1. Le baʼaxoʼob ku yúuchul teʼ kʼiinoʼobaʼ, ¿baʼax ku yeʼesiktoʼon, yéetel baʼaxten k-aʼalik leloʼ?

 ¿BIX a wuʼuyikaba yoʼolal le baʼaxoʼob ku yúuchloʼob teʼ kʼiinoʼobaʼ? ¿Ka creertik wa yaan u mejorar? Ichil yaʼab familiaʼobeʼ tsʼoʼok u pʼáatal minaʼan yaabilaj. Bejlaʼeʼ le máakoʼoboʼ maas séeb u beetkoʼob loob yéetel ku kaxtik chéen u yutsiloʼob. Yaʼab máakoʼobeʼ ku chan difíciltal u confiaroʼob tiʼ le máaxoʼob tsʼaʼan autoridad tiʼoboʼ. Pero u jaajileʼ tuláakal le baʼaloʼobaʼ ku yeʼesiktoʼoneʼ yaan u kʼuchul u kʼiinil u mejorar tuláakal baʼal. ¿Baʼaxten k-aʼalik leloʼ? Tumen le máakoʼoboʼ táan u beetkoʼob le baʼaxoʼob ku yaʼalik 2 Timoteo 3:1 tak 5 kun ilbil teʼ ‹tu tsʼook kʼiinoʼobaʼ›. Tuláakal le máakoʼob uts u puksiʼikʼaloʼoboʼ ku tsʼáaikoʼob cuenta táan u béeychajal le profecíaaʼ. Ikil u béeytaleʼ ku yeʼesikeʼ Jesucristoeʼ tsʼoʼok u kʼuchul u beetuba u Reyil u Reino Dios. Chéen baʼaleʼ beoraaʼ yaan k-xakʼaltik uláakʼ profecíaʼob tsʼoʼok u béeytaloʼob yéetel ku muʼukʼaʼankúuntikoʼob k-fe.

2. ¿Baʼax ken k-xakʼalt teʼ xookaʼ, yéetel baʼax ken u yáantoʼon k-ile? (Tsol baʼax ku chíikpajal teʼ dibujo yaan tu yáax páginail le revistaaʼ).

² ¿Baʼax ken k-xakʼalt teʼ xookaʼ? Yáaxeʼ yaan k-xakʼaltik junpʼéel profecía ken u yáantoʼon k-naʼat baʼax kʼiin ka káaj u gobernar u Reino Dios. U kaʼapʼéeleʼ yaan k-xakʼaltik jujunpʼéel profecíaʼob ken u yáantoʼon k-il táan u beetik u Reyil Jesús tiʼ u Reino Dios. Tu tsʼookeʼ yaan k-xakʼaltik profecíaʼob ku yeʼeskoʼob bix kun xuʼulsbil tiʼ le máaxoʼob ku líikʼloʼob tu contra u  Reino Diosoʼ. Yaan u yáantkoʼon k-ileʼ tuláakal le profecíaʼobaʼ ku kʼaxkubaʼob tubeel jeʼex u kʼaxkuba junpʼéel rompecabezaeʼ yéetel natsʼaʼan u kʼiinil le xuʼulsajil u yaʼalmaj Jéeobaoʼ.

3. Daniel 7:13, 14, ¿baʼax ku yeʼesik yoʼolal le máax ken u beet u Reyil tiʼ u Reino Diosoʼ?

³ Le profecía yaan tiʼ Daniel 7:13 yéetel 14, ku yeʼesikeʼ Jesucristoeʼ jach maʼalob utiaʼal ka u beetuba Reyil tiʼ u Reino Dios. Ku yaʼalikeʼ u kajnáaliloʼob le luʼumoʼoboʼ yaan u tsʼáaikubaʼob yáanal u páajtalil Jesús yéetel maʼ kun jeelintbil tumen mix máak. ¿Baʼax kʼiin kaʼach ken káajak u gobernar Jesús? Uláakʼ junpʼéel profecía yaan tu libroil Danieleʼ tu yaʼaleʼ yaan u káajal u gobernar tu tsʼoʼokbal siete tiempos. Koʼoneʼex ilik bix jeʼel u páajtal k-ojéeltik jach baʼax kʼiin ka káaj u gobernar Jesúseʼ.

