaʼak tiʼ tuláakal yóokʼol kaab le baʼaloʼob maʼalobtak ken u beet le Reinooʼ (Mar. 13:10; 1 Tim. 2:3, 4). Letiʼeʼ jach kʼaʼanaʼan u yilik ka beetaʼak, le oʼolal tsʼoʼok u yéeyik u Hijo utiaʼal u nuʼuktik le meyajaʼ. Tumen Jesucristo nuʼuktik le kʼaʼaytajoʼ k-ojleʼ Jéeobaeʼ yaan u kiʼimaktal u yóol yéetel le baʼax kun beetbil tak ken kʼuchuk le xuʼulsajiloʼ (Mat. 24:14).
2. ¿Baʼax ken k-il teʼ xookaʼ?
2 Teʼ xookaʼ yaan k-ilkeʼ tiʼ Jesúseʼ ku meyaj «le esclavo chúukaʼan u yóol yéetel yaan u naʼat» utiaʼal u tsʼáaiktoʼon le janal espiritualoʼ bey xan utiaʼal u nuʼuktik le kʼaʼaytaj k-beetik tiʼ tuláakal yóokʼol kaaboʼ (Mat. 24:45). Tsʼoʼoleʼ yaan xan k-ilik baʼax jeʼel u páajtal u beetik cada juntúul tiʼ toʼon utiaʼal u apoyartik Jesús yéetel le esclavo chúukaʼan u yóoloʼ.
JESÚS NUʼUKTIK LE KʼAʼAYTAJOʼ
3. ¿Baʼax páajtalil tsʼoʼok u tsʼaʼabal tiʼ Jesús?
3 Jesús nuʼuktik le kʼaʼaytaj ku beetaʼal tiʼ tuláakal yóokʼol kaaboʼ. ¿Bix k-ojéeltik leloʼ? Le jach taʼaytak u bin teʼ kaʼanoʼ tu muchʼuba yéetel jujuntúul tiʼ u discípuloʼob tiʼ junpʼéel montaña yaan Galileaeʼ ka tu yaʼalajtiʼob: «Tsʼoʼok u tsʼaʼabalten tuláakal páajtalil teʼ kaʼanoʼ bey xan way luʼumeʼ». Tsʼoʼoleʼ tu yaʼalajtiʼob: «Le oʼolaleʼ xeeneʼex tu yiknal u kajnáaliloʼob tuláakal le kaajoʼoboʼ ka a kaʼanseʼexoʼob utiaʼal ka taalakoʼob tin paach» (Mat. 28:18, 19). Jeʼex k-ilkoʼ tiʼ Jesúseʼ tsʼoʼok u tsʼaʼabal yaʼab páajtalil, ichil le jeʼeloʼ tiaʼan le u nuʼuktik le kʼaʼaytajoʼ.
4. ¿Baʼaxten k-ojel Jesús nuʼuktik le kʼaʼaytaj ku beetaʼal teʼ kʼiinoʼobaʼ?
4 Jesúseʼ tu yaʼaleʼ le kʼaʼaytaj yéetel le u kaʼansaʼal uláakʼ máakoʼoboʼ yaan u beetaʼal tiʼ tuláakal kaajoʼob. Tsʼoʼoleʼ tu yaʼaleʼ yaan u yantal yéetel u discípuloʼob «tak teʼ kʼiinoʼob táan u tsʼoʼokol tiʼ le yóokʼol kaabaʼ» (Mat. 28:20). Yoʼolal le baʼax tu yaʼaloʼ ku yeʼesikeʼ letiʼ nuʼuktik le kʼaʼaytaj ku beetaʼal teʼ kʼiinoʼobaʼ.
5. ¿Bix k-áantaj utiaʼal u béeytal le baʼax ku yaʼalik Salmo 110:3?
