Jesúseʼ kʼuch u beetuba u maas nojchil le sacerdoteʼob le ka okjaʼanaj tu añoil 29. ¿Bix k-ojlil? Tumen le ka okjaʼanaj Jesúsoʼ tu yeʼesaj u kʼáat u kʼub u kuxtal jeʼex u kʼáat u Taataeʼ. Úuchik u beetik lelaʼ bey ka u kʼub u kuxtal tiʼ junpʼéel altareʼ, le altaraʼ u kʼáat u yaʼal le baʼax u kʼáat Dios ka beetaʼakoʼ (Gál. 1:4; Heb. 10:5-10). Le altaraʼ anchaj desde le ka okjaʼanaj Jesúsoʼ, le templooʼ láayliʼ xan teʼ kʼiin anchajoʼ. Le temploaʼ u kʼáat u yaʼal tuláakal le baʼax u tsʼaamaj Dios utiaʼal k-adorartik jeʼex u kʼáatoʼ (Mat. 3:16, 17; Heb. 5:4-6).

Le ka anchaj le temploaʼ kʼaʼabéetchaj xan juntúul nojoch sacerdote utiaʼal ka meyajnakiʼ. Le oʼolal Jéeobaeʼ tu yéeyaj Jesús «yéetel espíritu santo» utiaʼal ka u beet le meyajoʼ (Hech. 10:37, 38; Mar. 1:9-11). Chéen baʼaleʼ, ¿bix k-ojéeltik yéeyaʼab Jesús bey u maas nojchil le sacerdoteʼob antes tiʼ u kíimil yéetel u kaʼa kuxkíintaʼaloʼ? K-ojéeltik u núukil le kéen k-xakʼalt bix úuchik u tsʼaʼabal le nojoch sacerdoteʼob tu kʼiiniloʼob Moisésoʼ.

Le Leyoʼ ku yaʼalikeʼ chéen le u maas nojchil le sacerdoteʼob jeʼel u páajtal u yokol teʼ «Cuarto Maas Jach Santooʼ» yéetel chéen ku páajtal u beetik tu Kʼiinil u Perdonartaʼal le Kʼebanoʼoboʼ. Teʼ kʼiin jeʼelaʼ le sacerdoteoʼ ku kʼáatmáansik le cortina ku jatsik le «Cuarto Santo» tiʼ le «Cuarto Maas Jach Santooʼ» (Heb. 9:1-3, 6, 7). Tsʼoʼoleʼ chéen ku yokol le máax tsʼokaʼaniliʼ u tsʼaʼabal u beet u nojoch sacerdoteiloʼ. Bey túun xanoʼ Jesúseʼ tsʼokaʼaniliʼ u tsʼaʼabal u beet u nojoch sacerdoteil le ka kíimoʼ, beyoʼ páajchaj u «táatsʼmáan teʼ cortina» utiaʼal u páajtal u bin kuxtal teʼ kaʼanoʼ. Le cortinaoʼ letiʼe wíinklil yaan kaʼach tiʼ le ka kuxlaj way Luʼumoʼ (Heb. 10:20). Le oʼolal apóstol Pabloeʼ tu yaʼaleʼ le «ka taal Cristo, [le] maas nojoch sacerdote[oʼ]» «ook ichil le maas nojoch yéetel maas maʼalob tabernáculooʼ. Le tuʼux ookaʼ maʼ u kʼab wíinik beetmiliʼ» tumen letiʼe «kaʼanoʼ» (Heb. 9:11, 24).

Jaaj, tiʼ junpʼéeliliʼ kʼiin ka úuchi. Koʼox ilik baʼaxten k-aʼalik leloʼ. Le ka kʼuch Jesús teʼ kaʼanoʼ tu kʼubaj tiʼ u Taata u tojol u kuxtal tu tsʼáaj utiaʼal u salvartaʼal wíinikoʼ, ka túun joʼopʼ u páaʼtik u kʼaʼamaltiʼ. Le ka tu beetaj lelaʼ bey ka u yaʼal xan tiʼ u Taata ka u kʼam le túumben pacto tu beetoʼ. Kéen u kʼam túun Jéeoba u tojol u kuxtal Jesúsoʼ yaan u jéetsʼel le pactooʼ yéetel yaan xan u káajal u meyaj. Koʼox ilik bix úuchik lelaʼ.

Yáaxeʼ Jesúseʼ ook tu táan u Taata. Tsʼoʼoleʼ tu kʼubaj tiʼ u Taata u tojol u kuxtal tu tsʼáajoʼ. Tu tsʼookeʼ Jéeobaeʼ tu kʼamaj le u tojol u kuxtal Jesúsoʼ. Bey túunoʼ le túumben pactooʼ káaj u meyaj le ka tsʼoʼok u beetaʼal le óoxpʼéel baʼaloʼobaʼ.

Le Bibliaoʼ maʼ tu yaʼalik jach baʼax kʼiin ka tu kʼamaj Jéeoba u tojol u kuxtal Jesúsoʼ. Le oʼolal maʼ tu páajtal k-aʼalik jach baʼax kʼiin ka jéetsʼ yéetel ka káaj u meyaj le túumben pactooʼ. Chéen baʼax k-ojleʼ Jesúseʼ suunaj teʼ kaʼan diez días antes u káajal u fiestail le Pentecostésoʼ (Hech. 1:3). Ichil le diez díasaʼ Jesúseʼ tu kʼubaj u tojol u kuxtal yéetel Jéeobaeʼ tu kʼamaj (Heb. 9:12). Tu fiestail le Pentecostésoʼ jach chíikpaj tsʼoʼok u káajal u meyaj le túumben pactooʼ (Hech. 2:1-4, 32, 33).

Bey túunoʼ le kʼiin ka tu kʼamaj Jéeoba u tojol u kuxtal Jesúsoʼ letiʼe kʼiin xan ka jéetsʼ yéetel ka káaj u meyaj le túumben pactooʼ, tsʼoʼoleʼ tu táakbesaj le yéeyaʼanoʼob ichiloʼ. Le ka káaj u meyaj le túumben pactooʼ Jesús, le u maas nojchil le sacerdoteʼoboʼ, káaj xan u beetik u mediadoril le pactooʼ (Heb. 7:25; 8:1-3, 6; 9:13-15).