4. ¿Bix u yáantkoʼon Daniel 4:10-17 k-ojéelt baʼax kʼiin ka káaj u gobernar Jesús? (Ilawil xan le notaoʼ).

⁴(Xok Daniel 4:10-17). Le ‹siete tiempos› ku yaʼalik le profecíaoʼ ku xáantal 2,520 años. Lelaʼ káaj u xoʼokol tu añoil 607 táanil tiʼ u taal Jesús, teʼ kʼiinoʼob jeʼeloʼ le babilonioʼoboʼ tu luʼsoʼob le u tsʼook rey yaan tu trono Jéeoba tu kaajil Jerusalénoʼ. Yéetel tsʼoʼok u xoʼokol tu añoil 1914, le ka tsʼaʼab u beet Jesús u Reyil tiʼ u Reino Diosoʼ tumen letiʼ «le máax yaan u derechoil u kʼamkoʼ» (Eze. 21:25-27). *

5. Aʼal junpʼéel utsil ku taasik k-naʼatik u profecíail le ‹siete tiemposoʼ›.

⁵ ¿Bix u yáantkoʼon le profecíaaʼ? Ku yáantkoʼon k-naʼat Jéeobaeʼ ku béeykuntik tuláakal le baʼaxoʼob u prometermaj jach teʼ kʼiin u yaʼalmoʼ. Letiʼeʼ tu yaʼalaj baʼax kʼiin ken káajak u gobernar u Reino, le ka kʼuch le kʼiin jeʼeloʼ tu béeykuntaj. Leloʼ ku yeʼesiktoʼoneʼ bey xan ken u beetil yéetel u maasil profecíaʼob u yaʼalmoʼ. Le oʼolal jeʼel u páajtal k-aʼalikeʼ u kʼiinil Jéeobaeʼ «¡yaan u kʼuchul jach tu yorail!» (Hab. 2:3).

6. 1) ¿Baʼaxoʼob eʼesik tsʼoʼok u káajal u gobernar Jesús teʼ kaʼanoʼ? 2) ¿Bix u yeʼesik Apocalipsis 6:2-8 jach jaaj leloʼ?

⁶ Tu tsʼook u kʼiiniloʼob u kuxtal Jesús way Luʼumeʼ tʼaanaj tiʼ jujunpʼéel baʼaloʼob kun eʼesik tiʼ u discípuloʼob tsʼoʼok u káajal u gobernar teʼ kaʼanoʼ. Letiʼeʼ tu yaʼaleʼ «jejeláas tuʼux» way yóokʼol kaabeʼ yaan u yantal guerraʼob, wiʼijil, terremotoʼob bey xan pakʼbeʼen kʼojaʼaniloʼob, jeʼex le COVID-19. Le baʼaloʼobaʼ letiʼe ‹señaloʼob› ku yeʼeskoʼob way yaan Cristo jeʼex u yaʼalik le Bibliaoʼ (Mat. 24:3, 7; Luc. 21:7, 10, 11). Tsʼoʼoleʼ maas tiʼ 60 años suunak Jesús teʼ kaʼanoʼ tu yaʼalaj tiʼ apóstol Juan jach tu jaajil yaan u yúuchul le baʼaloʼobaʼ (xok Apocalipsis 6:2-8). Tuláakal le baʼaxoʼob tu yaʼalaj Jesúsoʼ tsʼoʼok u béeytaloʼob desde tu añoil 1914, le ka káaj u gobernar teʼ kaʼanoʼ.

7. ¿Baʼaxten desde ka káaj u gobernar Jesús teʼ kaʼanoʼ maas yaachaj le kuxtal way Luʼumeʼ?