5 Jesúseʼ u yojel yaʼab máakoʼob kun kʼaʼaytik le baʼaloʼob maʼalobtak ken u beet le Reino teʼ tu tsʼook kʼiinoʼobaʼ. ¿Baʼaxten k-aʼalik leloʼ? Tumen u yojel jach yaan u béeytal le profecíaaʼ: «Le kʼiin ken a muchʼkíint a soldadoʼobeʼ, a kaajaleʼ yéetel kiʼimak óolal ken u yaʼal jeʼel u bin teʼ baʼateloʼ» (Sal. 110:3). Wa ka kʼaʼaytik le baʼaloʼob maʼalobtak ken u beet le Reinooʼ táan a wáantaj utiaʼal u béeytal le profecíaaʼ yéetel táan xan a apoyartik Jesús bey xan le esclavo chúukaʼan u yóoloʼ. U jaajileʼ táan u yúuchul kʼaʼaytaj tiʼ tuláakal yóokʼol kaab, chéen baʼaleʼ yaan kʼiineʼ maʼ chéen chʼaʼabiliʼ.
6. ¿Máakalmáak jujunpʼéel tiʼ le baʼaloʼob k-muʼyajtikoʼ?
6 Junpʼéel tiʼ le baʼaxoʼob k-muʼyajtik teʼ kʼiinoʼobaʼ letiʼe u tsʼáaikuba le máakoʼob t-contraoʼ. Le apóstataʼob, le políticoʼob yéetel u nuuktakil le religiónoʼoboʼ ku yaʼalikoʼob baʼaloʼob maʼ jaajtak t-contraiʼ. Wa k-láakʼtsiloʼob, k-éet meyajoʼob yéetel le máaxoʼob kʼaj óoltmiloʼon ku creerkoʼob le baʼaxoʼob ku yaʼalaʼalaʼ maʼ xaaneʼ jeʼel u beetkoʼob tuláakal le ku páajtal utiaʼal u xuʼulul k-kʼaʼaytajeʼ bey xan utiaʼal u xuʼulul k-meyajtik Jéeoba. Tiʼ jujunpʼéel luʼumiloʼobeʼ le máaxoʼob pʼekmiloʼonoʼ ku amenazarkoʼonoʼob, ku atacarkoʼonoʼob wa hasta ku kʼalkoʼonoʼob cárcel. Chéen baʼaleʼ leloʼ k-ojliliʼ bey kun úuchloʼ tumen Jesúseʼ u yaʼalmaj: «Yaan a chʼaʼpʼektaʼaleʼex tumen tuláakal le kaajoʼob tu yoʼolal in kʼaabaʼoʼ» (Mat. 24:9). U jaajileʼ le k-pʼektaʼaloʼ ku yeʼesik táan k-seguertik u ejemplo Jesús, yéetel maʼalob yanikoʼon tu táan Jéeoba (Mat. 5:11, 12). Maʼ u tuʼubultoʼoneʼ letiʼe Kʼaasilbaʼal beetik u tsʼáaikuba le máakoʼob t-contraoʼ, chéen baʼaleʼ maʼ unaj k-sajaktaliʼ tumen letiʼeʼ mix baʼal tu táan Jesús. Yéetel u yáantaj Jesúseʼ le baʼaloʼob maʼalobtak ken u beet u Reino Diosoʼ táan u tsikbaltaʼal tiʼ tuláakal u kajnáaliloʼob le Luʼumaʼ.
7. ¿Baʼax eʼesiktech táan u béeytal le baʼax ku yaʼalik Apocalipsis 14:6, 7?
