LE DISIPULOʼOB teʼ yáax siglooʼ tu tsʼáaj u yóol u kʼaʼaytoʼob «u maʼalob péektsilil le Reino» tiʼ u maas yaʼabil máakoʼob páajchajoʼ (Mat. 24:14). Yanoʼobeʼ binoʼob táanxel luʼumil kʼaʼaytaj. Jeʼex apóstol Pabloeʼ bin kʼaʼaytaj teʼ luʼumil tuʼux yaan Turquía bejlaʼoʼ, teʼeloʼ yaʼab u téenel kʼaʼaytajnaj le táan u beetik u misioneroiloʼ. * Tu jaʼabil 2014, óoliʼ dos mil años máanak Pablo teʼeloʼ, bin u jaats sukuʼunoʼob kʼaʼaytajiʼ. ¿Máaxoʼob yéetel baʼaxten binoʼobiʼ?

Tu luʼumil Turquíaeʼ yaan maas tiʼ dos mil 800 j-kʼaʼaytajoʼobiʼ, baʼaleʼ yaan kex 79 millones u kajnáaliloʼob. Lelaʼ ku yeʼesikeʼ chéen juntúul j-kʼaʼaytaj yaan tiʼ cada 28 mil máakoʼob. Jeʼex k-ilkoʼ le sukuʼunoʼoboʼ chéen tiʼ junpʼíit máakoʼob tsʼoʼok u kʼaʼaytajoʼob. Le oʼolal invitartaʼab le sukuʼunoʼob utiaʼal u kʼaʼaytajoʼob tiʼ u maas yaʼabil máak ichil junpʼíit kʼiinoʼoboʼ. Teʼ kʼiinoʼob jeʼeloʼ bin 550 sukuʼunoʼob tu luʼumil Turquía u yojel u tʼanoʼob u idioma le máakoʼoboʼ, le oʼolal páajchaj u múul kʼaʼaytajoʼob yéetel le sukuʼunoʼoboʼ. ¿Bix túun binik tiʼob?

Kʼaʼaytajnajoʼob tiʼ yaʼab máak. Le sukuʼunoʼob tu múuchʼulil Estambuloʼ, tu yaʼaloʼob: «Ka tu yilaj le máakoʼob jejeláas tuʼux u taal le sukuʼunoʼoboʼ tu kʼáatoʼob wa yaantoʼon junpʼéel asamblea especial». Le sukuʼunoʼob yanoʼob tu múuchʼulil Izmiroʼ, tu yaʼaloʼob xan: «Juntúul máak ku meyaj teʼ tuʼux ku jóokʼol le taxiʼoboʼ tu kʼáataj tiʼ juntúul anciano: ‹¿Baʼax ku yúuchul? ¿Baʼaxten maas yaʼab a jóokʼleʼex bejlaʼeʼ?›». Le máakoʼoboʼ jach tu tsʼáajoʼob cuenta yaʼab kʼaʼaytaj úuchi.

Le sukuʼunoʼob tiʼ uláakʼ luʼumiloʼoboʼ jach jatsʼuts úuchik u yilkoʼob le kʼaʼaytaj beetaʼaboʼ. Steffen, ku taal Dinamarcaeʼ, tu yaʼalaj: «Sáamsamaleʼ kin tsikbal yéetel máakoʼob mix juntéen u yuʼuboʼob u yúuchul tʼaan tiʼ Jéeoba. Tin wilaj jach tu jaajil táan in tsʼáaik kʼaj óoltbil u kʼaabaʼ Jéeoba». Jean-David, ku taal Franciaeʼ, tu yaʼalaj: «K-máansik yaʼab horaʼob táan k-kʼaʼaytaj chéen tiʼ junpʼéel calle. ¡Jach jatsʼutschaji! U maas yaʼabil le máakoʼoboʼ maʼ u kʼaj óoloʼob u j-jaajkunajoʼob Jéeobaiʼ. Óoliʼ tiʼ tuláakal le najoʼob k-uʼuyaʼaloʼ, k-eʼesik le videoʼoboʼ yéetel k-pʼatik junpʼéel publicación».

 Le 550 sukuʼunoʼoboʼ tu pʼatoʼob 60 mil publicacionoʼob chéen ich kaʼapʼéel semana. Jeʼex túun k-ilkoʼ tu kʼaʼaytoʼob le maʼalob péektsil tiʼ yaʼab máakoʼoboʼ.

Tu maas tsʼáaj u yóoloʼob teʼ kʼaʼaytajoʼ. Le sukuʼunoʼob binoʼob kʼaʼaytajoʼ tu líiʼsoʼob u yóol le sukuʼunoʼob yanoʼob teʼ luʼumiloʼ. Yaʼabeʼ tu beetaj u precursoriloʼob. Le oʼolal tu yáamil le 12 meses tsʼoʼokok le kʼaʼaytajoʼ anchaj uláakʼ 82 precursoroʼob.