⁷ ¿Baʼaxten ka joʼopʼ u gobernar Jesúseʼ maas yaachaj le kuxtal way Luʼumoʼ? Apocalipsis 6:2, ku yáantkoʼon k-naʼat baʼaxten. Ku yaʼalikeʼ yáax baʼax tu beetaj Jesús le ka tsʼaʼab u beet u reyil teʼ kaʼanoʼ junpʼéel guerra. ¿Máax contra baʼatelnaji? Tu contra le Kʼaasilbaʼal yéetel le demonioʼoboʼ. Le capítulo 12 tiʼ Apocalipsisoʼ ku yaʼalikeʼ perdernaj le Kʼaasilbaʼaloʼ, le oʼolal letiʼ yéetel u demonioʼobeʼ píikchʼintaʼaboʼob way Luʼumeʼ. Yoʼolal leloʼ jach pʼujaʼan yéetel  táan u beetik u kʼasaʼanil. Le Bibliaoʼ ku yaʼalik: «¡Óotsil tiʼ le luʼumoʼ bey xan tiʼ le kʼáaʼnáaboʼ!» (Apo. 12:7-12).

8. ¿Baʼax utsil ku taasik k-ojéeltik táan u béeytal le profecíaʼob ku tʼaanoʼob tiʼ u Reino Diosoʼ?

⁸ ¿Bix u yáantkoʼon le profecíaʼobaʼ? Le baʼaloʼob ku yúuchul teʼ kʼiinoʼobaʼ yéetel le bix u kuxtal le máakoʼoboʼ ku yeʼeskoʼob tsʼoʼok u káajal u gobernar Jesús teʼ kaʼanoʼ. Le oʼolal maʼatech k-sen chiʼichnaktal le kéen k-il bix u pʼektikuba le máakoʼoboʼ yéetel bix u kaxtik chéen u yutsiloʼob. Baʼaxeʼ ku kʼaʼajaltoʼon táan u béeykuntkoʼob le baʼax ku yaʼalik le Bibliaoʼ. ¡Tuláakal baʼax eʼesik táan u gobernar u Reino Dios teʼ kaʼanoʼ! (Sal. 37:1). Tsʼoʼoleʼ k-ojleʼ jeʼex u bin u náatsʼal u kʼiinil le Armagedónoʼ bey kun bin u maas kʼastal le kuxtal way yóokʼol kaabaʼ (Mar. 13:8; 2 Tim. 3:13). K-Taata yaan teʼ kaʼanoʼ jach u yaabiltmoʼon yéetel ku yáantkoʼon k-naʼat baʼaxten jach yaj le kuxtal teʼ kʼiinoʼobaʼ. ¿Máasaʼ jach k-agradecertik le baʼax ku beetik t-oʼolaloʼ?

9. 1) ¿Baʼax ku yaʼalik Daniel 2:28, 31-35 yoʼolal le u tsʼook potencia mundialoʼ? 2) ¿Baʼax kʼiin ka chíikpaji?

⁹ (Xok Daniel 2:28, 31-35). Teʼ kʼiinoʼobaʼ táan k-ilik u béeytal junpʼéel profecía tu yaʼalaj Daniel. Tiʼ junpʼéel wayakʼeʼ Nabucodonosoreʼ tu yilaj «baʼax kun úuchul teʼ tu tsʼook kʼiinoʼob» kéen káajak u gobernar Jesúsoʼ. Juntúul tiʼ u enemigoʼob Jesús way Luʼumeʼ letiʼe u tsʼook potencia mundial ku yaʼalik le Bibliaoʼ. Teʼ kʼiinoʼobaʼ tsʼoʼok u yilaʼal máax le u tsʼook potenciaoʼ. Letiʼe ku chíikbesaʼal tumen ‹u yookoʼob de fierro yéetel de kʼat› le imagen tu wayakʼtaj Nabucodonosoroʼ. Lelaʼ chíikpaj le táan le Primera Guerra Mundialoʼ, le ka tu  nupuba le Reino Unido yéetel Estados Unidosoʼ. Le nuxiʼ imagenoʼ ku yeʼesik baʼaxten jelaʼan le u tsʼook potencia tiʼ u maasil tsʼoʼok u yantaloʼoboʼ.

10. 1) ¿Baʼax tu yaʼalaj u profecíail Daniel yoʼolal le potencia mundial formartaʼan tumen Reino Unido yéetel Estados Unidosoʼ? 2) ¿Tiʼ baʼax unaj k-kanáantikba? (Ilawil le cuadro « ¡Kanáantaba tiʼ le kʼatoʼ!»).