7 Uláakʼ baʼax talamkúuntik k-kʼaʼaytajeʼ letiʼe jejeláas idiomaʼob ku tʼaʼanloʼ. Chéen baʼaleʼ ichil le baʼax tsʼaʼab u yil apóstol Juan tumen Jesúsoʼ, eʼesaʼabtiʼeʼ leloʼ maʼ ken u impedirt u tsʼaʼabal ojéeltbil tiʼ tuláakal yóokʼol kaab le baʼaloʼob maʼalobtak ken u beet le Reinooʼ (xok Apocalipsis 14:6, 7). ¿Baʼax áantkoʼon kʼaʼaytaj kex jejeláas idiomaʼob ku tʼaʼanal? Junpʼéel baʼax áantkoʼoneʼ letiʼe u tsʼaʼabal teʼ sitio jw.org jejeláas publicaciónoʼob ku taal tiʼ le Bibliaoʼ. Lelaʼ ku beetaʼal ich maas tiʼ 1,000 idiomaʼob. Tsʼoʼoleʼ le Cuerpo Gobernanteoʼ tu tsʼáaj permiso utiaʼal u traducirtaʼal ich maas tiʼ 700 idiomaʼob le libro Disfrutart le kuxtaloʼ, lelaʼ ku meyajtoʼon utiaʼal u tsʼaʼabal xook teʼ kʼiinoʼobaʼ. Beetaʼan xan videoʼob utiaʼal le kóokoʼoboʼ bey xan publicaciónoʼob ich braille utiaʼal le chʼóopoʼoboʼ. Beyoʼ tuláakal máak jeʼel u páajtal u yojéeltik le baʼaloʼob maʼalobtak ken u beet le Reinooʼ. Jeʼex k-ilkoʼ le profecíaʼob ku yaʼalik le Bibliaoʼ táan u béeytaloʼob teʼ kʼiinoʼob kuxlikoʼonaʼ, tumen máakoʼob ku tʼankoʼob «tuláakal le idiomaʼob yaan teʼ naciónoʼoboʼ» táan u kankoʼob le «idioma jach limpio» ku kaʼansik le Bibliaoʼ (Zac. 8:23; Sof. 3:9). Tuláakal le jeʼelaʼ ku béeytal k-beetik chéen tumen táan k-nuʼuktaʼal tumen Jesucristo.
8. ¿Baʼax utsiloʼob tsʼoʼok u taasik le kʼaʼaytaj ku beetaʼal teʼ kʼiinoʼobaʼ?
8 Bejlaʼeʼ ichil u kaajal Jéeobaeʼ yaan maas tiʼ 8 millones máakoʼob ku taaloʼob tiʼ 240 luʼumiloʼob. ¡Tsʼoʼoleʼ cada añoeʼ táan u yokjaʼ u milesil máakoʼob! Chéen baʼaleʼ baʼax maas jatsʼutseʼ letiʼe bix u bin u yantaltiʼob «le túumben modos» ku yaʼalik le Bibliaoʼ (Col. 3:8-10). Yaʼab tiʼ letiʼobeʼ xuʼul u núupkʼebantaloʼob, u beetik u kʼasaʼaniloʼob, u paktikoʼob jelaʼan u maasil yéetel u apoyarkoʼob le luʼumil tuʼux u taaloʼoboʼ. Jeʼex k-ilkoʼ jach táan u béeytal le profecía ku yaʼalik Isaías 2:4, ku yaʼalik: «Mix kun seguer u kankoʼob baʼateʼel». Yoʼolal le túumben modos ku yantaltoʼonoʼ le máakoʼoboʼ ku taaktal u yookloʼob ichil u kaajal Dios yéetel ku chíikpajal táan k-seguertik Jesucristo le máax nuʼuktikoʼonoʼ (Juan 13:35; 1 Ped. 2:12). Tuláakal le jeʼelaʼ ku béeytal k-beetik chéen tumen táan k-áantaʼal tumen Jesús.
JESÚSEʼ KU YÉEYIK LE ESCLAVO CHÚUKAʼAN U YÓOLOʼ
9. Jeʼex u yaʼalik Mateo 24:45-47, ¿baʼax tu yaʼalaj Jesús kun úuchul teʼ tu tsʼook kʼiinoʼobaʼ?
9 (Xok Mateo 24:45-47). Jesúseʼ tu yaʼaleʼ tu tsʼook kʼiinoʼobeʼ yaan u kʼubéentik tiʼ juntúul «esclavo chúukaʼan u yóol yéetel yaan u naʼat» ka u tsʼáa le janal espiritual jach tu yorailoʼ. Le baʼax tu yaʼalaj Jesúsoʼ ku yeʼesikeʼ ku páaʼtaʼaleʼ le esclavooʼ jach u tsʼaamaj u yóol meyaj teʼ kʼiinoʼobaʼ. U jaajileʼ jach letiʼe baʼax ku beetik le esclavooʼ. Bejlaʼeʼ Jesúseʼ u tsʼaamaj junjaats sukuʼunoʼob yéeyaʼanoʼob utiaʼal u tsʼáaikoʼobtoʼon le janal espiritual jach tu yorailoʼ bey xan tiʼ le máaxoʼob ku káajal u natsʼkubaʼob tiʼ u kaajal Diosoʼ. Le sukuʼunoʼob yéeyaʼanoʼobaʼ maʼatech u tuklikoʼob wa letiʼob u yuumil u fe le sukuʼunoʼoboʼ (2 Cor. 1:24). U yojloʼobeʼ chéen Jesucristo «u nojchil» u kaajal Dios yéetel letiʼ nuʼuktik (Isa. 55:4).