Le sukuʼunoʼob binoʼob kʼaʼaytaj Turquíaoʼ ku yaʼalikoʼob baʼax utsiloʼob tu kʼamoʼob úuchik u táakpajloʼob teʼ kʼaʼaytajoʼ. Juntúul kiik ku taal Alemania ku kʼaabaʼtik Şirineʼ, tu yaʼalaj: «Le sukuʼunoʼob Turquíaoʼ jach maʼ talam u káajsik u kʼaʼaytajoʼob kex maʼ le jokʼaʼan u beetoʼobiʼ. Teneʼ jach talam in wilik, tumen suʼlaken. Baʼaleʼ jach tu yáanten le bix u kʼaʼaytaj le sukuʼunoʼoboʼ bey xan in orar tiʼ Jéeoba. ¡Tak teʼ metro páajchaj in kʼaʼaytaj yéetel in pʼatik tratadoʼoboʼ! Bejlaʼeʼ maʼ jach suʼlaken jeʼex kaʼacheʼ».

Johannes, ku taal Alemaniaeʼ, tu yaʼalaj: «Yaʼab baʼaxoʼob tin kanaj jeʼel u yáantken teʼ kʼaʼaytajoʼ. Le sukuʼunoʼob kajaʼanoʼob Turquíaoʼ jach ku yilik u kʼaʼaytajoʼob tiʼ le bukaʼaj máakoʼob ku páajtaleʼ yéetel ku beetkoʼob tiʼ tuláakal súutukil. Teen xaneʼ bey joʼopʼ in beetik ka suunajen Alemaniaoʼ. Le oʼolal bejlaʼeʼ kin kʼaʼaytaj tiʼ yaʼab máakoʼob».

Juntúul kiik kajaʼan Francia ku kʼaabaʼtik Zeynepeʼ, ku yaʼalik: «Úuchik in táakpajal teʼ kʼaʼaytajaʼ tu yáanten utiaʼal maʼ in sajaktal tʼaan tiʼ Jéeoba yéetel in maas kʼub in wóol tiʼ».

Le sukuʼunoʼoboʼ tu maas bisubaʼob. Le yaabilaj yéetel le bix úuchik u múuchʼ meyaj le sukuʼunoʼob ku taaloʼob tiʼ jejeláas luʼumiloʼoboʼ jach áantajnaji. Jean-David, tsʼoʼok k-yáax chʼaʼchiʼitikeʼ, tu yaʼalaj: «Jach maʼalob úuchik k-kʼaʼamal tumen le sukuʼunoʼoboʼ. Tu yiloʼonoʼob bey u amigoʼonoʼobeʼ yéetel bey u láakʼtsiloʼonoʼobeʼ. Tu kʼamoʼonoʼob tu yotochoʼob. Teneʼ in wojel u j-jaajkunajoʼob Jéeoba tiʼ tuláakal yóokʼol kaabeʼ maʼalob u biskubaʼob, tumen in xokmaj teʼ publicacionoʼoboʼ. Bejlaʼeʼ tsʼoʼok in wilik  jach jaaj. Tin wuʼuyaj jach kiʼimak in wóol ikil in meyajtik Jéeoba. Kin tsʼáaik u graciasil tiʼ tu yoʼolal».

Juntúul kiik ku taal Francia ku kʼaabaʼtik Claireeʼ, tu yaʼalaj: «Tuláakloʼon k-bisikba bey junpʼéel familiaeʼ, kex Alemania k-taal, Dinamarca, Francia wa Turquía. Bey ka luʼsaʼak tumen Dios tuláakal le fronteraʼoboʼ».

Stéphanie, ku taal Franciaeʼ, tu yaʼalaj: «Le kʼaʼaytaj beetaʼaboʼ tu yáanten in wileʼ, k-yaabilaj tiʼ Jéeoba péeksikoʼon múuchʼ meyaj, maʼ k-idiomaiʼ mix le tuʼux k-taaloʼ».

Yaʼab sukuʼunoʼobeʼ táan u tuklik u suutoʼob Turquía utiaʼal u seguer u yáantajoʼobiʼ. Yanoʼobeʼ tsʼoʼok u binoʼob kajtaliʼ, le oʼolal maas nojoch áantaj ken u tsʼáaʼobiʼ.

Tiʼ junpʼéel grupoeʼ chéen 25 j-kʼaʼaytajoʼob yaniʼ. Máan yaʼab jaʼaboʼob chéen juntúul anciano ku meyajiʼ. Baʼaleʼ tu jaʼabil 2015, seis sukuʼunoʼob ku taaloʼob Alemania yéetel Países Bajoseʼ binoʼob áantajiʼ. ¡Bukaʼaj wal kiʼimakchajik u yóol le sukuʼunoʼob yanoʼoboʼ!

¿Bix u yuʼubikuba le sukuʼunoʼob binoʼob áantaj Turquíaoʼ? Kex yaʼab baʼaxoʼob tsʼoʼok u aktáantkoʼobeʼ, yaʼab bendicionoʼob tsʼoʼok xan u kʼamkoʼob. Koʼox ilik baʼax ku yaʼalik jujuntúul tiʼ letiʼobiʼ.