¹⁰ Koʼoneʼex ilik baʼaxten jelaʼan le potencia formartaʼan tumen Reino Unido yéetel Estados Unidosoʼ. Yáaxeʼ tumen ku representartaʼal tumen kaʼapʼéel baʼal: fierro yéetel kʼat. Chéen baʼaleʼ le u maasil potenciaʼoboʼ ku representartaʼaloʼob tumen junpʼéeliliʼ baʼal jeʼex oro wa plataoʼ. Tsʼoʼoleʼ le kʼatoʼ ku representartik «u paalal le máakoʼoboʼ» wa u kajnáaliloʼob le yóokʼol kaabaʼ (Dan. 2:43, nota). Jeʼex k-ojliloʼ tiʼ le u tsʼook potenciaaʼ ku chan difíciltal u beetik le baʼax u kʼáatoʼ tumen le máakoʼoboʼ ku beetkoʼob protestaʼob, sindicatoʼob, campañaʼob utiaʼal u defendertik u derechosoʼob bey xan yoʼolal le baʼax ku beetkoʼob le táan le votaciónoʼoboʼ.

11. ¿Baʼax uláakʼ eʼesiktoʼon kuxaʼanoʼon tu tsʼook kʼiinoʼob?

¹¹ Uláakʼ baʼax eʼesik jelaʼan le u tsʼook potencia tiʼ u maasiloʼ tumen letiʼeʼ ku representartaʼal tumen u yook le nuxiʼ imagenoʼ. Bey túunoʼ le potencia formartaʼan tumen le Reino Unido yéetel Estados Unidosoʼ, letiʼe u tsʼook potencia u yaʼalmaj le Biblia kun antaloʼ. Letiʼ yéetel u maasil gobiernoʼoboʼ jach taʼaytak u xuʼulsaʼaltiʼob tumen u gobierno Dios teʼ Armagedónoʼ (Apo. 16:13, 14, 16; 19:19, 20). *

12. ¿Máakalmáak le uláakʼ pruebaʼob ku yaʼalik u profecíail Daniel ku yeʼesik kuxaʼanoʼon tu tsʼook kʼiinoʼoboʼ, yéetel baʼaxten jach ku kiʼimakkúuntik k-óol?

¹² ¿Bix u yáantkoʼon le profecíaaʼ? U profecíail Danieleʼ ku tsʼáaiktoʼon uláakʼ pruebaʼob eʼesik kuxaʼanoʼon tu tsʼook kʼiinoʼob. Walajki maas tiʼ 2,500 añosaʼ tu yaʼalaj yaan u lúubul Babilonia, yéetel yaan u yantal uláakʼ kanpʼéel potenciaʼob ken u afectartoʼob u kaajal Dios. Tsʼoʼoleʼ tu yeʼeseʼ le potencia formartaʼan tumen Reino Unido yéetel Estados Unidosoʼ letiʼe u tsʼook potencia kun antaloʼ. Lelaʼ jach ku kiʼimakkúuntik k-óol, tumen k-ojleʼ maʼ kun xáantaleʼ u Reino Dioseʼ yaan u luʼsik tuláakal le gobiernoʼoboʼ yéetel chéen letiʼ ken u gobernart le Luʼumaʼ (Dan. 2:44).

13. 1) ¿Máax le u ‹ocho reyoʼ›, yéetel máaxoʼob le «diez reyoʼob» ku yaʼalik Apocalipsis 17:9-12? 2) ¿Bix tsʼoʼok u béeytal le profecíaaʼ?

¹³ (Xok Apocalipsis 17:9-12). Le Primera Guerra Mundialoʼ jach nojoch loob tu beetaj, leloʼ tu béeykuntaj uláakʼ profecíaʼob ku tʼaan tiʼ u tsʼook kʼiinoʼoboʼ. Le gobernanteʼoboʼ tumen u kʼáatoʼob ka yanak jeetsʼelil tiʼ tuláakal yóokʼol kaabeʼ tu formartoʼob le Sociedad de Naciones tu mesil enero tiʼ 1920. Chéen baʼaleʼ jeelintaʼab tumen le Naciones Unidas tu mesil octubre tiʼ 1945. Le Bibliaoʼ ku yaʼalikeʼ letiʼeʼ «juntúul rey xan, letiʼ u ochoil». Chéen baʼaleʼ maʼ junpʼéel potencia mundial jeʼex u maasiloʼ, tumen le páajtalil yaantiʼoʼ letiʼe gobiernoʼob tsʼáaiktiʼoʼ. Tiʼ le gobiernoʼobaʼ teʼ Bibliaoʼ ku yaʼalaʼaltiʼob «diez reyoʼob».