10. Tiʼ le libroʼob ku chíikpajal teʼ dibujoʼoboʼ, ¿máakalmáak áantech utiaʼal u káajal a meyajtik Jéeoba?
10 Desde 1919, le esclavo chúukaʼan u yóoloʼ tsʼoʼok u jóoʼsik jejeláas publicaciónoʼob utiaʼal u tsʼáaik u túunt le máakoʼob le kiʼikiʼ janal espiritualoʼ. Tu añoil 1921, le esclavo chúukaʼan u yóoloʼ utiaʼal u kaʼansik tiʼ le máakoʼob le baʼaloʼob kʼaʼanaʼantak ku kaʼansik le Bibliaoʼ tu jóoʼsaj ich inglés le libro El Arpa de Dios. Jeʼex máanik le kʼiinoʼoboʼ le esclavooʼ tu jóoʼsaj uláakʼ libroʼob. ¿Máakalmáak áantech utiaʼal a yaabiltik le k-Taata yaan teʼ kaʼanoʼ? Maʼ xaaneʼ tu yáantech junpʼéel tiʼ leloʼobaʼ: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Baʼax jach tu jaajil ku kaʼansik le Bibliaoʼ? wa ¿Baʼax k-kanik teʼ Bibliaoʼ? Wa maʼ xaaneʼ le túumben libro ku kʼaabaʼtik Disfrutart le kuxtaloʼ. Tuláakal le libroʼobaʼ jóoʼsaʼaboʼob utiaʼal u yáantkoʼonoʼob k-beet discípuloʼob, beetaʼaboʼob jach teʼ súutuk kʼaʼabéettoʼonoʼ.
11. ¿Baʼaxten tiʼ tuláakloʼon kʼaʼabéet le chichich janal espiritualoʼ?
11 Maʼ chéen le máaxoʼob ku xookoʼob t-éetel kʼaʼabéettiʼob le chichich janal espiritualoʼ, baʼaxeʼ tak tiʼ toʼon. Le apóstol Pablooʼ tu tsʼíibtaj: «Le chichich janaloʼ utiaʼal nukuch máakoʼob». Tsʼoʼoleʼ tu yaʼaleʼ le máaxoʼob ku tsʼáaikoʼob ichil u kuxtaloʼob le baʼaxoʼob ku kankoʼoboʼ «jeʼel u páajtal u kʼaj óoltikoʼob baʼax maʼalob bey xan baʼax maʼ maʼalobeʼ» (Heb. 5:14). Teʼ kʼiinoʼobaʼ le máakoʼoboʼ jach tsʼoʼok u kʼastal u kuxtaloʼob, le oʼolal yaan kʼiineʼ maʼ chéen chʼaʼabil k-beetik le baʼax ku yaʼalik Jéeobaoʼ. Chéen baʼaleʼ u maʼalobileʼ Jesúseʼ ku yilik ka yanaktoʼon le janal espiritual ku yáantkoʼon k-beet baʼax maʼaloboʼ. Tiʼ Jesúseʼ ku meyaj le esclavo chúukaʼan u yóol utiaʼal u tsʼáaiktoʼon le janal espiritualoʼ.