Sukuʼun Federico, yaan kex 40 años tiʼ, tsʼokaʼan u beel yéetel tiʼ u taal Españaeʼ, tu yaʼalaj: «Tumen minaʼanten yaʼab baʼaloʼobeʼ, minaʼan baʼax beetik maʼ u béeychajal in beetik le baʼaxoʼob maas kʼaʼanaʼantakoʼ». Letiʼeʼ ku yaʼalik tiʼ u maasil ka xiʼikoʼob áantaj tuʼux kʼaʼabéet. Ku yaʼalik: «¡Jach maʼalob ka u beet máak! Ken xiʼik máak táanxel luʼumil utiaʼal u yáantik le máakoʼob u kʼaj óoltoʼob Jéeobaoʼ, u jaajileʼ táan u pʼatik u kuxtal tu kʼab Jéeoba. Letiʼeʼ jach yaan u yilik maʼ kun pʼatbil».

Rudy, yaan kex 60 años tiʼ, tsʼokaʼan u beel yéetel tiʼ u taal Países Bajoseʼ, tu yaʼalaj: «Jach kiʼimak k-óol ikil k-kʼaʼaytaj tiʼ yaʼab máak mix juntéen u yuʼub le  baʼax ku kaʼansik le Bibliaoʼ. Ku kiʼimaktal in wóol xan ken in wil u kʼamkoʼob le maʼalob péektsil yéetel kiʼimak óolaloʼ».

Sascha, juntúul sukuʼun tsʼokaʼan u beel, yaan óoliʼ 40 años tiʼ yéetel Alemania u taaleʼ, tu yaʼalaj: «Ken jóokʼken kʼaʼaytajeʼ kin tsikbal yéetel máakoʼob yáax u yuʼubikoʼob u tsikbaltaʼaltiʼob yoʼolal le Bibliaoʼ. Jach ku taasikten kiʼimak óolal in wáantkoʼob u kʼaj óoltoʼob Jéeoba».

Juntúul kiik tsʼokaʼan u beel ku taal Japón yaan kex 35 años tiʼ, ku kʼaabaʼtik Atsukoeʼ, tu yaʼalaj: «Kaʼacheʼ in kʼáat ka séeb taalak Armagedón. Chéen baʼaleʼ úuchik in bin áantaj Turquíaeʼ, kin tsʼáaik u graciasil tiʼ Jéeoba tumen maʼ u séeb taas le xuʼulsajiloʼ. Wa maas táan in wilik bix u nuʼuktik u kaajal Jéeobaeʼ, maas ku taaktal in natsʼkinba tiʼ letiʼ».

Alisa, juntúul kiik kajaʼan Rusia yaan junpʼíit maas tiʼ 30 años tiʼeʼ, tu yaʼalaj: «Úuchik in taal áantaj wayeʼ ku yáantken in wil jach tu jaajil uts Jéeoba (Sal. 34:8). Kin wilik Jéeoba maʼ chéen bey in Taataeʼ, baʼaxeʼ bey in amigoeʼ. Tumen ku páajtal in kʼaj óoltik yoʼolal baʼaxoʼob ku yúuchul ichil in kuxtal. Jach kiʼimak in wóol yoʼolal le baʼaxoʼob ku páajtal in beetkoʼ bey xan yoʼolal le utsiloʼob kin kʼamkoʼ».

Yoʼolal le kʼaʼaytaj beetaʼab Turquíaoʼ, tsʼoʼok u kʼuchul le maʼalob péektsil tiʼ yaʼab máakoʼoboʼ. Baʼaleʼ yaan uláakʼ tuʼuxoʼob maʼ kʼujsaʼakiʼ. Le sukuʼunoʼob bijaʼanoʼob áantaj Turquíaoʼ sáamsamal ku tsikbaloʼob yéetel máaxoʼob mix juntéen u yuʼuboʼob u yúuchul tʼaan tiʼ Jéeoba. ¿A kʼáat wa bin áantaj tiʼ junpʼéel kaaj beyaʼ? Wa a kʼáateʼ, kʼaʼajaktech baʼax ku yaʼalik Juan 4:35: «Líiʼs a wicheʼex ka a pakteʼex le kooloʼoboʼ, tsʼoʼok u pʼiistaloʼob utiaʼal jochbil». ¿Jeʼel wa u páajtal a bin áantaj jeʼel tuʼuxak yaan máakoʼob taak u kaanbaloʼobeʼ? Wa beyoʼ káajak a beetik baʼaxoʼob kʼaʼabéet utiaʼal u páajtal a bin. Maʼ u tuʼubultecheʼ, a maas táakpajal a kʼaʼayt le maʼalob péektsil «tak tu maas náachil le Luʼumaʼ» yaan u taasiktech yaʼab bendicionoʼob (Bax. 1:8).