14, 15. 1) ¿Baʼax ku yaʼalik Apocalipsis 17:3-5 yoʼolal «le Nojoch Babiloniaoʼ»? 2) Yaʼab tiʼ le máaxoʼob apoyartik le religiónoʼob maʼatech u kaʼanskoʼob u jaajiloʼ, ¿baʼax ku beetkoʼob teʼ kʼiinoʼobaʼ?

¹⁴ (Xok Apocalipsis 17:3-5). Jéeobaeʼ tu tsʼáaj u yil apóstol Juan juntúul koʼolel chéen bey u máan ku kʼaabaʼtik «le Nojoch Babiloniaoʼ». Le koʼolelaʼ ku chíikbesik tuláakal le religiónoʼob maʼatech u kaʼanskoʼob u jaajiloʼ. ¿Bix tsʼoʼok u béeychajal le baʼax tu yilaj apóstol Juanoʼ? Le religiónoʼob maʼatech u kaʼanskoʼob u jaajiloʼ úuch joʼopʼok u apoyarkoʼob le  baʼax ku beetik le gobiernoʼoboʼ. Chéen baʼaleʼ Jéeobaeʼ maʼ kun xáantaleʼ yaan u tsʼáaik tu puksiʼikʼal le gobiernoʼob «ka u tsʼoʼokbesoʼob le baʼax u tukultmoʼ». Le kéen tsʼoʼokkeʼ le «diez reyoʼob» wa le gobiernoʼoboʼ yaan u líikʼloʼob tu contra le religiónoʼob maʼatech u kaʼanskoʼob u jaajiloʼ yéetel yaan u xuʼulskoʼobtiʼob (Apo. 17:1, 2, 16, 17).

¹⁵ ¿Bix k-ojéeltik natsʼaʼan u kʼiinil u xuʼulsaʼal tiʼ le Nojoch Babiloniaoʼ? Junpʼéel baʼax kun áantkoʼon k-núuk le kʼáatchiʼaʼ letiʼe ka kʼaʼajaktoʼoneʼ junpʼéel tiʼ le baʼaxoʼob kanáantik kaʼach le u yúuchben kaajil Babiloniaoʼ letiʼe u taamkach jaʼil le Río Éufratesoʼ. U libroil Apocalipsiseʼ ku yaʼalikeʼ le u millonesil máakoʼob apoyartik le Nojoch Babiloniaoʼ beyoʼob ‹jaʼobeʼ› (Apo. 17:15). Chéen baʼaleʼ ku yaʼalik xaneʼ le jaʼoboʼ yaan u tijloʼob. Leloʼ u kʼáat u yaʼaleʼ le religiónoʼob maʼatech u kaʼanskoʼob u jaajiloʼ yaan u xuʼulul u apoyartaʼaloʼob tumen yaʼab máakoʼob (Apo. 16:12). Teʼ kʼiinoʼobaʼ táan u béeytal le profecíaaʼ. Yaʼab máakoʼobeʼ tsʼoʼok u jóokʼloʼob ichil le religiónoʼob maʼatech u kaʼanskoʼob u jaajiloʼ yéetel tsʼoʼok u binoʼob táanxel tuʼux utiaʼal u kaxtikoʼob áantaj.

16. ¿Baʼax utsiloʼob ku taasiktoʼon k-naʼatik le profecíaʼob ku tʼaanoʼob tiʼ u formartaʼal le Naciones Unidas yéetel u xuʼulsaʼal tiʼ le Nojoch Babiloniaoʼ?