12. Jeʼex tu beetil Jesúseʼ, ¿baʼaxoʼob tsʼoʼok k-beetik utiaʼal k-alabartik u kʼaabaʼ Dios?
12 Jeʼex tu beetil Jesúseʼ toʼon xaneʼ k-alabartik Dios yéetel le baʼaxoʼob k-beetkoʼ (Juan 17:6, 26). Por ejemploeʼ tu añoil 1931, t-chʼaʼtuklaj k-kʼaabaʼtik u testigoʼob Jéeoba. Bey úuchik k-eʼesik jach importante k-ilik k-kʼaj óoltaʼal yéetel u kʼaabaʼ k-Taata yaan teʼ kaʼanoʼ (Isa. 43:10-12). Tu mesil octubre teʼ año jeʼeloʼ, u kʼaabaʼ Dioseʼ káaj u chíikpajal tu yáax páginail le revista U Pʼíich Tulumil Kanan ich inglésoʼ. Tsʼoʼoleʼ teʼ Biblia Túumben Luʼumoʼ tsʼoʼok u tsʼaʼabal u kʼaabaʼ Dios teʼ tuʼux unaj u chíikpajloʼ, kex uláakʼ religiónoʼob maʼatech u meyajtiʼob u kʼaabaʼ Jéeoba le kéen u traducirtoʼob le Bibliaoʼ.
JESÚSEʼ KU NUʼUKTIK U DISCÍPULOʼOB
13. ¿Baʼax eʼesiktech táan u nuʼuktaʼal «le esclavo chúukaʼan u yóol yéetel yaan u naʼat» tumen Jesúsoʼ? (Juan 6:68).
13 Tiʼ Jesúseʼ tsʼoʼok u meyaj «le esclavo chúukaʼan u yóol yéetel yaan u naʼat» utiaʼal u muchʼik u discípuloʼob yaan tiʼ tuláakal yóokʼol kaab utiaʼal u adorarkoʼob Jéeoba jeʼex unajoʼ. ¿Yaan wa baʼax jeʼel u páajtal u keʼetel yéetel u kaajal Dioseʼ? Minaʼan. Maʼ xaaneʼ techeʼ ka wuʼuyikaba jeʼex apóstol Pedro le ka tu yaʼalaj tiʼ Jesús: «¿Máax yiknal jeʼel k-bineʼ? Techeʼ ka kaʼansik baʼaloʼob ku bisik máak tiʼ kuxtal minaʼan u xuul» (Juan 6:68). ¿Tsʼoʼok wa a máansik ta tuukul tuʼux yanoʼon kaʼach wa minaʼanoʼon ichil u kaajal Jéeobaeʼ? Jesúseʼ tsʼoʼok u nuʼuktik u kaajal Jéeoba utiaʼal u tsʼáaiktoʼon le janal espiritualoʼ yéetel utiaʼal u yeʼesiktoʼon bix jeʼel k-kaʼansaj maʼalobeʼ. Tsʼoʼoleʼ tsʼoʼok xan u yáantkoʼon utiaʼal u yantaltoʼon «le túumben modos» ku kiʼimakkúuntik u yóol Jéeobaoʼ (Efe. 4:24).
14. Tu kʼiiniloʼob le pandemia COVID-19, ¿bix tsʼoʼok u yáantkech a wantal ichil u kaajal Jéeoba?
14 Jesúseʼ jach maʼalob u nuʼuktikoʼon. Leloʼ bey úuchik k-ilik le ka káaj le pandemia COVID-19. Yaʼab máakoʼobeʼ maʼ tu kaxtik kaʼach baʼax u beetoʼob, chéen baʼaleʼ Jesúseʼ tu nuʼuktaj u kaajal Dios utiaʼal u yaʼaliktoʼon bix unaj k-kanáantikba. Aʼalaʼab ka meyajnaktoʼon cubrebocas le kéen yanakoʼon tuʼux yaan máakoʼob yéetel maʼ k-jach náatsʼal tiʼ u maasil. Tiʼ le ancianoʼoboʼ kʼaʼajsaʼab ka u tʼanoʼob mantatsʼ le sukuʼunoʼoboʼ yéetel ka u yil u yáantkoʼob yéetel baʼax ku kʼaʼabéettaltiʼob (Isa. 32:1, 2). Tsʼoʼoleʼ u informeʼob le Cuerpo Gobernanteoʼ ku líiʼskoʼob k-óol yéetel ku yaʼaliktoʼon uláakʼ baʼaloʼob unaj k-beetik.
15. ¿Baʼax uláakʼ tsʼoʼok u yaʼaliktoʼon u kaajal Jéeoba tu kʼiiniloʼob le COVID-19, yéetel baʼax utsil tsʼoʼok u taasik leloʼ?
15 Tu kʼiiniloʼob le COVID-19, tsʼoʼok xan u yaʼalaʼaltoʼon bix unaj k-beetik le muchʼtáambaloʼoboʼ bey xan le kʼaʼaytajoʼ. Tu séebaʼanileʼ káaj k-beetik muchʼtáambaloʼob yéetel asambleaʼob tiʼ videoconferencia, tsʼoʼoleʼ le kʼaʼaytajoʼ maas joʼopʼ k-beetik yéetel carta wa yéetel teléfono. Jéeobaeʼ tsʼoʼok u bendecirtik le baʼaxoʼob k-beetkoʼ. Yaʼab u najiloʼob Beteleʼ tu yaʼaloʼob tsʼoʼok u yaʼabtal le j-kʼaʼaytajoʼob teʼ tuʼux ku nuʼuktajoʼoboʼ. Tu kʼiiniloʼob le COVID-19, yaʼab sukuʼunoʼobeʼ tsʼoʼok u yantaltiʼob jatsʼuts experienciaʼob (ilawil le cuadro « Jéeoba bendecirtik le kʼaʼaytajoʼ»).
16. ¿Baʼaxten maʼalob ka k-il bix u nuʼuktikoʼon Jesús?
16 Maʼ xaaneʼ jujuntúul sukuʼunoʼobeʼ joʼopʼ u tuklikoʼob jach ku píitmáan u kaajal Dios le ka tu yaʼalaj bix unaj u kanáantkuba máak tu kʼiiniloʼob le COVID-19. Chéen baʼaleʼ yaʼab u téenel tsʼoʼok u chíikpajal jach maʼalob le nuʼuktaj ku tsʼaʼabaltoʼonoʼ (Mat. 11:19). Le kéen k-il bix u nuʼuktikoʼon Jesús yéetel yaabilajeʼ k-tsʼáaik cuentaeʼ kex jeʼel baʼaxak ka taalak maas táanileʼ, letiʼ yéetel Jéeobaeʼ maʼ ken u pʼatoʼonoʼob (xok Hebreos 13:5, 6).
17. ¿Bix a wuʼuyikaba ikil a meyaj yáanal u nuʼuktaj Jesús?
17 ¡Jach kiʼimak k-óol k-meyaj yáanal u nuʼuktaj Jesús! Toʼoneʼ tiaʼanoʼon ichil u kaajal Dioseʼ. Le kaajaʼ maʼatech u jatskuba yoʼolal tuʼux u taal máak, yoʼolal baʼax suukaʼan tiʼ máak wa yoʼolal baʼax idiomail ku tʼanik. Maʼalob k-tséentaʼal yéetel janal espiritual yéetel ku tsʼaʼabaltoʼon tuláakal baʼax kʼaʼabéet utiaʼal k-kʼaʼaytaj. Tsʼoʼoleʼ cada juntúul tiʼ toʼoneʼ sigue u yilik u búukintik le túumben modosoʼ bey xan u yaabiltik u maasil. ¿Máasaʼ kiʼimak k-óol ikil u nuʼuktikoʼon Jesús?
KʼAAY 16 Nojbeʼenkúunteʼex Jéeoba yoʼolal u Paal
^ Bejlaʼeʼ u millonesil xiiboʼob, koʼoleloʼob yéetel paalaloʼobeʼ kiʼimak u yóoloʼob u kʼaʼaytikoʼob le baʼaloʼob maʼalobtak ken u beet u Reino Diosoʼ. ¿Tiaʼanech wa ichiloʼobeʼ? Wa tiaʼanecheʼ u kʼáat u yaʼaleʼ táan a chaʼik u nuʼuktikech Jesucristo. Teʼ xookaʼ yaan k-ilik baʼaxoʼob eʼesik Jesús nuʼuktik le kʼaʼaytaj ku beetaʼal teʼ kʼiinoʼobaʼ. Leloʼ yaan u péeksikoʼon utiaʼal u seguer k-meyajtik Jéeoba yáanal u nuʼuktaj Jesucristo.