 ¹⁶ ¿Bix u yáantkoʼon le profecíaʼobaʼ? Le úuchik u formartaʼal le Naciones Unidas yéetel le u pʼáatal maʼ tu jach apoyartaʼal le religiónoʼob maʼatech u kaʼanskoʼob u jaajiloʼ ku yeʼeskoʼob kuxaʼanoʼon tu tsʼook kʼiinoʼob. Jeʼex k-ilkoʼ «le jaʼob» kanáantik le Nojoch Babiloniaoʼ táan u tijil, chéen baʼaleʼ maʼ letiʼe baʼax ken u beet u xuʼulultiʼoʼ. Tumen jeʼex tsʼoʼok k-ilkoʼ Jéeobaeʼ yaan u tsʼáaik tu puksiʼikʼal le «diez reyoʼob» wa le gobiernoʼob apoyartik le Naciones Unidas utiaʼal «ka u tsʼoʼokbesoʼob le baʼax u tukultmoʼ». Le gobiernoʼoboʼ chéen kéen u téek xuʼulsoʼob tiʼ le religiónoʼob maʼatech u kaʼanskoʼob u jaajiloʼ (Apo. 18:8-10). * Leloʼ yaan u beetik u jaʼakʼal u yóol tuláakal u kajnáaliloʼob yóokʼol kaab, yéetel maʼ xaaneʼ leloʼ yaan u taasik problemas. Chéen baʼaleʼ toʼon táan k-meyajtik Jéeobaeʼ yaan kaʼapʼéel baʼax kun beetik u jach kiʼimaktal k-óol. Yáaxeʼ le religiónoʼob maʼatech u kaʼanskoʼob u jaajiloʼ yaan u xuʼulsaʼaltiʼob utiaʼal mantatsʼ. U kaʼapʼéeleʼ natsʼaʼan u kʼiinil k-jáalkʼabtaʼal jeʼex u yaʼalik le Bibliaoʼ (Luc. 21:28).

17, 18. 1) ¿Baʼax unaj k-beetik utiaʼal k-muʼukʼaʼankúuntik k-fe? 2) ¿Tiʼ baʼax ken k-tʼaan teʼ tuláakʼ xookoʼ?

¹⁷ Profeta Danieleʼ tu yaʼalaj: «Le u jaajil kʼaj óolaloʼ yaan u sen yaʼabtal». Leloʼ bey tsʼoʼok u yúuchloʼ, tumen bejlaʼeʼ k-naʼatik tubeel le profecíaʼob ku tʼaanoʼob tiʼ le kʼiinoʼob kuxlikoʼonaʼ (Dan. 12:4, 9, 10). Le bix u béeytal le profecíaʼobaʼ ku beetik k-maas confiar tiʼ Jéeoba yéetel tiʼ le baʼax ku yaʼalik le Bibliaoʼ (Isa. 46:10; 55:11). Le oʼolaleʼ unaj u seguer k-muʼukʼaʼankúuntik k-fe. ¿Bix jeʼel k-beetkeʼ? Letiʼe ka k-tsʼáa k-óol k-xakʼalxokt le Bibliaoʼ yéetel ka k-áant uláakʼ máakoʼob u natsʼubaʼob yiknal Jéeoba. Letiʼeʼ yaan u kanáantik tuláakal le máaxoʼob ku kʼubik u yóoloʼob tiʼ letiʼoʼ yéetel yaan u tsʼáaiktiʼob «jeetsʼelil» utiaʼal mantatsʼ (Isa. 26:3).

¹⁸ Teʼ tuláakʼ xookoʼ yaan k-xakʼaltik jujunpʼéel profecíaʼob ku tʼaanoʼob tiʼ u kaajal Dios teʼ tu tsʼook kʼiinoʼobaʼ. Yaan k-ilkeʼ le profecíaʼobaʼ ku kʼaxkubaʼob tubeel yéetel le uláakʼ profecíaʼob ku tʼaanoʼob tiʼ u tsʼook kʼiinoʼoboʼ. Yaan k-xakʼaltik uláakʼ baʼaxoʼob eʼesik Jesús, le máax ku gobernar teʼ kaʼanoʼ, táan u nuʼuktik u discípuloʼob teʼ kʼiinoʼobaʼ.